ⵉⵎⴹⴰⴽⴰⵕ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵚⵉⵕⴱⵢⴰ

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 16 ⵢⵓⵏⵢⵓ 2021 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⵎⴰⵙⵙ Ivica DAČIĆ ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵜⴳⴷⵓⴷⵏⵜ ⵏ ⵚⵉⵕⴱⵢⴰ, ⵉⵍⵍⴰⵏ ⴳ ⵓⵔⵣⴰⴼ ⴰⵎⴰⴷⴷⵓⴷ ⵉ ⵜⵎⴰⵣⵉⵔⵜ ⵏⵏⵖ ⴳ ⵢⵉⵅⴼ ⵏ ⵓⴽⴰⴱⴰⵕ ⵉⵙⵜⴰⵡⵀⵎⵎⴰⵏ ⴳ ⵉⵍⵍⴰ: ⵎⴰⵙⵙ Muarem ZUKORLIC ⴰⵎⴰⵔⵉ ⵏ ⵓⵏⵙⵙⵉⵅⴼ ⴷ ⵎⴰⵙⵙⴰ Tamara PILIPOVIC ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵚⵉⵕⴱⵢⴰ-ⵍⵎⵖⵔⵉⴱ.

ⴳ ⵓⵏⵎⵓⵇⵇⴰⵔ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵚⵉⵕⴱⵢⴰ ⵎⴰⵙ ⵉⴳⴰ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵜⴰⵔⵙⵍⵜ ⵏ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵊⴰⵔ ⵍⵎⵖⵔⵉⴱ ⴷ ⵚⵉⵕⴱⵢⴰ ⴳ ⵉⴳⵔⴰⵏ ⴽⵓⵍⵍⵓⵜⵏ, ⵉⵙⵓⵜⴳ ⵜⵉⴷⴷⵓⴽⴽⵯⵍⴰ ⵉⵥⵉⵍⵏ ⵉⵙⵎⵓⵏⵏⵏ ⵙⵏⴰⵜ ⵜⵎⵉⵣⴰⵔ ⴷ ⵙⵉⵏ ⵉⵎⴰⴷⴰⵏⵏ ⵙⴳ ⴰⵣⵎⵣ ⵉⵎⴰⵟⵍⵏ. ⵢⵉⵏⵉ ⵎⴰⵙ ⵉⴳⴰ ⵍⵎⵖⵔⵉⴱ, ⵙ ⵜⵏⴰⵔⴰ ⵏ ⵉⴳⵍⵍⵉⵏ ⵍⵃⴰⵙⴰ ⵡⵉⵙ ⵙⵉⵏ, ⴳ ⵉⵎⵙⴽⴰⵔⵏ ⵏ ⵓⵎⵓⵙⵙⵓ ⵏ “ⵉⵡⴰⵏⴽⵏ ⵓⵔ ⵉⵜⵜⵓⵙⵎⵏⴰⵏ”  , ⵔⴰⴷ ⵜⵙⵏⵓⴱⴳ ⵚⵉⵕⴱⵢⴰ ⴳ ⵓⵙⴳⴳⵯⴰⵙ ⴰⴷ ⵜⴰⴼⵓⴳⵍⴰ ⵜⵉⵙ 60 ⵏ ⵓⵙⴽⵔ ⵏⵏⵙ.

ⵉⵙⵓⵜⴳ ⵎⴰⵙⵙ Ivica DAČIĆ ⵙ ⵓⴷⵖⴰⵔ ⵉⵙⵜⴰⵡⵀⵎⵎⴰⵏ ⵏ ⵜⴳⵍⴷⵉⵜ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⵢⵉⵏⵉ ⵎⴰⵙ ⵉⴳⴰ ⵍⵎⵖⵔⵉⴱ ⵜⴰⵎⴰⵣⵉⵔⵜ ⵉⵙⵜⴰⵡⵀⵎⵎⴰⵏ ⵉⴳⴰⵏ ⵜⴰⵔⵙⵍⵜ ⵏ ⵓⵔⴳⴳⵉⴳ ⴷ ⵜⴳⵎⵉ ⴳ ⵜⵙⴳⴰ. ⵉⵙⵎⴰⵢⵏⵓ ⵓⵍⴰ ⴰⵙⵏⴰⵍ ⵏ ⵜⵎⴰⵣⵉⵔⵜ ⵏⵏⵙ ⵉ ⵜⵙⵓⵎⵔⵜ ⵏ ⵓⴱⴰⴹ ⴰⵏⵉⵎⴰⵏ ⵍⵍⵉ ⵉⴼⴽⴰ ⵍⵎⵖⵔⵉⴱ ⴷ ⴰⴼⵙⵙⴰⵢ ⵉ ⵜⵎⴰⵖⵜ ⵉⵜⵜⵓⵙⴽⴰⵔⵏ ⴼ ⵜⵏⵣⵔⵓⴼⵜ ⵜⴰⵎⵖⵔⵉⴱⵉⵜ, ⵢⵉⵏⵉ ⵎⴰⵙ ⵜⴳⴰ ⵜⵢⴰⵏⵜ ⵜⴰⴽⴰⵍⴰⵏⵜ ⵜⴰⵖⴰⵡⵙⴰ ⵜⴰⵙⵉⵍⴰⵏⵜ. ⵉⵙⵙⵔⵖⴷ ⵉ ⵍⵎⵖⵔⵉⴱ ⴼ ⵓⵙⵡⵓⴷⴷⵓ ⵏⵏⵙ ⵉⵥⵉⵍⵏ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵢⵉⵏⵉ ⵎⴰⵙ ⵜⵥⴹⴰⵕ ⵚⵉⵕⴱⵢⴰ ⴰⴷ ⵜⵙⵓⵊⵉⴷ ⵉⴳⵣⵣⴰⵢⵏ ⵉ ⵉⵏⵎⵓⵔⴰⵏ ⵏⵏⵙ, ⵜⵉⵥⴹⵉⵕ ⴰⴷ ⵜⵣⵣⵔⵉ ⴳⴰⵔ ⵉⴷⵔⵉⵣⵏ ⵏ ⵓⴱⴰⵢⵢⵓⵕ.

ⵢⵉⵏⵉ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵚⵉⵕⴱⵢⴰ ⵎⴰⵙ ⵉⵥⵉⵍ ⵓⴱⵔⵉⴷ ⵏ ⵜⵣⴷⴰⵢⵉⵏ ⵏⴳⵔ ⵙⵏⴰⵜ ⵜⵎⵉⵣⴰⵔ, ⵉⴱⴷⵔ ⵉⴳⵔⴰⵏ ⵏ ⵓⵎⵢⴰⵡⴰⵙ ⵊⴰⵔ ⵏⵏⵙⵏ ⴰⵎ: ⵜⴰⵎⴰⵍⵍⴰⵢⵜ, ⵜⴰⵎⴳⵓⵔⵉ, ⴰⵙⴳⵎⵉ ⴷ ⵓⵙⵎⵓⵜⵜⴳ ⴷ ⵡⵉⵢⵢⴰⴹ, ⵉⵖⵔ ⵉ ⵓⵙⵎⵖⵔ ⵏ ⵓⵙⵏⴼⵍ ⵏ ⵓⵙⵖⵏⵣⵉ ⴷ ⵜⴷⵎⵙⴰ ⵙ ⵎⴰⴷ ⵉⵜⵜⴰⵡⵉⵏ ⵙ ⵓⵙⵎⵔⵙ ⵏ ⵡⴰⵏⵏⴰⵣⵏ  ⴷ ⵜⵥⴹⴰⵕⵉⵏ ⵍⵍⴰⵏⵉⵏ ⴳ ⵜⴷⵎⵙⵉⵡⵉⵏ ⵏ ⵙⵏⴰⵜ ⵜⵎⵉⵣⴰⵔ.

ⴳ ⵓⵎⵏⵉⴷ ⵏⵏⵙ, ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⵉⵙⵎⵓⵏⵏ ⵙⵏⴰⵜ ⵜⵎⵔⵙⴰⵍ, ⵉⵜⵜⵓⵣⵎⵎⴰⵎⵏ ⴳ 2018, ⵢⵉⵏⵉ ⵎⴰⵙ ⵜⴱⴷⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵙⵏⴰⵜ ⵜⵎⵉⵣⴰⵔ ⴼ ⵉⵎⵏⵣⴰⵢⵏ ⵏ ⵜⵎⵜⵜⴰ ⵎⵓⵏⵏⵉⵏ, ⵙⵍⴰⵡⴰⵏ ⴰⴽⴽⵯ ⴰⵡⵇⵇⵕ ⵏ ⵜⵢⴰⵏⵜ ⵏ ⵉⵎⴰⴷⴰⵏⵏ ⴷ ⵉⵡⴰⵏⴽⵏ, ⵢⵉⵏⵉ ⵎⴰⵙ ⴱⴷⴷⴰ ⵉⵍⵍⴰ ⵍⵎⵖⵔⵉⴱ ⴷ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵚⵉⵕⴱⵢⴰ, ⵉⵙⵓⵜⴳ ⵓⵍⴰ ⴰⴷⴷⴰⴷ ⵏ ⵚⵉⵕⴱⵢⴰ ⴳ ⵓⵙⵏⴰⵍ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ.

ⵉⵙⴰⵡⵍ ⵎⴰⵙⵙ ⵍⵎⴰⵍⴽⵉ ⴼ ⵡⴰⵜⵉⴳ ⵏ ⵓⵙⵎⴰⵢⵏⵓ ⴷ ⵓⵙⵎⵖⵔ ⵏ ⵉⴳⵔⴰⵏ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵢⵉⵏⵉ ⵎⴰⵙ ⵉⵙⴽⵔ ⵍⵎⵖⵔⵉⴱ, ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴳ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⵢⴰⵏ ⵓⵙⵜⴰⵢ ⴰⵙⵜⵔⴰⵜⵉⵊⵉ. ⵉⵙⴷⴷⵉⴷ ⵎⴰⵙ ⵉⵥⴹⴰⵕ ⵍⵎⵖⵔⵉⴱ ⴷ ⵚⵉⵕⴱⵢⴰ ⵙ ⵓⴷⵖⴰⵔ ⵏⵏⵙⵏ ⴰⵙⵜⵔⴰⵜⵉⵊⵉ, ⴰⴷ ⵚⴽⵓⵏ ⵜⵉⵎⴰⴷⵔⴰⵡⵉⵏ ⵟⵟⴰⴼⵏⵉⵏ ⴽⵕⴰⴹ ⵉⵎⵏⴰⴷⵏ ⵉ ⵜⴳⵎⵉ ⵏ ⵉⴼⵔⵉⵇⵢⴰ.

ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⵥⴹⴰⵕ ⵓⵎⵓⵙⵙⵓ ⵏ “ⵉⵡⴰⵏⴽⵏ ⵓⵔ ⵉⵜⵜⵓⵙⵎⵏⴰⵏ” ⴰⴷ ⵢⴰⵡⵙ ⴳ ⵜⴼⵔⵓⵜ ⴷ ⵓⴼⵔⴰ ⵉⵎⴰⴹⵍⴰⵏⵏ ⴷ ⵓⵎⵣⴰⵖ ⵏ ⵜⵏⵓⴼⴰ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⴳ “ⵓⵎⴰⴹⴰⵍ ⵖ ⴳⴳⵓⵜⵏ ⵉⵛⵓⵎⴰⵛ”, ⵉⵙⵙⵓⵎⵔ ⵅⴼ ⵓⵙⴽⵔ ⵏ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⵉ ⵜⵖⵔⵉ ⵏ ⵉⵎⵏⴰⴷⵏ ⵏ ⵓⵎⵢⴰⵡⴰⵙ ⵊⴰⵔ ⵉⵡⴰⵏⴽⵏ ⵏ ⵓⵎⵓⵙⵙⵓ.