ⴰⴷⵔⴰⵡ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵢⵉⵙⴽⵉⵍ ⴷ ⵓⵙⴰⵎⵓ ⴳ ⵓⵏⵎⵓⵇⴰⵔ ⴰⵎⵣⵡⴰⵔⵓ ⴼ ⵓⵙⵉⵥⴹⵕ ⵏ ⵜⵎⵖⴰⵔⵉⵏ ⴷ ⵓⴷⵔⴰⵡ ⵏⵏⵙⵏⵜ ⴳ ⵜⵓⴷⵔⵜ ⵜⴰⵙⵔⵜⴰⵏⵜ
ⵜⴷⵔⵓ ⵎⴰⵙⵙⴰ ⵜⴰⵎⴰⵔⵉⵜ ⴼⴰⵟⵉⵎⴰ ⵥⵥⴰⵀⵕⴰ ⵏⴰⵣⵉⵀ, ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵢⵉⵙⴽⵉⵍ ⴷ ⵓⵙⴰⵎⵓ, ⴷ ⵎⴰⵙⵙⴰ ⵜⴰⵎⴰⵔⵉⵜ ⵅⴰⴷⵉⵊⴰ ⵣⵣⴰⵢⴰⵏⵉ ⴳ ⵓⵏⵎⵓⵇⴰⵔ ⴰⵎⵣⵡⴰⵔⵓ ⴼ ⵓⵙⵉⵥⴹⵕ ⵏ ⵜⵎⵖⴰⵔⵉⵏ ⴷ ⵓⴷⵔⴰⵡ ⵏⵏⵙⵏⵜ ⴳ ⵜⵓⴷⵔⵜ ⵜⴰⵙⵔⵜⴰⵏⵜ ⵏ ⵉⵡⴰⵏⴽⵏ ⵏ ⵍⵎⵖⵔⵉⴱ ⴷ ⵍⴱⵉⵔⵓ ⴷ ⴱⵓⵍⵉⴼⵢⴰ ⴷ ⵍⵉⴽⵡⴰⴷⵓⵔ, ⴰⴽⵕⴰⵙ 24 ⴱⵕⴰⵢⵕ 2021 ⵙⴳ ⵜⴰⵎⵙⵇⴰⴷⵜ ⵏ ⵍⵎⵖⵔⵉⴱ ⴳ ⵍⴱⵉⵔⵓ ⴷ ⴱⵓⵍⵉⴼⵢⴰ ⴷ ⵓⵥⵟⵟⴰ ⵏ ⵜⵙⵔⵜⵉⵜ ⵜⴳⴰⵏ ⵜⴰⵡⵓⵔⵉ ⵏ ⵜⵎⵖⴰⵔⵉⵏ ⵙ ⵜⵎⵢⴰⴳⴳⵓⴳⵜ.
ⴳ ⵜⴳⵓⵔⵉ ⵏⵏⵙ, ⵉⵙⴷⴷⵉⴷ ⵎⴰⵙⵙ ⴰⵎⵉⵏ ⵛⵛⵓⵔⴷⵉ ⴰⵎⵙⵇⴰⴷ ⵏ ⵍⵎⵖⵔⵉⴱ ⴳ ⵍⴱⵉⵔⵓ ⴷ ⴱⵓⵍⵉⴼⵢⴰ ⵎⴰⵙ ⵉⵡⴰⵜⵜⵙ ⵓⵏⵎⵓⵇⴰⵔ ⴰⵙⵏⴼⵍ ⵏ ⵜⵎⵓⵥⴰⵢⵉⵏ ⴷ ⵓⴼⵓⵖ ⵙ ⵜⵙⵓⵎⵔⵉⵏ ⴼ ⵜⵏⴰⵥⴰⵕⵉⵏ ⴷⴰⵜ ⵏ ⵓⵙⵉⵥⴹⵕ ⵏ ⵜⵎⵖⴰⵔⵉⵏ ⴷ ⵓⵎⵣⴰⵖ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ, ⵉⴱⴷⴷ ⵓⵍⴰ ⴼ ⵜⵓⴳⴳⴰⵙ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵓⵙⵏⴰⵍ ⵏ ⵓⴷⵔⴰⵡ ⵏ ⵜⵎⵖⴰⵔⵜ ⴳ ⵜⵓⴷⵔⵜ ⵜⴰⵙⵔⵜⴰⵏⵜ ⵍⵍⵉⵖ ⵜⴳⴰ ⵜⵎⵖⴰⵔⵜ ⵜⴰⵙⵉⵍⴰ ⵏ ⵡⴰⵎⵓⵏ.
ⵙⵎⵏⵉⴷⵏⵜ ⵜⵉⴳⵏⵙⴰⵙⵉⵏ ⵏ ⵉⴱⵕⵍⴰⵎⴰⵏⵏ ⵏ ⴱⵓⵍⵉⴼⵢⴰ ⴷ ⵍⴱⵉⵔⵓ ⴷ ⵍⵉⴽⵡⴰⴷⵓⵔ ⵉⵙⵎⵏⵉⴷⵏ ⴼ ⵜⵉⵍⴰⵡⵜ ⴷ ⵜⵏⴰⵥⴰⵕⵉⵏ ⴷⴰⵜ ⵏ ⵜⵎⵙⴰⵔⵉⵏ ⵏ ⵜⵎⵖⴰⵔⵜ ⴳ ⵉⵡⴰⵏⴽⵏ ⴰⴷ, ⵙⵍⴰⵡⵏ ⴰⴽⴽⵯ ⴳ ⵓⴼⵔⴰⴳ ⵏ ⵜⵎⵖⴰⵔⵉⵏ ⴷ ⵜⵄⵔⵔⵉⵎⵉⵏ ⴷ ⵓⵍⵓⵢ ⵏ ⵜⴳⵏⵙⴰⵙⵜ ⵏ ⵜⵎⵖⴰⵔⵉⵏ ⴳ ⵜⵎⵔⵙⴰⵍ ⵜⵉⵙⵔⵜⴰⵏⵉⵏ ⴷ ⵡⴰⵎⵎⴰⵙⵏ ⵏ ⵜⵖⵜⵙⵜ.
ⴳ ⵜⴽⵛⵛⵓⵎⵜ ⵏⵏⵙ, ⵜⵙⵎⵏⵉⴷ ⵎⴰⵙⵙⴰ ⴼⴰⵟⵉⵎⴰ ⵥⵥⴰⵀⵕⴰ ⵏⴰⵣⵉⵀ, ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵜⴰⵙⴳⵓⵎⵎⴰⵏⵜ ⵜⴰⵏⵙⵙⵉ ⵉⵜⵜⵓⵙⵎⴰⴳⴰⵍⵏ ⵙ ⵢⵉⵙⴽⵉⵍ ⴷ ⵓⵙⴰⵎⵓ, ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵓⴷⵔⴰⵡ ⵏ ⵜⵎⵖⴰⵔⵜ ⴳ ⵜⵓⴷⵔⵜ ⵜⴰⵙⵔⵜⴰⵏⵜ ⴳ ⵜⵎⵔⴰⵡⵉⵏ ⴳⴳⵓⵔⴰⵏⵉⵏ. ⵜⵙⴷⴷⵉⴷ ⵎⴰⵙ ⴷ ⴰⵙⵎⵖⵔ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵓⵣⵓⵣⵣⵔ ⵏ ⵜⴷⵍⵙⴰ ⴷ ⵡⴰⵜⵉⴳⵏ ⵏ ⵢⵉⵙⴽⵉⵍ ⴷ ⵓⵙⴰⵎⵓ ⴳⴰⵏ ⴰⵙⵜⴰⵢ ⵓⵛⵛⵉⵍ ⴼ ⴽⵓ ⴰⵎⵓⵏ ⴰⵎⵖⵔⵉⴱⵉ, ⵎⴰⴷ ⵉⵥⵍⵉⵏ ⵙ ⵜⵏⴱⴰⴹⵜ ⴷ ⵉⴽⴰⴱⴰⵕⵏ ⵉⵙⵔⵜⴰⵏⵏ ⴷ ⵜⵎⴰⴷⴷⴰⵙⵉⵏ ⵡⴰⵔ ⵜⵓⵏⴱⵉⴹⵉⵏ ⴷ ⵡⴰⵎⵓⵏ ⴰⵖⵔⵎⴰⵏ.
ⵜⵙⴰⵡⵍ ⵎⴰⵙⵙⴰ ⵜⴰⵎⴰⵔⵉⵜ ⵅⴰⴷⵉⵊⴰ ⵣⵣⴰⵢⴰⵏⵉ ⴳ ⵜⴳⵓⵔⵉ ⵏⵏⵙ ⵎⴰⵙ ⵜⴳⴰ ⵜⵉⵔⵎⵉⵜ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵜⴰⴷ ⵉⴳⴰⵏ ⴰⵡⵜⵜⴰⵙ ⵉ ⵜⵖⵔⵉ, ⵍⵍⵉⵖ ⴷ ⵎⵍⴰⵏⵜ ⵜⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵓⴳⴰⵔ ⵏⵏⵙⵏⵜ ⴷ ⵉⴷⵔⴰⵡⵏ ⴳ ⵉⵎⴹⴰⴽⴰⵕⵏ ⵀⵎⵎⴰⵏⵉⵏ ⵜⵉⵎⵙⴰⵔⵉⵏ ⵜⵉⵣⵣⵔⴰⴼⵉⵏ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⵜⵉⵏⵉ ⵎⴰⵙ ⴷ ⴰⵍⵜⴰⵖ ⴳ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵢⵉⵙⴽⵉⵍ ⴷ ⵓⵙⴰⵎⵓ ⴰⵔ ⵉⵎⵎⴰⵍ ⵜⴰⴷⵉⵏⴰⵎⵉⵜ ⵜⴰⵏⴰⵎⵓⵏⵜ ⴷ ⵜⵉⵔⴰⵜ ⵏ ⵍⵎⵖⵔⵉⴱ ⵉ ⵓⵙⵉⵥⴹⵕ ⵏ ⵜⵎⵖⴰⵔⵉⵏ ⴷ ⵓⵙⵏⴰⵍ ⵏ ⵓⴷⵔⴰⵡ ⵏⵏⵙⵏⵜ ⴳ ⵜⵓⴷⵔⵜ ⵜⴰⴽⵓⵢⴰⵙⵜ ⵏ ⵜⵎⴰⵣⵉⵔⵜ ⵏⵏⵖ.