ⴰⵙⵏⴳⵉⴷⴷⵉ ⵏ ⵜⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵉⵛⵛⴰⵔⵏ ⵊⴰⵔ ⵍⵎⵖⵔⵉⴱ ⴷ ⵓⵕⵓⴱⴱⴰ

ⵉⵙⵙⵉⵅⴼ ⵎ.ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵎ.ⵏⵏⵄⵎⴰ ⵎⵉⵢⴰⵕⴰ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴰⴽⵕⴰⵙ 8 ⴷⵓⵊⴰⵏⴱⵉⵔ 2021, ⴳ ⵓⵙⵖⵉⵎ ⵏ ⵓⴱⵕⵍⴰⵎⴰⵏ, ⵜⴰⵙⵎⵓⵏⵉ ⵏ ⵓⵙⵏⴳⵉⴷⴷⵉ ⵏ ⵜⵙⵇⵇⵉⵎⵜ ⵜⴰⴱⵕⵍⴰⵎⵏⵉⵜ ⵉⵛⵛⴰⵔⵏ ⵊⴰⵔ ⵍⵎⵖⵔⵉⴱ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ ⵙⴳ ⵜⴰⵙⴳⴰ ⵜⴰⵎⵖⵔⵉⴱⵉⵜ. ⵙ ⵜⵉⵍⵉⵜ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵙⴳ ⵙⵉⵏ ⵉⵙⵇⵇⵉⵎⵏ.

ⴳ ⵜⵙⵎⵓⵏⵉ ⴰⴷ, ⵜⵜⵓⴼⴽⴰ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵉ ⵓⵎⵛⴰⵡⴰⵕ ⵍⵃⵙⵏ ⵃⴷⴷⴰⴷ, ⵙⴳ ⵜⴰⵔⴰⴱⴱⵓⵜ ⵜⴰⵙⵉⵎⴰⵏⵜ ⵉ ⵜⵎⵓⵏⵉ ⴷ ⵢⵉⵙⴽⵉⵍ, ⴰⵎⴰⵔⵉ ⵏⵏⵙ ⴰⴱⵕⵍⴰⵎⴰⵏⵉ ⵎⵓⵃⴰⵎⵎⴰⴷ ⵎⵓⴱⴷⵉⵄ ⵙⴳ ⵜⴰⵔⴰⴱⴱⵓⵜ ⵜⴰⵃⴰⵔⴰⴽⵉⵜ.

ⵉⵍⵍⴰ ⵓⵎⴹⴰⴽⴰⵕ ⴼ ⵜⵎⵙⴽⴰⵔ ⵏ ⵜⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵉⵛⵛⴰⵔⵏ ⵊⴰⵔ ⵜⴰⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ ⴷ ⵜⵏⴰⵥⴰⵕⵉⵏ ⴷ ⵉⵙⴰⵡⵓⵔⵏ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵙⵔⵜⴰⵏ ⴷ ⵓⴱⵕⵍⴰⵎⴰⵏⵉ ⵊⴰⵔ ⵍⵎⵖⵔⵉⴱ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ.

ⵙⴰⵡⵍⵏ ⵉⵏⵙⵙⵉⵅⴼⵏ ⵏ ⵓⴱⵕⵍⴰⵎⴰⵏ ⴼ ⵉⵎⵉⵥ ⵉⵜⵜⵓⵙⵏⴼⴰⵍⵏ ⴳ ⵜⵎⴷⵔⴰⵡⵜ ⵊⴰⵔ ⵍⵎⵖⵔⵉⴱ ⴷ ⵓⵕⵓⴱⴱⴰ, ⵉⴳⴰ ⵏ ⵜⴰⵎⵢⴰⵏⴰⵡⵜ ⴷ ⵜⵢⴰⴼⵓⵜ ⵏ ⵜⵡⵡⵓⵔⵉ ⵏ ⵡⴰⵣⴳⵏ ⵏ ⵜⴰⵙⵓⵜ, ⴷ ⵓⵛⵛⵉⵍ ⵏ ⵓⴼⵔⴰⴳ ⵏⵏⵙ ⴳ ⵉⴳⵔⴰⵏ ⵉⵙⵔⵜⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⴷ ⵡⵉⵏ ⵜⵏⴼⵔⵓⵜ.

ⵙⴷⴷⵉⴷⵏ ⵓⵍⴰ ⴼ ⵡⴰⵜⵉⴳ ⵏ ⵓⵎⵙⴰⵡⴰⵍ ⵊⴰⵔ ⵜⴰⵎⴰⴷⵔⴰⵡⵜ ⴰⴷ ⵃⵎⴰ ⴰⴷ ⵉⵍⵉⵏⵜ ⵜⵎⵔⴰⵔⵓⵜⵉⵏ ⴼ ⵉⵙⵏⵜⴰⵍ ⵛⵛⴰⵔⵏⵉⵏ ⴰⵎ ⵜⵓⴹⴹⵊⵓⵕ, ⵜⴰⵏⴼⵔⵓⵜ, ⴰⵙⴱⴷⴷⵉ ⵏ ⵓⴱⵔⵙⵙⵉⵡⴷ, ⴰⵣⵡⴰⴳ, ⵜⵉⴳⵎⵉ ⵜⴰⵙⵓⵍⴰⵏⵜ, ⴰⵎⵢⴰⵡⴰⵙ ⴰⵙⵔⵜⴰⵏ ⴷ ⵓⵙⵖⵏⵣⵉ ⴷ ⵡⴰⵡⵏⴰⴹ.

ⵉⵏⵉⵏ ⵓⵍⴰ ⵎⴰⵙ ⵉⵇⵇⴰⵏ ⵓⵎⵢⴰⵡⴰⵙ ⴳ ⵜⵎⵙⵓⵜⵍⵉⵏ ⴰⴷ ⴳ ⵉⵍⵍⴰ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⴷ ⵜⵎⵣⵡⴰⵔ ⵏⵏⵙ ⴳ ⵜⴷⵎⵙⴰ ⴷ ⵡⴰⵎⵓⵏ ⴷ ⵡⴰⵡⵏⴰⴹ ⴷ ⵜⴷⵓⵙⵉ, ⴷ ⵓⵙⴽⵔ ⵏ ⵉⵙⴰⵢⵔⵓⵔⵏ ⵏ ⵓⵎⵛⴰⵡⴰⵕ ⵊⴰⵔ ⵍⵎⵖⵔⵉⴱ ⴷ ⵓⵕⵓⴱⴱⴰ ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵜⵉⵔⵎⵉⵜⵉⵏ ⵥⵉⵍⵏⵉⵏ.

ⵉⵙⴷⴷⵉⴷ ⵎ.ⵍⵃⵙⵏ ⵃⴷⴷⴰⴷ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ, ⴼ ⵓⵛⵛⵉⵍ ⵏ ⵓⵙⴽⵔ ⵏ ⵜⵎⵢⴰⴷⴰⵙⵜ ⵜⴰⵎⴰⵢⵏⵓⵜ ⵉⵎⵙⴰⵙⴰⵏ ⴷ ⵜⵓⵎⴰⵢⵜ ⵜⴰⵎⴰⵢⵏⵓⵜ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ, ⵢⵉⵏⵉ ⵎⴰⵙ ⴷ ⵉⵇⵇⴰⵏ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵓⵕⵓⴱⴱⴰ ⵃⵎⴰ ⴰⴷ ⵜⵉⵍⵉ ⵜⵎⴷⵔⴰⵡⵜ ⵜⴰⵎⴰⵢⵏⵓⵜ ⵜⴰⴳⵜⵉⵔⴰⵏⵜ ⴷ ⵓⵎⵙⴰⵡⴰⵍ ⴰⵙⵔⵜⴰⵏ ⵉⵣⴷⵉⵏ ⴷ ⵜⵎⴰⵢⵏⵓⵜⵉⵏ ⵏ ⵓⵙⴰⵢⵔⵓⵔ ⵓⵕⵓ ⴰⵏⴰⵎⵎⴰⵙ ⴷ ⵉⴼⵔⵉⵇⵉ ⴷ ⵓⵚⴽⵓ ⵏ ⵜⵎⴷⵔⴰⵡⵜ ⴷ ⵜⵓⴹⴹⵊⵓⵕⴰ ⵉⵥⵉⵍⵏ ⵊⴰⵔ ⵓⵕⵓⴱⴱⴰ ⴷ ⵡⴰⴹⵊⴰⵕⵏ ⵏⵏⵙ ⴳ ⵉⴼⴼⵓⵙ ⵏ ⵓⵏⴰⵎⵎⴰⵙ ⵙ ⵓⵡⵇⵇⵔ ⵏ ⵜⵏⵓⴼⴰ ⵏⵏⵙⵏ ⵜⵉⵙⵜⵔⴰⵜⵉⵊⵉⵢⵉⵏ, ⵎⴽ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴳ ⵉⵏⴰⵡ ⵏ ⵓⴽⵜⵜⴰⵢ ⵡⵉⵙ ⵙⵉⵏ ⵡⴰⴳⵏⴰⵔⵏ ⴷ ⵚⴹⵉⵚ ⵏ ⵜⵡⴰⴷⴰ ⵜⴰⵣⴳⵣⴰⵡⵜ.

ⵢⵉⵏⵉ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵎⴰⵙ ⵔⴰⴷ ⵜⵉⵍⵉ ⵜⴷⵉⵏⴰⵎⵉⵜ ⵉⴷⵓⵙⵏ ⵉ ⵓⵙⵎⴰⴷ ⵏ ⵜⴰⵏⵏⴰⵢⵢⵉⵏ ⵊⴰⵔ ⵙⵏⴰⵜ ⵜⵙⴳⴳⵉⵡⵉⵏ ⴼ ⵜⵎⵙⴰⵔ ⵜⵉⵙⵔⵜⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴷ ⵜⵓⵡⵏⴰⴹⵉⵏ, ⵔⴰⴷ ⵉⴼⴽ ⵓⵙⵏⴳⵉⴷⴷⵉ ⵏ ⵜⵙⵇⵇⵉⵎⵜ ⵉⵛⵛⴰⵔⵏ ⵊⴰⵔ ⵍⵎⵖⵔⵉⴱ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ ⵜⴰⵖⵍⴰⵖⴰⵍⵜ ⵜⴰⵎⴰⵢⵏⵓⵜ ⵉ ⵜⵣⴷⴰⵢⵜ ⵊⴰⵔ ⵍⵎⵖⵔⵉⴱ ⴷ ⵓⵕⵓⴱⴱⴰ.