ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 24 ⵏⵓⵡⴰⵏⴱⵉⵔ 2020

ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⵙ ⵜⵏⵏⵉⵙⵅⴼⵜ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵙⵙ ⵏ ⵓⵙⵉⵏⴰⵙ 24 ⵏⵓⵡⴰⵏⴱⵉⵔ 2020, ⵜⵥⵍⵉ ⵉ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⴷ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ.

ⵖ ⵜⵉⴹⴰⴼ, ⵖ ⵓⵙⴰⵜⵉ ⵏ ⵓⵎⵏⵏⵉ 100 ⵏ ⵓⴷⵓⵙⵜⵓⵔ ⵖ ⵜⵙⴷⴷⴰⵔⵜ ⵜⵉⵙ ⴽⵕⴰⴹⵜ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⵉⴼⴼⵖ ⵓⵙⵉⵔⴰ ⴰⴷ ⵢⵉⵍⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵜⵖⵉⵎⵉⵜ ⵜⴰⵢⵢⵓⵔⴰⵏⵜ ⵉⵥⵍⵉⵏ ⵙ ⵉⵙⵇⵙⵉⵜⵏ ⵏ ⵜⵙⵔⵜⵉⵜ ⵜⴰⵎⴰⵜⴰⵢⵜ ⴼ ⵔⴰⴷ ⵉⵔⴰⵔ ⵓⵏⵙⵙⵉⵅⴼ ⵏ ⵜⵏⴱⴹⴰⵜ ⵖ ⵡⴰⵙⵙ ⵏ ⵡⴰⵢⵏⴰⵙ 30 ⵏⵓⵡⴰⵏⴱⵉⵔ 2020 ⴼ “ⵉⵖⴰⵡⴰⵙⵏ ⵓⵏⴳⵉⵎⵏ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ”.

ⵉⵙⴷⴷⵉⴷ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⵙ ⵜⵎⵍⴷⴰ ⴰⴷ ⴼ ⵡⴰⵜⵉⴳ ⵏ ⵉⵖⴰⵡⴰⵙⵏ ⴷ ⵉⵙⴰⵡⵓⵔⵏ ⵍⵍⵉ ⴼ ⵉⵍⵍⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⵖ ⵓⵙⴰⵜⵉ ⵏ ⵢⴰⵏ ⵓⵙⵏⴼⴰⵔ ⵉⵙⵎⴷⵏ ⵖ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ, ⴰⵢⵍⵍⵉ ⴰⵙⵏⵜ ⵉⵕⵥⵎⵏ ⵉⵎⵏⵉⴷⵏ ⵅⴰⵜⵔⵏⵉⵏ ⵖ ⵢⵉⴳⵔ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵜⵓⵚⴽⵉⵏ ⵜⵉⵏⴰⴷⴷⵉⵡⵉⵏ.

ⵉⵙⵓⵜⴳ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⵜⴰⵙⵔⵜⵉⵜ ⵜⵓⵏⵥⵉⵥⵜ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵕⴱⴱⵉ ⵖ ⵓⵙⴱⴷⴷⵉ ⵏ ⵡⴰⵄⴷⵉⵡⵏ ⵏ ⵜⵢⴰⵏⵜ ⵜⴰⵏⴰⴽⴰⵍⵜ , ⵙⵓⵜⴳⵏ ⵓⵍⴰ ⵜⵉⵢⴰⴼⵓⵜⵉⵏ ⵜⵉⴷⵉⴱⵍⵓⵎⴰⵙⵉⵢⵉⵏ ⵏ ⵜⵎⵙⴰⵔⵜ ⵜⴰⵏⴰⵎⵓⵔⵜ ⵜⴰⵣⵔⴼⴰⵏⵜ.

ⵖ ⵜⵡⵓⵔⵉ ⵏ ⵜⵉⴹⴰⴼ, ⵉ ⵓⴳⵣⵣⵓⵎ ⴰⵎⵣⵡⴰⵔⵓ ⵏ ⵡⴰⵢⵢⵓⵔ ⵏ ⴷⵓⵊⴰⵏⴱⵉⵔ, ⵔⴰⴷ ⵢⵉⵍⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵡⴰⵢⵏⴰⵙ 07 ⴷⵓⵊⴰⵏⴱⵉⵔ 2020 ⵖ ⵉⴳⵔⴰⵏ ⵏ ⵜⴳⵯⵏⵙⴰⵏⵜ ⴷ ⵜⴼⵍⵍⴰⵃⵜ ⴷ ⵓⵙⴳⵎⵉ ⴰⵏⴰⵎⵓⵔ, ⵉⵍⵉⵏ ⵉⴳⵔⴰⵏ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵙⵖⵏⵣⵉ ⴷ ⵜⵎⴳⵓⵔⵉ ⴷ ⵜⴷⵎⵙⴰ ⵜⴰⵎⵓⵟⵟⵓⵏⵜ ⴷ ⵓⵎⴰⵡⴰ ⴷ ⵡⴰⵙⵙⴰⵢ ⴷ ⵍⵓⵊⵉⵙⵜⵉⴽ ⵖ ⵜⵖⵉⵎⵉⵜ ⵏ 14 ⴷⵓⵊⴰⵏⴱⵉⵔ 2020.

ⵉⵥⵕⴰ ⵓⵙⵉⵔⴰ ⵜⵉⵍⴰⵍⵜ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵖ ⵉⵎⴰⵍⴰⵙⵙ ⵉⵣⵔⵉⵏ, ⵉⵣⵎⵎⵉⵎ ⴰⵜⵉⴳ ⵏ ⵜⵙⵎⵓⵏⵉ ⵍⵍⵉ ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⴷ ⵎⴰⵙⵙ ⵍⵡⴰⵍⵉ ⵏ ⵍⴱⴰⵏⴽ ⵏ ⵍⵎⵖⵔⵉⴱ ⵙ ⵜⵓⵎⴰⵢⵉⵏ ⵏ ⵓⵎⵏⵏⵉ 45 ⵏ ⵓⵙⵍⴳⵏ ⵓⵟⵟⵓⵏ 40.17 ⴼ ⵓⵙⵍⴳⵏ ⴰⴷⵙⵍⴰⵏ ⵏ ⵍⴱⴰⵏⴽ ⵏ ⵍⵎⵖⵔⵉⴱ ⵙ ⵜⵓⵜⵔⴰ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⵜⴰⵙⵎⵓⵏⵉ ⴰⴷ ⵖ ⵉⵙⵎⵏⵉⴷ ⵎⴰⵙⵙ ⵍⵡⴰⵍⵉ ⵏ ⵍⴱⴰⵏⴽ ⵏ ⵍⵎⵖⵔⵉⴱ ⵜⵉⵏⴰⵡⵜ ⵉⵣⵓⵣⵣⵔⵏ ⴼ ⵓⵎⵏⴰⴹ ⴰⴳⵔⴰⵖⵍⴰⵏ ⴷ ⵓⵏⴰⵎⵓⵔ ⴷ ⵉⵙⵡⵓⴷⴷⵓⵜⵏ ⵏ ⵍⴱⴰⵏⴽ ⵏ ⵍⵎⵖⵔⵉⴱ ⵉ ⵓⵙⴱⴷⴷⵉ ⵏ ⵜⴰⵙⵙⴰⵙⵜ ⴷ ⵉⴷⵔⵉⵣⵏ ⵏⵏⵙ ⴼ ⵜⴷⵎⵙⴰ ⵜⴰⵏⴰⵎⵓⵔⵜ.

ⵖ ⵓⵣⵣⵔⴰⴼ, ⵉⵥⵕⴰ ⵓⵙⵉⵔⴰ ⵢⴰⵣⵏ ⵉ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⵉⴱⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ ⵉⵙⵏⴼⴰⵔⵏ ⵏ ⵜⵎⵢⴰⵇⵇⴰⵏⵉⵏ:

-  ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 08.20 ⴼ ⵜⵎⵢⴰⵇⵇⴰⵏⵜ ⵏ ⵜⵙⴳⴰ  ⵖ ⵓⵔ ⵉⵍⵍⵉ ⵓⴱⵕⵕⵓⴹ ⴰⵏⴰⵡⴰⵡⵉ ;

-  ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 54.20 ⵉ ⵓⵎⵙⴰⵛⴽⴰ ⴼ ⵓⵙⵏⴼⵍ ⵏ ⵜⵎⵢⴰⵇⵇⴰⵏⵜ ⵏ ⵓⵙⵏⴼⵍ ⵉⵍⴻⵍⵍⵉ ⵊⴰⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⴳⴷⵓⴷⴰⵏⵜ ⵏ ⵜⵓⵕⴽⵢⴰ;

-  ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 59.20 ⵉ ⵓⵎⵙⴰⵛⴽⴰ ⴼ ⵜⴱⵖⵓⵔⵉⵏ ⴷ ⵜⴼⵔⴰⴳⵉⵏ ⵏⴳⵔ ⵜⵏⴱⴰⴹⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⵏⴱⴰⴹⵜ ⵏ ⵎⴰⵔⵉⴽⴰⵏ;

-  ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 60.20 ⵉ ⵓⵎⵙⴰⵛⴽⴰ ⴼ ⵓⵏⴳⵔⴰⵡ ⴰⴷⵙⵍⴰⵏ ⵏ ⵍⴱⴰⵏⴽ ⴰⵙⵢⴰⵡⵉ ⵉ ⵓⵙⵙⴰⵔⵓ ⵖ ⵜⵓⵚⴽⴰ ⵜⴰⵏⴰⴷⴷⴰⵡⵜ;

-  ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 45.20 ⵉ ⵓⵎⵙⴰⵛⴽⴰ ⴼ ⵓⵎⵇⵏ ⴰⴼⵔⵉⵇⵉ ⵉ ⵜⴼⴰⵜⵉⵜ ⵖ ⵉⴱⵔⴷⴰⵏ;

ⵢⴰⵣⵏ ⵓⵍⴰ ⵉ ⵜⵙⵇⵇⵉⵎⵜ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ:

 -  ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 71.18 ⵉⵣⴷⵉⵏ ⴷ ⵍⴱⵓⵍⵉⵙ ⵏ ⵉⴼⵜⴰⵙⵏ.

 ⵢⴰⵣⵏ ⵉ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ:

 -  ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 63.20 ⵉ ⵓⵙⵖⵥⵏ ⵏ ⵓⵎⵕⵚⵓⵎ ⵙ ⵓⵙⵍⴳⵏ ⵉⵣⴷⵉⵏ ⴷ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⴷ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⴷ ⵜⵎⵙⴽⴰⵔ ⵏ ⵓⵚⵉⵡⴹ ⵏⵏⵙⵏ ⵉ ⵓⵙⵎⴰⴷ ⵏ ⵜⴱⵔⵉⴷⵜ ⵜⴰⵣⵣⵔⴰⴼⵜ ⵖ ⵓⵎⵏⵉⴷ ⴰⴷ.

 ⵢⴰⵣⵏ ⵉ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ:

 -  ⵜⴰⵙⵓⵎⵔⵜ ⵏ ⵓⵙⵍⴳⵏ ⵉ ⵓⵙⴽⵔ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵓⵙⵡⵓⴷⴷⵓ ⵏ ⵓⵏⴳⵔⴰⵡ ⵏ ⵜⵡⵉⵙⵉ ⵖ ⵜⵙⵏⵉⵊⵊⵉⵜ.

 ⵖ ⵜⵙⵓⵎⵔⵉⵏ ⵏ ⵉⵙⵍⴳⵏⵏ, ⵔⴰⴷ ⵜⵜⵓⵙⴽⵉⵔ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⴰⵙⵙ ⵏ ⵓⵙⵉⵏⴰⵙ 22 ⴷⵓⵊⴰⵏⴱⵉⵔ ⵉ ⵜⵖⵔⵉ ⴷ ⵓⵙⵜⴰⵢ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵓⵊⴰⴷⵏⵉⵏ, ⵙ ⵜⵎⵍⴷⴰ ⵉⵙⵙⴽⵜⵉ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⵜⵉⵙⵓⵎⵔⵉⵏ ⴼ ⵜⴼⴽⴰ ⵜⵏⴱⴰⴹⵜ ⴰⴷⴷⴰⴷ ⵏⵏⵙ ⵡⵉⵍⵍⵉ ⴳⴰⵏⵉⵏ 15 ⵏ ⵜⵙⵓⵎⵔⵜ, ⵜⵉⵍⵉ ⵜⵖⵓⵔⵉ ⵉ ⵉⵎⴰⵡⵙⴰⵙⵏ ⴷ ⵜⵙⵇⵇⵉⵎⵉⵏ ⵃⵎⴰ ⴰⴷ ⵢⵉⵍⵉ ⵓⵙⵖⵉⵡⵙ ⵏⵏⵙⵏⵜ ⵖ ⵎⴰ ⵏⵏ ⵓⵔ ⵢⴰⴳⴳⵓⴳⵏ.

 ⵖ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ, ⵉⵥⵕⴰ ⵓⵙⵉⵔⴰ ⵜⵉⵙⵓⵎⵔⵉⵏ ⵜⵉⵎⴰⴷⴷⴰⵙⵉⵏ ⵍⵍⵉ ⵜⵙⵓⵊⴰⴷ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⵃⵎⴰ ⴰⴷ ⵜⵜⵓⴽⴽⵉⵙⵏⵜ ⵜⵎⵓⴽⵔⵉⵙⵉⵏ ⵏ ⵜⴱⵔⵉⴷⵜ ⴷ ⵜⵉⵏ ⵓⵙⵍⴳⵏ ⵍⵍⵉ ⵙⴱⴷⴷⵏⵉⵏ ⴰⵙⴽⵔ ⵏ ⵓⵣⵔⴼ ⴰⴷ ⴰⴷⵙⵜⴰⵔ, ⵉⵙⵙⴽⵜⵉ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵜⵉⴳ ⵏ ⵜⵡⵓⵔⵉ ⴰⴷ ⵍⵍⵉ ⴷ ⵉⵇⵇⴰⵏ ⵓⵎⵙⴰⵛⴽⴰ ⵏⴳⵔ ⵓⵙⵇⵇⵉⵎ ⴷ ⵜⵏⴱⴰⴹⵜ.

 ⵖ ⵜⵙⵎⵉⴳⴰⵍ ⵏ ⵓⵙⴰⴳⴳⵯ, ⵉⵥⵕⴰ ⵓⵙⵉⵔⴰ ⴰⵎⴰⵏⴰⵔ ⵏⵏⵙⵏⵜ ⵍⵍⵉ ⵉⵙⴳⵉⴷⴷⵉⵏ ⵜⴰⵡⵓⵔⵉ ⴷ ⵜⴼⴰⴷⵉⵡⵉⵏ ⵏ ⵓⵙⴽⵔ ⵏⵏⵙⵏⵜ ⴷ ⵓⵏⴳⵔⴰⵡ ⴷ ⵓⵥⵟⵟⴰ ⵏⵏⵙⵏⵜ ⴰⴼⴰⴷ ⴰⴷ ⵢⵉⵍⵉ ⵢⴰⵏ ⵓⵙⴰⵜⵉ ⴼ ⵉⵍⵍⴰ ⵓⵎⵙⴰⵛⴽⴰ, ⵙ ⴰⵢⵍⵍⵉ ⵔⴰⴷ ⵉⵙⵙⴷⵓⵙ ⵜⴰⵙⵎⵉⴳⵍⵜ ⴰⴷ ⵏ ⵜⵉⴹⴰⴼ ⵉⴹⵎⵏⵏ ⵓⵍⴰ ⵜⵉⴼⴰⴷⵉⵡⵉⵏ ⵏ ⵓⵎⵓⵔⵙ ⵏⵏⵙⵏⵜ.