ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴼⵉⵜⵏⴰⵎ ⴰⴱⵔⵉⴷ ⵏ ⵜⵎⵢⴰⵡⴰⵙⵜ ⵊⴰⵔ ⵙⵏⴰⵜ ⵜⵎⵉⵣⴰⵔ

ⵉⵎⴹⴰⴽⴰⵕ ⵎ.ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 7 ⵢⵓⵍⵢⵓⵣ 2021, ⴷ ⵎ. Vuong Dinh Huê ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴼⵉⵜⵏⴰⵎ, ⵙ ⵓⴼⵉⵣⵢⵓⴽⵓⵏⵉⴼⵕⵓⵏⵚ.

ⵉⴳⴰ ⵓⵏⵎⵓⵇⵇⴰⵔ ⴰⴷ ⵜⴰⵎⵍⴷⴰ ⴳ ⴱⴷⵔⵏ ⵙⵉⵏ ⵉⵎⵙⵜⴳⴳⴰⵔⵏ ⵜⵓⵎⵔⵜ ⵏⵏⵙⵏ ⴼ ⵓⴱⵔⵉⴷ ⵏ ⵜⵣⴷⴰⵢⵉⵏ ⵏ ⵜⴷⴷⵓⴽⴽⵍⴰ ⴷ ⵓⵎⵢⴰⵡⴰⵙ ⵉⵙⵎⵓⵏⵏ ⵙⵏⴰⵜ ⵜⵎⵉⵣⴰⵔ ⴷ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ, ⵙⴷⴷⵉⴷⵉⵏ ⴼ ⵡⴰⵜⵉⴳⵏ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵙⵎⵖⵔ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵙ ⴽⵉⴳⴰⵏ ⵏ ⵓⵎⵢⴰⵡⴰⵙ ⴷ ⵓⵙⵎⴰⴷ, ⵎⵛⴰⵛⴽⴰⵏ ⴷ ⵓⵍⴰ ⴼ ⵓⵙⵉⴳⵓⵜ ⵏ ⵉⵔⵣⴰⴼⵏ ⵏ ⵉⴽⴰⴱⴰⵕⵏ ⵉⴱⵕⵍⴰⵎⴰⵏⵉⵢⵉⵏ, ⴷ ⵓⵣⴷⴷⵓⵢ ⴳ ⵉⴳⵔⴰⵡⵏ ⵉⴱⵕⵍⴰⵎⴰⵏⵉⵢⵏ ⵉⴳⵔⴰⵖⵍⴰⵏⵏ, ⴷ ⵓⵙⵏⴰⵍ ⵏ ⵜⵎⵢⴰⵇⵇⴰⵏⵉⵏ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ, ⴷ ⵓⵙⴼⵓⴳⵍⵓ ⵉⵛⵛⴰⵔⵏ ⵏ ⵓⴽⵯⵜⵜⴰⵢ 60 ⵏ ⵜⵣⴷⴰⵢⵉⵏ ⵜⵉⴷⵉⴱⵍⵓⵎⴰⵙⵉⵢⵉⵏ ⵊⴰⵔ ⵏⵏⵙⵏ.

ⵙ ⵜⵎⵍⴷⴰ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴼⵉⵜⵏⴰⵎ ⵎⴰⵙ ⵜⴼⴽⴰ ⵜⵎⴰⵣⵉⵔⵜ ⵏⵏⵙ ⴰⵜⵉⴳ ⴰⵅⴰⵜⴰⵔ ⵉ ⵜⵣⴷⴰⵢⵉⵏ ⵏⵏⵙ ⴰⴽⴷ ⵜⴰⴳⵍⴷⵉⵜ ⵏ ⵍⵎⵖⵔⵉⴱ, ⵉⵙⵓⵜⴳ ⵜⵉⵣⴷⴰⵢⵉⵏ ⵏ ⵓⵎⵣⵔⵓⵢ ⵉⵙⵎⵓⵏⵏ ⵙⵏⴰⵜ ⵜⵎⵉⵣⴰⵔ, ⵉⵙⵏⵉⵎⵎⵉⵔ ⵓⵍⴰ ⴰⵎⴰⴷⴰⵏ ⴰⵎⵖⵔⵉⴱⵉ ⵍⵍⵉ ⵉⴷⵔⵓⵏ ⴷ ⵓⵎⴰⴷⴰⵏ ⵏ ⴼⵉⵜⵏⴰⵎ ⴳ ⵜⵎⴰⵖⵜ ⵏⵏⵙ ⴼ ⵜⵙⵉⵎⴰⵏⵜ, ⵢⵉⵏⵉ “ⵙⵎⵓⵏⵏ ⴰⵖ ⴽⵉⴳⴰⵏ ⵏ ⵉⴼⵔⴷⴰⵙ ⵛⵛⴰⵔⵏⵉⵏ ⴳⴰⵏⵉⵏ ⵜⵉⵎⵔⵙⵍⵜ ⵏ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ”.

ⵉⵙⴷⴷⵉⴷ ⵎⴰⵙⵙ Vuong Dinh ⵎⴰⵙ ⵉⴳⴰ ⵍⵎⵖⵔⵉⴱ ⵜⴰⴳⴳⵓⵔⵜ ⵙ  ⵉⴼⵔⵉⵇⵢⴰ, ⵜⴳ ⴼⵉⵜⵏⴰⵎ ⵜⴰⴳⴳⵓⵔⵜ ⵙ ⵜⵙⴳⴰ ⵏ ⵉⴼⴼⵓⵙ-ⴰⴳⵎⵎⵓⴹ, ⵉⵖⵔ ⵉ ⵓⵙⴷⵓⵙ ⵏ ⵓⵙⵏⴼⵍ ⴰⴷⵎⵙⴰⵏ ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵜⵉⵔⵎⵉⵜⵉⵏ, ⴷ ⵓⵙⴷⵓⵙ ⵏ ⵜⵣⴷⴰⵢⵉⵏ ⵊⴰⵔ ⵉⴱⴰⵏⴽⵏ ⵏ ⵙⵏⴰⵜ ⵜⵎⵉⵣⴰⵔ, ⴷ ⵓⵙⵙⵔⵇⴱ ⵏ ⵓⵙⵖⵏⵣⵉ ⴷ ⵓⵙⵙⴰⵔⵓ, ⴷ ⵓⵙⵏⴰⵍ ⵉⵜⵜⵓⵙⵏⴼⴰⵍⵏ ⴷ ⵓⵣⴷⴷⵓⵢ ⴼ ⴽⵓ ⵜⵉⵎⵙⴰⵔⵉⵏ ⵛⵛⴰⵔⵏⵉⵏ.

ⵢⵉⵏⵉ ⵎⴰⵙ ⵉⵜⵜⵓⵇⴱⴰⵍ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⴰⴳⵎⴰⵎ ⵉⵎⵥⵕⵉ ⴳ ⵜⴳⵔⴰⵡⵉⵏ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⵏ ⵓⴳⵎⵎⵓⴹ ⵏ ⴰⵙⵢⴰ ⴳ ⵓⵙⴳⴳⵯⴰⵙ ⵉⵣⵔⵉⵏ, ⵉⴳⴰ ⴰⵙⵉⵙⵙⵏ ⵙ ⵜⵓⴳⴳⴰⵙ ⵏ ⵍⵎⵖⵔⵉⴱ ⴳ ⵓⵙⴷⵓⵙ ⵏ ⵓⴼⵔⴰ ⴷ ⵓⵔⴳⴳⵉⴳ ⴷ ⵜⵏⴼⵔⵓⵜ ⴳ ⵉⵙⵡⵉⵔⵏ ⵉⵏⵎⵏⴰⴹⵏ ⴷ ⵉⵙⴳⴰⵡⴰⵏⵏ ⴷ ⵉⵎⴰⴹⵍⴰⵏⵏ.

ⴳ ⵓⵎⵏⵉⴷ ⵏⵏⵙ, ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵎⴰⵖⵜ ⵉⵛⵛⴰⵔⵏ ⵊⴰⵔ ⵉⵎⴰⴷⴰⵏⵏ ⴰⵎⵖⵔⵉⴱⵉ ⴷ ⵓⴼⵉⵜⵏⴰⵎⵉ ⵉ ⵜⵍⴻⵍⵍⵉ, ⵢⵉⵏⵉ ⵎⴰⵙ ⴷ “ⵜⴰⴳⴳⵓⵔⵜ ⵏ ⵉⵎⵖⵔⵉⴱⵉⵢⵏ”  ⵍⵍⵉ ⵙⴽⵔⵏ ⵉⵙⵔⴷⴰⵙⵏ ⵉⵎⵖⵔⵉⴱⵉⵢⵏ ⴳ ⵓⵙⵓⵏ ⴳ ⵉⵣⵣⵍⵎⴹ ⵏ ⵜⵎⴰⵥⵓⵏⵜ ⵀⴰⵏⵓⵢ ⴷⴼⴼⵉⵔ ⵎⴰⴷ ⴷⵔⵓⵏ ⴳ ⵜⵎⴰⵖⵜ ⵏ ⴼⵉⵜⵏⴰⵎ, ⵉⴳⴰ ⵉⵏⵉⴳⵉ ⴼ ⵜⴷⵓⵙⵉ ⵏ ⵜⵣⴷⴰⵢⵉⵏ ⵜⵉⵎⵣⵔⴰⵢⵉⵏ ⴷ ⵜⵏⴰⴼⴳⴰⵏⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ.

ⵉⵙⴷⴷⵉⴷ ⵎ. ⵍⵎⴰⵍⴽⵉ ⵎⴰⵙ ⵟⵟⴰⴼⵏⵜ ⵙⵏⴰⵜ ⵜⵎⵉⵣⴰⵔ ⵜⵉⵥⴹⴰⵕⵉⵏ ⴳⴳⵓⵜⵏⵉⵏ ⵉ ⵓⵙⴷⵓⵙ ⵏ ⵜⴷⵎⵙⴰ ⴷ ⵓⵙⵖⵏⵣⵉ, ⵉⵙⴰⵡⵍ ⴼ ⵜⵣⵣⵉⴳⵣⵜ ⵏ ⴼⵉⵜⵏⴰⵎ ⴳ ⵢⵉⴳⵔ ⵏ ⵜⵎⴳⵓⵔⵉ ⴷ ⵜⵣⵡⵉⵔⵉ ⵏ ⵍⵎⵖⵔⵉⴱ ⴳ ⵉⴳⵔⴰⵏ ⵏ ⵜⴼⵍⵍⴰⵃⵜ ⴷ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏⵏ.

ⵉⵣⵎⵎⵉⵎ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴷ ⴰⵣⵎⵎⴻⵎ ⵏ ⵜⵎⵙⵙⴽⵯⵜⵉⵜ ⵏ ⵓⵏⵔⴰⵎⴰⵙ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴳ ⵙⵏⴰⵜ ⵜⵎⵉⵣⴰⵔ ⴳ 2017, ⵉⴼⴽⴰ ⵜⴰⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⵉ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ, ⵉⵙⵙⴷⵓⵙ ⵜⵉⵣⴷⴰⵢⵉⵏ ⵏ ⵓⵎⵢⴰⴷⴰⵙ ⴷ ⵓⵎⵢⴰⵡⴰⵙ ⵊⴰⵔ ⵏⵏⵙⵏ, ⵉⵙⵓⵜⴳ ⴰⵙⵏⴰⵍ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴼⵉⵜⵏⴰⵎ ⵃⵎⴰ ⴰⴷ ⵉⵜⵜⵓⵇⴱⵉⵍ ⵍⵎⵖⵔⵉⴱ ⴷ ⵉⵎⵥⵕⵉ ⴳ ⵜⴳⵔⴰⵡⵉⵏ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⵏ ⵓⴳⵎⵎⵓⴹ ⵏ ⴰⵙⵢⴰ.