ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⴳⵔⴰⵡ ⴰⵎⵙⴽⴰⵔ ⵏ ⵓⵥⵟⵟⴰ ⴰⴱⵕⵍⴰⵎⴰⵏⵉ ⵏ ⵓⵎⵓⵙⵙⵓ ⵏ ⵡⴰⵔⵡⴰⵍⴰ, 30 ⵢⵓⵏⵢⵓ 2022

ⵉⵙⵎⵏⵉⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 30 ⵢⵓⵏⵢⵓ 2022, ⵜⴰⴳⵓⵔⵉ ⵙ ⵜⵎⵍⴷⴰ ⵏ ⵓⴳⵔⴰⵡ ⴰⵎⵣⵡⴰⵔⵓ ⵏ ⵓⵥⵟⵟⴰ ⴰⴱⵕⵍⴰⵎⴰⵏⵉ ⵏ ⵉⵡⴰⵏⴽⵏ ⵏ ⵓⵎⵓⵙⵙⵓ ⵏ ⵡⴰⵔⵡⴰⵍⴰ ⴳ ⴱⴰⴽⵓ ⴳ ⴰⴷⵔⵉⴱⵉⵊⴰⵏ ⴳ 29 ⵢⵓⵏⵢⵓ ⴰⵔ 02 ⵢⵓⵍⵢⵓⵣ 2022.

ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⴳⵓⴷⴰⵏⵜ ⵏ ⴰⴱⵔⵉⴷⵊⴰⵏ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⴷⴰⵔⵉ ⵜⵓⵎⵔⵜ ⵉⴳⴳⵓⵜⵏ ⵉⴳⴰⵏ ⵜⴰⵅⴰⵜⴰⵔⵜ ⴰⴷ ⴷⵔⵓⵖ ⵙ ⵉⵙⵎ ⵏ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⴳⵔⴰⵡ ⴰⵎⵙⴽⴰⵔ ⵏ ⵓⵥⵟⵟⴰ ⴰⴱⵕⵍⴰⵎⴰⵏⵉ ⵏ ⵓⵎⵓⵙⵓ ⵏ ⵡⴰⵔⵡⴰⵍⴰ ⵉⵍⵍⴰⵏ ⴳ ⵜⵎⴰⵥⵓⵏⵜ ⵏ ⵜⴳⴷⵓⴷⴰⵏⵜ ⵏ ⴰⴷⵔⵉⴱⵉⵊⴰⵏ.

ⴰⵔ ⵙⵏⵉⵎⵎⵉⵔⵖ ⴳ ⵜⵣⵡⵉⵔⵉ, ⴰⵔ ⴱⴰⵀⵔⴰ ⵙⵏⵉⵎⵎⵉⵔⵖ ⵜⴰⵏⴱⴰⴹⵜ ⴷ ⵓⴱⵕⵍⴰⵎⴰⵏ ⴷ ⵓⵎⴰⴷⴰⵏ ⵏ ⴰⴷⵔⵉⴱⵉⵊⴰⵏ, ⴼ ⵓⵙⵏⵓⴱⴳ ⵉⵥⵉⵍⵏ ⵍⵍⵉ ⴰⵖ ⵜⴼⴽⴰ ⵜⵎⴰⵣⵉⵔⵜ ⴰⴷ ⵉⵍⴰⵏ ⴰⵎⵣⵔⵓⵢ, ⴷ ⵜⵎⵏⵜⵍⵉⵏ ⵏ ⵓⵎⵓⵔⵙ ⵉ ⵓⴳⵔⴰⵡ ⴰⴷ ⵉⵙⵔⵙⵏ ⵜⵉⵔⵙⴰⵍ ⵜⵉⵎⵔⵙⵍⴰⵢⵉⵏ ⵏ ⵓⵎⵏⴰⴷ ⴰⴱⵕⵍⴰⵎⴰⵏⵉ ⵏ ⵓⵎⵓⵙⵙⵓ ⵏ ⵡⴰⵔⵡⴰⵍⴰ.

ⵉⵜⵜⵓⵙⴽⴰⵔ ⵓⵎⵓⵙⵙⵓ ⵏ ⵡⵔⵡⴰⵍⴰ ⴳ 1961 ⴳ ⵓⵎⵏⴰⴹ ⵏ ⵜⵎⴰⵖⵜ ⵜⴰⵚⵎⵎⴰⴹⵜ ⵊⴰⵔ ⵍⵇⴱⵍⵜ ⴷ ⴳⵔⵡⵜ, ⵙ ⵜⵉⵔⴰⵜ ⵏ ⵓⵙⴷⵓⵙ ⵏ ⵜⵙⵉⵎⴰⵏⵜ ⵏ ⵜⵎⵉⵣⴰⵔ ⴼⴼⵖⵏⵉⵏ ⵙⴳ ⵓⵙⴷⴷⵓⵔⵔⵉ, ⴷ ⵓⵙⵏⴰⵍ ⵏ ⵜⵎⵉⵣⴰⵔ ⵎⵎⴰⵖⵏⵉⵏ ⵉ ⵜⵙⵉⵎⴰⵏⵜ ⴷ ⵓⵏⴰⵔⵓⵣ ⵏ ⵓⵙⴽⵔ ⵏ ⵜⴳⵎⵉ ⵜⴰⵙⵉⵎⴰⵏⵜ.

ⴰⵙⵙ ⴰⴷ, ⵜⵙⵎⴷ ⵜⵎⴰⵖⵜ ⵜⴰⵙⵎⵎⴰⴹⵜ, ⵜⴰⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ, ⵙⵍⴰⵡⴰⵏ ⴰⴽⴽⵯ ⵜⵉⵎⵉⵣⴰⵔ ⵜⵉⴳⵎⴰⵎⵏⵉⵏ ⴳ ⵓⵎⵓⵙⵙⵓ, ⴷⴰⵔⵙ ⵜⵉⵏⴰⵥⴰⵕⵉⵏ ⵅⴰⵜⵔⵏⵉⵏ, ⴰⵔ ⴰⵙⵏⵜ ⵜⵣⵣⴰⵢⴰⴷ ⵜⵎⴰⴹⵍⴰⵏⵜ ⵏ ⵉⵎⵏⵣⴰⵖⵏ ⴷ ⵜⴰⵙⵙⴰⵙⵉⵏ, ⴷ ⵜⵎⵓⴽⵔⵉⵙⵉⵏ ⵏ ⵓⴱⵔⵙⵙⵉⵡⴷ ⴷ ⵓⵣⵡⴰⴳ ⴷ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ, ⵣⵉⵢⴷⵏ ⴰⵙ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⴷ ⵓⵛⵃⵓ ⵉⵛⴷⴷⴰⵏ ⵏ ⵉⵙⴳⵓⵎⵏ ⵏ ⵓⵜⵛⵓ, ⴷ ⵡⴰⵍⴰⵢ ⵓⵔ ⵉⵍⵍⵉ ⵏ ⵡⴰⵜⵉⴳⵏ ⵏ ⵉⵎⵏⵏⵉⵜⵏ ⵏ ⵜⵥⴹⴰⵕⵜ ⵙ ⵉⵎⵏⴰⴹⵏ ⵍⵍⵉ ⴰⴽⴽⵯ ⵏⵏⵙⵏ.

ⴼⵔⴽⵖ ⵎⴰⵙ ⴷ ⴰⵙⵜⴰⵢ ⵏ: “ⴰⵙⴷⵓⵙ ⵏ ⵓⵙⵏⴰⵍ ⵏ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⴳ ⵓⵙⵎⵖⵔ ⵏ ⵓⴼⵔⴰ ⴰⵎⴰⴹⵍⴰⵏ ⴷ ⵜⴳⵎⵉ ⵜⴰⵙⵓⵍⴰⵏⵜ”, ⴰⵔ ⵉⵎⵎⴰⵍ ⴰⵙⵡⵓⵔⵉ ⵏⵏⵖ ⴷ ⵜⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⴼ ⵎⴰⵙ ⵏⵓⴼⴰ ⴰⴷ ⵙⵔⵙ ⵏⴰⵡⵙ ⵙ ⵜⵙⵓⵎⴰⵔ ⴷ ⵉⴼⵙⵙⴰⵢⵏ ⵉ ⵜⵎⵓⴽⵔⵉⵙⵉⵏ  ⵍⵍⴰⵏⵉⵏ ⴳ ⵓⵎⴰⴹⴰⵍⴰ ⴰⵙⵙ ⴰⴷ, ⴰⵔ ⴰⵖ ⵉⵙⵇⵙⴰ ⵓⵍⴰ ⴼ ⵜⵉⵕⵡⵉ ⵏ ⵜⵎⵢⴰⴷⴰⵙⵉⵏ ⵜⵉⵇⴱⵓⵔⵉⵏ ⴷ ⵓⵎⵙⴰⵙⴰ ⵏ ⵉⵏⴰⵡⵏ ⵉⵙⵔⵜⴰⵏⵏ ⵍⵍⵉ ⵙ ⵏⵙⵡⵓⵔⵉ ⵙⴳ ⵉⵙⴳⴳⵯⴰⵙⵏ ⵣⵔⵉⵏⵉⵏ ⵉ ⵜⵏⴰⵥⴰⵕⵉⵏ ⵏ ⵡⴰⵙⵙ ⴰⴷ.

ⵙⵙⵓⵔⴼⴰⵜ ⵉⵢⵉ, ⵎⴰⵙⵙⴰ ⵜⴰⵏⵙⵙⵉⵅⴼⵜ, ⵜⵉⵏⴳⴳⵯⴰ ⴷ ⵉⵏⴳⴳⵯⴰ, ⴰⴷ ⴷⵉⴷⵉⵏ ⴷⵔⵓⵖ ⴽⵔⴰ ⵏ ⵜⵎⵉⵜⴰⵔ ⴷ ⴽⵔⴰ ⵜⵎⵣⵔⴰⵢⵉⵏ, ⵜⴰⵎⵣⵡⴰⵔⵓⵜ ⴳⵉⵙⵏⵜ ⵎⴰⵙ ⴷ ⵜⵉⵎⵉⵣⴰⵔ ⵏ ⵡⴰⵔⵡⴰⵍⴰ ⵖⵓⵔⵙⵏⵜ ⴰⵢⴷⴰ ⴰⵉⴳⴳⵓⵜⵏ ⵏ ⵉⵙⴳⵓⵎⵏ ⵉⴷⵙⵍⴰⵏⵏ ⵉⵎⵣⵡⵓⵔⴰ ⴳ ⵜⵥⴹⴰⵕⵟ ⴷ ⵉⵣⵓⵖⴰⵣ, ⵖⵓⵔⵙⵏⵜ ⵉⴽⴰⵍⵉⵡⵉⵏ ⴳⴰⵏⵉⵏ ⵡⵉⵏ ⵜⴼⵍⵍⴰⵃⵜ (ⵓⴳⴳⴰⵔ ⵏ 60% ⴳ ⵉⴼⵔⵉⵇⵢⴰ), ⵎⴰⵛⵛ ⴳ ⵜⵙⴳⴰ ⵢⴰⴹⵏⵉⵏ, ⴰⵔ ⵜⵜⵣⵎⵎⵉⵎⵏⵜ ⵜⵎⵉⵣⴰⵔ ⵏ ⵡⴰⵔⵡⴰⵍⴰ ⵜⵉⵎⵉⵜⴰⵔ ⵎⵇⵇⵓⵔⵏⵉⵏ ⵏ ⵍⴰⵥ ⴷ ⵓⵥⵍⴰⴹ ⴷ ⵓⵛⵖⵓ ⵏ ⵜⵖⵔⵉ ⴷ ⵓⵣⴷⴰⵢ ⴰⴽⴷ ⵡⴰⵎⴰⵏ ⴷ ⵜⵉⴼⴰⵡⵜ ⴷ ⵜⵓⵚⴽⵉⵡⵉⵏ ⵜⵉⵏⴰⴷⴷⵉⵡⵉⵏ.

ⵜⴰⵎⴰⵜⵔⵜ ⵜⵉⵙ ⵙⴰⵏⵜ, ⵜⴳⴰ ⵎⴰⵙ ⴷ ⵜⵓⴳⵜ ⵏ ⵉⵎⵏⵣⴰⵖⵏ ⵉⴳⵯⵏⵙⴰⵏⵏ ⴷ ⵡⵉⴷ ⵣⵣⵔⴰⵢⵏⵉⵏ ⵉⵡⵜⵜⵜⴰ, ⵍⵍⴰⵏ ⵣⵓⵏ ⵎⴰⴷ ⵉⵣⵔⵉⵏ ⴷ ⵡⴰⵙⵙ ⴰⴷ ⵊⴰⵔ ⵜⵉⵎⵉⵣⴰⵔ ⵏ ⵡⴰⵔⵡⴰⵍⴰ, ⴰⵢⵍⵍⵉ ⵉⵙⴱⴷⴷⵏ ⵜⵉⴳⵎⵉ ⵉⵙⴽⵔ ⵜⴰⵙⵓⵜⵉⵏ ⵜⵙⵙⵉⵡⴷ ⵜⴽⵕⴹⵉ.

ⵜⴰⵎⴰⵜⴰⵔⵜ ⵜⵉⵙ ⴽⵕⴰⴹⵜ ⴰⵔ ⵜⵜⵉⵏⵉ ⵎⴰⵙ ⴷ ⵜⵉⵎⵉⵣⴰⵔ ⵏ ⵡⴰⵔⵡⴰⵍⴰ ⴳⴰⵏⵜ ⵓⴳⴳⴰⵔ ⵏ ⵓⵣⴳⵏ ⵏ ⵉⴳⵎⴰⵎⵏ ⴳ ⵜⵎⵜⵜⴰ ⵎⵓⵏⵏⵉⵏ, ⵎⴰⵛⵛ ⵓⵔ ⵟⵟⴰⴼⵏ ⴰⴷⵔⵉⵣ ⴳ ⵜⵖⵜⴰⵙⵜ ⵜⴰⴳⵔⴰⵖⵍⴰⵏⵜ  ⵙ ⵜⵖⴰⵔⴰⵙⵜ ⵉⵎⵙⴰⵙⴰⵏ ⴷ ⵓⵏⵛⴽ ⵏⵏⵖ ⴰⴷⵉⵎⵓⵖⵔⴰⴼⵉ ⴷ ⵓⴷⵖⴰⵔ ⵏⵏⵖ ⴰⵊⵢⵓⵖⵔⴰⴼⵉ, ⴷ ⵓⵎⵣⵔⵓⵢ ⵏ ⵜⵎⵉⵣⴰⵔ ⵏⵏ ⴷ ⵜⵡⵉⵙⵉ ⴳ ⵜⵖⵔⵎⴰ ⵜⴰⵎⴰⴹⵍⴰⵍⵏⵜ.

ⵜⴰⵎⴰⵜⴰⵔⵜ ⵜⵉⵙ ⴽⴽⵓⵥⵜ, ⴰⵔ ⵜⵜⵉⵏⵉ ⵎⴰⵙ ⴰ ⵜⴼⵔⵔⵓⵏⵜ ⵜⵎⵉⵣⴰⵔ ⵏⵏⵖ ⴰⵜⵉⴳ ⵏ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ, ⵙ ⵜⵖⴰⵔⵜ ⴷ ⵓⵙⵏⵣⵔⴼ ⴷ ⵓⴷⵔⵓⵙ ⵏ ⵜⴰⴳⴰⵏⵉⵏ, ⴷ ⵉⵏⴳⵉⵢⵏ, ⵙ ⵉⴷⵔⵉⵣⵏ ⴷ ⵉⵣⵡⴰⴳⵏ ⵙ ⵜⵎⵏⵜⵉⵍⵜ ⵏ ⵓⵏⵣⵡⵉ, ⴳ ⵜⴷⴳⴰ ⵢⴰⴹⵏⵉⵏ ⵓⵔ ⴰⵖ ⵉⵚⴰⵃⴰ ⵡⴰⵍⵓ ⵙⴳ ⵜⴰⴳⵔⴰⵡⵍⴰ ⵏ ⵜⵎⴳⵓⵔⵉ ⴷ ⵜⴻⵜⵉⴽⵏⵓⵍⵓⵊⵉⵜ, ⴷ ⵓⵔ ⴰⴷ ⵏⵜⵜⴰⵡⵙ ⴰⴱⵍⴰ ⵙ ⵓⵙⵖⵍ ⴱⴰⵀⵔⴰ ⵉⴷⵔⵓⵙⵏ ⴳ ⵉⴳⴰⵣⵏ ⵜⵜⴰⵡⵙⵏⵉⵏ ⴳ ⵡⴰⵍⴰⵢ ⵏ ⵜⵉⵔⵖⵉ ⵏ ⵡⴰⴽⴰⵍ (ⵜⵉⵎⵉⵣⴰⵔ ⵏ ⵉⴼⵔⵉⵇⵢⴰ ⴰⵔ ⵙⴽⴰⵔⵏ 4% ⴳ ⵉⴳⴰⵣⵏ ⴰⴷ).

ⵜⴰⵎⵔⴰⵔⵓⵜ ⴼ ⵜⵏⴰⵥⵕⵉⵏ ⴰⴷ ⵓⵣⵣⵔⴰⵢ ⵏ ⵉⵎⵣⵔⴰⵢⵏ, ⵔⴰⵏ ⴰⵙⵎⴰⵇⵇⴰⵍ ⴰⵎⵢⵏⵓ ⴷ ⵜⵎⵢⴰⴷⴰⵙⵉⵏ ⵜⵉⵎⴰⵢⵏⵓⵜⵉⵏ, ⵓⵔ ⵔⴰⴷ ⵜⵙⵎⵥⵉ ⴰⵢⴷⴰ ⵏ ⵜⵖⵏⵙⴰ ⵏ ⵓⵎⵓⵙⵙⵓ ⵏ ⵡⴰⵔⵡⴰⵍⴰ, ⵜⵙⵙⴽⵜⵉ ⴷ ⵉⵎⴰⵏ ⵏⵏⵙ ⴷ ⵡⴰⵜⵉⴳⵏ  ⵏ ⵓⵙⴽⵔ ⵏⵏⵙ, ⵜⴳ ⵜⴰⵎⴰⵢⵏⵓⵜ ⴳ ⵜⴱⵔⵉⴷⵜ ⵏ ⵓⵏⵄⴰⵕ ⴷ ⵓⵎⵛⴰⴱⴱⴰⴽ ⵏ ⵜⵣⴷⴰⵢⵉⵏ.

ⵏⴽⴽⵉⵏ ⴼⵔⴽⵖ ⵙ ⵉⵎⴰⵍ ⵏ ⵜⵎⵉⵣⴰⵔ ⵏⵏⵖ, ⴷ ⵡⵉⴷⴰ ⴼⵔⴽⵏⵉⵏ ⵙ ⵜⵉⴽⴽⵉ ⵏ ⵜⵓⵎⴰⵢⵜ ⵜⴰⵎⴰⵢⵏⵓⵜ ⵉ ⵓⵏⵄⴰⵕ ⵏⵏⵖ ⴷ ⵉⴱⵕⵍⴰⵎⴰⵏⵏ ⴳ ⵉⵏⵎⵓⵇⵇⴰⵔⵏ ⵉⴳⵜⵉⵔⴰⵏⵏ, ⵙ ⵉⵏⴰⵡ ⴳ ⵉⵍⵍⴰ ⵓⵎⵣⴰⵖ ⴼ ⵓⴼⵔⴰ, ⴷ ⵜⴷⵉⵎⵓⵇⵔⴰⵟⵉⵜ ⵏ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ, ⴷ ⵜⵉⵍⵉ ⵏ ⵚⴰⵃⴰ ⴰⵣⵔⴼⴰⵏ ⵙⴳ ⵡⴰⵢⴷⴰ ⵏ ⵡⴰⴽⴰⵍ, ⴷ ⵜⵙⵉⵎⴰⵏⵜ ⵏ ⵜⵖⵜⴰⵙⵉⵏ ⵏ ⵜⵎⵉⵣⴰⵔ ⵏ ⵡⴰⵔⵡⴰⵍⴰ, ⴷ ⵓⵣⵔⴼ ⵏⵏⵙ ⴳ ⵉⵎⵉⵥ ⵏ ⵜⴻⵜⵉⴽⵏⵓⵍⵓⵊⵉⵢⵉⵏ ⵙ ⵓⵙⵎⵔⵙ ⵉⵕⵡⴰⵏ ⵏ ⵡⴰⵢⴷⴰ ⵏⵏⵙⵏⵜ.

ⵉⵇⵇⴰⵏ ⴷ ⴰⴷ ⵏⴻⵏⵄⵕ ⴼ ⵜⵣⵔⴼⵜ ⵜⴰⵏⵣⵡⴰⵢⵜ ⴳ ⵜⵎⴰⵉⵔⵜ ⵏⵏⵖ, ⵉ ⵓⵙⵖⵏⵣⵉ ⴰⴳⵔⴰⵖⵍⴰⵏ ⵉⵎⵙⴰⵙⴰⵏ.

ⵉⵇⵇⴰⵏ ⴷ ⵓⵍⴰ ⴰⴷ ⵏⴻⵏⵄⵕ ⴼ ⵓⵎⵢⴰⵡⴰⵙ ⵊⴰⵔ ⵜⵉⵎⵉⵣⴰⵔ ⵏⵏⵖ, ⵏⴰⵍⵍⴰ ⴰⵙⵡⵉⵔ ⵏ ⵓⵎⵢⴰⵡⴰⵙ ⵙ ⵜⵎⴷⵔⴰⵡⵜ ⵜⴰⴳⵜⵉⵔⴰⵏⵜ, ⵏⵙⴽⵔ ⴳ ⵜⵡⵉⵣⵉ ⵊⴰⵔ ⵏⵏⵖ ⴷ ⵡⴰⵔⴰⴽⵛⵓⵎ ⴳ ⵜⵖⴰⵡⵙⵉⵡⵉⵏ ⵜⵉⴳⵯⵏⵙⴰⵏⵉⵏ  ⵏ ⵡⵉⵢⵢⴰⴹ, ⴷ ⴰⴼⵔⴰⴽⴰ ⴰⴷⵙⵍⴰⵏ.

ⴳ ⵓⴳⵯⵏⵙ ⵏ ⵎⴰⵢⴰⴷ, ⵉⵇⵇⴰⵏ ⴷ ⵓⵡⵇⵇⵔ ⵏ ⵜⵅⵅⵓⵜⵔⴰ ⵏ ⵉⵡⴰⵏⴽⵏ, ⴷ ⵓⵡⵇⵇⵔ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⴽⵓ ⵉⴳⵎⴰⵎⴰⵏ ⵏ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ, ⵜⴰⵏⴰⵥⴰⵕⵜ ⵉⵛⴷⴷⴰⵏ ⵉⵙⵙⵉⵡⵉⴷⵏ ⵜⴰⵔⴰⴱⴱⵓⵜ ⵏⵏⵖ ⵜⴰⵊⵢⵓⵙⵔⵜⴰⵏⵜ ⵉⴳⴰ ⵜⵜ ⴰⵙⴼⵙ ⵏ ⵜⵎⵉⵣⴰⵔ ⴷ ⵜⵉⵕⵥⵉ ⵏ ⵉⵏⴳⵔⴰⵡⵏ ⵉⵙⵔⵜⴰⵏⵏ ⴷ ⵓⵎⵥⵍⴰⵢ, ⴰⵢⵍⵍⵉ ⵉⵜⵜⴰⵡⵙⵏ ⴳ ⵓⴱⵔⵙⵙⵉⵡⴷ  ⴷ ⵓⵙⵏⵓⵃⵢⵓ, ⴳⵉⵏⵜ ⵜⵙⴳⴳⵉⵡⵉⵏ ⵉⴷⵖⴰⵔⵏ ⵏ ⴽⵉⴳⴰⵏ ⵏ ⵜⴰⵙⵙⴰⵙⵉⵏ, ⵉⵖ ⴰⴽⴽⵯ ⵓⵔ ⵍⵍⵉⵏⵜ ⵜⴰⵙⵙⴰⵙⵉⵏ ⴳ ⴽⵔⴰ ⵏ ⵜⵎⵉⵣⴰⵔ ⴰⵔ ⴳⵉⵙ ⵜⵜⵓⵙⴽⵉⵔⵏⵜ  ⵙ ⵓⵎⵣⴰⵖ ⵏ ⵜⵔⵙⴰⵍ ⴷ ⵡⴰⵜⵉⴳⵏ ⵥⵉⵍⵏⵉⵏ, ⵖⵎⴽ ⴰⵏⵏ ⴰⵙ ⵓⵔ ⵜⴻⵜⵜⵉⵍⵉ ⵜⴳⵎⵉ ⴷ ⵜⵣⵣⵉⴳⵣⵜ  ⴷ ⵓⴼⵔⴰ ⴷ ⵜⵏⴼⵔⵓⵜ, ⵜⴰⵔ ⵉⵡⵜⵜⴰ ⵏ ⵓⴼⵔⴰ ⵊⴰⵔ ⵉⵡⴰⵏⴽⵏ ⵃⵎⴰ ⴰⴷ ⵉⵣⵣⵉⴳⵣ ⵓⵙⵖⵏⵣⵉ ⴷ ⵜⵡⵡⵓⵔⵉⵡⵉⵏ ⴷ ⵉⵙⵏⴼⵍⵏ ⴷ ⵓⵎⵎⴰⵜⵜⵉ ⵏ ⵉⵡⴷⴰⵏ.

ⵉⵎⴰⵍ ⵉⴳⴰ ⵡⵉⵏⵖ ⵉⵖ ⵏⵓⵎⵥ ⴳ ⵓⵎⵢⴰⵡⴰⵙ ⴷ ⵜⵡⵉⵙⵉ ⴷ ⵓⴼⵔⴰ ⴷ ⵓⵡⵇⵇⵔ ⵉⵜⵜⵓⵙⵏⴼⴰⵍⵏ, ⴷ ⵉⵖ ⵏⵔⵎⵙ ⴳ ⵡⴰⵔⴰⵢ ⵙⴳ ⵜⴰⵙⵙⴰⵙⵉⵏ ⴷ ⵓⴼⵓⴽⴽⵓ ⵏⵏⵙⵏⵜ.

ⵔⴰⴷ ⵏⵣⵣⵉⴳⵣ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ , ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⵎⵣⴰⵖ ⵏ ⵓⴼⴼⴰⴽ ⴰⴷ, ⵏⵙⵡⵓⵔⵉ ⵉ ⵓⵚⴽⵓ ⵏ ⵜⵎⴷⵔⴰⵡⵉⵏ ⵙⴰⴽⴰⵔⵏⵉⵏ ⵉⵏⴰⵔⵓⵣⵏ ⴷ ⵉⵎⴰⵍ, ⵏⴷⵔⵓ ⵜⵉⵔⵎⵉⵜⵉⵏ ⵏⵏⵖ ⴷ ⵜⵙⵓⴳⴰⵔ ⵏⵏⵖ ⴰⴽⴷ ⴰⵢⵜⴰⵎⵜⵏⵖ ⴷ ⵉⵎⴷⴷⵓⴽⴽⵯⴰⵍ.

ⵔⴰⴷ ⴱⴷⴷⴰ ⵏⴼⵔⴽ ⵎⴰⵙ ⴷ ⵜⵉⵎⵙⴰⵔⵉⵏ ⵍⵍⵉ ⴰⵖ ⵙⵙⵓⵜⵍⵏⵉⵏ ⴰⵔ ⵜⵜⵣⴰⵢⴰⴷⵏⵜ ⴳ ⵓⵏⵛⴽ  ⵏⵓⵙⵖⴰⵡⴰⵙ ⵏⵏⵖ ⴷ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ ⵉ ⵓⴼⵔⴰ ⴷ ⵜⴷⵉⵎⵓⵇⵔⴰⵟⵉⵜ ⴷ ⵜⵎⵢⵉⴷⵔⵉⵜ, ⵜⴰⵏ ⴰⴷ ⵉⴳⴰⵏ ⵜⴰⵎⴰⵙⴰⵢⵜ ⵏⵏⵖ.

ⵙⵙⵉⵜⵎⵖ ⴰⵎⵓⵔ ⵏ ⵜⵡⵡⵓⵔⵉⵡⵉⵏ ⵏⵏⵖ, ⵜⴰⵏⵎⵎⵉⵔⵜ ⴼ ⵓⵙⴼⴼⵍⴷ ⵏⵏⵓⵏ.