ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⴼⵓⴳⵍⴰ ⵏ ⵓⵙⵕⵚⵓ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵉ ⵜⵖⵓⵔⵉⵡⵉⵏ ⴷ ⵉⵔⵣⵣⵓⵜⵏ ⴼ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ
ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 11 ⵎⴰⵢⵢⵓ 2021, ⵜⴰⴼⵓⴳⵍⴰ ⵏ ⵓⵙⵕⵚⵓ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵉ ⵜⵖⵓⵔⵉⵡⵉⵏ ⴷ ⵉⵔⵣⵣⵓⵜⵏ ⴼ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ.
ⵙ ⵜⵎⵍⴷⴰ ⴰⴷ, ⵉⵙⵉⵙⴼⵉⵡ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵜⴽⵛⵎ ⵜⵙⵎⵖⵓⵔⵜ ⴰⴷ ⴳ ⵓⵙⵎⵀⵍ ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⴷ ⵜⵎⵢⴰⵇⵇⴰⵏⵜ ⵏ ⵜⵎⴰⴷⵔⴰⵡⵜ ⴷ ⵓⵎⵢⴰⵡⴰⵙ ⴰⵎⴰⵙⵙⴰⵏ ⵏⴳⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵜⵎⴰⵡⴰⵙⵜ ⵜⴰⵎⴰⵔⵉⵜ ⵖⵔ ⵓⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⵉⵜⵜⵓⵙⵎⴰⴳⴰⵍⵏ ⵙ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵜⵙⴷⴰⵡⵉⵢⵉⵏ ⵜⵉⴳⴷⵓⴷⴰⵏⵉⵏ.
ⵉⵣⵎⵎⵉⵎ ⵎⴰⵙⵙ ⵍⵎⴰⵍⴽⵉ ⵎⴰⵙ ⴰ ⵜⵙⴰⵡⴰⵍ ⵜⵙⵏⵜⴰⵢⵜ ⴰⴷ ⴼ ⵜⵉⵔⴰⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵙⵎⵔⵙⵍ ⵏ ⵓⵎⵢⴰⵡⴰⵙ ⴰⵎⴰⵙⵙⴰⵏ ⴷ ⵓⴽⴰⴷⵉⵎⵉ ⴷ ⵜⵙⴷⴰⵡⵉⵢⵉⵏ ⵜⵉⴳⴷⵓⴷⴰⵏⵉⵏ ⵍⵍⵉⵖ ⴳⴰⵏⵜ ⴰⵎⵎⴰⵙ ⵏ ⵓⴼⴰⵔⵙ ⴷ ⵓⵙⵎⵖⵔ ⵏ ⵜⵓⵙⵙⵏⴰ ⴷ ⵓⵙⵡⵉⵏⴳⵎ, ⴷ ⴰⵔ ⵜⵎⵎⴰⵍ ⴰⵏⵏⵓⵕⵥⵎ ⵏ ⵓⵙⵇⵇⵉⵎ ⴼ ⵡⴰⵎⵓⵏ ⵏⵏⵙ ⵙ ⴽⵓ ⵎⴰⴷ ⴳⵉⵙ ⵉⵍⵍⴰⵏ, ⵢⵉⵍⵉ ⴳⵉⵙ ⵡⴰⴷ ⵉⴳⴰⵏ ⴰⵎⴰⵙⵙⴰⵏ ⴷ ⵓⴽⴰⴷⵉⵎⵉ ⵍⵍⵉⵖ ⵜⴻⵟⵟⴰⴼ ⵜⵓⵙⵙⵏⴰ ⵜⵉⵍⴰⵍⵜ ⴳ ⵜⵣⵣⵉⴳⵣⵜ ⴷ ⵜⴳⵎⵉ.
ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵜⵡⴰⵜⵜⵙ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵜⵖⵓⵔⵉⵡⵉⵏ ⴷ ⵉⵔⵣⵣⵓⵜⵏ ⴼ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴰⵙⵓⵜⴳ ⵏ ⵉⵔⵣⵣⵓⵜⵏ ⵉⵎⴰⵙⵙⴰⵏⵏ ⵥⵉⵍⵏⵉⵏ ⴳⴰⵏ ⴰⴷⵍⵉⵙ ⵏⵖ ⵜⴰⵡⵓⵔⵉ ⵏ ⴷⴷⵓⴽⵜⵓⵕⴰ, ⴷ ⵓⵙⵙⵔⵇⴱ ⵏ ⵉⵎⵔⵣⵓⵜⵏ ⵙⵍⴰⵡⴰⵏ ⴰⴽⴽⵯ ⵉⵄⵔⵔⵉⵎⵏ ⵉ ⵜⵡⵓⵔⵉ ⵏ ⵓⴹⴼⵕ ⴷ ⵜⵖⵔⵉ ⴷ ⵓⵙⴼⵙⵉ ⵏ ⵓⵏⴳⵔⴰⵡ ⴰⴷⵙⵜⴰⵔ ⴷ ⵓⵙⵔⵜⴰⵏ ⵏ ⵜⵎⴰⵣⵉⵔⵜ ⵏⵏⵖ ⴷ ⵓⴱⵔⵉⴷ ⵏ ⵜⴳⵎⵉ ⵜⴰⵙⵔⵜⴰⵏⵜ ⴷ ⵜⴷⵉⵎⵓⵇⵔⴰⵟⵉⵜ, ⴰⵢⵍⵍⵉ ⵔⴰⴷ ⵉⵣⴷⵉ ⴰⵔⵣⵣⵓ ⴰⵎⴰⵙⵙⴰⵏ ⵙ ⵜⵉⵍⴰⵡⵜ ⵏ ⵡⴰⵎⵓⵏ, ⴷ ⴰⵢⵍⵍⵉ ⵔⴰⴷ ⵉⵙⴽⵔ ⵖ ⵉⵔⵣⵣⵓⵜⵏ ⴷ ⵜⵖⵓⵔⵉⵡⵉⵏ ⵜⵉⵎⴰⵙⵙⴰⵏⵉⵏ ⴳ ⵓⵎⵏⵉⴷ ⴰⴱⵕⵍⴰⵎⴰⵏⵉ ⵢⴰⵏ ⵓⵙⴰⵖⵓⵍ ⴰⴷⵙⵍⴰⵏ ⵉ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⴷ ⴽⵓ ⵉⵎⵙⴽⴰⵔⵏ.
ⵉⵖⵔⴰ ⵎⴰⵙⵙ ⵍⵎⴰⵍⴽⵉ ⵉ ⵓⵙⵎⵖⵔ ⵏ ⵓⵔⵣⵣⵓ ⴰⵎⴰⵙⵙⴰⵏ ⴳ ⵢⵉⴳⵔ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵙ ⵓⵙⵎⵢⴰⵏⴰⵡ ⵏ ⵉⴳⵔⴰⵏ ⴷ ⵡⴰⵏⴰⵡⵏ ⵏ ⵓⵎⵢⴰⵡⴰⵙ ⵏⴳⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵙⴷⴰⵡⵉⵢⵉⵏ ⵜⵉⴳⴷⵓⴷⴰⵏⵉⵏ, ⵙ ⵓⵙⴽⵔ ⵏ ⵜⵔⵓⴱⴱⴰ ⵏ ⵓⵙⵡⵉⵏⴳⵎ ⴷ ⵓⵎⵛⴰⵡⴰⵕ ⴳ ⵜⵎⵙⴰⵔⵉⵏ ⵏ ⵓⵣⵣⵔⴰⴼ, ⴷ ⵓⵙⴷⵓⵙ ⵏ ⵓⵔⵣⵣⵓ ⴰⵙⴷⴰⵡⴰⵏ ⴼ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴷ ⵜⴷⵉⵎⵓⵇⵔⴰⵟⵉⵜ ⵙ ⵉⵎⴰⵙⵜⵔⵏ, ⴷ ⵓⵙⴽⵔ ⵏ ⵉⵎⴰⵙⵙⵏ ⴷ ⵜⵔⵓⴱⴱⴰ ⵏ ⵉⵔⵣⵣⵓⵜⵏ ⴼ ⵓⵙⵍⴳⵏ ⴰⴱⵕⵍⴰⵎⴰⵏⵉ.
ⵖ ⵓⵎⵏⵉⴷ ⵏⵏⵙⵏ, ⵏⵏⴰⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵉ ⵜⵖⵓⵔⵉⵡⵉⵏ ⴷ ⵉⵔⵣⵣⵓⵜⵏ ⴼ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴰⵙⵓⵜⴳ ⵏⵏⵙⵏ ⵉ ⵜⵙⵏⵜⴰⵢⵜ ⴰⴷ, ⵢⵉⵏⵉ ⵎⴰⵙⵙ ⴰⵏⵙⵙⵉⵅⴼ ⵏⵏⵙ ⵎⵓⵃⴰⵎⵎⴰⴷ ⴰⵛⵔⴳⵉ ⵎⴰⵙ ⴰ ⵜⵎⵎⴰⵍ ⴰⵕⵥⵥⵓⵎ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵡⴰⵎⵓⵏ ⵏⵏⵙ, ⴰⵢⵍⵍⵉ ⵉⵙⴷⵓⵙⵏ ⴰⴷⵖⴰⵔ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴳ ⵓⵙⴰⵢⵔⵓⵔ ⵏ ⵓⵎⴹⴰⴽⴰⵕ ⴰⵎⴰⵜⴰⵢ ⴷ ⵓⵏⴰⵎⵓⵏ.
ⵙⴰⵡⵍⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵜⵖⵓⵔⵉⵡⵉⵏ ⴷ ⵉⵔⵣⵣⵓⵜⵏ ⴼ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴼ ⵜⵉⵍⴰⵍⵜ ⵏ ⵜⵙⵎⵖⵓⵔⵜ ⴳ ⵓⵙⵙⵔⵇⴱ ⵏ ⵉⵎⵔⵣⵓⵜⵏ ⵉⵎⴰⵢⵏⵓⵜⵏ ⴳ ⵢⵉⴳⵔ ⴰⴱⵕⵍⴰⵎⴰⵏⵉ ⵙⵍⴰⵡⴰⵏ ⴰⴽⴽⵯ ⴳ ⵓⵙⵍⴳⵏ ⴰⴱⵕⵍⴰⵎⴰⵏⵉ.
ⵉⵍⵍⴰ ⴳ ⵜⵙⵇⵇⵉⵎⵜ ⴰⴷ:
- ⵎⴰⵙⵙ ⵎⵓⵃⴰⵎⵎⴰⴷ ⴰⵛⵔⴳⵉ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ, ⴰⵙⴰⵍⵎⴰⴷ ⵏ ⵜⵙⴷⴰⵡⵉⵜ, ⴰⵏⵙⵙⵉⵅⴼ ⴰⵇⴱⵓⵔ ⵏ ⵓⵙⵇⵇⵉⵎ ⴰⴷⵙⵜⴰⵔ.
- ⵎⴰⵙⵙ ⴼⴰⵔⵉⴷ ⵍⴱⴰⵛⴰ, ⴰⵙⴰⵍⵎⴰⴷ ⵏ ⵜⵙⴷⴰⵡⵉⵜ, ⴰⵏⴱⴷⴰⴷ ⵏ ⵜⵖⵉⵡⴰⵏⵜ ⵏ ⵉⵣⵔⴼⴰⵏ ⴰⴳⴷⴰⵍ ⵕⵕⴱⴰⵟ.
- ⵎⴰⵙⵙⴰ ⴰⵎⵉⵏⴰ ⵍⵎⵙⵄⵓⴷⵉ, ⵜⴰⵙⴰⵍⵎⴰⴷⵜ ⵏ ⵜⵙⴷⴰⵡⵉⵜ, ⵜⴰⴳⵎⴰⵎⵜ ⵜⴰⵇⴱⵓⵔⵜ ⴳ ⵜⵙⵇⵇⵉⵎⵜ ⵜⴰⵎⵛⴰⵡⴰⵕⵜ ⴼ ⵜⵎⵏⴹⴰⵡⵜ ⴷ ⵜⵙⵇⵇⵉⵎⵜ ⵜⴰⵎⵛⴰⵡⴰⵕⵜ ⴼ ⵓⵣⵣⵔⴰⵢ ⵏ ⵓⴷⵓⵙⵜⵓⵔ.
- ⵎⴰⵙⵙ ⵄⴰⴱⴷⵍⵉⵍⴰⵀ ⵍⵄⴰⴱⴷⵉ, ⴰⵙⴰⵍⵎⴰⴷ ⵏ ⵜⵙⴷⴰⵡⵉⵜ, ⴰⵏⵙⵙⵉⵅⴼ ⴰⵇⴱⵓⵔ ⵏ ⵜⵣⵓⵏⵉ ⵏ ⵓⵙⵍⴳⵏ ⴰⵎⴰⵜⴰⵢ ⴷ ⵜⵎⴰⵙⵙⴰⵏⵉⵏ ⵜⵉⵙⵔⵜⴰⵏⵉⵏ ⴳ ⵓⴳⴷⴰⵍ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵎⵖⵔⵉⴱⵉⵜ ⵏ ⵓⵙⵍⴳⵏ ⴰⴷⵙⵜⴰⵔ.
- ⵎⴰⵙⵙ ⵕⴰⵛⵉⴷ ⵍⵎⴷⵡⵡⵕ, ⴰⴳⵎⴰⵎ ⴰⵇⴱⵓⵔ ⴳ ⵓⵙⵇⵇⵉⵎ ⴰⴷⵙⵜⴰⵔ ⴷ ⵓⴱⵕⵍⴰⵎⴰⵏⵉ ⴰⵇⴱⵓⵔ.