ⴰⵔⵣⴰⴼ ⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⵉ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵖ ⵜⵙⴳⴰ ⵏ ⵉⴼⴼⵓⵙ
ⵙ ⵓⵣⵣⴳⵉⵔ ⵏ ⵉⵙⵡⴰⵍⴰⵜⵏ ⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴰⵏⵙⵙⵉⵅⴼ ⵢⴰⵜⵜⵓⵢⵏ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⵉⵙⴽⵔ ⵢⴰⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵔⵣⴰⴼ ⵉ ⵉⴼⵔⴷⴰⵙ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵉⴹⴼⵕⵏ ⵜⴰⵙⴳⴰ ⵏ ⵉⴼⴼⵓⵙ ⵏ ⵜⴳⵍⴷⵉⵜ, ⵙⴳ 05 ⵎⴰⵕⵚ 2020.
ⵙ ⵓⵣⵎⵣⵣⵓ, ⵉⴱⴷⴷ ⵓⴽⴰⴱⴰⵕ ⴰⴱⵚⵍⴰⵎⴰⵏⵉ ⵖ ⵜⵎⴷⵉⵏⵜ ⵏ ⵓⴳⴰⴷⵉⵔ ⵃⵎⴰ ⴰⴷ ⵉⵙⴽⵔ ⴰⵔⵣⴰⴼ ⵉ ⵜⵖⵍⴼⵜ ⵏ ⵜⵙⴳⴰ ⵏ ⵉⴼⴼⵓⵙ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⵉⵎⵓⵏ ⴷⵉⴷⵙ ⵎⴰⵙⵙ ⵄⴰⴱⴷⵍⵍⴰⵟⵉⴼ ⵍⵓⴷⵉⵢⵢⵉ, ⴰⵎⴰⵡⵙⴰⵙ ⴰⵎⴰⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⵙⵓⴳⵓⵔⵜ ⵏ ⵓⵎⵣⴰⵖ ⴰⵏⴰⵎⵓⵔ. ⵖⵉ ⴷ ⴰⵖ ⵉⵙⵏⵓⴱⴳ ⵓⵊⵉⵏⵉⵕⴰⵍ ⴷⵓⴽⵓⵕⴹⴰⵕⵎⵉ, ⴰⵏⵙⵙⵉⵅⴼ ⵏ ⵜⵙⴳⴰ ⵏ ⵉⴼⴼⵓⵙ, ⴰⴽⴰⴱⴰⵕ ⴰⴱⵕⵍⴰⵎⴰⵏⵉ ⵉⵙⵎⵓⵏⵏ 35 ⵏ ⵉⵎⵉⵔⵉ ⴷ ⵓⵎⵛⵛⵉⵡⵕ, ⵉⵎⵍⵉ ⴷ ⵖ ⵜⴳⵓⵔⵉ ⵏⵏⵙ ⵜⵓⴳⴳⴰⵙ ⵍⵍⵉ ⵏⵏ ⵜⴳⴳⴰⵏ ⵉⴼⵔⴷⴰⵙ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵉⵍⵍⴰⵏ ⵖ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ, ⵖ ⵓⵃⵟⵟⵓ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⵖ ⵜⵙⴳⴰ. ⵢⵉⵏⵉ ⵎⴰⵙ ⵔⴰⴷ ⵢⴰⵡⵙ ⵓⵔⵣⴰⴼ ⵉ ⵓⴽⴰⴱⴰⵕ ⴰⴱⵕⵍⴰⵎⵏⵉ ⴰⴷ ⵉⵙⵙⵏ ⵜⵉⵎⵙⵓⵜⴰⵍ ⵖ ⴷⴷⵔⵏ ⵉⵙⵔⴷⴰⵙⵏ ⵉⵎⵖⵔⵉⴱⵉⵢⵏ ⴷ ⵜⵎⵙⴽⵉⵔⵜ ⵏⵏⵙⵏ ⵉⵣⴷⵉⵏ ⴷ ⵓⵎⵣⴰⵖ ⵏ ⵜⴰⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ.
ⵖⵎⴽ ⵍⵍⵉ ⵉⴹⴼⵕ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⵢⴰⵜ ⵜⴽⵛⵛⵓⵎⵜ ⴼ ⵜⵎⵙⴽⵉⵔⵉⵏ ⵏ ⵉⴼⵔⴷⴰⵙ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵖ ⵜⵙⴳⴰ ⵏ ⵉⴼⴼⵓⵙ ⵖ ⵉⴳⵔⴰⵏ ⵏ ⵓⵙⵎⵓⵜⵜⴳ, ⴰⵏⵀⵍⵍⴰ, ⴰⵙⵙⴰⵢ ⵏ ⵉⴼⵔⴷⴰⵙ, ⴰⵙⴳⴼⴰⵔ, ⵓⴽⵓⵙ ⵏ ⵍⵎⵉⵏⴰⵜ. ⵜⵙⴰⵡⵍ ⵜⴽⵛⵛⵓⵎⵜ ⴰⴷ ⵓⵍⴰ ⴼ ⵜⵎⴰⴷⵔⴰⵡⵜ ⵉⵍⴰⵏ ⴰⵜⵉⴳ ⵖ ⵓⵙⵡⵉⵔ ⴰⴳⵔⴰⵖⵍⴰⵏ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵖ ⴽⵓ ⵜⵉⵡⵡⵓⵔⵉⵡⵉⵏ ⵏ ⵓⵃⵟⵟⵓ ⵏ ⵓⴼⵔⴰ ⵍⵍⵉ ⵙⵏⵎⴰⵍⴰⵏⵜ ⵜⵎⵜⵜⴰ ⵉⵎⵓⵏⵏ.
ⴷⴼⴼⵉⵔ ⵏ ⵎⴰⵢⴰ ⴷ, ⵉⴽⴽⴰ ⴷ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵎⵎⴰⵙ ⴰⵙⵔⴷⴰⵙ ⵏ ⵜⵙⵏⵉⵊⵊⵉⵜ ⴷ ⵓⴼⵍⴰⵢ ⵉ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⵜⵜⵓⴽⴼⵉⵏ ⵉⵙⵙⵉⵙⴼⵉⵡⵏ ⴼ ⵜⵏⵓⴼⴰ ⵏⵏⵙ ⴷ ⵜⵎⵙⴽⴰⵔⵉⵏ ⵏⵏⵙ. ⵖⵎⴽ ⵍⵍⵉ ⴷ ⵉⴽⴽⴰ ⵓⴽⴰⴱⴰⵕ ⴰⴷ ⴰⵎⵎⴰⵙ ⵏ ⵓⵙⵏⴰⵍ ⵉⴹⴼⵕⵏ ⵉⴳⵔ ⴰⵙⵔⴷⴰⵙ ⵏ ⵙⵙⵎⴰⵕⴰ ⵖ ⵜⵙⴳⴰ ⵏ ⴼⵔⵉⵔⵉⵏⴰⵜ ⵢⴰⴳⴳⵓⴳⵏ ⵙ 47 ⴽⵍⵎ ⴼ ⵜⵎⴷⵉⵏⵜ. ⴼⴽⴰⵏ ⵉⴼⵙⵢⴰⵏⵏ ⴰⵜⵜⵓⵢⵏⵉⵏ ⵖ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵉⵙⵙⵉⵙⴼⵉⵡⵏ ⴼ ⵡⴰⵎⵎⴰⵙ ⴰⴷ ⵏ ⵓⵙⵏⴰⵍ ⴷ ⵉⵎⴰⵙⵙⵏ ⵍⵍⵉ ⴳⵉⵙ ⵉⵍⵍⴰⵏ ⵉ ⵓⵎⵣⴰⵖ ⵏ ⵜⴰⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ, ⵙ ⵜⵉⵍⵉⵜ ⵏ ⵎⴰⵙⵙ ⵄⴰⴱⴷⵍⵍⴰⵟⵉⴼ ⵍⵓⴷⵉⵢⵢⵉ, ⴰⵎⴰⵡⵙⴰⵙ ⴰⵎⴰⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⵙⵓⴳⵓⵔⵜ ⵏ ⵓⵎⵣⴰⵖ ⴰⵏⴰⵎⵓⵔ. ⵖⵎⴽ ⵍⵍⵉ ⵉⴱⴷⴷ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴼ ⵜⵎⵙⵓⵜⴰⵍ ⵏ ⵜⵓⴷⵔⵜ ⵏ ⵉⴼⵔⴷⴰⵙ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵉⴳⴰⵏ ⵜⵉⵎⵓⵣⴰⵍ ⵉⵎⵎⴰⵖⵏ ⴼ ⵜⵎⵙⴰⵔⵉⵏ ⵜⵉⵏⴰⵎⵓⵔⵉⵏ ⵜⵉⵎⵙⴼⵓⵥⵥⵓⵕⵉⵏ, ⴷⴼⴼⵉⵔ ⵎⴰ ⴷ ⵉⴽⴽⴰ ⴷⴰⵔ ⵢⴰⵜ ⵜⵔⴰⴱⴱⵓⵜ ⵏ ⵓⵙⵏⴰⵍ ⴰⵜⴰⴽⵜⵉⴽⵉ ⵏ ⵜⴽⴰⴱⵔⵜ ⵏ ⵉⵎⵜⵔⴰⵙ.
ⵉⵥⵍⵉ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵔⵣⴰⴼ ⵏⵏⵙ ⵏ ⵡⴰⵙⵙ ⵏ ⵓⴽⵡⴰⵙ 06 ⵎⴰⵕⵚ 2020 ⵉ ⵜⵎⴷⵉⵏⵜ ⵏ ⵡⴰⵡⵙⵔⴷ, ⵉⴳ ⴰⵣⵎⵣⵣⵓ ⵖ ⵉⵙⵙⵓⵜⴳ ⵓⴽⴰⴱⴰⵕ ⵙ ⴽⵉⴳⴰⵏ ⵜⵓⴳⴳⴰⵙ ⵎⵇⵇⵓⵔⵏⵉⵏ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵖ ⵢⵉⴳⵔ ⵏ ⵓⵎⵣⴰⵖ ⵏ ⵜⴰⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ, ⵖⵎⴽ ⴰⵏⵏ ⴰⴼ ⵏⵏ ⵉⴱⵉⴷⴷ ⵖ ⵡⴰⵎⵎⴰⵙ ⵏ ⵓⵙⵏⴰⵍ ⵉⵍⵍⴰⵏ ⵖ ⵡⴰⵡⵙⵔⴷ, ⵙ ⵜⴰⵎⵓⵏⵜ ⴷ ⵓⵎⴰⵡⵙⴰⵙ ⴰⵎⴰⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⵙⵓⴳⵓⵔⵜ ⵏ ⵓⵎⵣⴰⵖ ⴰⵏⴰⵎⵓⵔ, ⵉⵙⵙⴼⵍⴷ ⵖⵉ ⴷ ⵉ ⵉⵙⵙⵉⵙⴼⵉⵡⵏ ⵏ ⵉⴼⵙⴰⵢⵏⵏ ⴰⵜⵜⵓⵢⵏⵉⵏ ⴼ ⵜⵎⵙⴽⵔⵜ ⵏ ⵡⴰⵎⵎⴰⵙ ⴰⴷ ⴷ ⵉⵎⴰⵙⵙⵏ ⵍⵍⵉ ⴳⵉⵙ ⵉⵍⵍⴰⵏ ⵉ ⵓⵎⵣⴰⵖ ⵏ ⵜⴰⵢⴰⵏⴰⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ.
ⵖ ⵓⵎⵏⴰⴹ ⴰⴷ, ⵙⵙⵓⵜⴳⵏ ⵉⴳⵎⴰⵎⵏ ⵏ ⵓⴽⴰⴱⴰⵕ, ⵖ ⵜⵙⴳⵓⵔⵉⵡⵉⵏ ⵏⵏⵙⵏ ⵉ ⵍⴰⵎⴰⴱ, ⵉⵙⴼⴰⵙⴽⴰⵜⵏ ⵏ ⵉⵙⵔⴷⴰⵙⵏ ⵉⵎⵖⵔⵉⴱⵉⵢⵏ ⴷ ⵜⵜⵓⴳⴳⴰⵙ ⵏⵏⵙⵏ ⵍⵍⵉ ⵏⵏ ⵜⴳⴳⴰⵏ ⵖ ⵓⵎⵏⵉⴷ ⵏ ⵓⵎⵣⴰⵖ ⵏ ⵜⵎⴰⵣⵉⵔⵜ ⵎⴳⴰⵍ ⴽⵓ ⵜⵉⵔⵎⵉⵜⵉⵏ ⵏ ⵜⴰⴷⵓⵜ ⴼ ⵜⴰⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ.
ⵢⵉⵏⵉ ⵎⴰⵙⵙ ⵢⵓⵙⵓⴼ ⵖⵔⴱⵉ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⵉⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ, ⵎⴰⵙ ⵉⵥⵕⴰ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⵖ ⵡⴰⵡⵙⵔⴷ ⵜⵉⵎⵙⵓⵜⴰⵍ ⴱⴰⵀⵔⴰ ⵉⴼⵓⵍⴽⵉⵏ ⵖ ⴷⴷⵔⵏ ⵉⵙⵔⴷⴰⵙⵏ ⵙ ⵜⵡⵏⴳⵉⵎⵉⵏ ⴰⵜⵜⵓⵢⵏⵉⵏ ⵉ ⵓⵙⴼⴰⵙⴽⴰ ⴼ ⵜⵎⴰⵣⵉⵔⵜ, ⵢⵉⵏⵉ:«ⴰⵔⵣⴰⴼ ⵏⵏⵖ ⵏ ⵡⴰⵙⵙ ⴰⴷ ⵉⴳⴰ ⴰⵊⵎⵉⵍ ⵉ ⵉⵎⴰⵏⵏ ⵏ ⵡⵉⵍⵍⵉ ⵙⴼⴰⵙⴽⴰⵏⵉⵏ ⵜⵓⴷⵔⵜ ⵏⵏⵙⵏ ⴼ ⵜⵎⵓⵔⵜ, ⵜⴳ ⴰⵙⵏⴰⵍ ⵉ ⵉⵙⵔⴷⴰⵙⵏ ⵉⵍⵍⴰⵏ ⵖ ⵜⵙⴳⴳⵉⵡⵉⵏ ⴰⴷ».
ⵉⵎⵍⵉ ⴷ ⵎⴰⵙⵙ ⵖⵔⴱⵉ, ⵖ ⵜⵙⴳⵓⵔⵉ ⵏⵏⵙ, ⵎⴰⵙ ⵉⴱⴷⴷ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴼ ⵉⵎⴰⵙⵙⵏ ⵙⵜⴰⵡⵀⵎⵎⴰⵏⵉⵏ ⵉⵍⵍⴰⵏ ⵖ ⵡⴰⵎⵎⴰⵙ ⴰⵙⵔⴷⴰⵙ ⵏ ⵜⵙⵏⵉⵊⵊⵉⵜ ⴷ ⵓⴼⵍⴰⵢ ⵉ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵖ ⵓⴳⴰⴷⵉⵔ, ⵉⵙⵙⵓⵜⴳ ⵙ ⵜⴽⵛⵛⵓⵎⵜ ⵉⵜⵜⵓⴼⴽⴰⵏ ⴼ ⵜⵉⵍⴰⵍ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ. ⵖ ⵜⵙⴳⴰ ⵏⵏⵙ, ⵉⵙⵙⵓⵜⴳ ⵎⴰⵙⵙ ⵎⵓⵃⴰⵎⵎⴰⴷ ⵕⴰⵥⵎⴰ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵉⵡⵜⵜⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵙⴳⴳⵉⵡⵉⵏ ⵉⵜⵜⵢⴰⵎⴰⵥⵏ, ⵖ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴰⵔⵣⴰⴼ ⴰⴷ. ⵢⵉⵏⵉ ⵎⴰⵙ ⵉⴳⴰ ⵓⵔⵣⴰⴼ ⴰⴷ ⴰⵣⵎⵣⵣⵓ ⵉ ⵓⵙⵙⵓⵜⴳ ⵏ ⵜⵉⵍⴰⵍⵜ ⵏ ⵉⵙⵔⴷⴰⵙⵏ ⵉⵍⵍⴰⵏ ⵖ ⵉⵡⵜⵜⴰ ⴱⴷⴷⵏ ⴼ ⵓⵃⵟⵟⵓ ⵏ ⵜⵎⵓⵔⵜ ⵃⵎⴰ ⴰⴷ ⴳⵉⵙ ⵢⵉⵍⵉ ⵓⵔⴳⴳⵉⴳ ⴷ ⵜⴳⵎⵉ ⵜⴰⴷⵎⵙⴰⵏⵜ, ⵢⵉⵍⵉ ⵓⵙⴷⵓⵙ ⵏ ⵜⴷⵉⵏⴰⵎⵉⵜ ⵉⵍⵍⴰⵏ ⵖ ⵜⵎⴰⵣⵉⵔⵜ.
ⵖ ⵓⵎⵏⵉⴷ ⵏⵏⵙ, ⵉⵏⵏⴰ ⵎⴰⵙⵙ ⵄⴰⵍⵍⴰⵍ ⵍⵄⵎⵕⴰⵡⵉ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⵉⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ, ⵎⴰⵙ ⵢⵓⵊⵊⴰ ⵓⵔⵣⴰⴼ ⴰⴷ ⴰⴽⴰⴱⴰⵕ ⴰⵎⵖⵔⵉⴱⵉ ⴰⴷ ⵉⴱⴷⴷ ⴼ ⵜⵎⵙⵓⵜⴰⵍ ⵏ ⵜⵓⴷⵔⵜ ⵏ ⵉⵙⵔⴷⴰⵙⵏ ⵉⵎⵖⵔⵉⴱⵉⵢⵏ ⵖ ⵜⵙⴳⴳⵉⵡⵉⵏ ⴰⴷ, ⵖⵎⴽ ⴰⵏⵏ ⴷ ⵓⵟⵟⴰⴼⴰⵏⵥⵕ ⵏⵏⵙⵏ ⵢⴰⵜⵜⵓⵢⵏ ⴷ ⵡⴰⵜⵉⴳ ⵎⵇⵇⵓⵔⵏ ⵏ ⵜⵡⵓⵔⵉ ⵏⵏⵙⵏ ⴼ ⵓⵎⵣⴰⵖ ⵏ ⵜⴰⵎⵓⵔⵜ.
ⵖ ⵜⵙⴳⴰ ⵏⵏⵙ, ⵜⵎⵍⴰ ⴷ ⵎⴰⵙⵙⴰ ⴼⴰⵟⵉⵎⴰ ⵥⵥⴰⵀⵕⴰ ⵍⵢⴰⵃⵢⴰⵡⵉ, ⵜⴰⴳⵎⴰⵎⵜ ⵏ ⵜⵔⴰⴱⴱⵓⵜ ⵏ ⵜⴰⵎⵓⵏⵜ ⵜⴰⵎⵖⵔⵉⴱⵉⵜ ⵉ ⵜⵡⵓⵔⵉ ⵖ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵎⴰⵙ ⵉⴱⴷⴷ ⵓⴽⴰⴱⴰⵕ ⴰⵎⵖⵔⵉⴱⵉ ⴼ ⵜⵎⵙⵓⵜⴰⵍ ⵉⵥⵍⵉⵏ ⴷ ⵜⵓⴷⵔⵜ ⵏ ⵉⵙⵔⴷⴰⵙⵏ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⴷ ⵜⵓⴳⴳⴰⵙ ⵍⵍⵉ ⵏⵏ ⵜⴳⴳⴰⵏ ⵃⵎⴰ ⴰⴷ ⵜⵉⵍⵉ ⵜⵏⴼⵔⵓⵜ ⴷ ⵓⵙⴱⴷⴷⵉ ⵏ ⵜⵉⵔⵎⵉⵜⵉⵏ ⵏ ⵡⴰⵄⴷⴰⵡⵉⵏ ⵏ ⵜⴰⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ, ⵖⵎⴽ ⴰⵏⵏ ⴷ ⵓⵙⴱⴷⴷⵉ ⵏ ⵓⵙⵖⵏⵣⵉ ⵖ ⵉⵙⴷⵓⵀⴷⵓⵜⵏ.
ⵉⵏⵏⴰ ⵎⴰⵙⵙ ⵄⴰⴱⴷⵍⵡⴰⵃⴷ ⵅⴰⵔⴱⵓⵛ, ⴰⴳⵎⴰⵎ ⵏ ⵜⵔⴰⴱⴱⵓⵜ ⵏ ⵓⴳⵔⴰⵡ ⴰⴷⵙⵜⴰⵔ, ⵎⴰⵙ ⵉⴳⴰ ⵓⵔⵣⴰⴼ ⴰⴷ ⵢⴰⵏ “ⵓⵔⵣⴰⴼ ⵏ ⵓⵙⵏⴰⵍ ⴷ ⵓⴱⴷⴷⴰⴷ” ⴷ ⵜⴰⴳⴳⴰⵍⵉⵏ ⴰⴷ ⵉⵍⵍⴰⵏ ⵖ ⵉⵣⵔⵉⵔⵉⴳⵏ ⵉⵎⵣⵡⵓⵔⴰ ⵏ ⵓⵎⵣⴰⵖ ⵏ ⵜⴰⵎⵓⵔⵜ, ⵉⴳ ⵓⵍⴰ ⴰⵣⵎⵣⵣⵓ ⵏ ⵜⵓⵙⵙⵏⴰ ⵏ ⵜⵓⴷⵔⵜ ⵏⵏⵙⵏⵜ ⵜⴰⴽⵓⵢⴰⵙⵜ.
ⵖ ⵜⵙⴳⴰ ⵏⵏⵙ, ⵉⵏⵏⴰ ⵎⴰⵙⵙ ⵄⴰⴱⴷⵍⵍⴰⵟⵉⴼ ⵓⵄⵎⵎⵓ, ⴰⴳⵎⴰⵎ ⵏ ⵜⵔⴰⴱⴱⵓⵜ ⵏ ⵡⴰⵍⴰⵢ ⴷ ⵜⵙⵔⵎⵓⵜⵏ ⵖ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵎⴰⵙ ⵉⵥⴹⴰⵕ ⵓⵔⵣⴰⴼ ⴰⴷ ⴰⴷ ⵉⵎⵍ ⵜⴰⵡⵓⵔⵉ ⵍⵍⵉ ⵙⴽⴰⵔⵏⵜ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵖ ⵜⵎⵏⴰⴹⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ, ⵉⵙⵙⵓⵜⴳ ⵖ ⵓⵎⵏⵉⴷ ⴰⴷ ⵙ ⵜⵓⴳⴳⴰⵙ ⵎⵇⵇⵓⵔⵏⵉⵏ ⵍⵍⵉ ⵏⵏ ⵜⴳⴳⴰⵏⵜ.
ⵉⴽⴽⴰ ⴷ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⵓⵍⴰ ⴰⵎⵎⴰⵙ ⵏ ⵓⵙⴰⵏⵓⵏ ⵏ ⵡⴰⵡⵙⵔⴷ ⵏ ⵉⴳⵔ ⵏ ⵡⴰⴷⵉ ⴷⴷⴰⵀⴰⴱ ⵉⴹⴼⵕⵏ ⵉ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⵜⵜⵓⴽⴼⵉⵏ ⵉⵙⵙⵉⵙⴼⵉⵡⵏ ⴼ ⵜⵎⵙⴽⵉⵔⵉⵏ ⵏⵏⵙ, ⵙⵍⴰⵡⴰⵏ ⴰⵢⵍⵍⵉ ⵉⵥⵍⵉⵏ ⵙ ⵓⵙⵏⵎⴰⵍⴰ ⵏ ⵜⵙⵓⵜⵍⵉⵏ ⵏ ⵓⵙⴰⵏⵓⵏ ⴰⴷⵙⵍⴰⵏ ⵉⵛⵛⴰⵔⵏ ⵉⵚⴰⵃⴰⵏ ⵉ ⵉⵙⵔⴷⴰⵙⵏ ⵉⵎⴰⵢⵏⵓⵜⵏ, ⴷ ⵉⵙⴰⵏⵓⵏⵏ ⵓⵍⴳⵉⵏⵏ ⵉ ⵉⴼⵙⵢⴰⵏⵏ ⵎⵥⵥⵉⵏⵉⵏ ⵉⴹⴼⵕⵏ ⵉⴳⵔ ⴰⵙⵔⴷⴰⵙ ⵏ ⵡⴰⴷⵉ ⴷⴷⴰⵀⴰⴱ.
ⴰⵙⴰⴳⵎ: ⵜⴰⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵜⴰⵏⵖⵎⴰⵙⵜ, ⵙ ⵓⵙⴳⵣⵍ.