ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵙⵏⵓⴱⴳ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⴰⵎⵓⵏⵜ ⵏ ⵍⵎⵖⴰⵔⵉⴱ ⴷ ⵓⵙⵓⵜⴳ ⵏ ⵜⵙⵏⵜⴰⵢⵜ ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⴼ ⵓⵙⵉⵜⵜⵉ ⵏ ⵜⵎⵓⴽⵔⵉⵙⵉⵏ ⵊⴰⵔ ⵍⵎⵖⵔⵉⴱ ⴷ ⴷⴷⵣⴰⵢⵔ
ⵖ ⵓⵎⵏⴰⴹ ⵏ ⵜⴷⵉⵏⴰⵎⵉⵜ ⵍⵍⵉ ⴷ ⵢⵉⵡⵉ ⵉⵏⴰⵡ ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵙ ⵜⵎⵍⴷⴰ ⵏ ⵓⴽⵜⴰⵢ ⵡⵉⵙ 43 ⵏ ⵜⵡⴰⴷⴰ ⵜⴰⵣⴳⵣⴰⵡⵜ, ⵉⵙⴽⵔ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵎⴹⴰⴽⴰⵕⵏ ⴷ ⵎⴰⵙⵙ ⵟⵟⴰⵢⵢⵉⴱ ⵍⴱⴽⴽⵓⵛ ⴰⵏⴼⵍⵓⵙ ⴰⵎⴰⵜⴰⵢ ⵏ ⵜⴰⵎⵓⵏⵜ ⵏ ⵜⵎⵉⵣⴰⵔ ⵏ ⵍⵎⴰⵖⴰⵔⵉⴱ ⴰⵙⵙ ⵏ ⵡⴰⵢⵏⴰⵙ 12 ⵏⵓⵡⵏⴱⵉⵔ 2018 ⵖ ⵓⵙⵖⵉⵎ ⵏ ⵓⵙⵇⵇⵉⵎ.
ⵙ ⵓⵣⵎⵣⵣⵓ ⴰⴷ, ⵉⵙⵓⵜⴳ ⵎⴰⵙⵙ ⴰⵏⴼⵍⵓⵙ ⴰⵎⴰⵜⴰⵢ ⵏ ⵜⴰⵎⵓⵏⵜ ⵏ ⵜⵎⵉⵣⴰⵔ ⵏ ⵍⵎⴰⵖⴰⵔⵉⴱ ⵜⴰⵙⵏⵜⴰⵢⵜ ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⵃⵎⴰ ⴰⴷ ⵢⵉⵍⵉ ⵓⵙⵉⵜⵜⵉ ⵏ ⵜⵎⵓⴽⵔⵉⵙⵉⵏ ⵊⴰⵔ ⵍⵎⵖⵔⵉⴱ ⴷ ⴷⴷⵣⴰⵢⵔ, ⵢⵉⵏⵉ : « ⵜⴰⵙⵏⵜⴰⵢⵜ ⵜⴰⴳⵍⴷⴰⵏⵜ ⵓⵔ ⵜⴳⵉ ⵖⴰⵙ ⵢⴰⵜ ⵜⵉⵔⴰⵜ ⵉⵥⵉⵍⵏ, ⵍⵍⴰⵏⵜ ⴳⵉⵙ ⵓⵍⴰ ⵜⵙⵓⵎⴰⵔ ⵏ ⵜⵡⵓⵔⵉ ⵍⵍⵉ ⵔⴰⴷ ⵢⴰⵡⵉ ⵙ ⵓⵎⵙⴰⵡⴰⵍ ⴰⵙⵉⵏⵔⴰⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⴳⴰⵏⵉⵏ ⴰⴹⵊⴰⵕⵏ”, ⵉⵎⵍⵉ ⴷ ⴰⵏⴰⵔⵓⵣ ⵏⵏⵙ ⴰⴷ « ⵙⵡⵓⵔⵉⵏ ⵡⵉⵍⵍⵉ ⵜⵀⵎⵎⴰ ⵜⵙⵓⵎⵔⵜ ⴰⴷ ⵃⵎⴰ ⴰⴷ ⵢⵉⵍⵉ ⵓⵙⵎⵀⵍ ⵏ ⵜⵙⵏⵜⴰⵢⵜ ⴰⴷ, ⵙⴽⵔⵏⵜ ⵜⵢⴰⴼⵓⵜⵉⵏ ⵏⵏⵙ ⵉⵏⴰⵔⵓⵣⵏ ⵏ ⵉⵎⴰⴷⴰⵏⵏ ⵏ ⵜⵎⵉⵣⴰⵔ ⴰⴷ ».
ⵉⵙⵉⵙⴼⵉⵡ ⴷ ⵎⴰⵙⵙ ⵍⴱⴽⴽⵓⵛ ⵎⴰⵙ ⵔⴰⴷ ⵉⴼⴽ ⵓⵎⵢⴰⴷⴰⵙ ⴰⵎⵖⵔⵉⴱⵉ-ⴰⴷⵣⴰⵢⵔⵉ ⵢⴰⵏ ⵓⵏⵜⵓ ⵉⴷⵓⵙⵏ ⵉ ⵜⴰⵎⵓⵏⵜ ⵏ ⵜⵎⵉⵣⴰⵔ ⵏ ⵍⵎⴰⵖⴰⵔⵉⴱ, ⵢⵉⵏⵉ ⵎⴰⵙ ⵜⵎⵎⴰⴳⴳⴰⵔ ⵜⴼⵔⴽⴰ ⴰⴷ ⴷ ⵓⵙⴼⵓⴳⵍⵓ ⵏ ⵓⴽⵜⴰⵢ ⵡⵉⵙ 30 ⵏ ⵜⵍⴰⵍⵉⵜ ⵏ ⵜⴰⵎⵓⵏⵜ ⴰⴷ ⴷ ⵓⴽⵜⴰⵢ ⵡⵉⵙ 60 ⵏ ⵓⵚⵉⵡⴹ ⵏ ⵟⴰⵏⵊⴰ ⵍⵍⵉ ⵉⵖⵔⴰⵏ ⴰⴷ ⵜⵉⵍⵉ ⵜⵓⵚⴽⴰ ⵏ ⵢⴰⵜ ⵜⵙⴳⴰ ⵜⴰⵎⴰⵖⴰⵔⵉⴱⵉⵜ ⵜⴰⴷⵉⵎⵓⵔⴰⵟⵉⵜ ⵉⵎⵢⴰⵡⴰⵙⵏ. ⵢⵉⵏⵉ ⵎⴰⵙ ⴱⴰⵀⵔⴰ ⵜⵥⵥⴰⵢ ⵜⴰⴳⴳⵯⴰⵜ ⵍⵍⵉⵖ ⵓⵔ ⵜⵍⵍⵉ ⵜⴰⵎⵓⵏⵜ ⵏ ⵜⵎⵉⵣⴰⵔ ⵜⵉⵎⴰⵖⴰⵔⵉⴱⵉⵢⵉⵏ, ⴰⵢⵍⵍⵉ ⵏⵏ ⵉⵙⵉⵜⵜⵉ ⵏⵏ ⴼ ⵉⵡⴰⵏⴽⵏ ⵏ ⵜⵙⴳⴰ ⴰⴷ ⵉⵍⴰⵏ ⵏ ⵜⴳⵎⵉ ⴷ ⵓⵙⵡⵓⵔⵉ ⵏ ⵉⵄⵔⵔⵉⵎⵏ, ⵢⵉⵏⵉ:« ⵥⴹⴰⵕⵏⵜ ⴰⴽⴽⵯ ⵙⵎⵎⵓⵙⵜ ⵜⵎⵉⵣⴰⵔ ⵏ ⵍⵎⴰⵖⴰⵔⵉⴱ ⴰⴷ ⴰⵙⵏⵜ ⵉⵚⵉⵃⵉ ⵚⴰⵃⴰ ⵖ ⵓⴳⵏⵙ ⵏ ⵜⴰⵎⵓⵏⵜ ⵜⴰⵎⴰⵖⴰⵔⵉⴱⵉⵜ».
ⵖ ⵓⵎⵏⵉⴷ ⵏⵏⵙ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⵙⵉⵙⴼⵉⵡ ⵉⵏⴰⵡ ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⴰⴷⴷⴰⴷⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵉⵎⵍ ⵜⵉⵔⴰⵜ ⴰⴷ ⵓⵙⵜⵡⵓⵏⵜ ⵜⵣⴷⴰⵢⵉⵏ ⵏ ⵜⵎⴰⵣⵉⵔⵜ ⵏⵏⵖ ⴰⴽⴷ ⴷⴷⵣⴰⵢⵔ, ⵢⵉⵏⵉ ⵎⴰⵙ ⵉⵍⵍⴰ ⵓⵙⵓⵜⴳ ⵏ ⵜⵓⵏⵥⵉⵥⵜ ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⴷ ⵓⵎⵏⴰⴷ ⵏⵏⵙ ⵉⴷⵔⴰⵏ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵍⵍⴰⵏⵜ ⴽⵉⴳⴰⵏ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⴷⴷⵣⴰⵢⵔ ⴰⵎ: ⴰⵎⵣⵔⵓⵢ, ⵜⴰⵊⵢⵓⵖⵔⴰⴼⵉⵜ, ⴰⵙⴳⴷ, ⵜⵓⵜⵍⴰⵢⵜ.
ⵉⵙⵡⴰⵍ ⵎⴰⵙⵙ ⵍⵎⴰⵍⴽⵉ ⵓⵍⴰ ⴼ ⵓⵖⵉⵍⵓⴼ ⵏⵏⵙ ⵍⵍⵉⵖ ⵜⴱⵉⴷⴷ ⵜⵡⵓⵔⵉ ⵜⴰⵎⴰⵖⴰⵔⵉⴱⵉⵜ ⵉⵛⵛⴰⵔⵏ, ⵢⵉⵏⵉ: «ⵉⵇⵇⴰⵏ ⴷ ⴰⴷ ⵉⵣⵣⵉⴳⵣ ⵓⴽⴰⴱⴰⵕ ⴰⵎⴰⵖⴰⵔⵉⴱⵉ ⵙⵍⴰⵡⴰⵏ ⴰⴽⴽⵯ ⵖ ⵓⵣⵎⵣ ⴰⴷ ⵏ ⵜⵙⵎⴰⴹⴰⵍⵜ ⵍⵍⵉⵖ ⵉⴱⴷⴷ ⵓⵙⵉⴷⴼ ⴰⴷⴰⵎⵙⴰⵏ ⴼ ⵓⵎⵢⴰⵡⴰⵙ». ⵉⵍⵇⵎ ⵎⴰⵙ ⴷ ⵉⵇⵇⴰⵏ ⴰⴷ ⵎⵙⴰⵡⴰⵍⵏⵜ ⵜⵎⵉⵣⴰⵔ ⵜⵉⵎⴰⵖⴰⵔⵉⴱⵉⵢⵉⵏ ⵏⴳⵔⴰⵜⵙⵏⵜ ⵙ ⵜⵖⴰⵔⴰⵙⵜ ⵜⵓⵍⴳⵉⵏⵜ ⵖⵎⴽ ⵍⵍⵉ ⵎⵙⴰⵡⴰⵍⴰⵏⵜ ⴷ ⵓⵕⵓⴱⴱⴰ.