ⵜⴰⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵎⴰⵙⵙ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, 30 ⵎⴰⵕⵚ 2020

ⵉⵙⴽⵔ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴰⵙⵙ ⵏ ⵡⴰⵢⵏⴰⵙ 30 ⵎⴰⵕⵚ 2020, ⵜⵥⵍⵉ ⵉ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ ⴷ ⵓⵙⵏⵎⴰⵍⴰ ⵏ ⵜⵖⵉⵎⵉⵜⵉⵏ ⵏⵏⵙ.

ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ ⴰⴷ, ⴱⴷⴷⵏ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⵙ ⴽⵉⴳⴰⵏ ⵏ ⵓⵙⵓⵜⴳ ⴼ ⵜⴰⵣⵣⵍⵉⵡⵉⵏ ⴷ ⵜⵙⵏⵜⴰⵢⵉⵏ ⵣⵣⵉⴳⵣⵏⵉⵏ ⵍⵍⵉ ⵉⵙⴽⵔ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ  ⴰⴷ ⵜ ⵉⵏⵚⵕ ⵕⴱⴱⵉ, ⵖ ⵉⵙⵡⵉⵔⵏ ⴰⴷⴰⵡⵙⴰⵏ ⴷ ⵓⴷⴰⵎⵙⴰⵏ ⴷ ⵓⵏⴰⵎⵓⵏ ⴷ ⵓⴹⴼⵕ ⵍⵍⵉ ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ ⵃⵎⴰ ⴰⴷ ⵉⴼⵙⵓⵙⵏ ⵓⵙⵙⴰⵏ ⴰⴷ ⵛⵇⴰⵏⵉⵏ ⵉⵍⵍⴰⵏ ⵖ ⵜⵎⴰⵣⵉⵔⵜ ⵏⵏⵖ ⴷ ⵡⴰⵎⵓⵏ ⴰⴳⵔⴰⵖⵍⴰⵏ ⴷⴼⴼⵉⵔ ⵎⴰ ⴰⴷ ⵉⵍⵍⴰ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⵉⵎⴳⵔⴰ ⵉ ⵓⵙⴱⴷⴷⵉ ⵏ ⵜⵣⵣⵉⴳⵣⵜ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ.

ⵖⵎⴽ ⵍⵍⵉ ⵙⵓⵜⴳⵏ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵎⵙⴽⴰⵔ ⴷ ⵉⵙⴼⴰⵙⴽⴰⵜⵏ ⵎⵇⵓⵔⵏⵉⵏ ⵍⵍⵉ ⵜⵙⴽⴰⵔ ⵜⵏⴱⴰⴹⵜ ⴷ ⴽⵓ ⵜⵉⵎⵔⵙⴰⵍ ⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴷ ⵓⵎⴰⴷⴰⵏ ⴰⵎⵖⵔⵉⴱⵉ ⴽⵓⵍⵍⵓ ⵜ ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵜⵎⴰⴹⵓⵏⵜ ⴰⴷ ⴷ ⵜⵣⵣⵉⴳⵣⵜ ⵏⵏⵙ, ⴼⴽⵉⵏ ⵓⵍⴰ ⵜⴰⵢⵢⵓⵣⵉⵏ ⵏⵏⵙⵏ ⵉ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵏ ⵓⴷⵡⴰⵙ ⴷ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴷ ⵜⵎⵙⵙⵓⴳⵓⵔⵜ ⵜⴰⵏⴰⴽⴰⵍⵜ ⴷ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⵊⴹⵕⵎⵜ ⵜⴰⴳⵍⴷⴰⵏⵜ ⴷ ⵡⴰⵔⴰⵢ ⴰⵖⵔⵎⴰⵏ ⴷ ⵜⴳⴳⴰⵍⵉⵏ ⵏ ⵜⵡⵉⵙⵉ ⴷ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵏ ⵓⵙⵍⵎⴷ ⴷ ⵓⵙⵏⵖⵎⵙ ⴷ ⵡⴰⵎⵓⵏ ⵓⵖⵔⵉⵎ ⴷ ⵢⵉⴳⵔ ⵓⵙⵍⵉⴳ, ⵙⴷⴷⵉⴷⵏ ⵎⴰⵙ ⵜⵙⵖⴰⵡⵙⴰ ⵜⴼⵔⴽⴰ ⴰⴷ ⵖ ⵏⴷⴷⵔ ⵉ ⴽⵉⴳⴰⵏ ⵏ ⵓⵎⵛⴰⴱⴱⴰⴽ ⴷ ⵓⵎⵢⴰⵡⴰⵙ ⴷ ⵜⵡⵉⵣⵉ ⵍⵍⵉⵖ ⴳⴰⵏ ⴰⵜⵉⴳⵏ ⵍⵍⵉ ⵔⴰⴷ ⵉⵙⵙⴷⵓⵙ ⵜⵉⵥⵉⴹⵕⴰ ⵏⵏⵖ, ⵜⵙⵙⴷⵓⵙ ⵓⵍⴰ ⵜⴰⵏⴼⵔⵓⵜ ⵏⵏⵖ ⵜⴰⵎⴳⵔⵓⵜ ⵃⵎⴰ ⴰⴷ ⵏⵙⵉⵜⵜⵉ ⵜⴰⵏⵥⵕⵜ ⵏⵙⴱⴷⴷ ⵉⵎⵉⵣⵉⵢⵏ.

ⵖⵎⴽ ⵍⵍⵉ ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵎⴰⵙ ⵓⵔ ⵜⴳⵉ ⵜⵉⵣⵉ ⴰⴷ ⵖ ⵏⴷⴷⵔ ⵜⵉⵣⵉ ⵖ ⵔⴰⴷ ⵜⴱⵉⴷⴷ ⵜⵙⵓⵜⵍⵜ ⵏ ⵜⵓⴷⵔⵜ ⵏⵖ ⵜⵉⵣⵉ ⵏ ⵜⵉⵍⵉⵜ ⵏ ⵜⵓⴳⴰⵡⵜ, ⵉⴼⵔⴷⴰⵙ ⵏ ⵓⵙⵇⵇⵉⵎ ⵍⵍⴰⵏ ⴽⵓⵍⵍⵓ ⵜⵏ ⴰⴷ ⵜⵣⵣⵉⴳⵣ ⵜⵡⵓⵔⵉ ⵍⵍⵉ ⴷ ⵜⵉⵡⵉ ⵜⵉⵍⴰⵡⵜ ⵜⴰⴷⴰⵡⵙⴰⵏⵜ, ⵖⵎⴽ ⵍⵍⵉ ⵔⴰⴷ ⵜⵣⵣⵉⴳⵣ ⵜⵎⵔⵙⵍⵜ ⵜⴰⵣⵣⵔⴰⴼⵜ ⵖ ⵜⵡⵓⵔⵉ ⵏⵏⵙ ⵙ ⵓⴹⴼⵕ ⴷ ⵉⵙⵇⵙⵉⵜⵏ ⴷ ⵜⵉⴹⴰⴼ ⴷ ⵜⵉⴽⴽⵉ ⵏ ⵉⴼⵙⵙⴰⵢⵏ, ⵖⵎⴽ ⵍⵍⵉ ⵔⴰⴷ ⵉⵣⵣⵉⴳⵣ ⵓⵙⵍⵎⴷ ⵏ ⵓⵏⵍⵎⴰⴷ ⴷ ⵓⵎⵣⵔⴰⵡ, ⵣⵣⵉⴳⵣⵏⵜ ⵜⵎⵔⵙⴰⵍ ⵏ ⵓⴼⴰⵔⵙ ⴷ ⵓⵙⵖⵏⵣⵉ ⴰⴷ ⵙⴽⴰⵔⵏⵜ ⵙ ⴰⵢⵍⵍⵉ ⵙ ⵙⵖⴰⵡⵙⴰⵏ ⵉⵎⵣⴷⴰⵖⵏ, ⵜⴳⴰ ⵜⵉⵣⵉ ⴰⴷ ⵜⵉⵣⵉ ⵏ ⵜⵡⵉⵣⵉ ⵜⴰⵏⴰⵎⵓⵔⵜ, ⵖⵎⴽ ⴰⴷ ⴰⴼ ⵙⴷⴷⵉⴷⵏ ⵉⴼⵔⴷⴰⵙ ⵏ ⵓⵙⵇⵇⵉⵎ, ⵜⵉⵡⵉⵣⵉ ⴰⴷ ⵙⴽⵔⵏ ⵙⵔⵙ ⵉⵎⵖⴰⵔⴱⵉⵢⵏ ⵙ ⵉⵎⵏⴰⴷⵏ ⵏⵏⵙ ⴰⵏⴼⴳⴰⵏ ⴷ ⵓⵏⴰⵎⵓⵏ ⵍⵍⵉⵖ ⵉⵡⵙⵏ ⵉⵍⵉⵏ ⴷ ⵜⵓⴳⴳⴰⵙ ⵉⵜⵜⵓⵙⴽⴰⵔⵏ ⵃⵎⴰ ⴰⴷ ⵢⵉⵍⵉ ⵡⴰⵔⴰⵢ ⵖ ⵜⵎⴰⴹⵓⵏⵜ ⴰⴷ ⴷ ⵓⵙⴱⴷⴷⵉ ⵏⵏⵙ, ⴳⴳⵓⵜⵏⵜ ⵜⵎⵙⴰⵔ ⵛⵇⴰⵏⵉⵏ ⵍⵍⵉ ⴼ ⴽⴽⴰⵏ ⵉⵎⵖⴰⵔⴱⵉⵢⵏ ⵙ ⵜⴰⵎⵓⵏⵜ ⵏⵏⵙⵏ ⴷ ⵜⴰⵢⴰⵏⵜ ⵏ ⵜⴳⵓⵔⵉ ⵏⵏⵙⵏ ⴼ ⵜⴰⵢⵔⵉ ⵏ ⵜⵎⵓⵔⵜ.

ⵖ ⵎⴰ ⴰⴷ ⵉⵥⵍⵉⵏ ⵙ ⵜⵡⵓⵔⵉ ⵏ ⵓⵙⵇⵇⵉⵎ, ⵙⴷⴷⵉⴷⵏ ⵉⴼⵔⴷⴰⵙ ⵏⵏⵙ ⵎⴰⵙ ⵔⴰⴷ ⵉⵍⵉⵏⵜ ⵜⵙⵏⵜⴰⵢⵉⵏ ⴷ ⵉⵙⴰⵡⵓⵔⵏ ⵉⵏⵏⵓⵕⵥⵎⵏ ⵖ ⵉⴳⵔⴰⵏ ⵏ ⵓⵣⵣⵔⴰⴼ ⴷ ⵜⵉⴹⴰⴼ ⴷ ⵓⵎⵏⴰⴹ ⵍⵍⵉ ⴷ ⵜⵉⵡⵉ ⵜⴼⵔⴽⴰ ⵏ ⵖⵉⵍⴰⴷ, ⵎⵛⴰⵛⴽⴰⵏ ⴷ ⵓⵍⴰ ⴼ ⵜⵖⴰⵔⴰⵙⵉⵏ ⵏ ⵜⵉⵍⵉⵜ ⵖ ⵜⵖⵉⵎⵉⵜ ⵉⵥⵍⵉⵏ ⵙ ⵓⵏⵏⵓⵕⵥⵎ ⵏ ⵜⵙⵓⵜⵍⵜ ⵏ ⵜⴼⵙⵓⵜ ⵍⵍⵉ ⵔⴰⴷ ⵢⵉⵍⵉ ⴰⵙⵙ ⵏ ⵓⵙⵉⵎⵡⴰⵙ 10 ⵉⴱⵔⵉⵔ ⵙ ⵓⵣⵣⴳⵉⵔ ⵏ ⵜⵓⵎⴰⵢⵉⵏ ⵏ ⵓⵎⴰⴳⵔⴰⴷ 65 ⵖ ⵓⴷⵓⵙⵜⵓⵔ, ⵖⵎⴽ ⴰⵏⵏ ⵓⵍⴰ ⵜⵉⵖⵉⵎⵉⵜⵉⵏ ⵍⵍⵉ ⴷ ⵢⵓⵛⴽⴰⵏ. ⵖⵎⴽ ⵍⵍⵉ ⵉⵍⵍⴰ ⵓⵎⵛⴰⵛⴽⴰ ⴰⴷ ⵉⵍⵉⵏⵜ ⵙⵏⴰⵜ ⵜⵖⵉⵎⵉⵜⵉⵏ  ⵜⵉⴳⴷⵓⴷⴰⵏⵉⵏ ⵉⵥⵍⵉⵏ ⵉ ⵉⵙⵇⵙⵉⵜⵏ ⵏ ⵜⵙⵔⵜⵉⵜ ⵜⴰⵎⴰⵜⴰⵢⵜ ⵍⵍⵉ ⴼ ⵔⴰⴷ ⵉⵔⴰⵔ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵔⴰⴷ ⵜⵉⵍⵉ ⵜⴰⴷ ⵉⵣⵡⴰⵔⵏ ⴰⵙⵙ ⵏ ⵡⴰⵢⵏⴰⵙ 13 ⵉⴱⵔⵉⵔ, ⵔⴰⴷ ⵜⵥⵍⵉ ⵉ : 

"ⵉⴷⵔⵉⵣⵏ ⵉⴷⴰⵡⵙⴰⵏⵏ ⴷ ⵉⴷⴰⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵜⵣⵣⵉⴳⵣⵜ ⵏ ⴽⵓⵕⵓⵏⴰ ⴷ ⵜⵎⵙⴽⴰⵔ ⵉⵍⵍⴰⵏ ⵉ ⵓⵙⴱⴷⴷⵉ ⵏ ⵜⵎⴰⴹⵓⵏⵜ ⴰⴷ"

ⵉⵍⵍⴰ ⵓⵎⵛⴰⵛⴽⴰ ⵓⵍⴰ ⴰⴷ ⵢⵉⵍⵉ ⵓⵙⵖⵉⵡⵙ ⵏ ⵉⵎⴰⵍⴰⵙⵙ ⵉ ⵎⵏⵏⴰⵡ ⵉⴳⵔⴰⵏ ⵉⵎⴰⵡⵙⴰⵙⵏ ⴳⴰⵏⵉⵏ ⵡⵉⵏ ⵜⴷⴰⵡⵙⴰ ⴷ ⵜⴳⵯⵏⵙⴰⵏⵜ ⴷ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ ⴷ ⵜⴷⴰⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ ⴷ ⵜⵎⴳⵓⵔⵉ ⴷ ⵓⵙⵖⵏⵣⵉ ⴷ ⵜⴷⴰⵎⵙⴰ ⵜⴰⵣⴳⵣⴰⵡⵜ ⴷ ⵜⵎⵓⵟⵟⵓⵏⵜ ⴷ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ  ⴷ ⵜⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ ⵖ ⵉⵙⵇⵙⵉⵜⵏ ⵍⵍⵉ ⵔⴰⴷ ⵉⴹⴼⵕ ⵓⵎⴷⵉⵡⴰⵍ.

ⵖⵎⴽ ⵍⵍⵉ ⵙⴷⴷⵉⴷⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⴽⵓⵍⵍⵓ ⵜⵏ ⵖ ⵜⵙⵎⵓⵏⵉ ⴰⴷ ⴼ ⵡⴰⵜⵉⴳ ⵉⵙⵜⴰⵡⵀⵎⵎⴰⵏ ⵉⵍⵍⴰⵏ ⴷⴰⵔ ⵜⵡⵓⵔⵉ ⵏ ⵓⵙⵇⵇⵉⵎ ⵖ ⵜⵎⵙⵓⵜⴰⵍ ⴰⴷ ⵥⵍⵉⵏⵉⵏ ⵖ ⵓⵏⵢⴰⵍⴽⴰⵎ ⴷ ⵓⴳⴷⵓⴷ ⴷ ⵜⵎⵓⴽⵔⵉⵙⵉⵏ ⵏⵏⵙ ⴷ ⵓⵙⵡⵓⴷⴷⵓ ⵏⵏⵙⵏⵜ ⵙ ⵜⵎⵙⴽⴰⵔ ⵜⵉⴷⵙⵜⴰⵔⵉⵏ ⵍⵍⵉ ⴰⵙ ⵉⵜⵜⵓⴼⴽⴰⵏ, ⵙⴷⴷⵉⴷⵏ ⵎⴰⵙ ⵓⵔ ⵍⵍⵉⵏ ⵉⵎⴰⵖⵏ ⵉⵙⵔⵜⴰⵏⵏ ⴷⴰⵜ ⵏ ⵜⴷⵓⵙⵉ ⴷ ⵜⴼⴰⵜⵉⵜ ⵏ ⵜⵎⵓⵔⵜ ⴷ ⵜⵏⵓⴼⴰ ⵏⵏⵙ ⴰⵜⵜⵓⵢⵏⵉⵏ, ⴰⵛⴽⵓ ⵜⴰⵢⴰⵏⵜ ⵜⴰⵏⴰⵎⵓⵔⵜ ⵜⴳⴰ ⴷ ⵔⴰⴷ ⴱⴷⴷⴰ ⵜⴳ ⴰⵖⴱⴰⵍⵓ ⵏ ⵜⴷⵓⵙⵉ ⵏ ⵜⵎⵓⵔⵜ ⴰⴷ ⵖ ⵓⵙⴱⴷⴷⵉ ⵏ ⵜⵎⵓⴽⵔⵉⵙⵉⵏ ⴷ ⵜⵏⵥⴰⵕ.

  ⵖ ⵜⴳⵉⵔⴰ ⵏ ⵜⵙⵎⵓⵏⵉ ⴰⴷ, ⵢⵓⵣⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴰⵣⵓⵍ ⵖ ⵉⵍⵍⴰ ⵓⵙⵓⵜⴳ ⵎⵇⵇⵓⵔⵏ ⵉ ⵓⵏⴳⵎⴰⵎ ⴰⵎⵙⴳⵏⴰⴼ ⵖ ⵉⵙⴳⵏⴰⴼⵏ ⵉⴳⴷⴰⴷⴰⵏⵏ ⴷ ⵓⵙⵍⵉⴳⵏ ⵍⵍⵉ ⵉⵍⵍⴰⵏ ⵖ ⵜⵣⵡⵉⵔⵉ ⵏ ⵓⵙⴱⴷⴷⵉ, ⵖⵎⴽ ⵍⵍⵉ ⵏⵏⴰⵏ ⵜⵓⵜⵜⵔⴰ ⵏⵏⵙⵏ ⵉ ⵓⵙⵉⵊⵊⵉ ⵉ ⵉⵎⵓⴹⴰⵏ ⴷ ⵜⵎⵍⵍⴰ ⵏ ⵕⴱⴱⵉ ⴼ ⵡⵉⵍⵍⵉ ⵎⵎⵓⵜⵏⵉⵏ ⴷ ⵓⴼⵛⴰⴷ ⵉ ⵜⴰⵡⵊⵉⵡⵉⵏ ⵏⵏⵙⵏ.