ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴷ ⴰⵙⵉⵙⵙⵏ ⵏ ⵎⴰⵔⵉⴽⴰⵏ ⵏ ⵜⵎⵖⵔⵉⴱⵜ ⵏ ⵜⵏⵣⵔⵓⴼⵜ ⵉⴳⴰ ⴰⵙⵎⴰⴷ ⵏ ⵡⴰⴷⴷⴰⴷⵏ ⵏ ⴽⵓ ⵜⵉⵎⵙⵙⵓⴳⵓⵔⵉⵏ ⵏ ⵎⴰⵔⵉⴽⴰⵏ ⴳ ⵓⵙⵏⴰⵍ ⵏ ⵓⴱⴰⴹ ⴰⵏⵉⵎⴰⵏ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ
ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 6 ⵉⴱⵔⵉⵔ 2021 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⵎⴰⵙⵙⴰ Carol Moseley Braun ⵜⴰⴳⵎⴰⵎⵜ ⵏ ⵓⴽⴰⴱⴰⵕ ⴰⴷⵉⵎⵓⵇⵜⵔⴰⵟⵉ ⴰⵎⵉⵔⵉⴽⴰⵏⵉ ⵍⵍⵉ ⵜⵜ ⵏⵏ ⵉⴽⴽⴰⵏ ⵜⴳⴰ ⵜⴰⴷⵉⴱⵉⴱⵍⵓⵎⴰⵜ ⴷ ⵜⴱⴰⵕⵍⴰⵎⴰⵏⵉⵜ, ⴳ ⵓⵔⵣⴰⴼ ⵏ ⵜⴷⴷⵓⴽⵍⴰ
ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵣⴷⴰⵢⵉⵏ ⵏ ⵜⴷⴷⵓⴽⵍⴰ ⴷⵓⵙⵏⵉⵏ ⴷ ⵓⵡⵇⵇⵔ ⴰⵙⵉⵏⵔⴰⵏ ⵉⵣⴷⵉⵏ ⵍⵎⵖⵔⵉⴱ ⴷ ⵎⴰⵔⵉⴽⴰⵏ, ⵙⴳ ⴽⵉⴳⴰⵏ ⵏ ⵜⴰⵙⵓⵜⵉⵏ, “ⵉⴳⴰ ⵍⵎⵖⵔⵉⴱ ⵜⴰⵎⵣⵉⵔⵜ ⵜⴰⵎⵣⵡⴰⵔⵓⵜ ⵉⵙⵙⵏⵏ ⵙ ⵜⵙⵉⵎⴰⵏⵜ ⵏ ⵎⴰⵔⵉⴽⴰⵏ”, ⵉⵙⵙⴽⵜⵉ ⴷ ⵎⴰⵙ ⵉⵡⵙⵏⵜ ⵙⵏⴰⵜ ⵜⵎⵉⵣⴰⵔ ⴳ ⵓⵙⴽⵔ ⵏ ⵜⵎⴰⴷⴷⴰⵙⵜ ⵜⴰⵎⴰⴹⵍⴰⵏⵜ ⵏ ⵓⵙⵖⵏⵣⵉ ⴳ ⵎⵕⵕⴰⴽⵛ ⴳ 1994, ⵜⵉⵍⵉ ⵊⴰⵔ ⵏⵏⵙⵏⵜ ⵜⵎⵢⴰⵇⵇⴰⵏⵜ ⵏ ⵓⵙⵏⴼⵍ ⵉⵍⴻⵍⵍⵉ ⴰⵙⵉⵏⵔⴰⵏ.
ⵉⵙⴰⵡⵍ ⵎⴰⵙⵙ ⵍⵎⴰⵍⴽⵉ ⴼ ⵓⵙⵓⵜⴳ ⴷⴼⴼⵉⵔ ⵏ ⵓⵙⵉⵙⵙⵏ ⵏ ⵎⴰⵔⵉⴽⴰⵏ ⵙ ⵜⵎⵖⵔⵉⴱⵉⵜ ⵏ ⵚⵚⵃⵕⴰ, ⵍⵍⵉ ⵉⴳⴰⵏ ⵜⴰⵢⴰⴼⵓⵜ ⵏ ⵜⵎⵙⵙⵓⴳⵓⵔⵉⵏ ⵜⵉⵎⵉⵔⵉⴽⴰⵏⵉⵏ ⵣⵔⵉⵏⵉⵏ ⴳ ⵓⵙⵏⴰⵍ ⵏ ⵓⴱⴰⴹ ⴰⵏⵉⵎⴰⵏ ⵉⴳⴰⵏ ⴰⴼⵙⵙⴰⵢ ⵏ ⵜⵉⵍⴰⵡⵜ ⵉ ⵜⵎⵓⴽⵔⵉⵙⵜ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⵢⵉⵏⵉ:”ⵉⴳⴰ ⵖ ⵓⵖⵉⵍⵓⴼ ⵎⴰⵙ ⵓⴽⴰⵏ ⵍⵍⴰⵏⵜ ⴽⵔⴰ ⵏ ⵜⵙⴳⴳⵉⵡⵉⵏ ⴳ ⵜⴼⵔⴽⴰ ⵏ ⵜⵎⴰⵖⵜ ⵜⴰⵚⵎⵎⴰⵚⴹⵜ ⵍⵍⵉ ⴷ ⵉⴼⵍⵏ ⵜⴰⵎⵙⴰⵔⵜ ⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ”. ⵉⵙⵓⵜⴳ ⵓⵍⴰ ⵜⴰⵡⵓⵔⵉ ⵏ ⵜⵎⵙⵙⵓⴳⵓⵔⵜ ⵜⴰⵎⵉⵔⵉⴽⴰⵏⵉⵜ ⵜⴰⵎⴰⵢⵏⵓⵜ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴷ ⵜⵉⵍⵉⵜ ⵏ ⵓⴼⵔⴰ ⴳ ⵓⵎⴰⴹⵍ.
ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵎⴰⵙ ⵉⵥⴹⴰⵕ ⵍⵎⵖⵔⵉⴱ, ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴳ ⵓⵣⵎⵣ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⴰⴷ ⵉⵙⴳⵉⴷⴷⵉ ⵏⴳⵔ ⵉⵙⵖⴰⵡⵙⴰⵜⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵓⵎⴰⴷⴰⵏ ⴰⵎⵖⵔⵉⴱⵉ ⴷ ⵓⵛⵛⵉⵍ ⵏ ⵓⴼⵔⴰⴳ ⵏ ⵜⴷⵓⵙⵉ ⵏ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ, ⵢⵉⵏⵉ ⵎⴰⵙ ⵉⴳⴰ ⵍⵎⵖⵔⵉⴱ ⴳ ⵉⵎⵣⵡⵓⵔⴰ ⵍⵍⵉ ⵉⵡⵙⵏⵉⵏ ⴰⵎⵏⵥⴰⵡ ⵏ ⵉⴼⵔⵉⵇⵢⴰ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ. ⵉⵙⴰⵡⵍ ⵓⵍⴰ ⴼ ⵜⵙⵔⵜⵉⵜ ⵏ ⵜⴳⵍⴷⵉⵜ ⵎⵏⵉⴷ ⵏ ⵉⴼⵔⵉⵇⵢⴰ, ⵍⵍⵉ ⵉⵙⵔⵙ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ, ⴷ ⵓⵙⵎⵖⵔ ⵏ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⴳ ⵓⵎⵏⵥⴰⵡ ⵙ ⵜⵙⵏⵜⴰⵢⵉⵏ ⴼⴰⵡⵏⵉⵏ ⴷ ⵉⵙⵏⴼⴰⵔⵏ ⵉ ⵚⴰⵃⴰ ⵏ ⵉⵡⴷⴰⵏ ⵏ ⵜⵙⴳⴰ.
ⴳ ⵓⵎⵏⵉⴷ ⵏⵏⵙ, ⵜⵙⵓⵜⴳ ⵎⴰⵙⵙⴰ Carol Moseley Braun ⵜⴰⵣⵣⵉⴳⵣⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⴽⵓ ⵉⴳⵔⴰⵏ, ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ.
ⵜⵙⴷⴷⵉⴷ ⵜⵅⴰⵜⴰⵔⵜ ⴳ ⵓⴽⴰⴱⴰⵕ ⴰⴷⵉⵎⵓⵇⵔⴰⵟⵉ ⴰⵎⵉⵔⵉⴽⴰⵏⵉ ⵉⴳⴰⵏ ⵜⴰⵎⵖⴰⵔⵜ ⵜⴰⵎⵣⵡⴰⵔⵓⵜ ⵜⴰⴼⵔⵉⵇⵉⵜ-ⵜⴰⵎⵉⵔⵉⴽⴰⵏⵉⵜ ⵉⵜⵜⵓⵙⵜⴰⵢⵏ ⴷ ⵜⴰⴳⵎⴰⵎⵜ ⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⵎⵉⵔⵉⴽⴰⵏⵉ, ⴼ ⵡⴰⵜⵉⴳ ⵏ ⵓⵙⵎⵖⵔ ⵏ ⵜⵣⴷⴰⵢⵉⵏ ⵜⵉⵎⵉⵔⵉⴽⴰⵏⵉⵏ ⵜⵉⵎⵖⵔⵉⴱⵉⵢⵉⵏ ⵙ ⵉⵎⵏⴰⴷⵏ ⵢⴰⴹⵏⵉⵏ ⵏ ⵓⵎⵢⴰⵡⴰⵙ ⴷ ⵓⵎⵛⴰⵡⴰⵕ, ⵜⵉⵏⵉ ⵎⴰⵙ ⴷⵔⵓⵏⵜ ⵙⵏⴰⵜ ⵜⵎⵉⵣⴰⵔ ⴰⵜⵉⴳⵏ ⵏ ⵓⵙⴷⵓⵙ ⵏ ⵓⴼⵔⴰ ⴷ ⵓⵙⵎⵖⵔ.