ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ - ⴰⵙⵉⵡⴹ ⵉⵛⵛⴰⵔⵏ
ⵉⵎⴹⴰⴽⴰⵕ ⵎ.ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 12 ⵢⵓⵍⵢⵓⵣ 2021 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ ⴷ ⵎ.ⵔⵉⴽ ⴷⴰⵢⵎⵙ, ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵔⵓⴱⴱⴰ, ⴼ ⵜⵢⴰⴼⵓⵜ ⴷ ⵉⵎⵏⴰⴷⵏ ⵏ ⵓⵎⵢⴰⵡⴰⵙ ⵉⵥⵉⵍⵏ ⵊⴰⵔ ⵜⵎⵔⵙⴰⵍ ⴳ ⵓⵙⴰⵜⵉ ⵏ ⵓⵙⵓⵔⵙ ⵏ ⵓⵎⴷⵔⵓ ⵉ ⵜⴷⵉⵎⵓⴽⵔⴰⵟⵉⵜ ⵉⵟⵟⴰⴼ ⵍⵎⵖⵔⵉⴱ ⴷⴰⵔ ⵜⵎⵙⵎⵓⵏⵜ ⴰⴷ ⵙⴳ 2011.
ⵍⵍⵉⵖ ⵉⵙⵓⵜⴳ ⵜⵓⴳⴳⴰⵙ ⵏ ⵉⴳⵎⴰⵎⵏ ⵏ ⵜⴰⵢⵢⴰⵡⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ ⴷⴰⵔ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵍⵍⵉ ⵉⴳⴰⵏ ⴰⴽⴰⴱⴰⵕ ⵉⵙⴽⵔⵏ ⴽⵉⴳⴰⵏ ⵏ ⵜⵉⵍⴰⵍ, ⵉⵏⵏⴰ ⵎ.ⵔⵉⴽ ⴷⴰⵢⵎⵙ ⵎⴰⵙ ⴷ ⵉⵎⵓⴽⵏⵏ ⵍⵍⵉ ⵉⵙⴽⵔ ⵍⵎⵖⵔⵉⴱ ⵙ ⵓⵙⵏⴰⵍ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵙⴳ ⵓⵙⵖⵣⵏ ⵏ ⵓⴷⵓⵙⵜⵓⵔ ⵏ 2011 ⴰⵔ ⴳⵉⵙ ⵉⵙⴽⴰⵔ ⴰⵏⴰⵡ ⴳ ⵉⴼⵔⵉⵇⵢⴰ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⵉⵙⴰⵡⴰⵍ ⵎ.ⵔⵉⴽ ⴷⴰⵢⵎⵙ ⵓⵍⴰ ⴼ ⵡⴰⵜⵉⴳ ⵏ ⵉⵙⵍⴳⵏⵏ ⵍⵍⴰⵏⵉⵏ ⴼ ⵜⵡⵡⵓⵔⵉ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⴳⴰⵏⵉⵏ ⵓⴳⴳⴰⵔ ⵏ 200 ⵏ ⵜⵎⵢⴰⵇⵇⴰⵏⵜ, ⵉⴱⴷⵔ ⵜⵉⵏ ⵍⴰⵏⵣⴰⵔⵓⵜ ⴼ ⵓⴼⵔⴰⴳ ⵏ ⵜⴰⵣⵣⴰⵏⵉⵏ ⵎⴳⴰⵍ ⵏ ⵜⵔⴰⵄⵉⵜ, ⴷ ⵜⵎⵢⴰⵇⵇⴰⵏⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵉ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵜ ⴷ ⵜⴽⵕⴹⵉ ⵏ ⵜⴳⵎⵎⵉ (ⵜⴰⵎⵢⴰⵇⵇⴰⵏⵜ ⵏ ⵉⵚⵟⴰⵏⴱⵓⵍ).
ⵢⵓⵎⵥ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴰⵖⵓⵔⵉ ⴰⵎⴰⴷⴷⵓⴷ ⵉ ⵉⵥⵉⵕ ⵏ ⵉⵙⵜⴰⵢⵏ ⵉⵣⵣⵔⴰⴼⵏ ⵏ 8 ⵛⵓⵜⴰⵏⴱⵉⵔ 2021.
ⴳ ⵜⵙⴳⴰ ⵏⵏⵙ, ⵉⵏⵏⴰ ⵎ.ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵎⴰⵙ ⵉⵎⵏⴰⵇⵇⴰⵔ ⵓⵔⵣⴰⴼ ⵏ ⵎ.ⵔⵉⴽ ⴷⴰⵢⵎⵙ ⵉ ⵍⵎⵖⵔⵉⴱ ⴷ ⵓⴽⵯⵜⵜⴰⵢ ⵡⵉⵙ ⵎⵔⴰⵡ ⵏ ⵓⵙⵓⵔⵙ “ⴰⵎⴷⵔⵓ ⵉ ⵜⴷⵉⵎⵓⵇⵔⴰⵟⵉⵜ” ⵍⵍⵉ ⵉⵟⵟⴰⴼ ⵍⵎⵖⵔⵉⴱ ⴷⴰⵔ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ. ⵉⵙⴷⴷⵉⴷ ⵎⴰⵙ ⴷ ⴰⵍⵜⴰⵖ ⵏ ⵍⵎⵖⵔⵉⴱ ⴳ ⵓⴱⵔⵉⴷ ⵏ ⵓⵙⴷⵓⵙ ⵏ ⵉⵙⵜⴰⵢⵏ ⵉⴷⵉⵎⵓⵇⵔⴰⵟⵉⵢⵏ ⴷ ⵜⵣⵣⵉⴳⵣⵜ ⵏⵏⵙ ⴳ ⵢⵉⴳⵔ ⵏ ⵓⵡⴰⵏⴽ ⵏ ⵓⵙⵍⴳⵏ ⵖⵎⴽ ⴰⵏⵏ ⴷ ⵓⵙⵓⵔⵙ ⵏ ⵓⵎⴷⵔⵓ ⵉ ⵜⴷⵉⵎⵓⵇⵔⴰⵟⵉⵜ ⵜⴰⴷⵖⵔⴰⵏⵜ ⵍⵍⵉ ⴰⵙ ⵉⵜⵜⵓⴼⴽⴰⵏ ⵙⴳ ⵓⴳⵔⴰⵡ ⵏ ⵜⵏⴱⴰⴹⵉⵏ ⵜⵉⴷⵖⵔⴰⵏⵉⵏ ⴷ ⵜⵏⵎⵏⴰⴹⵉⵏ ⴳ ⵉⴱⵔⵉⵔ 2019, ⴰⵔ ⴰⵙ ⵢⴰⴽⴽⴰ ⵉⵎⵏⴰⴷⵏ ⵏ ⵓⵙⵎⵖⵔ ⵏ ⵜⵣⴷⴰⵢⵉⵏ ⴰⴽⴷ ⵜⴰⵎⵙⵎⵏⵓⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵙ ⵉⵙⵡⵉⵔⵏ ⴰⵜⵜⵓⵢⵏⵉⵏ.