ⴰⵙⴷⵓⵙ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⴳ ⵓⵎⴹⴰⴽⴰⵕ ⵏ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⴷ ⵜⵏⵙⵙⵉⵅⴼⵜ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ

ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⴽⵕⴰⵙ, ⴷ ⵎⴰⵙⵙⴰ ⵔⵓⴱⵉⵔⵜⴰ ⵎⵉⵜⵙⵓⵍⴰ ⴼ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⵊⴰⵔ ⵜⵉⵎⵔⵙⴰⵍ.

ⵉⵍⵍⴰ ⵓⵎⴹⴰⴽⴰⵕ ⴰⴷ ⴳ ⵓⵔⵣⴰⴼ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ  ⵉ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵖ ⵉⵅⴼ ⵏ ⵓⴽⴰⴱⴰⵕ ⵏ ⵓⵙⵇⵇⵉⵎ ⵏ ⵉⵎⵓⵔⴰ.

ⵜⵙⵓⵜⴳ ⵎⴰⵙⵙⴰ ⵎⵉⵜⵙⵓⵍⴰ ⴰⵏⵎⵓⵇⵇⴰⵔ ⴰⴷ ⵍⵍⵉ ⵖ ⵉⵍⵍⴰ ⵓⵎⴹⴰⴽⴰⵕ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⵊⴰⵔ ⵙⵏⴰⵜ ⵜⵎⵔⵙⴰⵍ ⴷ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⴼ ⵓⵎⵢⴰⵡⴰⵙ ⴷ ⵍⵎⵖⵔⵉⴱ ⵉⴳⴰⵏ ⴰⵎⴷⵔⴰⵡ ⴰⵙⵜⵔⴰⵜⵉⵊⵉ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ.

ⵜⵉⵏⵉ ⵎⴰⵙ ⵔⴰⴷ ⵜⵙⵡⵓⵔⵉ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴷ ⵊⴰⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ.

ⵜⵉⵏⵉ ⵎⴰⵙⵙ ⵎⵉⵜⵙⵓⵍⴰ ⵎⴰⵙ ⵍⵍⴰⵏ ⵉⵎⴹⴰⴽⴰⵕⵏ ⴰⴷ ⴼ ⵜⵏⴼⵔⵓⵜ ⴷ ⵓⵣⵡⴰⴳ ⴷ ⵓⵔⴳⴳⵉⴳ ⵖⵎⴽ ⴰⵏⵏ ⴷ ⵜⵎⵣⵡⵓⵔⴰ ⵏ ⵜⵙⴳⴰ ⵓⵕⵓⵜⴰⵏⴰⵎⵎⴰⵙⵜ, ⵜⵙⴷⴷⵉⴷ ⵎⴰⵙ ⵜⵍⵍⴰ ⵜⵙⵎⵓⵏⵉ ⴰⴷ ⴷⴼⴼⵉⵔ ⵏ ⵙⵉⵏ ⵉⵙⴳⴳⵯⴰⵙⵏ ⵏ ⵜⵉⴳⴳⵉⴳⵜ ⵍⵍⵉ ⴷ ⵢⵉⵡⵉ ⵓⴱⴰⵢⵢⵓⵕ ⵏ ⴽⵓⵕⵓⵏⴰ.

ⴳ ⵓⵎⵏⵉⴷ ⵏⵏⵙ, ⵉⵏⵏⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⵍⵍⴰ ⵓⵎⴹⴰⴽⴰⵕ ⴰⴷ ⴼ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴷ ⵓⵙⵓⵔⵙ ⵏ ⵓⴳⴰⴷⴰⵣ ⴰⴳⵔⴰⵖⵍⴰⵏ ⴷ ⵓⵍⵓⵢ ⵏ ⵡⴰⵜⵉⴳⵏ ⴷⴼⴼⵉⵔ ⵏ ⵜⵎⴰⵖⵜ ⵊⴰⵔ ⵔⵓⵙⵢⴰ ⴷ ⵓⴽⵕⴰⵏⵢⴰ.

ⵢⵉⵏⵉ ⵓⵍⴰ ⵎⴰⵙ ⵉⵍⵍⴰ ⴼ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⴰⵎⵓⵏⵜ ⵉ ⵓⵏⴰⵎⵎⴰⵙ ⵍⵍⵉ ⵉⵙⵙⵉⵅⴼ ⵍⵎⵖⵔⵉⴱ, ⵉⵙⴷⵉⴷ ⴼ ⵓⵛⵉⵍ ⵏ ⵓⵙⵎⴰⵢⵏⵓ ⵏⵏⵙ ⵃⵎⴰ ⴰⴷ ⵜⵙⴽⵔ ⵜⴰⵡⵡⵓⵔⵉ ⵏⵏⵙ.

ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵓⵍⴰ ⵜⵉⵍⴰⵍⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⵓⵎⵏⵉⴷ ⵏ ⵜⵎⵙⴰⵔⵉⵏ ⵏ ⵜⵏⴼⵔⵓⵜ ⴷ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵓⵙⴱⴷⴷⵉ ⵏ ⵉⵙⴷⵓⴷⴷⵓⵢⵏ  ⴷ ⵓⵙⵏⵓⴱⴳ ⵏ ⵓⵎⵙⴰⵡⴰⵍ ⴰⵍⵉⴱⵉ ⵙ ⵜⵖⴰⵔⴰⵙⵜ ⵜⴰⴷⵉⵎⵓⵇⵔⴰⵟⵉⵜ ⴷ ⵜⵉⴹⴰⴼ ⵏ ⵉⵡⵜⵜⴰ ⴷ ⵓⵙⵏⴼⵍ ⵏ ⵜⵎⵓⵛⴰ ⴰⴽⴷ ⵉⵎⴷⵔⴰⵡⵏ ⵏ ⵓⵕⵓⴱⴱⴰ, ⵢⵉⵏⵉ ⵎⴰⵙ ⴷ ⵉⵇⵇⴰⵏ ⵓⵍⵓⵢ ⵏ ⵜⵏⴰⵥⴰⵕⵉⵏ ⵙ ⵜⵉⵍⵉⵜ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉⴷⵓⵙⵏ ⵙ ⵓⴷⵔⴰⵡ ⴰⴽⴷ ⵜⴰⵙⴳⴰ ⵏ ⵓⵕⵓⴱⴱⴰ.

ⵢⵉⵏⵉ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⵜⵙⴰⵡⵍ ⵎⴰⵙⵙⴰ ⵎⵉⵜⵙⵓⵍⴰ ⴼ ⵜⵉⵔⴰⵜ ⵏⵏⵙ ⵉ ⵜⵡⵡⵓⵔⵉ ⴰⴽⴷ ⵍⵎⵖⵔⵉⴱ ⵃⵎⴰ ⴰⴷ ⵜⵉⵍⵉ ⵜⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⴷⴰⵔ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴰⵎⵓⵏⵜ ⵉ ⵓⵏⴰⵎⵎⴰⵙ ⴷ ⵓⵙⴷⵓⵙ ⵏ ⵜⵉⵍⴰⵍ ⵏⵏⵙ.

ⵉⵍⵍⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵔⵣⴰⴼ ⴰⵎⴰⴷⴷⵓⴷ ⵉ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵉ ⵙⵉⵏ ⵡⵓⵙⵙⴰⵏ, ⴳ ⵓⴽⴰⴱⴰⵕ ⴳ ⵉⵍⵍⴰ ⵎⴰⵙⵙ ⵍⴰⵃⵙⵏ ⵃⴷⴷⴰⴷ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵉⵛⵛⴰⵔⵏ ⵊⴰⵔ ⵍⵎⵖⵔⵉⴱ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ, ⴷ ⵎⴰⵙⵙ ⵏⵊⵉⴱ ⵍⵅⴰⴷⴷⵉ ⴰⵎⴰⵔⴰ ⴰⵎⴰⵜⴰⵢ ⵏ ⵓⵙⵇⵇⵉⵎ.