ⴰⵙⵉⵔⴰ(2016-2021):
ⵉⴷⵔⵓ ⵎⴰⵙⵙ ⵎⵓⵃⴰⵎⵎⴰⴷ ⵜⵜⵡⵉⵎⵉ ⴱⵏ ⵊⵍⵍⵓⵏ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵜⴼⵓⴳⵍⴰ ⵏ ⵓⵕⵥⵥⵓⵎ ⵏ ⵜⵙⵓⵜⵍⵜ ⵜⴰⵏⵎⵢⴰⵔⵜ ⵜⵉⵙ ⵙⵏⴰⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵏⵏⵉⵊⵉⵔ
ⵢⵉⵡⵙ ⵎⴰⵙⵙ ⵎⵓⵃⴰⵎⵎⴰⴷ ⵜⵜⵡⵉⵎⵉ ⴱⵏ ⵊⵍⵍⵓⵏ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵕⵥⵥⵓⵎ ⵏ ⵜⵙⵓⵜⵍⵜ ⵜⴰⵏⵎⵢⴰⵔⵜ ⵜⵉⵙ ⵙⵏⴰⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵏⵏⵉⵊⵉⵔ ⴳ ⵜⵎⴰⵥⵓⵏⵜ ⵏⵢⴰⵎⵉ ⴰⴽⵡⴰⵙ 27 ⵛⵓⵜⴰⵏⴱⵉⵔ.
ⴳ ⵜⴳⵓⵔⵉ ⵏⵏⵙ, ⵉⵙⵙⵔⵖⴷ ⵎⴰⵙⵙ ⵜⵜⵡⵉⵎⵉ ⴱⵏ ⵊⵍⵍⵓⵏ ⵉ ⵎⴰⵙⵙ SEINI OUMAROU ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵏⵏⵉⵊⵉⵔ ⴷ ⴽⵓ ⵉⵎⵓⵔⴰ ⴼ ⵜⵎⵢⵉⵎⴰⵏⵜ ⴰⵙ ⵉⴼⴽⴰ ⵓⵎⴰⴷⴰⵏ ⵏ ⵏⵏⵉⵊⵉⵔ ⴷ ⵓⵚⴽⵓ ⴰⴷⵉⵎⵓⵇⵔⴰⵟⵉ ⴰⴼⵔⵉⵇⵉ ⵉⴳⴰⵏ ⵜⴰⵔⵙⵍⵜ ⵉ ⵜⴰⵙⵓⵜⵉⵏ ⵏ ⵉⵎⴰⵍ.
ⵉⵏⵏⴰ ⵎⴰⵙⵙ ⴰⵎⴰⵔⵉ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵜⴹⴼⵕ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵜⴰⵣⵣⵉⴳⵣⵜ ⵏ ⵜⴷⵉⵎⵓⵇⵔⴰⵟⵉⵜ ⵖ ⵏⵏⵉⵊⵉⵔ ⵉⵍⵍⴰⵏ ⵙⴳ 1991 ⵙ ⵓⵙⵏⵎⴰⵍⴰ ⵏ ⵓⴳⵔⴰⵡ ⴰⵏⴰⵎⵓⵔ ⵍⵍⵉ ⵢⵉⵡⵙⵏ ⴳ ⵓⵙⵎⵓⵜⵜⵉ ⴰⴷⵉⵎⵓⵇⵔⴰⵟⵉ ⵉⵥⵉⵍⵏ ⵢⴰⵡⵉ ⴷ ⵜⴰⵎⵏⵏⴰⵡⵜ ⵜⴰⵙⵔⵜⴰⵏⵜ, ⵢⴰⵡⵉ ⴷ ⵉⵙⵜⴰⵢⵏ ⵉⵍⴻⵍⵍⵉⵢⵏ ⴼⴰⵡⵏⵉⵏ, ⴷ ⵓⵙⴽⵔ ⵏ ⵉⵣⵔⴼⴰⵏ ⴷ ⵜⴷⵔⴼⵉⵢⵉⵏ ⵜⵉⴷⵙⵜⴰⵔⵉⵏ ⴷ ⵜⵉⵍⵉⵜ ⵏ ⵡⴰⵎⵓⵏ ⴰⵖⵔⵎⴰⵏ ⵉⴷⵓⵙⵏ ⵉⴳⴰⵏ ⴰⵎⵏⵏⴰⵡ ⴷ ⵓⵙⵍⴻⵍⵍⵉ ⵏ ⵓⵙⵎⴰⵍ.
ⵉⵙⵓⵜⴳ ⵎⴰⵙⵙ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⴽⵔ ⵏ ⵉⵙⵜⴰⵢⵏ ⵉⵣⵣⵔⴰⴼⵏ ⴳ ⵏⵏⵉⵊⵉⵔ ⴳ 2020, ⵢⵉⵏⵉ ⵎⴰⵙ ⵜⵎⵍⴰ ⵏⵏⵉⵊⵉⵔ ⵜⵉⵣⵉⴹⵕⴰ ⵏⵏⵙ ⴳ ⵓⵙⵏⵎⴰⵍⴰ ⵏ ⵉⵙⵜⴰⵢⵏ ⴼⴰⵡⵏⵉⵏ, ⵢⵉⵏⵉ ⵎⴰⵙ ⵜⴳⴰ ⴰⵏⴰⵡ ⴳ ⵓⵙⵡⵉⵔ ⴰⵏⵎⵏⴰⴹ ⴷ ⵓⵎⵏⵥⴰⵡ.
ⵢⵉⵏⵉ ⵓⵍⴰ ⵎⴰⵙ ⴷⵓⵙⵏⵜ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵏⵏⵉⵊⵉⵔ ⵙⴳ ⵜⴰⵙⵓⵜ ⵜⵉⵙ 11 ⴷ 12, ⵢⵉⵍⵉ ⵓⵣⵎⵎⴻⵎ ⵏ ⵜⵎⵢⴰⵇⵇⴰⵏⵜ ⵏ ⵜⴷⴷⵓⴽⵍⴰ ⴷ ⵓⵎⵢⴰⵡⴰⵙ ⵊⴰⵔ ⵏⵏⵙⵏ ⴳ 1967 ⴳ ⵕⵕⴱⴰⵟ, ⵢⵉⵏⵉ ⵎⴰⵙ ⵙⵙⵕⵚⴰⵏ ⵉⵅⴰⵜⴰⵔⵏ ⴷ ⵉⵎⴰⴷⴰⵏⵏ ⵏ ⵙⵏⴰⵜ ⵜⵎⵉⵣⴰⵔ ⵜⵉⵣⴷⴰⵢⵉⵏ ⵏⵏⵙⵏ ⴼ ⵓⵙⵓⵜⴳ ⴷ ⵜⵡⵉⵣⵉ ⴷ ⵓⵎⵣⵔⵓⵢ ⴷ ⵡⴰⵜⵉⴳⵏ ⵛⵛⴰⵔⵏⵉⵏ.
ⴳ ⵓⵎⵏⴰⴹ ⴰⴷ, ⵉⵙⴷⴷⵉⴷ ⵎⴰⵙⵙ ⴱⵏ ⵊⵍⵍⵓⵏ ⵎⴰⵙ ⵟⵟⴰⴼ ⵏⵏⵉⵊⵉⵔ ⴰⵙⵡⵉⵔ ⵉⴼⴰⵡⵏ ⴳ ⵜⵙⵔⵜⵉⵜ ⵜⴰⴼⵔⵉⵇⵉⵜ ⵏ ⵍⵎⵖⵔⵉⴱ, ⵙ ⵜⵎⴰⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⵉⵍⵍⴰⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵍⵍⵉ ⵉⵍⵍⴰⵏ ⴼ ⵜⴷⵎⵙⴰ ⴷ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵡⴰⵎⵓⵏ. ⵉⵙⴷⴷⵉⴷ ⵎⴰⵙ ⴷⵔⴰⵏⵜ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵢⵉⵏⵉ ⵎⴰⵙ ⵉⵥⵍⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⵏⵏⵉⵊⵉⵔ ⵙ ⵓⵔⵣⴰⴼ ⴰⵎⴰⴷⴷⵓⴷ ⴳ 2004 ⴳ ⵉⵔⵣⴰⴼⵏ ⵏⵏⵙ ⵉ ⵜⵎⵉⵣⴰⵔ ⵏ ⵉⴼⵔⵉⵇⵢⴰ, ⴰⵢⵍⵍⵉ ⵉⴼⴽⴰⵏ ⵉ ⵜⵣⴷⴰⵢⵉⵏ ⴰⴷ ⵢⴰⵜ ⵜⴷⵉⵏⴰⵎⵉⵜ ⵜⴰⵎⵣⵡⴰⵔⵓⵜ.
ⵉⵙⴷⴷⵉⴷ ⵎⴰⵙⵙ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵔⴰⴷ ⵓⵔ ⵉⵜⵜⵓ ⵓⵎⴰⴷⴰⵏ ⴰⵎⵖⵔⵉⴱⵉ ⴰⴷⴷⴰⴷⵏ ⵏ ⵜⴳⴷⵓⴷⴰⵏⵜ ⵏ ⵏⵏⵉⵊⵉⵔ ⴳ ⵓⵙⵏⴰⵍ ⵏ ⵜⵎⵙⴰⵔⵜ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⵙⵏⴰⵍ ⵏ ⵜⵉⵍⵉⵜ ⵏ ⵍⵎⵖⵔⵉⴱ ⴳ ⵜⵔⴰⴱⴱⵓⵜ ⵜⴰⴷⵎⵙⴰⵏⵜ ⵏ ⵉⵡⴰⵏⴽⵏ ⵏ ⴳⵔⵡ ⵏ ⵉⴼⵔⵉⵇⵢⴰ.
ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵙⵓⵜⴳ ⵎⴰⵙⵙ ⴱⵏ ⵊⵍⵍⵓⵏ ⵜⴰⵎⴰⴷⵔⴰⵡⵜ ⵉⵥⵉⵍⵏ ⵊⴰⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ, ⵉⵙⵙⴽⵜⵉ ⴷ ⴰⵣⵎⵎⴻⵎ ⵏ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⵊⴰⵔ ⵙⵉⵏ ⵉⵙⵇⵇⵉⵎⵏ ⴳ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏⵏⵙⵏ ⴳ ⴽⵓ ⵉⴳⵔⴰⵏ, ⴷ ⵓⵙⴷⵓⵙ ⵏ ⵓⵙⵏⴼⵍ ⵏ ⵜⵉⵔⵎⵉⵜⵉⵏ, ⴷ ⵜⵡⵉⵙⵉ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵙⵎⴰⵢⵏⵓ ⵏ ⵜⵡⵓⵔⵉ ⵏ ⵜⵎⵙⵎⵓⵏⵜ ⵜⴰⵏⵎⵓⵔⵜ ⴳ ⵏⵏⵉⵊⵉⵔ, ⴷ ⵓⵣⴷⴷⵓⵢ ⵉⵛⵛⴰⵔⵏ ⴳ ⵉⵏⵎⵓⵇⴰⵔⵏ ⵉⵏⵎⵏⴰⴹⵏ ⴷ ⵉⴳⵔⴰⵖⵍⴰⵏⵏ.