ⴰⵙⵏⵓⴱⴳ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵓⴽⴰⴱⴰⵕ ⵏ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴷ ⵓⵙⴷⴷⵉⴷ ⴼ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 26 ⵉⵏⵏⴰⵢⵔ 2021 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⴰⴽⴰⴱⴰⵕ ⵏ ⵡⴰⵎⵓⵏ ⴰⵖⵔⵎⴰⵏ ⴳ ⵉⵍⵍⴰ ⵎⴰⵙⵙ ⵄⴰⴱⴷⵙⵙⵍⴰⵎ ⴷⴷⴰⵎⵓⵏ ⴰⵏⵙⵙⵉⵅⴼ ⵏ ⵜⴳⵔⴰⵡⵜ ⵜⴰⵎⵛⴰⵡⴰⵕⵜ ⴷ ⵡⴰⵎⵓⵏ ⴰⵖⵔⵎⴰⵏ ⴳ ⵓⵙⵖⵉⵎ ⵏ ⵜⵎⵏⴰⴹⵜ ⵟⴰⵏⵊⴰ ⵜⵉⵟⵡⴰⵏ ⵍⵃⵓⵙⵉⵎⴰ, ⴷ ⵎⴰⵙⵙ  Steffen Krogerⴰⴳⵏⴰⵙⴰ ⴰⵙⵓⵍⴰⵏ ⵏ Konrad Adenauer Stifung ⴳ ⵍⵎⵖⵔⵉⴱ, ⴷ ⵎⴰⵙⵙ ⵏⴰⵚⵉⵕ ⵍⴼⵇⵉⵀ ⵏⵏⵊⵔⵉ ⴰⵏⵙⵙⵉⵅⴼ ⵏ ⵜⵎⵔⵙⵍⵜ ⵜⴰⵏⴰⵎⵎⴰⵙⵜ ⵉ ⵓⵎⵢⴰⵡⴰⵙ ⴷ ⵜⴳⵎⵉ, ⴷ ⵡⵉⵢⵢⴰⴹ.

ⵜⵃⴰⴹⵕ ⴳ ⵓⵏⵎⵓⵇⴰⵔ ⴰⴷ ⵎⴰⵙⵙⴰ ⵎⴰⵔⵢⴰⵎⴰ ⴱⵓⵊⵎⵄⴰ ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙⵎⵏⵉⴷⵏ ⴳⵉⵙ ⵉⴳⵎⴰⵎⵏ ⵏ ⵓⴽⴰⴱⴰⵕ ⵜⵉⵔⵎⵉⵜ ⵉⵥⵉⵍⵏ ⵏ ⵓⵎⵢⴰⵡⴰⵙ ⵏⴳⵔ ⵜⴳⵔⴰⵡⵉⵏ ⵜⵜⵓⵙⵜⴰⵢⵏⵉⵏ ⴷ ⵡⴰⵎⵓⵏ ⴰⵖⵔⵎⴰⵏ ⵙ ⵓⵙⵏⴰⵍ ⵏ Konrad Adenauer Stifung ⴳ ⵜⵎⵏⴰⴹⵜ ⵏ ⵟⴰⵏⵊⴰ- ⵜⵉⵟⵡⴰⵏ-ⵍⵃⵓⵙⵉⵎⴰ ⵖ ⵓⵙⴽⵔ ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ ⴷ ⵓⵙⴷⵓⵙ ⵏ ⵓⵏⵏⵓⵕⵥⵎ ⴷ ⵓⵎⵢⴰⵡⴰⴹ ⵏ ⵉⵏⵎⵓⵔⴰⵏ ⵙ ⵓⵙⴽⵔ ⵏ “ⵓⵙⵉⵔⴰ ⵏ ⵓⵏⵎⵓⵔⵉ” ⴳ ⵜⴳⵔⴰⵡⵉⵏ ⵏ ⵜⵎⵏⴰⴹⵜ, ⴷ ⵓⵙⵙⵔⵇⴱ ⵏ ⵜⴷⵉⵎⵓⵇⴰⵔⴰⵟⵉⵜ ⵜⴰⵎⴰⴷⵔⴰⵡⵜ ⵜⴰⴷⵖⴰⵔⴰⵏⵜ.

ⵉⵙⵓⵜⴳ ⵓⴽⴰⴱⴰⵕ ⴰⵏⵏⵓⵕⵥⵎ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵜⵉⵍⴰⵍⵜ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴳ ⵓⵙⴽⵔ ⵏ ⵉⵡⵜⵜⴰⵙ ⵏ ⵜⴳⵎⵉ ⵜⴰⵙⵓⵍⴰⵏⵜ, ⴷ ⵜⵖⵓⵔⵉ ⵉ ⵓⵙⵓⵊⴷ ⵏ ⵓⵙⴰⵜⵉ ⵓⵙⵍⵉⴳ ⵉ ⵓⵙⵎⴰⵜⴰ ⵏ ⵜⵉⵔⵎⵉⵜ ⵏ “ⵓⵙⵉⵔⴰ ⵏ ⵓⵏⵎⵓⵔⵉ” ⴳ ⵜⵙⴳⴳⵉⵡⵉⵏ ⵏ ⵜⴳⵍⴷⵉⵜ, ⵔⴰⴷ ⵉⴳ ⴰⵙⵉⵔⴰ ⵉⴳⴰⵏ ⵢⴰⵏ ⵉ ⵜⵉⴽⴽⵉ ⵏ ⵜⵏⵓⴼⴰ ⵏ ⵜⴳⵔⴰⵡⵉⵏ ⵜⵜⵓⵙⵜⴰⵢⵏⵉⵏ ⵉ ⵉⵏⵎⵓⵔⴰⵏ.

ⴳ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⴳⴰ ⵡⴰⵎⵓⵏ ⴰⵖⵔⵎⴰⵏ “ⵡⴰⵍⵍⵉ ⵉⴹⵎⵏⵏ ⵜⴰⵎⵢⴰⵏⴰⵡⵜ ⵙ ⵜⵉⴷⵜ”, ⵍⵍⵉⵖ ⵉⴱⴷⴷ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⴼ ⵜⵉⵍⴰⵍⵜ ⵏ ⵡⴰⵎⵓⵏ ⴰⵖⵔⵎⴰⵏ ⴳ ⵜⵣⵣⵉⴳⵣⵜ ⵏ ⵓⵙⴽⵓ ⴰⴷⵉⵎⵇⵔⴰⵟⵉ ⴳ ⵜⵎⴰⵣⵉⵔⵜ ⵏⵏⵖ, ⵢⵉⵏⵉ ⵎⴰⵙ ⵉⵙⴽⵔ ⵓⵙⵇⵇⵉⵎ ⴳ ⵜⵡⴰⵍⴰ ⴰⴷ ⵜⴰⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ , ⵉⵙⴽⵔ ⵜⵉⵙⵏⵜⴰⵢⵉⵏ ⵉ ⵓⵙⴷⵓⵙ ⵏ ⵓⵎⵢⴰⵡⴰⴹ ⴷ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ.

ⵉⵙⴰⵡⵍ ⵎⴰⵙⵙ ⵍⵎⴰⵍⴽⵉ ⴼ ⵜⵉⵔⵉⵜ ⵉⴷⵓⵙⵏ ⵉ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴷ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ, ⴷ ⵓⵍⵜⴰⵖ ⵏ ⵓⵙⵇⵇⵉⵎ ⴳ ⵜⴳⵎⵉ ⵜⴰⵙⵓⵍⴰⵏⵜ,” ⴳ ⵜⴽⵛⵎ ⵜⵎⴰⵣⵉⵔⵜ ⵏⵏⵖ ⵙ ⵜⵡⵓⵔⵉ ⵉⴷⵓⵙⵏ”, ⵉⴱⴷⵔ ⴰⵙⵏⵎⴰⵍⴰ ⵏ ⵍⵎⵖⵔⵉⴱ ⵏ ⵓⴳⵔⴰⵡ ⵏ ⵓⵏⵣⵡⵉ ⴳ ⵎⵕⵕⴰⴽⵛ ⴳ 2016 ⴷ ⵜⵣⵡⵉⵔⵉ ⵏⵏⵙ ⵜⴰⵅⴰⵜⴰⵔⵜ ⴳ ⵢⵉⴳⵔ ⵏ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏⵏ.