ⵉⵙⵏⵓⴱⴳ ⵎⴰⵙⵙ ⵃⴰⵙⴰⵏ ⴱⵏ ⵄⵓⵎⴰⵕ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵏⵙⵙⵉⵅⴼ ⵏ ⵜⵎⵔⵙⵍⵜ ⵜⴰⴼⵉⵏⵍⴰⵏⴷⵉⵜ Martti Ahtisaari Peace Foundation

ⵉⵙⵏⵓⴱⴳ ⵎⴰⵙⵙ ⵃⴰⵙⴰⵏ ⴱⵏ ⵄⵓⵎⴰⵕ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ, ⴰⴽⵕⴰⵙ 16 ⵏⵓⵡⴰⵏⴱⵉⵔ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ ⴰⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵜⵎⵔⵙⵍⵜ ⵜⴰⴼⵉⵏⵍⴰⵏⴷⵉⵜ (Martti Ahtisaari Peace Foundation ) ⵎⴰⵙⵙ Janne Taalas ⵉⵍⵍⴰⵏ ⴳ ⵓⵔⵣⴰⴼ ⵏ ⵜⵡⵡⵓⵔⵉ ⵉ ⵍⵎⵖⵔⵉⴱ.  

ⴰⵏⵎⵓⵇⵇⴰⵔ ⴰⴷ ⵉⵃⴰⴹⵕ ⴳⵉⵙ ⵎⴰⵙⵙ ⴰⵎⴰⵔⵉ ⵉⴱⵕⴰⵀⵉⵎ ⵅⴰⵢⵢⵉⵙⴳ ⵜⵔⴰⴱⴱⵓⵜ ⵜⴰⵏⴰⵎⵓⵔⵜ ⵏ ⵉⵏⵙⵉⵎⴰⵏⵏ ⴷ ⵎⴰⵙⵙ ⴰⵎⴰⵔⵉ ⴰⵎⵉⵏ ⵍⴱⵇⵇⴰⵍⵉ ⵟⴰⵀⵉⵕⵉ ⵙⴳ ⵜⵔⴰⴱⴱⵓⵜ ⵜⴰⵙⵔⵎⵓⵏⵜ, ⵉⵙⵏⵓⴱⴳ ⴳⵉⵙ ⵎⴰⵙⵙ ⴱⵏ ⵄⵓⵎⴰⵕ ⵙ ⵓⴽⴰⴱⴰⵕ ⵏ ⴼⵉⵏⵍⴰⵏⴷⴰ, ⵢⵉⵏⵉ ⵎⴰⵙ ⵉⴳⴰ ⵓⵏⵎⵓⵇⵇⴰⵔ ⴰⴷ ⵜⴰⵎⵍⴷⴰ ⵏ ⵓⵙⴽⵔ ⵏ ⵓⵎⵢⴰⵡⴰⴹ ⵊⴰⵔ ⵜⵉⵎⵉⵣⴰⵔ ⵜⵉⵎⴷⴷⵓⴽⴽⵯⴰⵍ. 

ⵉⵙⴷⴷⵉⴷ  ⵎⴰⵙⵙ ⵃⴰⵙⴰⵏ ⴱⵏ ⵄⵓⵎⴰⵕ ⴼ ⵓⵙⵕⵚⵓ ⵏ ⵍⵎⵖⵔⵉⴱ ⵏ ⵓⵡⴰⵏⴽ ⵏ ⵜⵎⵔⵙⴰⵍ  ⴷ ⵜⴷⵉⵎⵓⵇⵔⴰⵟⵉⵜ ⴷ ⵜⵎⵏⵏⴰⵡⵜ ⵜⴰⵙⵔⵜⴰⵏⵜ ⴷ ⵜⵎⵢⵉⴷⵉⵔⵜ ⵊⴰⵔ ⵉⵙⴳⴷⵏ ⴷ ⵜⵏⴰⵔⴰ ⵉⵥⵉⵍⵏ ⴳ ⵓⴳⵍⴷⵓⵏ ⵏ ⵉⵎⵓⵎⵎⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵉⵖⵔ ⵉ ⵉⵡⴰⵏⴽⵏ ⵏ ⵉⵥⵥⵍⵎⴹ ⵏ ⵓⵕⵓⴱⴱⴰ ⴷ ⴼⵉⵏⵍⴰⵏⴷⴰ ⵉ ⵓⵔⵣⴰⴼ ⵏ ⵍⵎⵖⵔⵉⴱ ⴷ ⵓⵙⴽⵔ ⵏ ⵜⵣⴷⴰⵢⵉⵏ ⴰⴽⴷ ⵉⵎⴰⵙⵜⴰⵢⵏ ⴷ ⵉⴱⵕⵍⴰⵎⴰⵏⵉⵢⵏ ⴷ ⵡⴰⵎⵓⵏ ⴰⵖⵔⵎⴰⵏ ⵃⵎⴰ ⴰⴷ ⵉⵜⵜⵓⵥⵕⵉ ⵓⴱⵔⵉⴷ ⵏ ⵍⵎⵖⵔⵉⴱ ⴳ ⵓⵚⴽⵓ ⴰⴷⵉⵎⵓⵇⵔⴰⵟⵉ ⴷ ⵜⵏⴽⵔⴰ ⵜⴰⴷⵎⵙⴰⵏⵜ. 

ⵖⵎⴽ ⵍⵍⵉ ⵉⵖⵔⴰ ⵎⴰⵙⵙ ⴱⵏ ⵄⵓⵎⴰⵕ ⵉ ⵓⵔⵣⴰⴼ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ ⵉ ⵜⵓⵙⵙⵏⴰ ⵏ ⵜⵣⵣⵉⴳⵣⵜ ⵜⴰⴷⵎⵙⴰⵏⵜ ⵍⵍⵉ ⴳⵉⵙⵏⵜ ⵉⵍⵍⴰⵏ. 

ⵉⵙⵎⵏⵉⴷ ⵎⴰⵙⵙ ⴰⵎⴰⵔⵉ ⵉⴱⵕⴰⵀⵉⵎ ⵅⴰⵢⵢⵉ ⴰⵙⵎⴰⵇⵇⵍ ⴰⵎⵣⵔⴰⵢ ⴼ ⵜⵎⵙⴰⵔⵜ ⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⵢⵉⵏⵉ ⵎⴰⵙ ⵉⴼⴽⴰ ⵍⵎⵖⵔⵉⴱ ⴰⵙⵏⴼⴰⵔ ⵏ ⵓⵏⴱⴰⴹ ⴰⵏⵉⵎⴰⵏ ⵉⴳⴰⵏ ⴰⴼⵙⵙⴰⵢ ⵏ ⵜⵉⵍⴰⵡⵜ ⵉ ⵜⵎⵓⴽⵔⵉⵙⵜ ⴰⴷ ⵉⵜⵜⵓⵙⴽⴰⵔⵏ, ⴷ ⵓⵣⵣⵉⴳⵣ ⵏ ⵓⴱⵔⵉⴷ ⵏ ⵜⴳⵎⵉ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵙ ⵓⵙⴽⵔ ⵏ ⵡⴰⵏⴰⵡ ⵓⵏⴳⵉⵎ ⵍⵍⵉ ⵔⴰⴷ ⵉⵙⵎⵖⵔ ⵜⵉⵙⴳⴳⵉⵡⵉⵏ ⴰⴷ ⴳ ⵎⴰⵕⵕⴰ ⵏ ⵉⵙⵡⵉⵔⵏ. 

ⴳ ⵓⵎⵏⵉⴷ ⵏⵏⵙ, ⵉⵏⵏⴰ ⵓⵎⴰⵔⵉ ⵎⴰⵙⵙ ⴰⵎⵉⵏ ⵍⴱⵇⵇⴰⵍⵉ ⵟⴰⵀⵉⵕⵉ ⵎⴰⵙ ⵜⵙⵎⵓⵏ ⵜⵎⵙⴰⵔⵜ ⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ ⴰⵎⴰⴷⴰⵏ ⴷ ⵓⴳⵍⵍⵉⴷ ⴷ ⵜⵏⴱⴰⵟⵜ, ⴷ ⵎⴰⵙ ⵉⴱⴷⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴼ ⵓⴱⵔⵉⴷ ⵓⵏⴳⵉⵎ ⴳ ⵚⵚⵃⵕⴰ ⵜⴰⵎⵖⵔⵉⴱⵉⵜ ⵍⵍⵉ ⵉⵙⴷⴷⵉⴷⵏ ⴳ ⵉⵏⴰⵡ ⵏ ⵓⴽⵜⵜⵓⵢ ⵡⵉⵙ 47 ⵏ ⵜⵡⴰⴷⴰ ⵜⴰⵣⴳⵣⴰⵡⵜ ⴼ ⵓⵙⵎⵖⵔ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵏⴼⴳⴰⵏ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ. ⵢⵉⵏⵉ ⵎⴰⵙⵙ ⵟⴰⵀⵉⵕⵉ ⵎⴰⵙ ⵔⴰⴷ ⵢⴰⵡⵙ ⵓⵖⴰⵡⴰⵙ ⵓⵏⴳⵉⵎ ⵉⵥⵍⵉⵏ ⵙ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⴳ ⵓⵙⵎⵖⵔ ⵏ ⵓⵙⵉⴷⴼ ⴰⵏⴰⵎⵓⵏ ⴷ ⵓⴷⵎⵙⴰⵏ ⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ. 

ⴳ ⵓⵎⵏⵉⴷ ⵏⵏⵙ, ⵉⵙⵎⵏⵉⴷ ⵎⴰⵙⵙ Janne Taalas ⵜⵉⵎⵔⵙⵍⵜ ⴷ ⵜⵉⵍⴰⵍ ⴼ ⵜⵎⵔⵙⵍⵜ ⵜⴰⴼⵉⵏⵍⴰⵏⴷⵉⵜ ⵉⴳⴰⵏ ⵜⴰⵙⵉⵎⴰⵏⵜ ⵉⵙⵡⵓⵔⵉⵏ ⴳ ⵓⴼⵓⴽⴽⵓ ⵏ ⵜⵎⵓⴽⵔⵉⵙⵉⵏ ⵙ ⵓⵎⵙⴰⵡⴰⵍ ⴷ ⵜⵎⴰⵣⵣⴰⵍⵜ, ⵜⵉⵎⵔⵙⵍⵜ ⴰⴷ ⵉⵍⵍⴰⵏ ⴳ 20 ⵏ ⵓⵡⴰⵏⴽ ⴳ ⵍⵍⴰⵏⵜ ⵜⵎⵓⴽⵔⵉⵙⵉⵏ ⴳ ⵓⵎⴰⴹⴰⵍ, ⴰⵔ ⵜⵙⵡⵓⵔⵉ ⵉ ⵜⵉⵍⵉⵜ ⵏ ⵓⵎⵙⴰⵡⴰⵍ ⵊⴰⵔ ⵡⵉⴷ ⵀⵎⵎⴰⵏⵜ ⵜⵎⵓⴽⵔⵉⵙⵉⵏ ⴰⴷ.

ⵢⵉⵏⵉ ⵎⴰⵙⵙ Janne Taalas ⵎⴰⵙ ⵜⵙⵡⵓⵔⵉ ⵜⵎⵔⵙⵍⵜ ⵓⵍⴰ ⴼ ⵓⵙⵎⴰⵜⵜⵉ ⴷ ⵓⵚⴽⵓ ⴰⴷⵉⵎⵓⵇⵔⴰⵟⵉ ⴷ ⵓⵙⵙⵔⵇⴱ ⵏ ⵜⵡⵡⵓⵔⵉ ⵜⴰⵙⵔⵜⴰⵏⵜ ⴷ ⵓⵙⵏⴰⵍ ⵏ ⵉⵎⵓⵙⵙⵓⵜⵏ ⵏ ⵜⵎⵖⴰⵔⵉⵏ ⴷ ⵓⴼⵔⴰ ⵙ ⵉⵎⴰⵙⵙⵏ ⵉⵎⵓⵟⵟⵓⵏⵏ. 

ⵉⵙⴷⴷⵉⴷ ⵓⴽⴰⴱⴰⵕ ⴰⴼⵉⵏⵍⴰⵏⴷⵉ ⴼ ⵡⴰⵜⵉⴳ ⵏ ⵓⵔⵣⴰⴼ ⴰⴷ ⵍⵍⵉ ⵔⴰⴷ ⵢⴰⵡⵙ ⴳ ⵜⵓⵙⵙⵏⴰ ⵏ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵓⵚⴽⵓ ⴰⴷⵉⵎⵓⵇⵔⴰⵟⵉ ⵉ ⵓⵎⵣⴰⵣⵍ ⴰⴽⴷ ⵉⵡⴰⵏⴽⵏ ⵏ ⵜⵙⴳⴰ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ. 

ⴳ ⵓⵏⵎⵓⵇⵇⴰⵔ ⴰⴷ, ⵉⴼⴽⴰ ⵓⴽⴰⴱⴰⵕ ⵏ ⴼⵉⵏⵍⴰⵏⴷⴰ ⵉⵙⵇⵙⵉⵜⵏ ⵅⴼ ⵓⵣⵣⵔⴰⴼ ⴷ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ.