ⵜⴰⴳⵓⵔⵉ ⵏ ⵎ.ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵉⵙⵎⴰⴷ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ ⵜⵉⵙ ⵙⵏⴰⵜ ⴳ ⵓⵙⴳⴳⵯⴰⵙ ⴰⵣⵣⵔⴰⴼ 2020/2021

ⵙⵉⵙⵎⵏⵕⴱⴱⵉⴰⵏⵙⵎⵍⵍⴰⴷⵓⵏⵎⵍⵍⴰ, ⵜⴰⵥⴰⵍⵍⵉⵜⴷⵓⴼⵔⴰⴼⵓⴼⵓⵥⴰⵕⵏⵉⵕⵇⵇⴰⵙⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⴰⵡⵙⴰⵙⵏ

ⵜⵉⵏⴳⴳⵯⴰ ⴷ ⵉⵏⴳⴳⵯⴰ ⵉⵎⵓⵔⴰ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵏⵎⵏⴰⵇⵇⴰⵔ ⴰⵙⵙ ⴰⴷ ⴳ ⵜⵖⵉⵎⵉⵜ ⴰⴷ ⵜⴰⴷⵙⵜⴰⵔⵜ ⵉⵙⵎⴷⵏ ⵜⵉⵡⵡⵓⵔⵉⵡⵉⵏ ⵏ ⵜⵡⴰⵍⴰ ⵜⴰⵣⵣⵔⴰⴼⵜ, ⵉⴱⵓⵖⵍⴰⵏ ⵙ ⵓⴼⴰⵔⵙ ⴷ ⵜⵡⵡⵓⵔⵉ ⴳ ⴽⵓ ⵜⵉⵎⵥⵍⴰⵢ ⴷ ⵜⵡⵡⵓⵔⵉⵡⵉⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵎⵏⴰⴹ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ ⵉⴱⵓⵖⵍⴰⵏ ⵙ ⵜⵎⵙⴰⵔⵉⵏ, ⵏⵎⵎⴰⵖ ⴳ ⵓⵙⵇⵇⵉⵎ ⴰⴷ ⴷⵉⴷⵙⵏⵜ ⵢⵉⵍⵉ ⵓⵏⵢⴰⵍⴽⴰⵎ ⵙ ⵜⵖⴰⵔⴰⵙⵜ ⵙ ⵔⴰⴷ ⵜⴰⵡⵙ ⵜⵎⵔⵙⵍⵜ ⵏⵏⵖ ⵜⵙⴽⵔ ⵜⴰⵏⴽⵔⴰ ⵜⴰⵎⵖⵔⵉⴱⵉⵜ  ⵙ ⵜⵏⴰⵔⴰ ⴷ ⵓⵙⵎⴰⵇⵇⵍ ⴰⵙⵜⵔⴰⵜⵉⵊⵉ  ⴰⵎⵣⵡⴰⵔⵓ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ.

ⵙⵙⵓⵔⴼⴰⵜ ⵢⵢⵉ, ⵜⵉⵏⴳⴳⵯⴰ ⴷ ⵉⵏⴳⴳⵯⴰ ⵏⵏⵡ, ⵙ ⵡⴰⵜⵉⴳ ⵏ ⵜⴼⵔⴽⴰ , ⴷ ⵜⵎⵢⵓⵔⵉⵏ ⵜⵉⵎⵔⵙⵍⴰⵏⵉⵏ, ⴰⴷ ⵏⵙⵎⵏⵉⴷ ⵙ ⵜⵖⴰⵔⴰⵙⵜ ⵉⵎⵓⵏⵏ ⵖ ⵉⵍⵍⴰ ⵓⵙⵡⵉⵏⴳⵎ ⵙ ⵓⵣⴳⵣⵍ, ⴳ ⵜⵖⵔⵉ ⵉⵣⵔⴱⵏ ⵜⴰⵢⵢⴰⴼⵢⵜ ⵏ ⵎⴰⴷ ⵉⵜⵜⵓⵙⴽⴰⵔⵏ ⵙⴳ ⵉⴼⵔⴷⴰⵙ ⵉⵙⵔⵜⴰⵏⵏ ⵏ ⵓⵙⵇⵇⵉⵎ ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ, ⴷ ⵎⴰⵎⵏⴽ ⵙ ⵏⵙⴽⵔ ⵎⴰⴷ ⵏⵙⴽⵔ, ⵏⴱⴷⴷ ⴼ ⵜⵎⵙⴰⵔⵉⵏ ⵍⵍⵉ ⵥⵕⵕⴰⵖ ⴷ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⴷ ⴼⵍⵍⴰⵙⵏ ⵏⴱⴷⴷ ⵃⵎⴰ ⴰⴷ ⵢⵉⵍⵉ ⵓⵙⴳⵓⴷⵉ ⴳ ⵜⵓⴷⵔⵜ ⵏⵏⵖ ⵜⴰⵙⵔⵜⴰⵏⵜ ⴷ ⵜⵎⵔⵙⵍⴰⵏⵜ, ⴷ ⵓⴷⴷⵓ ⵙ ⵉⵎⴰⵍ ⴳ ⵜⵎⵙⴽⴰⵔⵜ ⵏⵏⵖ ⵜⴰⴱⵕⵍⴰⵎⴰⵏⵉⵜ ⵙ ⵓⵎⵣⴰⵣⴰⵍ  ⵉⴼⵍⵏ ⵜⵉⵎⵓⴽⵔⵉⵙⵉⵏ ⵏⴼⵔⴽ ⵙ ⵎⴰⴷ ⵉⵅⴰⵚⵚⴰⵏ, ⵖⵎⴽⴰⵏⵏ ⴷ ⵓⵙⵓⵜⴳ ⵏ ⵜⵎⵙⴽⵔⵜ ⵜⵓⵏⴳⵉⵎⵜ ⴷ ⵓⵚⴽⵓ ⴼⵍⵍⴰⵙ, ⵉⴳ ⵡⴰⵡⵜⵜⴰⵙ ⵍⵍⵉ ⴰⵖ ⵉⵙⵎⵓⵏⵏ ⴷ ⵉⵎⴷⵔⴰⵡⵏ ⴰⵚⴽⵓ ⵏ ⵜⵎⵓⵔⵜ ⴷ ⵓⵙⵔⵅⵓ ⵏ ⵜⵣⵣⵉⴳⵣⵜ ⵏⵏⵙ ⴷ ⵓⵙⴷⵓⵙ ⵏ ⵓⴼⵔⴰⴳ ⵏⵏⵙ.

ⵜⵙⵎⵓⵏ ⵜⵎⴷⵔⴰⵡⵜ ⴰⴷ ⴳ ⵜⵎⵓⵔⵜ ⴷ ⵉ ⵜⵎⵓⵔⵜ, ⴷ ⵓⵎⵓⴽⵏ ⴷ ⵉⵎⴰⵍ, ⵜⵉⵡⵡⵓⵔⵉⵡⵉⵏ ⵏⵏⵖ, ⵏⵎⵎⴰⵖ ⴰⴷ ⵜⵉⵍⵉ ⵜⴱⵔⵉⴷⵜ ⴰⴷ ⵏⵏⵖ ⴰⵜⵉⴳ ⴰⴷ, ⵖ ⵖⴰⵢⵍⵍⵉ ⵎⵓ ⵜⵜⵉⵏⵉⵖ ⵜⴰⴷⵉⵎⵓⵇⵔⴰⵟⵉⵜ ⵏ ⵓⵎⵙⴰⵙⴰ ⵉⵍⵍⴰⵏ ⴰⵙⵙ ⴰⴷ ⴳ ⵜⵎⴰⵣⵉⵔⵜ ⵏⵏⵖ ⴷ ⴰⵙⵎⴰⵇⵇⵍ ⴷ ⵜⵎⵢⴰⴷⴰⵙⵜ ⴳ ⵓⵙⵡⵓⴷⴷⵓ ⵏ ⵜⵎⵙⴰⵔⵉⵏ ⴷ ⵜⵎⵓⴽⵔⵉⵙⵉⵏ ⴷ ⵉⵏⴰⵥⴰⵕⵏ ⵅⴰⵜⵔⵏⵉⵏ , ⴰⵙⵙ ⴰⴷ ⵉⴳⴰ ⴰⵖ ⴰⴷⴷⵓⵔ ⵎⴰⵙ ⵏⵍⵍⴰ ⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵃⵎⴰ ⴰⴷ ⵜⵜⵓⵙⴽⵉⵔⵏ ⵙ ⵜⵏⴰⵔⴰ ⵏⵏⵙ.

ⵔⵉⵖ ⴰⴷ ⵙⵙⵏⵜⵉⵖ ⵙ ⵢⴰⵜ ⴳ ⵜⵎⵣⵡⴰⵔⵉⵏ ⵏⵏⵖ ⵜⵉⵏⴰⵎⵓⵔⵉⵏ, ⵉⵇⵇⴰⵏ ⴷ ⴰⴷ ⴷⴰⵔⵏⵖ ⵢⵉⵍⵉ ⵓⴱⵓⵔⵣ ⵙ ⵎⴰⴷ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⴳ ⵓⵙⴷⴰⵡ ⵏ ⵏ ⵓⵙⵕⵚⵓ ⵏ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ, ⵉⵇⵇⴰⵏ ⴷ ⴰⴷ ⴷⴰⵔⵏⵖ ⵢⵉⵍⵉ ⵓⴱⵓⵔⵣ ⵎⴰⵙ ⵉⵍⵍⴰ ⵓⵎⵙⴰⵙⴰ ⴷ ⵓⵎⴰⴽⵕⴰⴹ ⴼ ⵜⵎⵙⴰⵔⵜ ⴰⴷ ⵜⴰⵎⵙⴼⵓⵥⵥⵓⵕⵜ, ⵏⵎⵎⴰⵖ ⴱⴷⴷⴰ ⴼ ⵓⵏⵄⴰⵔ ⵏⵏⵙ, ⵜⴰⵏⵙⵙⵉⵅⴼⵜ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⴷ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⴷ ⵜⴰⵢⵢⴰⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵜⵔⵓⴱⴱⴰ ⵏ ⵜⴷⴷⵓⴽⴽⵍⴰ, ⵏⵙⵡⵓⵔⵉ ⵙ ⵓⵙⴼⵔⴽ ⵙ ⵜⵎⵏⵜⵍⵉⵏ ⵏ ⵓⵎⵣⵔⵓⵢ ⴷ ⵓⵙⵍⴳⵏ ⴰⴳⵔⴰⵖⵍⴰⵏ ⴷ ⵜⵉⴹⴰⴼ ⴷ ⵜⵎⵣⵡⴰⵔⵜ.

ⴰⵔ ⴱⴷⴷⴰ ⵏⵙⵙⴽⵯⵜⵉ ⴷ ⴰⵔ ⵏⵙⵡⵓⵔⵉ ⴳ ⵓⵙⴷⴰⵡ ⴰⴷ ⵙ ⵉⵙⵡⴰⵍⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉ ⵓⴱⵕⵍⴰⵎⴰⵏ, ⴷ ⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵉ “ⵓⵎⵣⴰⵖ ⵏ ⵜⵎⵙⴰⵔⵉⵏ ⴰⵜⵜⵓⵢⵏⵉⵏ ⵏ ⵜⵎⵓⵔⵜ ⵙ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵣⵡⴰⵔⵓⵜ ⴷ ⵜⵎⵙⴽⴰⵔⵜ”.

ⵖ ⵓⵎⵣⴰⵖ ⴼ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ , ⴰⵙⵏⴰⵍ ⵏⵏⵖ ⵎⵏⵏⴰⵡⵜ ⵜⵍⵍⵓⴳⵏⴰ ⵜⴰⵎⵣⵔⴰⵢⵜ ⴷ ⵜⴷⵉⵎⵓⵇⵔⴰⵟⵉⵜ ⴷ ⵜⵣⵔⴼⴰⵏⵜ ⴷ ⵜⵊⵓⵖⵔⴰⴼⵉⵜ, ⴰⵢⵍⵍⵉ ⵉⵜⵜⵓⵙⴽⴰⵔⵏ ⵖ ⵡⴰⴽⴰⵍ ⵏ ⵜⵙⵙⴳⵉⵡⵉⵏ ⵏ ⵉⴼⴼⵓⵙ ⵙⴳ ⴰⵙⵙ ⴰⵎⵣⵡⴰⵔⵓ ⵏ ⵓⵖⵓⵍ ⵏⵏⵙⵜ ⴷⴰ ⵉⵙⵙⴷⵓⵙ ⴰⵖⵣⴰⵏ ⴷ ⵜⵉⵕⵡⵉ ⵏ ⵡⴰⴷⴷⴰⴷ ⵏⵏⵖ ⴰⵏⴰⵎⵓⵔ.

ⴳⴰⵏ ⵉⵙⵏⴼⴰⵔⵏ ⵏ ⵜⴳⵎⵉ ⴳ ⵢⵉⴳⵔ ⵏ ⵜⵓⵚⴽⵉⵡⵉⵏ ⴷ ⵉⵎⴰⵡⴰⵜⵏ ⵉⴷⵙⵍⴰⵏⵏ ⴷ ⵜⵏⵓⴼⴰ ⵜⵉⵏⴰⵎⵓⵏⵉⵏ ⴷ ⵉⴳⵔⴰⵏ ⵏ ⵓⴼⴰⵔⵙ ⵜⵜⵓⵙⴽⴰⵔⵏⵉⵏ ⴳ ⵜⵙⴳⴳⵉⵡⵉⵏ ⴰⴷ, ⴰⵣⵡⵍ ⵏ ⵜⵉⵍⴰⵡⵜ ⵏ ⵓⵙⵉⴷⴼ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⴷ ⵉⴳⵣⵣⵓⵎⵏ ⵢⴰⴹⵏⵉⵏ ⵏ ⵜⵎⵓⵔⵜ, ⴷ ⵜⵓⴳⴳⴰ ⵜⵓⴷⴷⵉⵔⵜ ⵉⴼⴰⵡⵏ ⴼ ⵓⵎⵛⴰⴱⴱⴰⴽ ⴰⵏⴰⵎⵓⵔ ⴷ ⵓⵎⵛⴰⴱⴱⴰⴽ ⵏⴳⵔ ⵉⴳⵔⴰⵏ ⵏ ⵍⵎⵖⵔⵉⴱ, ⴷ ⵓⵣⵡⵍ ⵏ ⵉⵎⵉⵥ ⵏ ⵎⴰⴷ ⵉⴼⵍ ⵓⵙⴷⴷⵓⵔⵔⵉ, ⵍⵍⵉⵖ ⵙⴽⵔⵏⵜ ⵜⵙⴳⴳⵉⵡⵉⵏ ⴰⴷ ⵉⵥⵎⵓⵥⵥⴰⵍ ⵕⵡⴰⵏⵉⵏ ⴳ ⵢⵉⴳⵔ ⵏ ⵜⴳⵎⵉ ⴷ ⵉⵙⵙⴰⵔⵓⵜⵏ ⵉⴳⴷⵓⴷⴰⵏⵏ ⴷ ⵓⵙⵍⵉⴳⵏ ⴷ ⵓⵙⵓⵊⴷ ⵏ ⵜⵏⵓⴼⴰ ⵜⵉⵏⴰⵎⵓⵏⵉⵏ ⴷ ⵜⵏⴼⵔⵓⵜ ⵜⴰⵎⵜⵜⵉⵡⴰⵏⵜ ⴷ ⵜⵉⵏ ⵉⵎⴰⵏ.

ⵉⴳⴰ ⵡⴰⵏⴰⵡ ⵏ ⵓⵙⵎⵖⵔ ⵏ ⵜⵉⴷⵜ ⵡⴰⴷ ⵉⵜⵜⵓⵙⴽⴰⵔⵏ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ, ⵉⵜⵜⵓⵙⴽⴰⵔ ⵙ ⵜⵓⵏⵥⵉⵥⵜ ⴷ ⵉⵙⵡⴰⵍⴰⵢⵏ ⴷ ⵉⵡⵉⵣ ⴷ ⵓⴹⴼⵕ ⵏ ⴱⴰⴱ ⵏ ⵡⴰⴷⴷⵓⵔ ⵉ ⵡⴰⵏⴰⵡ ⴰⴷ ⴰⵏⴳⵎⵓ ⵍⵍⵉ ⴼ ⵢⵉⵡⵣ ⴼ ⵓⵕⵥⵥⵓⵎ ⵏⵏⵙ ⴷ ⵜⵉⴽⵉ ⵏ ⵜⵥⴹⴰⵕⵉⵏ ⵏ ⵓⵙⵥⵕⴼ ⴷ ⵉⵎⴰⵙⵙⵏ ⵉⵎⵔⵙⵍⴰⵏⵏ ⴷ ⵜⵙⵓⴳⴰⵔ ⵏ ⵓⵙⴽⵔ.

ⴳ ⵓⵎⵏⵉⴷ ⴰⴷⵉⴱⵍⵓⵎⴰⵙⵉ, ⵉⵙⵙⵓⴷⵓⵙ ⵓⵙⵖⵣⵏ ⴰⵎⴰⴷⴷⵓⴷ ⵏ ⵎⴰⵔⵉⴽⴰⵏ ⵎⴰⵙ ⴳⴰⵏⵜ ⵜⵙⴳⴳⵉⵡⵉⵏ ⵜⵉⵎⵖⵔⵉⴱⵉⵢⵉⵏ ⵏ ⵉⴼⴼⵓⵙ ⵍⵍⵉ ⴷ ⵓⵔⵔⵉⵏⵉⵏ ⵢⴰⵏ ⵓⴳⵣⵣⵓⵎ ⴳ ⵡⴰⴽⴰⵍ ⴰⵏⴰⵎⵓⵔ ⴰⵎⵖⵔⵉⴱⵉ, ⴰⴱⵔⵉⴷ ⵏ ⵓⵎⵎⵉⵥⵏ ⵍⵍⵉ ⵜⵙⴽⵔ ⵜⵎⴰⵣⵉⵔⵜ ⵏⵏⵖ. ⴰⴱⵔⵉⴷ ⴳ ⵕⵥⵎⵏⵜ ⵎⵏⵏⴰⵡⵜ ⵜⵎⵉⵣⴰⵔ ⵜⵉⵙⵇⵓⵏⵙⵓⵜⵉⵏ ⴳ ⵜⵖⵔⵎⵉⵏ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⴰⵎⵖⵔⵉⴱⵉ: ⵍⵄⵢⵓⵏ ⴷ ⴷⴷⴰⵅⵍⴰ, ⴷ ⵓⵙⵙⵔⵇⴱ ⴰⴳⵔⴰⵖⵍⴰⵏ ⵉⴼⴰⵡⵏ ⵏ ⵜⵡⵡⵓⵔⵉ ⵏ ⵓⴼⵔⴰ ⵜⴰⵣⵣⵍⵓⵏⵜ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴳ 13 ⵏⵓⵡⴰⵏⴱⵉⵔ 2020 ⵉ ⵜⴼⴰⵜⵉⵜ ⴷ ⵜⵏⴼⵔⵓⵜ ⵏ ⵓⵎⵓⵙⵙⵓ ⴷ ⵓⵣⵔⴰⵢ ⴳ ⵍⴳⵔⴳⴰⵔⴰⵜ. ⵉ ⵜⴳⴳⴰⵍⵉⵏ ⴰⴷ ⴷ ⵓⵅⴰⵜⴰⵔ ⵏⵏⵙⵏⵜ ⴰⵏⴰⴼⵍⵍⴰ ⴷ ⵓⵏⵙⵙⵉⵅⴼ ⵏ ⵜⵔⵙⴰⵍ ⵏ ⵜⵎⴰⵖⵜ ⵏⵏⵙⵏⵜ ⵜⴰⵎⴰⵜⴰⵢⵜ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴽⵓ ⴰⵙⵉⵙⵙⵏ ⴷ ⵓⵙⵓⵜⴳ ⴷ ⵓⵡⵇⵇⵔ.

ⵙⵙⴷⵓⵙⵏ ⵓⵎⵎⵉⵥⵏ ⴰⴷ (ⵜⵜⵓⵙⴷⵓⵙⵏ) ⵙ ⵡⵉⵢⵢⴰⴹ ⵍⵍⵉ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⴳ ⵉⵙⴳⴳⵯⴰⵙⵏ ⴰⴷ ⴷⵔⵓⵙⵏⵉⵏ ⴳⴳⵓⵔⴰⵏⵉⵏ, ⵢⵉⵍⵉ ⴳⵉⵙⵏⵏ ⵎⴽ ⵏⴱⴷⵔ, ⵓⵖⵓⵍ ⵏ ⵜⴳⵍⴷⵉⵜ ⵙ ⵜⴰⵎⵓⵏⵜ ⵜⴰⴼⵔⵉⵇⵉⵜ, ⴰⵢⵍⵍⵉ ⵉⴳⴰⵏ ⴰⵍⵇⵎ  ⵉⵕⵡⴰⵏ ⵉ ⵜⵡⵡⵓⵔⵉ ⵏ ⵜⴰⵎⵓⵏⵜ ⴷ ⵉⵏⴳⵎⴰⵎⵏ ⵏⵏⵙ, ⴷ ⵜⵎⵙⴽⴰⵔ ⵍⵍⴰⵏⵉⵏ ⴳ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵏ ⵍⵎⵖⵔⵉⴱ ⴷ ⵜⵎⵉⵣⴰⵔ ⵢⴰⴹⵏⵉⵏ ⵏ ⵉⴼⵔⵉⵇⵢⴰ ⵙ ⵜⴷⵉⴱⵍⵓⵎⴰⵙⵉⵜ ⵏ ⵡⴰⴷⴰⵙ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵉⴱⴷⴷⵏ ⴼ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴷ ⵚⴰⵃⴰ ⵉⵛⵛⴰⵔⵏ.

ⵉⴳⴰ ⵍⵃⴰⵍ ⵢⴰⵜ ⵜⵙⴷⴷⵉⵜ ⵜⴰⵎⴰⵢⵏⵓⵜ ⴳ ⵓⴱⵔⵉⴷ ⵉⵙⵔⵙⵏ ⵜⴰⵎⴰⵣⵉⵔⵜ ⵏⵏⵖ ⴳ ⵓⵎⴰⴹⵍ ⴷ ⵜⵊⵢⵓⵜⴰⵙⵔⵜⴰⵏⵜ ⴳ ⵓⵎⵏⴰⴹ ⴰⵏⵎⵏⴰⴹ ⴳ ⵓⵔ ⵉⵍⵍⵉ ⵓⵔⴳⴳⵉⴳ, ⴷ ⵢⴰⵏ ⵉⴳⴰⵏ ⴰⴳⵔⴰⵖⵍⴰⵏ ⵓⵔ ⵉⴱⴷⴷⵏ ⵖ ⵉⵎⵎⴰⵖ ⵓⵎⴰⴹⴰⵍ ⴷ ⵜⵏⴰⵥⴰⵕⵉⵏ ⵥⵍⵉⵏⵉⵏ ⴳⴰⵏⵉⵏ ⵜⵉⵎⴰⵢⵏⵓⵜⵉⵏ.

ⵉⴳⴰ ⴰⵙⴷⴷⵉⴷ ⵎⴰⵙ ⴷ ⵓⵎⵎⵉⵥⵏ ⵜⵜⵓⵙⴽⴰⵔⵏⵉⵏ ⴳⴳⵓⵔⴰⵏⵉⵏ ⴳ ⵓⵙⴷⵓⵙ ⴷ ⵓⵙⵕⵚⵓ ⵏ ⵜⵢⴰⵏⵜ ⵜⴰⵏⴰⴽⴰⵍⵜ, ⴰⵔ ⴰⴽⴽⴰⵏ ⵉ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⴽⵓ ⵉⴼⵔⴷⴰⵙ ⴷ ⵉⵏⴳⵎⴰⵎⵏ ⵏⵏⵙ, ⵜⴰⵎⴰⵙⴰⵢⵜ ⵜⴰⵏⴰⵎⵓⵔⵜ ⵜⴰⵅⴰⵜⴰⵔⵜ, ⵍⵍⵉ ⵔⴰⴷ ⵢⴰⵡⵙ ⵖ ⵜⵣⵣⵉⴳⵣⵜ ⵏ ⵜⵡⵡⵓⵔⵉ ⴳ ⵓⵎⵏⵉⴷ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⵜⴰⵙⵉⵏⵔⴰⵏⵜ ⴷ ⵜⴳⵜⵉⵔⴰⵏⵜ, ⵉ ⵓⵙⵕⵚⵓ ⵏ ⵓⵎⵎⵉⵣⵥⵏ ⴷ ⵓⵙⵉⵙⵙⵏ ⵙ ⵜⵍⵍⵓⴳⵏⴰ ⵏ ⵜⵎⵙⴰⵔⵜ ⵏⵏⵖ, ⴳ ⵓⵙⴰⵜⵉ ⵏ ⵓⴱⵔⵉⴷ ⴰⴳⵍⴷⴰⵏ ⴷ ⵓⵎⵢⴰⵡⴰⵙ ⴷ ⵓⵙⵎⴰⴷ ⵏ ⵜⴷⵉⴱⵍⵓⵎⴰⵙⵉⵜ ⵜⵓⵏⴱⵉⴹⵜ.

ⵉⴳⴰ ⴰⵙⴷⴷⵉⴷ, ⵎⴰⵙ ⴷ ⵓⵎⵎⵉⵥⵏ ⴰⴷ ⵜⵜⵓⵙⴽⴰⵔⵏ ⵓⵍⴰ ⵙ ⵓⵙⴽⵔ ⴰⴳⵯⵏⵙⴰⵏ ⵉⴱⴷⴷⵏ ⴼ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ ⴷ ⵓⵙⵕⵚⵓ ⵏ ⵓⵡⴰⵏⴽ ⵏ ⵜⵎⵔⵙⴰⵍ ⴷ ⵉⵡⵉⵣ ⴼ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵡⴰⵎⵎⴰⴽⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵓⵚⴽⵓ ⴼ ⵓⵙⴳⵓⴷⵉ ⵖ ⵓⵎⵓⴽⵏ.

ⵉⴽ ⵏⵏⴰ ⵜⴳⴰ ⵜⵉⵍⵉⵜ ⵏⵏⵖ ⵜⴰⵙⵔⵜⴰⵏⵜ ⴷ ⵓⵡⴰⵍⴰ ⵏⵏⵖ ⴳ ⵓⵙⵡⵉⵏⴳⵎ ⴷ ⵓⴷⵖⴰⵔ ⵏⵏⵖ ⴰⵎⵔⵙⵍⴰⵏ ⴷ ⵓⵙⵔⵜⴰⵏ (ⵜⵓⴳⵜ ⵏⵖ ⵜⵓⵣⵍⵜ), ⵜⴳⴰ ⵜⵎⵙⴰⵔⵜ ⵏⵏⵖ ⵜⴰⵏⴰⵎⵓⵔⵜ ⵜⴰⴷ ⵉⵣⵡⴰⵔⵏ ⴳ ⵓⵏⵢⴰⵍⴰⴽⴰⵎ ⵏⵏⵖ ⴰⴽⴷ ⵡⵉⵢⵢⴰⴹ ⴳ ⵜⵎⵙⴰⵔⵉⵏ ⵏⵏⵖ ⵜⵉⴷⵙⵍⴰⵏⵉⵏ. ⵉⵇⵇⴰⵏ ⴷ ⴰⴷ ⵏⵣⵣⵉⴳⵣ ⵙ ⵜⵉⴹⴰⴼ ⴷ ⵡⴰⴷⴷⴰⴷ ⵉⴼⴰⵡⵏ ⴳ ⴽⵓ ⵜⵉⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵙ ⵓⵙⴽⵔ ⵙ ⵜⵉⴷⵜ ⴷ ⵉⵏⴰⵡ ⵏ ⵜⵍⵍⵓⴳⵏⴰ ⴷ ⵜⵎⵓⵛⴰ ⵉⵣⵓⵣⵣⵔⵏ ⴼ ⵓⵙⴷⴰⵡ, ⴷ ⵜⵎⴰⵖⵜ ⴷ ⵡⴰⵄⴷⵉⵡⵏ ⵏ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ  ⴷ ⵓⵙⴽⵔⴽⵙ ⵏ ⵜⵙⵡⵉⵏⴳⵎⵜ ⵏⵏⵙⵏ. ⵙ ⵓⵙⴷⴷⵉⴷ, ⵔⴰⴷ ⵜⵣⵣⵉⴳⵣ ⵜⵡⵡⵓⵔⵉ ⴰⴷ ⵙ ⵉⵎⴰⵏ ⴰⵏⴰⵎⵓⵔ ⴷ ⵓⵎⴰⴽⵕⴰⴹ ⴰⵏⴰⵎⵓⵔ, ⵔⴰⴷ ⴳⵉⵏ ⵉⴳⵏⵙⴰⵙⵏ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵉⴳⵎⴰⵎⵏ ⵏ ⵓⵙⵇⵇⵉⵎ ⴳ ⵜⵣⵡⵉⵔⵉ ⵏ ⵉⴽⴰⴱⴰⵕⵏ ⴷ ⵉⴳⵎⴰⵎⵏ ⵏ ⵜⴰⵢⵢⴰⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵍⵍⵉⵖ ⴱⴰⵀⵔⴰ ⵙⵙⵏⵏ ⴰⵙⴷⴰⵡ, ⴷ ⵍⵍⵉⵖ ⴳⴰⵏ ⵉⴳⵏⵙⴰⵙⵏ ⵓⵍⴳⵉⵏⵏ ⵏ ⵉⵎⵣⴷⴰⵖⵏ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ, ⴳ ⵓⵎⵣⴰⵖ ⵏ ⵜⵢⴰⵏⵜ ⵜⴰⵏⴰⴽⴰⵍⵜ. ⴰⵣⵓⵍ ⴷ ⵓⵙⵓⵜⴳ ⴷ ⵓⵡⵇⵇⵔ ⵉ ⴰⵢⵜ ⴷⴰⵔⵏⵖ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ.

ⵉⵎⵓⵔⵙⵏ ⵍⵍⵉ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⴷ ⵜⵣⵣⵉⴳⵣⵜ ⵏⵏⵙ ⵜⴰⵙⴳⴰⵡⴰⵏⵜ ⴷ ⵜⵎⵏⵥⴰⵡⵜ ⴷ ⵜⴳⵔⴰⵖⵍⴰⵏⵜ ⵥⵥⵉⵢⵢⵕⵏⵜ ⴽⵔⴰ ⵏ ⵡⵉⴷ, ⴼⵜⵓⵏ ⴰⵔ ⵙⴽⴰⵔⵏ ⵜⴰⵙⵙⴰⵙⵉⵏ ⵎⴳⴰⵍ ⵏ ⵜⵔⵙⴰⵍ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⴷ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⴳ ⵜⵣⴷⴰⵢⵉⵏ ⵊⴰⵔ ⵉⵡⴰⵏⴽⵏ, ⴷ ⵎⴰⴷ ⵉⵙⴱⵉⴹⵕⵏ ⵜⴰⵡⵡⵓⵔⵉ ⵏ ⵜⵎⵔⵙⴰⵍ ⵜⵉⵎⵏⵥⴰⵡⵉⵏ, ⵎⴽ ⵉⵊⵔⴰⵏ ⵜⴰⴳⵔⴰ ⴰⴷ ⴳ ⵓⴱⵕⵍⴰⵎⴰⵏ ⵏ ⴽⵓ ⵉⴼⵔⵉⵇⵢⴰ ⴳ ⵍⵍⴰⵏⵜ ⴳ ⵜⵙⵓⵜⵍⵜ ⵏⵏⵙ ⵜⴰⵎⴳⴳⴰⵔⵓⵜ ⴽⵔⴰ ⵏ ⵜⵎⵙⴽⴰⵔ ⵜⵉⵇⴱⵓⵔⵉⵏ ⵓⵔ ⴳⵉⵏⵉⵏ ⴰⴷⴷⵓⵔ ⵉ ⵉⴼⵔⵉⵇⵢⴰ. ⵉⵖ ⵎⵎⴰⵖⵏ ⵡⴰⵄⴷⵉⵡⵉⵏ ⵏ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ, ⵍⵍⵉ ⴷ ⵖⴰⵎⴰⵏⵉⵏ ⵓⴼⵔⵉⴷⵏ ⴳ ⵉⴼⵔⵉⵇⵢⴰ ⴷ ⵓⵎⴰⴹⴰⵍ,  ⴰⴷ ⵜⵜⵉⵏⵉⵏ ⴰⴷⴷⴰⴷⵏ  ⴷ ⵉⵎⵓⵣⴰⵢⵏ ⴷ ⵉⵙⵢⴰⴼⴰⵜⵏ ⵉ ⵉⵡⴰⵏⴽⵏ, ⵀⴰ ⵏⵏ ⵓⵔ ⵜⵉⵔⵎⵉⵜ ⵓⵍⴰ ⴰⵙⴽⵔ ⵏ ⵜⵎⵓⴽⵔⵉⵙⵉⵏ ⵓⵍⴰ ⵓⴼⵓⵍ ⵏ ⵓⵙⵍⴳⵏ, ⴳ ⵓⵙⵓⴼⵖ ⵏ ⵜⵎⵙⴰⵔⵉⵏ ⵜⵉⵎⵣⵡⵓⵔⴰ ⴳ ⵓⵎⵏⴰⴹ ⵏⵏⵙⵏⵜ, ⵓⵔ ⵔⴰⴷ ⵢⴰⵊⵊ ⵜⴰⵎⴰⵣⵉⵔⵜ ⵏⵏⵖ ⴰⴷ ⵜⵓⵔⵔⵉ ⴼ ⴽⵔⴰ ⵏ ⵉⵣⵔⴼⴰⵏ ⵏⵏⵙ ⵓⵍⴳⵉⵏⵏ ⴳ ⵜⵅⵅⵓⵜⵔⴰ ⴷ ⵜⵖⵜⴰⵙⵜ ⵜⴰⵙⵉⵎⴰⵏⵜ ⴷ ⵜⵣⵣⵉⴳⵣⵜ ⵏ ⵓⵙⴷⵖⵔ ⴷ ⵜⴰⴷⵓⵙⵉ ⵜⴰⵏⵎⵏⴰⴹⵜ ⴷ ⵜⵎⵏⵥⴰⵡⴰⵜ ⵉⵟⵟⴰⴼⵏ ⵜⵉⵍⴰⵍ ⴱⴷⴷⵏⵉⵏ ⴳ ⵜⵙⵏⴳⴰⴷⴷⴰⵢⵢⵉⵏ ⵜⵉⵙⴳⴰⵡⴰⵏⵉⵏ ⵙ ⵓⵎⵙⴰⵙⴰ ⴷ ⵡⴰⵔⵜⵉⵍⵉⵜ ⴷ ⵡⴰⵔⴰⴽⵛⵛⵓⵎ ⴳ ⵜⵖⴰⵡⵙⵉⵡⵉⵏ ⵜⵉⴳⵏⵙⴰⵏⵉⵏ ⵏ ⵡⵉⵢⵢⴰⴹ ⴷ ⵓⵎⵣⴰⵖ ⵏ ⵜⵣⵔⴼⵜ ⴷ ⵓⴼⵔⴰ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⵜⴳⴰ ⵜⵡⴰⵍⴰ ⵜⵉⵙ ⵎⵔⴰⵡⵜ ⵜⴰⴷ ⵉⴱⵓⵖⵍⴰⵏ ⴳ ⵓⴼⴰⵔⵙ ⴰⵣⵣⵔⴰⴼ, ⵙ ⵓⵏⵛⴽ ⴷ ⵜⵉⵕⵡⵉ ⵏ ⵉⴹⵕⵉⵚⵏ ⵜⵜⴰⵡⵙⵖⵣⴰⵏⵏⵉⵏ  ⴷ ⵜⵉⵔⴰⵜⵉⵏ ⴷ ⵓⴷⵔⵉⵣ ⵏⵏⵙⵏ ⴼ ⵡⴰⵎⵓⵏ. ⵏⵥⴹⴰⵕ ⴰⴷ ⵏⵉⵏⵉ, ⵎⴰⵙ ⵉⵍⵍⴰ ⵓⴼⴰⵔⵙ ⵏⵏⵖ ⴰⵣⵣⵔⴰⴼ , ⴳ ⵓⴳⵣⵣⵓⵎ ⵏⵏⵙ ⴰⵅⴰⵜⴰⵔ, ⴼ ⵜⴰⵙⵓⵜ ⵜⴰⵎⴰⵢⵏⵓⵜ ⵏ ⵉⵎⵓⴽⵏⵏ ⵉⵅⴰⵜⴰⵔⵏ ⵍⵍⵉ ⵜⵕⵥⵎ ⵜⵎⴰⵣⵉⵔⵜ ⵏⵏⵖ ⵙ ⵉⵙⵡⴰⵍⴰⵢⵏ  ⴷ ⵓⵙⵎⴰⵇⵇⵍ ⵏ ⴱⴰⴱ ⵏ ⵡⴰⴷⴷⵓⵔ  ⴷ ⵉⵙⵎⵓⵜⵜⵓⵢⵏ ⵍⵍⵉ ⵜⵔⴰ ⴰⴷ ⵜⵏ ⵜⵙⴽⵔ ⵉ ⵓⵙⴷⵓⵙ ⵏ ⵓⵙⵎⵖⵔ ⴰⵎⵖⵔⵉⴱⵉ ⴷ ⵓⵎⵛⴰⴱⴱⴰⴽ ⴰⵏⴰⵎⵓⵏ.

ⵎⴳⴰⵍ ⵏ ⵜⵢⵢⴰⴼⵓⵜⵉⵏ ⴱⵙⵓⵙⵏⵉⵏ, ⵓⵔ ⵏⵥⴹⴰⵕ ⴰⴷ ⵏⵙⵎⵓⵏ ⵜⵉⵡⵡⵓⵔⵉⵡⵉⵏ ⵜⵉⵣⵣⵔⴰⴼⵉⵏ ⵖⴰⵙ ⴳ ⵜⴱⵔⵉⴷⵉⵏ ⴷ ⵓⵙⵜⴰⵢ. ⵜⴳⴰ ⴰⵎⵙⴰⵙⴰ ⴷ ⵜⴷⵍⵙⴰ ⴷ ⵓⵎⵙⴰⵡⴰⵍ ⴷ ⵓⴽⵓⵢⵏ ⵜⵜⴰⵡⵙⵏⴼⴰⵍⵏⵉⵏ ⴷ ⵓⵙⵙⴽⵯⵜⵉ ⵏ ⵜⵏⵓⴼⴰ ⵏ ⵜⵎⵓⵔⵜ ⴷ ⵡⴰⵎⵓⵏ, ⴳⴰⵏ ⵉⵣⵣⵔⴰⴼⵏ ⴼ ⵡⴰⵎⵓⵏ, ⴷ ⴰⵔ ⵙⵏⵎⴰⵍⴰⵏ ⵜⵉⵣⴷⴰⵢⵉⵏ, ⵙⴳⵉⴷⴷⵉⵏ ⵜⴰⵣⴷⴰⵢⵜ ⵏ ⵓⵡⴰⵏⴽ ⴷ ⵡⴰⵎⵓⵏ, ⵙⵔⵙⵏ ⵉⵣⵔⴼⴰⵏ ⴷ ⵓⵛⵛⵉⵍⵏ. ⵉⵖ ⵉⴳⴰ ⴳ ⵓⵣⵔⴼ ⵏ ⵓⵎⵏⴰⴷ ⴰⵎⴰⵜⴰⵢ ⴷ ⵉⵎⵥⵕⴰⵢⵏ ⴹⴼⵕⵏⵉⵏ ⵜⴰⵖⴰⵡⵙⴰ ⵜⴰⴱⵕⵍⴰⵎⴰⵏⵉⵜ, ⴰⴷ ⵥⵕⵉⵏ ⵣⵎⵎⵉⵎⵏ ⵡⴰⵔⴰⵖⴰⵡⴰⵍ ⵉⵍⵍⴰⵏ, ⴽⵔⴰ ⵏ ⵜⵉⵣⵉ, ⴳ ⵓⵙⵖⵣⵏ ⵏ ⵉⵣⵣⵔⴰⴼⵏ ⵙⵜⴰⵡⵀⵎⵎⴰⵏⵉⵏ, ⵉⵇⵇⴰⵏ ⴷ ⴰⴷ ⵏⴼⵔⴽ ⵎⴰⵙⴷ ⴰⵜⵉⴳ ⴰⴷ, ⵏⵜⵜⴰⵏ ⴰⴷ ⵢⵓⵊⵊⴰⵏ ⴰⴷ ⵢⵉⵍⵉ ⵓⵎⴹⴰⴽⴰⵕ ⵉⴷⵔⴰⵏ ⴷ ⵓⵙⵇⵇⵉⵇ ⴷ ⵓⵎⵙⴰⵙ ⵢⵓⵙⵄⴰⵏ, ⴷ ⵓⵙⵙⵏⵡⵉ ⵏ ⵜⵎⵙⵓⵜⵍⵉⵏ ⵏ ⵓⵙⵖⵣⵏ ⵏ ⵉⴹⵕⵉⵚⵏ ⵉⵣⵣⵔⴰⴼⵏ.

ⵏⵥⴹⴰⵕ ⴰⴷ ⵏⵙⵖⵣⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⴷ ⵉⵏⵎⵢⴰⵔⵏ ⴳⴰⵏⵉⵏ ⴰⵙⵏⵜⵍ ⵏ ⵉⵍⴷⵉⵢⵏ ⵉⵙⵔⵜⴰⵏⵏ ⴷ ⵉⵏⴰⵎⵓⵏⵏ, ⴳⵉⵏ ⵓⵍⴰ ⵜⵉⵎⵓⴽⵔⵉⵙⵉⵏ ⵏ ⴷⵉⵎⴰ. ⴰⵔ ⴷ ⴰⴽⴽⵯ ⵏⴽⵯⵜⵜⵉ ⴰⵎⴹⴰⴽⴰⵕ ⵍⵍⵉ ⵙⴽⵔⵏ ⵉⴹⵕⵉⵚⵏ ⴰⴷ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⴰⵢⵔⵓⵔ ⴰⵎⴰⵜⴰⵢ, ⴰⵢⵍⵍⵉ ⵉⴳⴰⵏ ⴳ ⵓⴳⴰⵎⴰ ⵙ ⵜⵥⵉⵍⵜ ⵏ ⵓⵎⵓⵏ ⴰⴷ ⴷ ⵓⴷⵔⵓ ⵏⵏⵙ ⴷ ⵡⴰⵎⵎⴰⴽ ⵏⵏⵙ ⴷ ⵡⴰⵜⵉⴳ ⵏⵏⵙ ⴰⵏⴰⵎⵓⵏ ⴷ ⵓⵎⵣⵔⴰⵢ ⴷ ⵓⵣⵔⴼⴰⵏ.

ⵜⴳⴰ ⵜⵉⵢⵢⴰⴼⵓⵜ ⵜⴰⵣⵣⵔⴰⴼⵜ ⵜⴰⴷ ⵉⵕⵡⴰⵏ ⵉⵖ ⵏⵥⵕⴰ ⴰⵏⴰⵡ ⵏ ⵉⴹⵕⵉⵚⵏ ⵜⵜⴰⵡⵙⵖⵣⴰⵏⵏⵉⵏ, ⴷ ⵓⵎⵏⴰⴹ ⵍⵍⵉⵖ ⵏⵙⵡⵓⵔⵉ ⵙ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⴼ ⴽⵓ ⵉⴳⵔⴰⵏ ⵏ ⵜⵓⴷⵔⵜ ⴳ 2020/2021. ⵉⵍⴽⵎ ⵓⵏⵛⴽ ⵏ ⵉⴹⵕⵉⵚⵏ ⵉⵎⵙⴽⴰⵔⵏ ⵜⵜⴰⵡⵙⵖⵣⴰⵏⵏⵉⵏ 80 ⵏ ⵓⴹⵕⵉⵚ ⵟⵟⴰⴼⵏⵉⵏ ⴰⵜⵉⴳ ⴰⵅⴰⵜⴰⵔ ⴳ ⵜⵓⴷⵔⵜ ⵏⵏⵖ ⵜⴰⵙⵔⵜⴰⵏⵜ ⴷ ⵜⴷⵎⵙⴰⵏⵜ ⴷ ⵜⴷⵍⵙⴰⵏⵜ ⴷ ⵜⵏⴰⵎⵓⵏⵜ.

ⴳ ⵜⵙⴳⴰ ⵢⴰⴹⵏⵉⵏ, ⵉⵖ ⵉⵍⵍⴰ ⵓⵛⵃⵓ ⴳ ⵢⵉⴳⵔ ⵏ ⵓⵣⵣⵔⴰⴼ, ⵍⵍⵉ ⵙ ⵏⵙⵙⵏ ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ - ⵎⴽ ⴰⵏⵏ ⴷ ⵜⵡⴰⵍⵉⵡⵉⵏ ⵢⴰⴹⵏⵉⵏ ⵎⴽ ⵜⵜⵉⵏⵉⵏ ⵓⵟⵟⵓⵏⵏ- ⵉⴳⴰ ⴰⵙⵙⴰⵔⵓ ⵉⵥⵉⵍⵏ ⵏ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ, ⵓⵔ ⵏⵏ ⵜⵣⵔⵉ ⵜⵙⴰⵖⵓⵍⵜ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵜⵜⴰⵡⵙⵖⵣⴰⵏⵏⵉⵏ ⴳ ⵜⵡⴰⵍⴰ ⵜⵉⵙ ⵎⵔⴰⵡⵜ 7% ⵙ 23 ⵏ ⵜⵙⵓⵎⵔⵜ ⴳ ⵉⴹⵕⵉⵚⵏ ⵜⵜⴰⵡⵙⵖⵣⴰⵏⵏⵉⵏ ⵍⴽⵎⵏⵉⵏ 330 ⵏ ⵓⴹⵕⵉⵚ, ⴷ 8% ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵍⵍⵉ ⵓⵣⵏⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵍⴽⵎⵏⵉⵏ 257.

ⵉⵖ ⵏⵣⵎⵎⵉⵎ ⴰⵛⵃⵓ ⴰⴷ ⴳ ⵓⵏⵢⴰⵍⴽⴰⵎ ⴷ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ, ⴷⴰ ⵏⵜⵜⵣⵎⵎⵉⵎ ⵎⴰⵙ ⵜⵙⵖⴰⵡⵙⴰ ⵜⵙⵏⵜⴰⵢⵜ ⵜⴰⵣⵣⵔⴰⴼⵜ ⵏ ⵓⴱⵕⵍⴰⵎⴰⵏ ⴳ ⴽⵔⴰ ⵏ ⵡⴰⴷⴷⴰⴷⵏ ⵉ ⵓⵙⵎⵖⵔ ⴰⵏⵛⴽⴰⵏ ⴷ ⵉⵕⵡⴰⵏ, ⴷ ⵓⵙⵖⵓⴷⵓ ⴷ ⵓⵙⴱⵓⵖⵍⵓ, ⵖⵎⴽ ⵍⵍⵉ ⵏⵜⵜⵙⴷⴷⵉⴷ ⴼ ⵡⴰⵜⵉⴳ ⵏ ⵜⵙⵓⵎⵔⵉⵏ ⴰⴷ ⵏ ⵉⵙⵍⴳⵏⵏ ⴷ ⵜⵉⵕⵡⵉ ⵏⵏⵙⵏⵜ, ⵜⴰⴷ ⴳⵉⵙⵏⵜ ⵉⵙⵜⴰⵡⵀⵎⵎⴰⵏ ⵉⴳⴰ ⵜⵜ ⵎⴰⵙ ⵉⵙⴽⴰⵔ ⵓⴱⵕⵍⴰⵎⴰⵏ ⵜⵉⵎⵥⵍⴰⵢⵉⵏ ⵏⵏⵙ ⴳ ⵓⵣⵣⵔⴰⴼ, ⴷ ⵜⵡⵉⵙⵉ ⵏ ⵜⵙⵏⵜⴰⵢⵜ ⵜⴰⵣⵣⵔⴰⴼⵜ ⴳ ⵓⵄⵎⵎⵔ ⵏ ⵓⵙⵖⴰⵡⵙⴰ ⴰⵣⵣⵔⴰⴼ ⴳ ⴽⵉⴳⴰⵏ ⵏ ⵜⵉⵍⴰⵍ ⴷ ⵉⴳⵔⴰⵏ ⴷ ⵜⵎⵙⴰⵔⵉⵏ ⵜⵉⵏⴰⵎⵓⵏⵉⵏ.

ⵉⵟⵟⴰⴼ ⵓⵙⵓⵔⵙ ⴰⴷ ⵎⵏⵏⴰⵡⵜ ⵜⵎⵏⵜⵍⵉⵏ, ⴳⵉⵙⵏⵜ ⵡⴰⵔⴰⵎⵙⴰⵢ ⴳ ⵜⵥⴹⴰⵕⵉⵏ ⴷ ⵜⵎⵓⵣⴰⵢⵉⵏ ⴷ ⵓⵎⵍⴰⵏ ⵊⴰⵔ ⵜⵏⴱⴰⴹⵉⵏ ⵜⴰⵣⵣⵔⴰⴼⵜ ⴷ ⵜⵎⵙⵙⵓⴳⵓⵔⵜ, ⴷ ⵓⵙⴷⵓⵙ ⵏ ⵢⴰⵏ ⵡⴰⵏⴰⵡ ⵏ ⵜⴷⵍⵙⴰ ⵍⵍⵉ ⴷ ⵉⵇⵇⴰⵏ ⵓⵣⵣⵔⴰⵢ ⵏⵏⵙ, ⵍⵍⵉ ⵉⵜⵜⵏⵢⴰⵍⴰⴽⴰⵎⵏ ⴷ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵏ ⵉⵎⵓⵔⴰ ⵙ ⵢⴰⵏ ⵡⴰⵏⴰⵡ ⵏ ⵜⵉⴹⴰⴼ ⴷ ⵓⵛⵃⵓ ⵏ ⵓⵎⵢⴰⵡⴰⴹ ⵊⴰⵔ ⵜⵉⵎⵔⵙⴰⵍ: ⵜⴰⵏⴱⴰⴹⵜ ⴷ ⵓⴱⵕⵍⴰⵎⴰⵏ, ⵉⴽⴰⴱⴰⵕⵏ ⴷ ⵜⵎⵔⵙⴰⵍ, ⵜⵓⴳⵜ ⴷ ⵉⴽⴰⴱⴰⵕⵏ ⵏⵏⵙ.

ⵍⵍⴰⵏⵜ ⵓⵍⴰ ⵜⴱⴱⴰⵢⴹⴰⵕⵉⵏ ⵜⵉⵙⵏⵜⴰⵍⵉⵏ ⴷ ⵜⵏⵉⵎⴰⵏⵉⵏ ⴷⴰⵜ ⵏ ⵓⵙⵉⵜⵜⵉ ⵏ ⵜⵙⵏⵜⴰⵢⵜ ⵜⴰⵣⵣⵔⴰⴼⵜ ⵏ ⵉⴳⵎⴰⵎⵏ ⵏ ⵓⴱⵕⵍⴰⵎⴰⵏ, ⵏⵥⴹⴰⵕ ⴰⴷ ⵜⵏⵜ ⵏⵣⵣⵔⵉ, ⵉⵇⵇⴰⵏ ⴷ ⴰⴷ ⵓⵔ ⵜⴱⴷⴷ ⵎⴳⴰⵍ ⵏ ⵓⵏⴰⵔⵓⵣ ⵏⵏⵖ ⵉⵛⵛⴰⵔⵏ ⴳ ⵓⵙⵎⵖⵔ ⴷ ⵓⵙⵖⵓⴷⵓ ⵏ ⵜⵎⵥⵍⵉⵜ ⴰⴷ ⵉⵜⵜⵓⴼⴽⴰⵏ ⵉ ⵉⴱⵕⵍⴰⵎⴰⵏⵉⵢⵏ  ⵙ ⵓⴷⵓⵙⵜⵓⵔ. ⵃⵎⴰ ⴰⴷ ⵏⵍⴽⵎ ⴰⵡⵜⵜⴰⵙ ⴰⴷ, ⴰⵔ ⴷ ⵙⵙⴽⵯⵜⴰⵢⵖ ⴽⵔⴰ ⵏ ⵜⵙⵓⵎⵔⵉⵏ ⵍⵍⵉ ⴰⴷ ⵙⵎⵏⵉⴷⵖ ⴳ ⵎⵏⵏⵡⴰⵜ ⵜⵎⵍⴷⴰ: 1- ⴰⴷ ⵜⵎⵓⵏ ⴽⵔⴰⵢⴳⴰⵜ ⵜⴰⵙⵓⵎⵔⵜ ⵏ ⵓⵙⵍⴳⵏ ⴷ ⵜⵖⵔⵉ ⵏ ⵓⵎⵏⴰⴹ ⴷ ⵉⴷⵔⵉⵣⵏ ⴷ ⵜⵎⵏⵜⵍⵉⵏ ⴷ ⵉⵡⵜⵜⴰⵙⵏ ⵏⵏⵙ. 2- ⴰⵙⵖⵓⴷⵓ ⵏ ⵜⵉⵔⵔⴰ ⵏ ⵜⵙⵓⵎⵔⵉⵏ ⴰⴷ  ⵍⵍⵉ ⵔⴰⴷ ⵢⵉⵍⵉ ⵙ ⵙⵉⵏ ⵉⵎⵙⴽⴰⵔⵏ ⵙⵜⴰⵡⵀⵎⵎⴰⵏⵉⵏ ⵍⵍⵉ ⵏⵙⴽⵔ ⴳ ⵜⵡⴰⵍⴰ ⴷ: ⴰⵎⵣⵡⴰⵔⵓ ⴰⵙⴽⵔ ⵏⵓⴼⵔⴷⵉⵙ ⴰⵎⵙⵙⵓⴳⵓⵔ ⵉⵜⵜⵓⵙⵎⴰⴳⴰⵍⵏ ⵙ ⵜⵉⵔⵔⴰ ⵏ ⵉⵙⵍⴳⵏⵏ ⵉ ⵓⵙⵏⴰⵍ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴳ ⵜⵙⵎⵉⴳⴰⵍ ⵏⵏⵙⵏ ⵜⵉⵣⵣⵔⴰⴼⵉⵏ, ⵡⵉⵙ ⵙⵉⵏ ⵉⴳⴰ ⵜ ⴰⵙⴽⵔ ⵏ ⵡⴰⵎⵎⴰⵙ ⴰⴱⵕⵍⴰⵎⴰⵏⵉ ⵉ ⵜⵖⵓⵔⵉⵡⵉⵏ ⴷ ⵉⵔⵣⵣⵓⵜⵏ.

ⵏⵏⵓⵔⵣⵖ ⴰⴷ ⵉⴳ ⵎⴰⵢⴰ ⵏⵏ ⴰⵙⵏⴰⵍ ⵏ ⵓⵙⵖⵓⴷⵓ ⵏ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ.

ⵉⵇⵇⴰⵏ ⴷ (ⴷ ⵜⴰⵙⵓⵎⵔⵜ ⵜⵉⵙ ⴽⵕⴰⴹⵜ) ⴰⴷ ⵉⵍⵉⵏⵜ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴳ ⵓⴳⵏⵙ ⵏ ⵓⵎⴹⴰⴽⴰⵕ ⴷ ⵓⵎⴷⴰⵡⴰⵍ ⵊⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵏⴱⴰⴹⵜ ⴷ ⵡⴰⵎⵓⵏ ⵙ ⵜⴳⵔⴰⵡⵉⵏ ⵜⵉⵣⵣⵓⵍⴰⵏⵉⵏ ⴷ ⵜⵓⵖⵔⵉⵎⵉⵏ ⴷ ⵉⵎⵙⴽⴰⵔⵏ ⵏ ⵓⵎⵏⴰⴷ, ⴷ ⵓⵙⴽⵔ ⵏ ⵜⵎⵙⴽⴰⵔ ⵜⵓⵛⵛⵉⵍⵉⵏ ⴼ ⵉⵎⴰⵍ ⵏ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⴷ ⵓⵙⴽⵔ ⵏ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ ⴷ ⵓⵏⴳⵔⴰⵡ ⴰⴳⵏⵙⴰⵏ ⴼⵍⵍⴰⵙⵏⵜ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⵓⵔ ⴰ ⵉⵜⵜⵓⵙⵎⴰⴷ ⵓⵣⵣⵔⴰⴼ ⵙ ⵓⵙⵖⵣⵏ ⵏ ⵉⴹⵕⵉⵚⵏ ⴷ ⵜⵥⵕⵉⴳⵜ ⵏⵏⵙⵏ ⴳ ⵓⵖⵎⵉⵙ ⴰⵎⴰⴷⴷⵓⴷ, ⵉⴳⴰ ⵖ ⵜⵎⵓⴽⵔⵉⵙⵉⵏ ⵍⵍⵉ ⵙⴱⴷⴷⵏⵉⵏ ⴰⴷⵔⵉⵣ ⵏ ⵓⵣⵣⵔⴰⴼ ⴼ ⵡⴰⵎⵓⵏ ⴳ ⵍⵎⵖⵔⵉⴱ, ⵡⴰⵔⴰⵣⵣⴳⵉⵔ ⵏ ⵉⵙⵍⴳⵏ, ⵉⵖ ⴷ ⵓⵔ ⴼⴼⵓⵖⵏ  ⵉⵎⵕⵚⵓⵎⵏ ⵏ ⵓⵙⵎⵙⵉ ⵍⵍⵉ ⴷⵉⴷⵙⵏ ⵣⴷⵉⵏⵉⵏ ⵉⵖ ⵜⵜⵓⴱⴷⴰⵔⵏ ⴳ ⵉⴹⵕⵉⵚⵏ ⵜⵜⴰⵡⵙⵣⴰⵏⵏⵉⵏ.

ⵃⵎⴰ ⴰⴷ ⵏⵎⵎⴰⵜⵉ ⵙⴳ ⵉⵙⵓⵔⵙⵏ ⴰⴷ, ⵏⵙⴽⵔ ⵎⵏⵏⴰⵡⵜ ⵜⵎⵙⴽⴰⵔ ⴽⵛⵎⵏⵉⵏ ⴳ ⵓⴳⵏⵙ ⵏ ⵜⵏⴱⴰⴹⵉⵏ ⵏ ⵜⵉⴹⴰⴼ ⵏ ⵓⵙⵇⵇⵉⵎ, ⵙⵍⴰⵡⴰⵏ ⴰⴽⴽⵯ ⵜⴰⵏⴱⴰⴹⵜ ⵏⵏⵙ ⴳ ⵜⵉⴹⴰⴼ ⴼ ⵓⵙⵎⵙⵉ ⵏ ⵉⵙⵍⴳⵏⵏ ⵍⵍⵉ ⵜⵜⴰⵡⵙⵣⴰⵏⵏⵉⵏ. ⵉⵇⵇⴰⵏ ⴷ ⴰⴷ ⵉⵍⵉⵏ ⵉⵙⵡⵓⴷⴷⵓⵜⵏ ⵏ ⵓⴹⴼⵕ ⵏ ⵓⵙⵎⵙⵉ ⵏ ⵉⵣⵣⵔⴰⴼⵏ ⵙ ⵜⵥⵕⵉⴳⵜ ⵏ ⵉⵎⵕⵚⵓⵎⵏ ⵏ ⵜⵙⵎⵙⵉ:

• ⴰⵎⵣⵡⴰⵔⵓ ⴰⴷ ⵉⵜⵜⵔ ⵓⴱⵕⵍⴰⵎⴰⵏ ⵙⴳ ⵜⵏⴱⴰⴹⵜ ⵜⴰⵎⵣⵣⴳⴰⵔⵜ ⴰⴷ ⵉⵎⵓⵏ ⴽⵓ ⵓⵙⵏⴼⴰⵔ ⵏ ⵓⵙⵍⴳⵏ ⵉⵜⵜⵓⵚⵕⴰⴼⵏ ⵉ ⵓⴱⵕⵍⴰⵎⴰⵏ ⵙ ⵓⵎⵕⵚⵓⵎ ⵏⵏ ⵏⵖ ⴰⵎⵕⵚⵓⵎ ⵏ ⵓⵙⵎⵙⵉ ⵏⵏⵙ.
• ⵡⵉⵙ ⵙⵉⵏ, ⵉⵖ ⵓⵔ ⵉⵍⵍⵉ ⵓⵎⵣⵡⴰⵔⵉ, ⴰⴷ ⵉⵜⵜⵔ ⵓⴱⵕⵍⴰⵎⴰⵏ, ⵜⵉⵣⵉ ⵏ ⵓⵎⴹⴰⴽⴰⵕ ⵏ ⵓⴹⵕⵉⵚ ⴰⵣⵣⵔⴰⴼ ⴳ ⵜⵙⵇⵇⵉⵎⵜ, ⴷ ⵓⵍⴰ ⴳ ⵜⵖⵉⵎⵉⵜ ⵜⴰⵎⴰⵜⴰⵢⵜ, ⵙⴳ ⵜⵏⴱⴰⴹⵜ ⴰⴷ ⵜⵙⵔⵙ ⴷⴰⵜ ⵏ ⵓⴱⵕⵍⴰⵎⴰⵏ ⵢⴰⵏ ⵓⵖⴰⵡⴰⵙ ⴰⴽⵓⴷⴰⵏ ⵏ ⵓⵙⵓⵊⴷ ⴷ ⵓⵣⵓⵣⵣⵔ ⵏ ⵉⵎⵕⵚⵓⵎⵏ ⵏ ⵓⵙⵏⵙⵉ ⵏ ⴽⵔⴰⵢⴳⴰⵜ ⴰⴹⵕⵉⵚ.
• ⵡⵉⵙ ⴽⵕⴰⴹ, ⴰⴷ ⵢⴰⵎⵓ ⵓⵏⵇⵇⵉⵙ ⴼ ⵓⴹⵕⵉⵚ ⴰⵣⵣⵔⴰⴼ  ⵍⵍⵉ ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⴰⵍⴳⴰⵎⵜ ⵏ ⵉⵎⵕⵚⵓⵎⵏ ⵏ ⵓⵙⵏⵙⵉ ⵍⵍⵉ ⵙⵔⵙ ⵥⵍⵉⵏⵉⵏ, ⵎⴰⵢⴰ ⵏⵏ ⵔⴰⴷ ⵉⴳ ⵢⴰⵜ ⵜⵎⵙⵙⴽⵯⵜⵉⵜ ⵉ ⵉⴳⵎⴰⵎⵏ ⵏ ⵓⵙⵇⵇⵉⵎ ⴳ ⵓⵙⴽⵔ ⵏ ⵜⵏⴱⴰⴹⵜ ⵏⵏⵙⵏ ⴳ ⵜⵉⴹⴰⴼ.
• ⵡⵉⵙ ⴽⴽⵓⵥ, ⴰⴷ ⵜⵙⴽⵔ ⵜⵎⵙⵙⵓⴳⵓⵔⵜ ⵏ ⴽⵓ ⵜⴰⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵍⴰⵍⵜ ⴰⵏⵇⵇⵉⵙ ⵜⵙⵔⵙ ⵜⴰⵍⴳⴰⵎⵜ ⵏ ⵉⵙⵍⴳⵏⵏ ⵍⵍⵉ ⵙⵖⴰⵡⵙⴰⵏⵉⵏ ⵙ ⵉⵎⵕⵚⵓⵎⵏ ⵏ ⵓⵙⵎⵙⵉ. ⵜⴹⴼⵕ ⵜⵣⵕⵉⴳⵜ ⵏⵏⵙⵏ ⵏⵖ ⵓⵀⵓ, ⵃⵎⴰ ⴰⴷ ⵉⵔⵅⵓ ⴼ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⴰⴹⴼⵕ ⵏ ⵓⵙⵓⵔⵙ ⵏ ⵜⵥⵕⵉⴳⵜ ⵏⵏⵙⵏ ⴷ ⵓⵎⴹⴰⴽⴰⵕ ⵏ ⵜⵉⵢⵢⴰⴼⵓⵜ ⴷ ⵜⵉⵍⵉⵜ ⵏ ⵜⵎⵙⴽⴰⵔ ⵏ ⵜⵉⴹⴰⴼ ⵜⵓⵛⵛⵉⵍⵉⵏ.
• ⵡⵉⵙ ⵙⵎⵎⵓⵙ, ⴰⵙⵇⵙⵉ ⵉ ⵜⵏⴱⴰⴹⵜ ⵙ ⵉⵎⴰⵙⵙⵏ ⵏ ⵜⵉⴹⵉⴰⴼ ⵜⵉⴷⵙⵜⴰⵔⵉⵏ ⴼ ⵡⴰⵔⵜⴰⵥⵕⵉⴳⵜ ⵏ ⵉⵎⵕⵚⵓⵎⵏ ⴰⴷ ⴷ ⵓⵣⵣⴳⵉⵔ ⵏ ⵉⵙⵍⴳⵏⵏ.
• ⵡⵉⵙ ⵚⴹⵉⵚ, ⴰⴷ ⵜⵜⵓⵙⴽⵉⵔ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵡⵓⵔⵉ ⵙ ⵢⴰⵏ ⵡⴰⵏⵛⴽ ⵏ ⵉⴳⵎⴰⵎⵏ, ⵜⵥⵍⵉ ⵙ ⵓⴹⴼⵕ  ⵏ ⵓⵣⵣⵔⴰⴼ ⴷ ⵓⵣⵓⵣⵣⵔ ⵏ ⵉⵙⵍⴳⵏⵏ ⴷ ⵜⵥⵕⵉⴳⵜ ⵏ ⵉⵎⵕⵚⵓⵎⵏ ⵏ ⵓⵙⵎⵙⵉ, ⵔⴰⴷ ⵜⵜⵓⵙⵎⵎⴰ ⵜⴰⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵉⴹⴰⴼ ⵏ ⵓⵣⵣⴳⵉⵔ ⵏ ⵓⵙⵎⵙⵉ ⵏ ⵉⵙⵍⴳⵏⵏ.

ⵜⵉⵏⴳⴳⵯⴰⴷⵉⵏⴳⴳⵯⴰ

ⵉⵖ ⵜⴳⴰ ⵜⵉⴹⴰⴼ ⵏ ⵜⵡⵡⵓⵔⵉ ⵜⴰⵏⴱⴰⴹⵜ ⵙⴳ ⵜⵉⵎⵥⵍⴰⵢ ⵜⵉⵇⴱⵓⵔⵉⵏ ⵏ ⵉⴱⵕⵍⴰⵎⴰⵏⵏ, ⵀⴰⵜⵉ ⵜⴳⴰ ⴳ ⵜⵎⵙⵓⵜⵍⵉⵏ ⵍⵍⵉ ⵣⵣⵔⴰⵢⵏⵜ ⵜⴷⵉⵎⵓⵇⵔⴰⵟⵉⵢⵉⵏ ⵜⵉⴳⵏⵙⴰⵙⵉⵏ, ⴷⴰⵜ ⵏ ⵜⴰⵏⵏⴰⵢⵢⵉⵏ  ⵎⴳⴰⵍ ⵏ ⵉⴱⵕⵍⴰⵎⴰⵏⵏ ⴳ ⵓⵎⴰⴹⴰⵍ, ⴳ ⵓⵎⵏⴰⴹ ⵏ ⵉⵎⴰⴹⴰⵍⵏ ⵜⵜⵓⵕⵣⴰⵎⵏⵉⵏ ⵣⵣⵉⴳⵣⵏⵉⵏ, ⴰⵔ ⵜⵜⵉⵍⵉⵏⵜ ⴰⵙⵏⴼⵍⵓⵍ ⵉⵙⵓⵍⵏ ⴳ ⵜⵓⵏⵖⵉⵍⵉⵏ ⵏ ⵓⵣⵣⴳⵉⵔ, ⵃⵎⴰ ⴰⴷ ⴳⵉⵏⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴳ ⵓⵎⵏⵉⴷ ⴰⴷ, ⵜⵉⴷ ⴳⴰⵏⵉⵏ ⵜⵉⵎⵢⴰⴷⴰⵙⵉⵏ ⵙⴳ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ ⵉ ⵓⵙⴷⵓⵙ ⵏ ⵜⵎⵢⵉⵎⴰⵏⵜ ⵏ ⵡⴰⵎⵓⵏ ⴳ ⵜⵎⵔⵙⴰⵍ ⴷ ⵓⵙⵖⵣⵏ ⵏⵏⵙⵜ.

ⵏⵉⵡⵣ  ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ, ⴰⴽⴷ ⵉⵏⴳⵎⴰⵎⵏ ⵏ ⵓⵙⵇⵇⵉⵎ ⴷ ⵉⴼⵔⴷⴰⵙⵏ ⵏⵏⵙ ⵉⵙⵔⵜⴰⵏⵏ, ⵃⵎⴰ ⴰⴷ ⵜⴻⵟⵟⵉⴼ ⴽⵓ ⵜⴰⵎⵙⴰⵔⵜ ⵜⴰⵏⴰⵎⵓⵏⵜ ⴷ ⴽⵓ ⵜⴰⵎⵙⴽⵔⵜ ⵜⴰⵏⴰⵎⵓⵔⵜ ⵜⴰⵖⵍⴰⵖⴰⵍⵜ ⵏⵏⵙ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵃⵎⴰ ⴰⴷ ⵢⵉⵍⵉ ⵓⵏⵢⴰⵍⴽⴰⵎ ⴷ ⵉⵅⵎⵎⵉⵎⵏ ⵏ ⵡⴰⵎⵓⵏ, ⴷ ⵓⵙⴷⵓⵙ ⵏ ⵓⵎⵏⵣⴰⵡ ⵍⵍⵉ ⵉⵜⵜⵉⵏ ⴰⴷ ⵢⵉⵍⵉ ⵓⵎⴹⴰⴽⴰⵕ ⵏ ⵜⵎⵙⴰⵔⵉⵏ ⵜⵉⵅⴰⵜⴰⵔⵉⵏ ⴳ ⵡⴰⵎⵓⵏ ⴷ ⵓⴼⵙⵙⴰⵢ ⵏⵏⵙⵏⵜ ⴳ ⵓⵙⴰⵜⵉ ⵏ ⵜⵎⵔⵙⴰⵍ ⴷ ⵉⵎⵙⴽⴰⵔⵏ ⵏⵏⵙ ⵖ ⴳⴰⵏ ⵉⴳⵏⵙⴰⵙⵏ ⵜⵜⴰⵡⵙⵜⴰⵢⵏⵉⵏ ⵏⵖ ⵉⴷ ⴱⴰⴱ ⵏ ⵜⵖⵜⴰⵙⵜ ⵙⴽⴰⵔⵏⵉⵏ ⴰⵣⵣⴳⵉⵔ.

ⴳ ⵓⵙⴰⵜⵉ ⵏ ⵉⵏⴳⵎⴰⵎⵏ ⵏ ⵓⵙⵇⵇⵉⵎ ⴷ ⵉⴼⵔⴷⴰⵙ ⵏⵏⵙ ⵉⵙⵔⵜⴰⵏⵏ, ⵏⵎⵎⴰⵖ ⴼ ⵓⵙⵖⵓⴷⵓ ⵏ ⵜⵣⵣⵓⵍⵜ ⵏ ⵜⵉⴹⴰⴼ ⵏ ⵓⵙⵇⵇⵉⵎ ⵃⵎⴰ ⴰⴷ ⵜⵙⴽⵔ ⴰⵎⵓⵣⴰⵢ ⴰⴷⵙⵜⴰⵔ ⴼ ⵓⵣⴷⴰⵢ ⵏ ⵜⵎⴰⵙⴰⵢⵜ ⵙ ⵓⵙⵉⵟⵏ ⴷ ⵜⵡⵡⵓⵔⵉ ⴳ ⵓⵙⴰⵜⵉ ⵏ ⵓⵎⵢⴰⵡⴰⵙ ⴷ ⵓⵙⵎⴰⴷ ⵊⴰⵔ ⵜⵉⵏⴱⴰⴹⵉⵏ ⵙ ⵎⴰⴷ ⵉⵙⴽⵔⵏ ⴳ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⴷ ⵉⴽⵛⵛⵓⵎⵏ ⵉⴳⴷⵓⴷⴰⵏⵏ ⵡⵉⴷ ⵟⵟⴰⴼⵏⵉⵏ ⴰⴷⵔⵉⵣ ⴼ ⵜⵓⴷⵔⵜ ⵏ ⵉⵏⵎⵓⵔⴰⵏ.

ⵏⵙⵜⵉ ⵉⵙⴳⵓⵎⵏ ⵏ ⵜⵖⵉⵎⵉⵜⵉⵏ ⵏ ⵜⵉⴹⴰⴼ, ⴰⵢⵍⵍⵉ ⴷ ⵢⵉⵡⵉ ⵓⵎⵏⴰⴹ ⴰⵏⴰⵎⵓⵔ ⵙ ⵜⴱⵔⵉⴷⵜ ⵏ ⵓⵎⵛⴰⵡⴰⵕ ⴷ ⵓⵎⵙⴰⵙⴰ ⴷ ⵓⵙⵙⴼⵍⴷ ⵉⵜⵜⵓⵙⵏⴼⴰⵍⵏ ⴳ ⵓⵙⵡⵉⵔ ⵏ ⵉⵏⴳⵎⴰⵎⵏ ⴷ ⵉⴼⵔⴷⴰⵙ ⵏ ⵓⵙⵇⵇⵓⵎ, ⴷ ⵊⴰⵔ ⵉⵏⴳⵎⴰⵎⵏ ⵏ ⵓⵙⵇⵇⵉⵎ ⴷ ⵜⵏⴱⴰⴹⵜ ⵜⴰⵎⵣⵣⴳⴰⵔⵜ.

ⵉⴳⴰ ⵓⵣⵣⵔⴰⵢ ⵏ ⵓⵏⴳⵔⴰⵡ ⴰⴳⵏⵙⴰⵏ ⵏ ⵓⵙⵇⵇⵉⵎ ⴷ ⵓⵙⴱⵓⵖⵍⵓ ⵏⵏⵙ ⵙ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ ⵏ 2011 ⵙ ⴽⵉⴳⴰⵏ ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ, ⴰⴽⵛⵛⵓⵎ ⴰⴷⵙⵍⴰⵏ ⵉ ⵓⵙⵎⵖⵔ ⵏ ⵡⴰⵜⵉⴳ ⵏ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ ⵏ ⵜⵉⴹⴰⴼ ⴷ ⵜⵢⵢⴰⴼⵓⵜ ⵏⵏⵙⵏⵜ, ⴷ ⵓⵙⵡⵓⵔⵉ ⵙ ⵉⴳⵔⴰⵏ ⴷ ⵓⵙⵡⵓⴷⴷⵉ ⵉⴼⴼⵓⴽⵙⵏ ⵏ ⵡⴰⴽⵓⴷ ⵏ ⵉⵅⴼⴰⵡⴰⵍⵏ ⵃⵎⴰ ⴰⴷ ⴷⵔⵓⵏ ⴽⵉⴳⴰⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵙⴳ ⴽⵓ ⵜⵉⵍⵉⵜⵉⵏ ⵜⵉⵙⵔⵜⴰⵏⵉⵏ ⴳ ⴽⵔⴰⵢⴳⴰⵜ ⵜⵉⵖⵉⵎⵉⵜ ⴷ ⵓⵎⴹⴰⴽⴰⵕ ⵏ ⴽⵔⴰⵢⴳⴰⵜ ⵢⵉⴳⵔ.

ⴳ ⵓⵎⵏⵉⴷ ⵢⴰⴹⵏⵉⵏ, ⵉⵙⵙⵎⵖⵔ ⵓⵙⵇⵇⵉⵎ ⵉⵎⴰⵙⵙⵏ ⵏ ⵜⵉⴹⴰⴼ ⵙ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵎⵖⵍⴰⵍⵉⵏ ⵙ ⵓⵙⵙⴼⵍⴷ ⴷ ⵓⵙⵇⵙⵉ ⵏ ⵉⴳⵎⴰⵎⵏ ⵏ ⵜⵏⴱⴰⴹⵜ ⴷ ⵉⵎⵙⵜⴳⴳⴰⵔⵏ ⵏ ⵜⵎⵔⵙⴰⵍ ⴷ ⵜⵎⵙⵙⵏⵜⴰⵢ ⵜⵉⴳⴷⵓⴷⴰⵏⵉⵏ, ⵙ ⵜⵙⵎⵉⴳⴰⵍ ⵏ ⵓⵙⴰⴳⴳⵯ, ⴷ ⵓⵎⴹⴰⴽⴰⵕ ⵏ ⵉⵏⵇⵇⵉⵙⵏ ⵏ ⵜⵙⵏⴱⴹⴰⵢⵜ ⵏ ⵓⵚⵉⵟⵏ.

ⵉⴳⴰ ⵓⵎⴹⴰⴽⴰⵕ ⵏ ⵉⵏⵇⵇⵉⵙⵏ ⴰⴷ ⴷ ⵉⵏⵇⵇⵉⵙⵏ ⵏ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⵜⴰⵎⵙⴽⵔⵜ  ⵉⵙⵜⴰⵡⵀⵎⵎⴰⵏ ⵏ ⵓⵙⵇⵇⵉⵎ, ⵢⵉⵡⵉⵙ ⴳ ⵓⵙⴽⵔ ⵏ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵉⴱⵓⵖⵍⴰⵏ ⴼ ⵜⵎⵙⴰⵔⵉⵏ ⵉⵡⵉⵏⵉⵏ ⴰⵅⵎⵎⴻⵎ ⵏ ⵓⵎⵏⴰⴷ ⴰⵎⴰⵜⴰⵢ, ⵜⴰⵔ ⵜⵓⵔⴷⴰ ⵔⴰⴷ ⵉⴳ ⴰⵙⴽⵔ ⵏ ⵓⵎⵏⵣⴰⵢ ⵏ ⵓⵣⴷⴰⵢ ⵏ ⵜⵎⴰⵙⴰⵢⵜ ⴷ ⵓⵚⵉⵟⵏ ⴷ ⵓⵙⴷⵓⵙ ⵏ ⵓⵏⴱⴰⴹ ⵏ ⵜⵏⵓⴼⴰ ⵜⴰⴳⴷⵓⴷⴰⵏⵜ.

ⵏⵣⵎⵎⵉⵎ ⴳ ⵜⵡⴰⵍⴰ ⵜⵉⵙ ⵎⵔⴰⵡⵜ, ⵏⵉⵡⵣ ⵙ ⵜⵖⴰⵔⴰⵙⵜ ⵜⴰⵎⴷⵔⵓⵜ ⴳ ⵓⵙⵉⵔⴰ ⵏ ⵓⵙⵇⵇⵉⵎ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵎⴰⵙ ⵓⵔ ⵍⵍⵉⵏ ⵉⵣⵔⵉⵔⵉⴳⵏ ⵉⵥⴳⴳⵯⴰⵖⵏ ⵖ ⵜⵉⴹⴰⴼ ⴼ ⵓⵙⵡⵓⴷⴷⵓ ⵏ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⵙ ⵓⵙⵇⵙⵉ ⵏ ⵉⵏⵙⵙⵉⵅⴼⵏ ⴷ ⵉⵏⵎⵀⴰⵍⵏ ⵏⵏⵙⵏⵜ ⵙ ⵜⵉⵍⵉⵜ ⵏ ⵉⵎⴰⵡⵙⴰⵙⵏ ⵉⵎⵏⵜⵉⵍⵏ. ⴳⴰⵏⵜ ⵜⵙⵖⵍⴰⴼ ⵏ ⵉⵏⵇⵇⵉⵙⵏ ⴷ ⵉⵎⴷⵉⵡⴰⵍⵏ ⵏ ⵜⵙⵇⵇⵉⵎⵉⵏ, ⵜⵉⴷ ⵉⵙⴽⵔⵏ ⴰⵅⵎⵎⴻⵎ ⴰⵙⵔⵜⴰⵏ ⴷ ⵓⵎⵔⵙⵍⴰⵏ ⴷ ⵓⵏⵖⵎⴰⵙ ⴼ ⵉⵙⵓⵔⵙⵏ ⵏ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵓⴷⵖⴰⵔ ⵏⵏⵙⵏⵜ ⴳ ⵜⴷⵎⵙⴰ ⵜⴰⵏⴰⵎⵓⵔⵜ ⴷ ⵜⵉⵍⴰⵍⵜ ⵏⵏⵙⵏⵜ ⴳ ⵜⴳⵎⵉ.

ⵉⴳⴰ ⴳ ⵜⵉⵢⵢⴰⴼⵓⵜⵉⵏ ⵜⵉⵏⴰⵎⵎⴰⵙⵉⵏ ⵍⵍⵉ ⵏⵣⵎⵎⵉⵎ ⵖ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ ⴳ ⵜⵎⵙⴽⵔⵜ ⵏ ⵓⵙⵇⵇⵉⵎ ⴷ ⵜⵎⵥⵍⴰⵢⵉⵏ ⵏⵏⵙ, ⵉⴳⴰ ⵜⵜ ⵎⴰⵙ ⵜⵎⵉⵢⵢⵍ ⵙ ⵎⴰⴷ ⵉⴳⴰⵏ ⵡⵉⵏ ⵜⵉⴹⴰⴼ ⴷ ⵓⵣⵣⵔⴰⵢ ⵓⴳⴳⴰⵔ ⵏ ⵜⵡⵡⵓⵔⵉⵡⵉⵏ ⵏ ⵓⵣⵣⵔⴰⴼ, ⵉⴳⴰ ⵜⴰⵖⴰⵡⵙⴰ ⵉⵜⵜⵓⵙⵙⴰⵏ ⵉⴳⴰⵏ ⵜⵓⵍⴳⵉⵏⵜ ⴳ ⵓⵎⵏⴰⴹ ⴰⵎⴰⵜⴰⵢ ⴰⵎⴰⴹⵍⴰⵏ ⵉⵜⵜⵓⵙⵙⴰⵏ ⵙ ⵓⵏⵏⵓⵕⵥⵎ ⴷ ⵡⴰⵍⴰⵢ ⵏ ⵜⵓⵜⵔⴰⵡⵉⵏ ⵏ ⵡⴰⵎⵓⵏⵏ ⴳ ⵓⵏⴱⴰⴹ ⵏ ⵜⵎⴰⴼⴰⵡⵜ, ⴷ ⵓⵎⵏⴰⴹ ⴰⴷⵙⵜⴰⵔ ⴷ ⵓⵎⵔⵙⵍⴰⵏ ⴰⵏⴰⵎⵓⵔ ⵢⵓⵍⵍⵏ ⵜⴰⵏⴰⵥⴰⵕⵜ ⵏ ⵓⵚⵉⵟⵏ ⵉ ⵜⵎⴰⴼⴰⵡⵜ.

ⴰⵔ ⵜⴰⴽⴽⴰ ⵜⵉⵢⵢⴰⴼⵓⵜ ⴰⴷ ⵏⵏⵖ ⴰⵙⵏⴼⵍ ⴰⴷ (ⵉⵖ ⵜⴷⵓⵙ ⵜⴳⵓⵔⵉ) ⵎⵏⵏⴰⵡⵜ ⵜⵏⴰⵥⴰⵕⵉⵏ ⴷⴰⵜ ⵏ ⵜⵓⴼⵔⵉⵏⵉⵏ ⵜⵉⴱⵕⵍⴰⵎⴰⵏⵉⵢⵉⵏ, ⵉⵍⵉⵏⵜ ⵎⵏⵏⴰⵡⵜ ⵜⵏⴰⵥⴰⵕⵉⵏ ⵍⵍⵉ ⴷ ⵉⵇⵇⴰⵏⵏ ⴰⴷ ⵜⵜⵓⵙⴽⵉⵔⵏⵜ , ⵜⵉⵍⵉ ⴳⵉⵙⵏⵜ ⵜⵏⴰⵥⵕⵜ ⵏ ⵓⵙⵖⵓⴷⵓ ⵏ ⵓⴼⴰⵔⵙ ⴷ ⵜⵉⵍⵉⵜ ⵉⴼⴰⵔⵙⵏ ⴷ ⴰⴷ ⵓⵔ ⵉⵊⵍⵓ ⵡⴰⴽⵓⴷ ⴰⴱⵕⵍⴰⵎⴰⵏⵉ ⴷ ⵓⵙⵔⵜⴰⵏ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵜⵜⵓⵙⵎⵙⴰⵏ ⴳ ⵉⵙⵖⵍⴰⴼ ⴷ ⵜⵙⵓⵎⵔⵉⵏ ⵉ ⵓⵙⵖⵓⴷⵓ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⵉⵢⵢⴰⴼⵓⵜⵉⵏ ⵏⵏⵙ ⴷ ⵓⵙⵎⴰⵇⵍ ⵏ ⵓⴷⵔⵉⵣ ⵏⵏⵙⵏⵜ ⴼ ⵡⴰⵎⵓⵏ, ⴷ ⵓⵏⵢⴰⵍⴽⴰⵎ ⵊⴰⵔ ⵜⵏⴱⴰⴹⵜ ⴷ ⵓⵎⵏⴰⴷ ⴰⵎⴰⵜⴰⵢ, ⴷ ⵜⵉⴽⴽⵉ ⵏ ⵜⵓⵎⴰⵢⵜ ⵏ ⵜⵉⴷⵜ ⵉ ⵓⵎⵏⵏⵉ ⴰⴷⵙⵜⴰⵔ ⵉⵍⵍⴰⵏ ⴳ ⵓⵎⵢⴰⵡⴰⵙ ⴷ ⵓⵙⵎⴰⴷ ⴷ ⵓⵎⵢⴰⵙ ⵊⴰⵔ ⵜⵉⵏⴱⴰⴹⵉⵏ. ⵉⴳ ⵡⴰⵡⵜⵜⴰⵙ ⵏⵏⵖ ⴰⵎⴳⵔⵓ ⴰⴷ ⵜⴷⵓⵙ ⵜⵎⵢⵉⵎⴰⵏⵜ ⴳ ⵜⵎⵔⵙⴰⵍ ⴷ ⵓⵙⵎⵖⵔ ⵏ ⵓⵙⵖⵣⵏ ⵏⵏⵙ, ⴳⵉⵏⵜ ⵜⵎⵙⴽⴰⵔ ⵏ ⵜⵥⵍⴰⵢⵉⵏ ⴷ ⵜⵣⵣⵓⵍⵉⵏ ⴷ ⵜⵙⵎⵉⴳⴰⵍ ⵏⵏⵙⵏⵜ ⵜⵉⴷⴰ ⵙⴽⴰⵔⵏⵉⵏ ⴰⵜⵉⴳⵏ ⴳ ⵜⵙⵔⵜⴰⵢ.

ⴰⵔ ⴷ ⵉⵜⵜⴰⵡⵉ ⵓⵙⴳⵓⴷⵉ ⵏ ⵜⵓⵜⵔⴰⵡⵉⵏ ⴼ ⵓⵙⴽⵔ ⵏ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⵙⴳ ⵜⵉⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴰⴷ ⵢⵉⵍⵉ ⵓⵣⵣⵔⴰⵢ ⴳ ⵓⵏⵢⴰⵍⴽⴰⵎ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⴷ ⵜⵓⵔⴰⴳⵜ ⵏ ⵜⵙⵎⵉⴳⴰⵍ ⴰⴷ ⵙ ⵎⴰⴷ ⵉⵜⵜⴰⵡⵉⵏ ⴰⴷ ⵏⵉⵜⵜⵉ ⴼ ⵓⵏⵎⵓⵇⵇⴰⵔ ⵏ ⵜⵏⵓⴼⴰ, ⴷ ⵡⴰⵔⴰⵙⵎⴰⴷ ⵏ ⵜⵙⵎⵉⴳⴰⵍ ⴰⴷ (ⴳ 27 ⵏ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵍⵍⵉ ⵉⵙⵙⵓⵔⴳ ⵓⵙⵉⵔⴰ, ⵉⵍⵍⴰ ⵓⵙⵎⵏⵉⴷ ⵏ ⵉⵏⵇⵇⵉⵙⵏ ⵏ ⴽⴽⵓⵥⵜ ⴳ ⵜⵖⵉⵎⵉⵜ ⵜⴰⵎⴰⵜⴰⵢⵜ), ⴷ ⴰⴷ ⵓⵔ ⵜⵜⵓⵍⵙⵏⵜ ⵜⵙⵎⵉⴳⴰⵍ ⴼ ⵓⵙⵏⵜⵍ ⵉⴳⴰⵏ ⵢⴰⵏ ⵏⵖ ⵡⴰⴷ ⵜ ⵉⵔⵡⴰⵙⵏ ⴷ ⵜⵉⴽⴽⵉ ⵏ ⵜⵓⵔⴰⴳⵜ ⵉ ⵎⵏⵏⴰⵡⵜ ⵜⵙⵎⵉⴳⴰⵍ ⵙⴳ ⵢⴰⵜ ⵜⵙⵇⵇⵉⵎⵜ ⵉⴳⴰⵏ ⵢⴰⵜ. ⵏⵍⵍⴰ ⴷⴰⵜ ⵏ ⵓⵙⴽⵔ ⵏ ⵓⵏⴱⴰⴹ ⵏ ⵜⵉⴷⵜ ⵉ ⵜⵙⵎⵉⴳⴰⵍ ⴰⴷ ⵃⵎⴰ ⴰⴷ ⴷⴰⵔⵙⵏ ⵢⵉⵍⵉ ⵓⵖⵣⴰⵏ ⵍⵍⵉ ⴷ ⵉⵇⵇⴰⵏ ⴳ ⵜⵡⵡⵓⵔⵉ ⵏ ⵜⵉⴹⴰⴼ ⵍⵍⵉ ⵜⵜ ⵉⵔⵡⴰⵙⵏ.

ⴳ ⵓⵎⵏⵉⴷ ⵏⵏⵙ, ⵜⵓⵎⴰ ⵜⵎⵥⵍⵉⵜ ⵏ ⵓⵣⵣⵔⴰⵢ ⵏ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏⵏ ⴽⵉⴳⴰⵏ ⵏ ⵜⵏⴰⵥⴰⵕⵉⵏ. ⵉⵖ ⵉⵙⴳⵓⴷⵉ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵎⵥⵍⵉⵜ ⴰⴷ ⵎⵏⵏⴰⵜ ⵜⵎⵓⵣⴰⵢⵉⵏ ⵙⵜⴰⵡⵀⵎⵎⴰⵏⵉⵏ ⵍⴰⵏⵉⵏ ⴰⵜⵉⴳ ⵕⵡⴰⵏⵉⵏ ⵎⴽ ⵉⵜⵜⵓⵙⵙⴰⵏ ⴳ ⵜⴷⵉⵎⵓⵇⵔⴰⵟⵉⵢⵉⵏ ⵜⵉⵇⴱⵓⵔⵉⵏ ⴷⴼⴼⵉⵔ ⵏ ⵎⵔⵔⴰⵡ ⵉⵙⴳⴳⵯⴰⵙⵏ ⵙⴳ ⵓⵙⴷⵙⵜⵔ ⵏⵏⵙ, ⵜⵓⵎⴰ ⵜⵉⵣⵉ ⴰⴷ ⵉ ⵜⵉⵢⵢⴰⴼⵓⵜ ⵏ ⵜⵎⵙⵉⵔⵉⵏ ⵙⵍⴰⵡⵏ ⴰⴽⴽⵯ ⵎⴰⵙ ⴷ ⵜⵉⵡⵉ ⵜⴳⵓⵔⵉ ⵏ ⵓⵙⵓⵜⴳ  ⴷ ⵜⴰⵙⵡⵉⵏⴳⵎⵜ ⵜⴰⵏⴰⵎⵎⴰⵙⵜ ⴳ ⵓⵏⵇⵇⵉⵙ ⵉⵥⵍⵉⵏ ⵙ ⵓⵙⵡⵉⵏⴳⵎ ⵏ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ ⵍⵍⵉ ⵔⴰⴷ ⵜⵙⵙⵏⵜⵉ ⵜⵎⴰⵣⵉⵔⵜ ⵏⵏⵖ. ⴳⴰⵏⵜ ⵜⵎⵙⴰⵔⵉⵏ ⴰⴷ, ⵙ ⵉⵣⵡⴰⵔ ⴰⵙⵓⵊⴷ ⴰⵎⵣⵡⴰⵔⵓ ⵏ ⵓⵙⵏⵜⵉⵏ ⵏ ⵜⵡⵡⵓⵔⵉ ⵏ ⵓⵙⵓⵜⴳ ⵙ ⵓⵎⵙⴰⵙⴰ ⴼ ⵉⵎⵔⵙⵉ ⴰⵙⴳⴳⵯⵙⴰⵏ ⴳ ⵜⴳⵉⵔⴰ ⵏ ⴽⵓ ⴰⵙⴳⴳⵯⴰⵙ ⴰⵣⵣⵔⴰⴼ, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵓⵙⴽⵔ ⵏ ⵜⵡⵡⵓⵔⵉ ⵏ ⵓⵙⵓⵜⴳ ⵉⴳⴰⵏ ⵢⴰⵜ ⴳ ⵓⵙⵉⴷⵔⵓⵙ ⵖ ⴽⵔⴰⵢⴳⴰⵜ ⴰⵙⴳⴳⵯⴰⵙ ⴰⵣⵣⵔⴰⴼ.

ⵡⵉⵙ ⵙⵉⵏ, ⵉⵇⵇⴰⵏ ⴷ ⵓⵙⵉⴳⵓⵜ ⵏ ⵓⵏⵛⴽ ⵏ ⵉⴳⵏⵙⴰⵙⵏ ⵏ ⴽⵔⴰⵢⴳⴰⵜ ⵜⴰⵔⴰⴱⴱⵓⵜ ⴷ ⵜⴳⵔⵓⵎⵎⴰ ⵜⴰⴱⵕⵍⴰⵎⴰⵏⵉⵜ ⴳ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵃⵎⴰ ⴰⴷ ⵉⵔⵅⵓ ⵓⴱⵟⵟⵓ ⵏ ⵜⵙⵎⵉⴳⴰⵍ ⵊⴰⵔ ⵉⴳⵎⴰⵎⵏ ⵏⵏⵙ, ⵃⵎⴰ ⴰⴷ ⵜⵎⵓⵏ ⵖ ⵎⴰⴷ ⵢⵓⵛⴽⴰⵏ.

ⵉⵇⵇⴰⵏ ⴷ ⵓⵍⴰ ⴰⴷ ⵢⵉⵍⵉ ⵓⵖⴰⵡⴰⵙ ⵏ ⵡⴰⴽⵓⴷ ⴼ ⵜⵡⵡⵓⵔⵉ ⵏ ⵓⵙⵓⵜⴳ ⴷ ⵓⵡⵇⵇⵔ ⵏⵏⵙ, ⴰⴷ ⵉⵙⵎⵓⵏ  ⵜⵉⴼⵔⴽⵉⵡⵉⵏ ⵏ ⵓⵙⴽⵔ ⴷ ⵡⴰⴽⵓⴷ ⵏ ⵓⵙⵎⴰⴷ ⵏ ⴽⵓ ⵜⴰⵡⵡⵓⵔⵉ ⵜⴰⵢⵢⴰⵡⵜ ⴷ ⵉⵣⵎⴰⵣ ⵏ ⵓⵙⴽⵔ ⵏ ⵜⵡⵡⵓⵔⵉⵡⵉⵏ ⴳ ⵓⴱⴰⵔⴰⵣ ⴷ ⵜⵉⵔⵔⴰ ⵏ ⵓⵏⵇⵇⵉⵙ ⴷ ⵓⵙⵎⵏⵉⴷ ⵏⵏⵙ.

ⵃⵎⴰ ⴰⴷ ⵜⴳ ⵜⵎⵙⴽⵔⵜ ⵏ ⵜⵎⵥⵍⵉⵜ ⵜⴰⴷⵙⵜⴰⵔⵜ ⵜⴰⵎⴰⵢⵏⵓ ⵜⴰⴷ ⵉⵕⵡⴰⵏ; ⵃⵎⴰ ⴰⴷ ⵉⵙⴽⵔ ⵓⵙⵓⵜⴳ ⴰⴷⵔⵉⵣ

ⴷ ⵜⵉⵢⵢⴰⴼⵓⵜ ⵏⵏⵙ ⴳ ⵓⵙⵖⵓⴷⵓ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵉⵇⵇⴰⵏ ⴷ ⵓⴹⴼⵕ ⵏ ⵉⵎⴰⵍ ⵏ ⵉⵙⵖⵍⴰⴼ ⴼ ⵜⵉⵢⵢⴰⴼⵓⵜⵉⵏ ⵏ ⴽⵔⴰⵢⴳⴰⵜ ⵜⴰⵡⵡⵓⵔⵉ ⵏ ⵓⵙⵓⵜⴳ. ⵉⵖ ⵉⵥⵍⵉ ⵓⴹⴼⵕ ⴰⴷ ⵙ ⵓⵙⵇⵇⵉⵎ ⵏ ⵉⵎⵓⵔⴰ  ⵙ ⵜⵉⴹⴰⴼ ⴼ ⵜⵡⵡⵓⵔⵉ ⵜⵓⵏⴱⵉⴹⵜ ⴷ ⵓⵣⵣⵔⴰⴼ, ⵉⵇⵇⴰⵏ ⴷ ⵜ ⵜⵏⴱⴰⴹⵜ ⵜⴰⵣⵣⵔⴰⴼⵜ ⵓⵣⵣⴳⵉⵔ ⵏ ⵉⵙⵖⵍⴰⴼ, ⵙⵍⴰⵡⴰⵏ ⴰⴽⴽⵯ ⵎⴰⴼ ⵉⵍⵍⴰ ⵓⵎⵙⴰⵙⴰ ⴳ ⵜⵖⵉⵎⵉⵜ ⵜⴰⵎⴰⵜⴰⵢⵜ ⵏ ⵓⵎⴹⴰⴽⴰⵕ ⵏ ⵓⵏⵇⵇⵉⵙ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ, ⵏⵖ ⵔⴰⴷ ⵉⵖⴰⵎⴰ ⵓⴽⴰⵏ ⵓⵙⵇⵙⵉ ⵏ ⵜⵉⵕⵡⵉ ⴷ ⵜⵉⵔⴰⵜⵉⵏ ⵏⵏⵙ.

ⵜⵉⵏⴳⴳⵯⴰⴷⵉⵏⴳⴳⵯⴰ

ⴰⵔ ⵜⵜⵣⵔⴰⵢ ⵜⵎⴰⵣⵉⵔⵜ ⵏⵏⵖ, ⴰⵎ ⵜⵉⵎⵉⵣⴰⵔ ⵏ ⵓⵎⴰⴹⴰⵍ ⵢⴰⵏ ⵓⵣⵎⵣ ⵉⵛⴷⴷⴰⵏ ⴳ ⵓⵎⵣⵔⵓⵢ ⵙ ⵓⴱⴰⵢⵢⵓⵕ ⵏ ⴽⵉⴼⵉⴷ 19.  ⵜⵔⵎⵙ ⵜⵎⴰⵣⵉⵔⵜ ⵏⵏⵖ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ ⵙ ⵜⵖⴰⵔⴰⵙⵜ ⵉⵕⵡⴰⵏ, ⵉⵟⵟⴰⴼ ⵓⵙⵡⵓⴷⴷⵓ ⴰⴷ ⴽⵕⴰⴹ ⵉⵣⵡⵍⵏ, ⵏⵖ ⴽⵕⴰⴹ ⵉⵎⵓⵔⵙⵏ ⵉⵅⴰⵜⴰⵔⵏ:

• ⴰⵎⵣⵡⴰⵔⵓ ⵉⴳⴰ ⵜ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⴷ ⵓⵙⴱⴷⴷⵉ ⵏⵏⵙ ⴷ ⵓⵙⵡⵓⴷⴷⵓ ⵏ ⵉⴷⵔⵉⵣⵏ ⵏⵏⵙ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵓⵙⵡⵓⴷⴷⵓ ⵏ ⵜⵉⵣⵉ ⵏ ⵓⵥⵍⴰⵢ ⴰⴷⵓⵙⴰⵏ ⵙ ⵜⵎⵢⴰⴷⴰⵙⵉⵏ ⴷ ⵜⵎⵙⴽⴰⵔ ⵏ ⵜⵡⵉⵣⵉ ⴷ ⵜⵉⵍⵉⵜ ⵉⵕⵡⴰⵏ ⵏ ⵜⵎⵔⵙⴰⵍ ⵏ ⵓⵡⴰⵏⴽ; ⴰⵢⵍⵍⵉ ⵉⵙⴱⴷⴷⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⴳ ⵜⴷⵓⵙⵉ ⴷ ⵡⴰⵎⵓⵏ ⴷ ⵜⴷⵎⵙⴰ.
• ⵡⵉⵙ ⵙⵉⵏ, ⵚⴰⵃⴰ ⵏ ⵜⵏⴰⵥⴰⵕⵜ ⵏ ⵓⴳⵣⵣⴰⵢ ⴳ ⵓⵎⵏⴰⴹ ⴰⴳⵔⴰⵖⵍⴰⵏ ⴳ ⵉⵍⵍⴰ ⵓⵎⵣⵉⵣⵣⵍ ⵉⵛⴷⴷⴰⵏ ⴼ ⵉⴳⵣⵣⴰⵢⵏ, ⵜⴳⴰ ⵜⵎⴰⵣⵉⵔⵜ ⵏⵏⵖ ⵙⴳ ⵜⵉⵎⵣⵡⵓⵔ ⴳ ⵓⵎⴰⴹⴰⵍ ⴳ ⵢⵉⴳⵔ ⵏ ⵓⴳⵣⵣⴰⵢ, ⵙ ⵉⵡⵉⵣ ⴰⴳⵍⴷⴰⵏ ⵃⵎⴰ ⴰⴷ ⵜⴻⵟⵟⵉⴼ ⵜⵎⴰⵣⵉⵔⵜ ⵏⵏⵖ ⵉⴳⵣⵣⴰⵢⵏ ⴷ ⵜⵎⵢⵉⵎⴰⵏⵜ ⴷ ⵓⵙⵓⵜⴳ ⴰⵅⴰⵜⴰⵔ ⴷ ⵓⵡⵇⵇⵔ ⵍⵍⵉ ⵉⵟⵟⴰⴼ ⴱⴰⴱ ⵏ ⵡⴰⴷⴷⵓⵔ ⴳ ⵓⵙⵡⵉⵔ ⴰⴳⵔⴰⵖⵍⴰⵏ. ⵜⵙⴽⵔ ⵜⵎⴰⵡⴰⵙⵜ ⵏ ⵜⴳⵯⵏⵙⴰⵏⵜ ⴷ ⵜⵉⵏ ⵜⴷⵓⵙⵉ ⴰⵙⵏⴼⵍⵓⵍ ⴳ ⵓⵙⵡⵓⴷⴷⵓ ⵏ ⵓⵎⵓⵙⵙⵓ ⵙ ⵜⵖⴰⵔⵙⵜ ⵉⵕⵡⴰⵏ ⴷ ⵉⴳⴰⴷⴷⴰⵏ.
• ⴷ ⵖ ⵜⴳⵉⵔⴰ, ⵚⴰⵃⴰ ⵏ ⵓⴼⴰⵔⵙ ⵏ ⵉⴳⵣⵣⴰⵢⵏ ⴷ ⵓⵙⵎⵓⵙⵙⵓ ⵏⵏⵙ ⴷ ⵜⵉⵔⴰⵜ ⵏ ⵓⴷⵔⴰⵡ ⵏ ⵓⴼⴰⵔⵙ ⴷ ⴰⵢⵜ ⵎⴰⵜⵏ ⵏⵏⵖ ⴳ ⵜⵎⵉⵣⴰⵔ ⵏ ⵉⴼⵔⵉⵇⵢⴰ.

ⴳ ⴽⵓ ⵉⵎⵓⵔⵙⵏ ⴰⴷ, ⵉⵍⵍⴰ ⵡⴰⵜⵉⴳ ⵏ ⵜⵏⴰⵔⴰ, ⵜⴰⴷⵓⵙⵉ ⵏ ⵜⵏⴰⵔⴰ, ⴰⵖⵣⴰⵏ ⵏ ⵜⵏⴰⵔⴰ, ⵜⵉⵔⴰⵜ ⵏ ⵜⵏⴰⵔⴰ, ⵜⴰⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉ ⵉ ⵜⵎⴰⵣⵉⵔⵜ ⴳ ⵜⵎⵙⵓⵜⵍⵜ ⴰⴷ ⵉⵥⵍⵉⵏ ⵉⴳⴰⵏ ⵜⴰⴳⵔⴰⵖⵍⴰⵏⵜ ⵉⵛⴷⴷⴰⵏ.

ⴰⵔ ⵜⵜⵉⵏⵉⵏ ⵉⵏⵎⵎⴰⵍⵏ, ⵎⴰⵙ ⵔⴰⴷ ⵜⵙⵏⴼⵍ ⵜⵎⴰⵣⵉⵔⵜ ⵏⵏⵖ ⵜⴰⵙⵙⴰⵙⵜ ⵏ ⵓⴱⴰⵢⵢⵓⵕ ⴷ ⵡⴰⵏⵏⴰⵣⵏ ⵏ ⵓⵙⵎⵖⵔ ⴷ ⵡⴰⵍⴰⵢ, ⴷ ⵚⴰⵃⴰ ⵏ ⵓⵖⵓⵍ ⵏ ⵓⵕⵥⵥⵓⵎ ⵏ ⵜⴷⵉⵏⴰⵎⵉⵜ ⵜⴰⴷⵎⵙⴰⵏⵜ ⵉⴷⵓⵙⵏ  ⵉ ⵜⴼⵔⴽⴰ ⴷⴼⴼⵉⵔ ⵏ ⴽⵓⴼⵉⴷ,  ⴷ ⵚⴰⵃⴰ ⵏ ⵜⵏⴰⵥⴰⵕⵜ ⵏ ⵜⵣⵣⵉⴳⵣⵜ ⵏ ⵜⴷⵉⵎⵓⵇⵔⴰⵟⵉⵜ ⴷ ⵓⵔⴳⴳⵉⴳ.

ⵙ ⵓⵙⴷⴷⴻⴷ, ⵜⴰⴱⵖⵔⵜ ⵎⴰ ⴰⴷ ⵜⴳⴰ ⵜⵉⵏ ⵜⵎⵔⵙⵍⵜ ⵜⴰⴳⵍⴷⴰⵏⵜ ⵍⵍⵉ ⵉⵙⴽⵔⵏ ⴰⵎⵛⴰⴱⴱⴰⴽ ⴰⵏⴰⵎⵓⵏ ⵜⴹⵎⵏ ⵓⵍⴰ ⵜⴰⵣⵣⵉⴳⵣⵜ ⵏ ⵓⵡⴰⵏⴽ, ⵜⴱⴷⴷ ⴼ ⵓⵡⵇⵇⵔ ⵏ ⵓⴷⵓⵙⵜⵓⵔ ⴷ ⵓⵙⵡⵓⴷⴷⵓ ⵉⵥⵉⵍⵏ ⵜⵎⵔⵙⴰⵍ ⴷ ⵓⴼⵔⴰⴳ ⵏ ⵓⵙⵜⴰⵢ ⴰⴷⵉⵎⵓⵇⵔⴰⵟⵉ ⵎⴽ ⵉⵍⵍⴰⵏ ⴳ ⵓⴷⵓⵙⵜⵓⵔ ⴰⴷ, ⵉⴳⴰⵏ ⴰⵙⴳⵓⵎ ⵏ ⵓⵎⵙⴰⵙⴰ ⴷ ⵜⵔⵙⵍⵜ ⵏⵏⵙ.

ⵉⵙⵙⵔⵅⴰ ⵎⴰⵢⴰ ⵏⵏ ⵜⵉⵍⵉⵜ ⵏ ⵜⵎⴰⵣⵉⵔⵜ ⵏⵏⵖ ⴳ ⵜⴷⵉⵎⵓⵇⵔⴰⵟⵉⵢⵉⵏ ⵜⵜⵉⵎⵖⵓⵔⵏⵉⵏ ⵉⴱⴷⴷⵏ ⴼ ⵜⵎⵏⵏⴰⵡⵜ ⵜⴰⴷⵍⵙⴰⵏⵜ ⵉⴱⵓⵖⵍⴰⵏ ⴷ ⵜⵎⵏⵏⴰⵡⵜ ⵜⴰⵙⵔⵜⴰⵏⵜ ⵉⴱⴷⴷⵏ ⴼ ⵓⴷⵓⵙⵜⵓⵔ ⴰⴷⵉⵎⵇⵔⴰⵟⵉ ⵉⵍⴻⵍⵍⵉ ⴰⵎⴰⵢⵏⵓ, ⵉⴳⴰ ⴰⵡⴷ ⵏⵜⵜⴰⵏ ⵜⴰⵢⵢⴰⴼⵓⵜ ⵏ ⵉⵙⵏⴼⵍⵏ ⴳⴳⵓⵜⵏⵉⵏ ⴷ ⵉⵎⵙⴰⵙⴰⵏ ⴷ ⵓⵎⵙⴰⵡⴰⵍ ⴰⵏⴰⵎⵓⵔ ⵊⴰⵔ ⴽⵓ ⵉⴼⵔⴷⴰⵙ ⵏ ⵜⵎⵜⵜⵉ.

ⵙⵖⴰⵡⵙⴰⵏ ⴱⴷⴷⴰ ⵓⵎⵎⵉⵥⵏ ⴰⴷ ⵉ ⵓⵙⵓⵜⴳ ⴷ ⵓⵙⵖⵓⴷⵓ ⵃⵎⴰ ⴰⴷ ⴱⴷⴷⴰ ⵉⵍⵉⵏⵜ ⵜⵜⵢⵉⵎⵉⵥⵏⵜ ⵙⴳ ⵉⴼⵔⴷⴰⵙ ⵏ ⵡⴰⵎⵓⵏ ⵍⵍⵉ ⵢⴰⴽⴽⴰⵏ ⵉ ⵢⵉⵅⴼ ⵏⵏⵙ ⴰⴼⵔⴰⴳ ⵙⴳ ⵉⵎⵉⵣⵉⵜⵏ ⵏ ⵓⵖⵓⵍ ⴷ ⵓⵎⵎⵓⴽⵔⵉⵙ ⴷ ⵜⴻⵟⵟⵓⵕⴼⴰ ⴷ ⵜⴰⴱⴱⴰⵢⵢⵉⵏ ⴷ ⵡⴰⵔⴰⵏⴰⵔⵓⵣ.

ⴳ ⵓⵎⵏⴰⴹ ⴰⵎⴰⴹⵍⴰⵏ ⵖ ⵎⵎⴰⵖⵏⵜ ⵜⴷⵉⵎⵓⵇⵔⴰⵟⵉⵢⵉⵏ ⴷ ⴽⵉⴳⴰⵏ ⵏ ⵜⵏⴰⵥⵕⵉⵏ ⴷ ⴰⵔ ⵙⵉⴳⴳⵉⵍⵏⵜ ⴰⵙⵎⴰⵢⵏⵓ ⵏ ⵉⵅⴼⴰⵡⵏ ⵏⵏⵙⵏⵜ, ⵉⵇⵇⴰⵏ ⴰⵖ ⴷ ⴳ ⵍⵎⵖⵔⵉⴱ, ⴰⴷ ⵏⴱⵓⵔⵣ ⵙ ⵜⵎⵢⵓⵔⵉⵏ ⵏⵏⵖ ⵜⵉⴷⵉⵎⵓⵇⵔⴰⵟⵉⵢⵉⵏ ⴷ ⵓⵙⵡⵓⵔⵉ ⴼ ⵓⵙⵕⵚⵓ ⵏ ⵜⴷⵍⵙⴰ ⵏⵏⵖ ⵜⴰⵙⵔⵜⴰⵏⵜ ⴷ ⵜⴷⵉⵎⵓⵇⵔⴰⵟⵉⵜ, ⵏⵎⵎⴰⵖ ⴰⴷ ⵏⵍⴽⵎ ⴰⵎⵙⴰⵙ ⴼ ⵉⵎⵓⴽⵏⵏ ⵉⵅⴰⵜⴰⵔⵏ ⵍⵍⵉ ⵉⵙⵙⴷⵓⵙⵏ ⴰⵏⴰⵡ ⵏⵏⵖ ⴰⴷⵉⵎⵓⵇⵔⴰⵟⵉ ⴰⵎⴰⵢⵏⵓ.

ⴰⵙⵡⵓⵔⵉ ⵙ ⵓⵎⵙⴰⵙⴰ ⵓⵔ ⵉⴳⵉ ⵜⵓⵙⵔⴰ, ⴷ ⵓⵔⴷ ⵉⵇⵇⴰⵏ ⴰⴷ ⵉⵜⵜⵃⵉ, ⴰⵎⵣⵔⴰⵢ ⵍⵍⵉ ⵉⴳⴰⵏ ⵙⴳ ⵜⵉⵔⵙⴰⵍ ⵏ ⵜⴷⵉⵎⵓⵇⵔⴰⵟⵉⵜ, ⴷ ⵓⵙⵖⵣⵏ ⵏⵏⵙ ⵓⵔ ⴷ ⵉⵍⴰⵣⵎ ⴰⴷ ⵉⴳ ⴰⵜⴰⴽⵜⵉⴽⵉ ⵏⵖ ⵡⵉⵏ ⵜⵎⵙⵓⵜⵍⵜ ⵏⵖ ⵡⵉⵏ ⵜⵎⵍⴷⴰ, ⵉⵇⵇⴰⵏ ⴷ ⵓⵏⵢⴰⵍⴽⴰⵎ ⴷⵉⴷⵙ  ⴷ ⴰⴳⵣⵣⵓⵎ ⵙⴳ ⵜⴷⵍⵙⴰ ⴷ ⵜⴷⵉⵎⵓⵇⵔⴰⵟⵉⵜ.

ⴰⵔ ⵥⵕⵕⴰⵖ ⵎⴰⵙ ⴷ ⴰⵎⵙⴰⵙ ⵉⵥⴹⴰⵕ ⴰⴷ ⵢⴰⵡⵙ ⵖ ⵓⵙⵉⵜⵜⵉ ⵏ ⵜⴰⴱⴱⴰⵢⵢⵉⵏ ⴳ ⵓⵎⵣⵔⵓⵢ ⴷ ⵜⵣⴷⴰⵢⵉⵏ ⵊⴰⵔ ⵉⵎⴷⵔⴰⵡⵏ, ⵔⴰⴷ ⵉⵕⵡⵓ ⵓⵙⵕⵚⵓ ⵏⵏⵙ ⴷ ⴰⵙⵡⵉⵏⴳⵎ ⴷ ⵜⴷⵍⵙⴰ ⴷ ⵜⴼⵍⵙⴰⴼⵜ ⵏ ⵓⵙⵡⵓⴷⴷⵓ ⴳ ⵓⵔⴳⴳⵉⴳ ⴷ ⵓⵙⵎⵖⴱⵔ ⵏ ⵜⵔⵙⵍⵜ ⵏ ⵜⵎⴷⵔⴰⵡⵜ.

ⵖ ⵜⵣⴷⴰⵢⵜ ⴷ ⵜⵎⵉⵜⴰⵔ ⵏ ⵜⴼⵔⴽⴰ ⴷ ⵓⵎⵏⴰⴹ ⵏ ⵖⵉⵍⴰⴷ ⴳ ⵜⵎⴰⵣⵉⵔⵜ ⵏⵏⵖ ⵖ ⵜⵍⵍⴰ ⵜⵣⵣⵉⴳⵣⵜ ⵏ ⵉⵎⵓⴽⵏⵏ ⵙ ⵉⵡⵉⵣ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ   ⵉ ⵜⵉⴽⴽⵉ ⵏ ⵓⵏⴼⵓⵙ ⴰⵎⴰⵢⵏⵓ ⵏ ⴽⵓ ⵉⴳⵔⴰⵏ ⵏ ⵜⵓⴷⵔⵜ, ⵉⵇⵇⴰⵏ ⴷ ⵓⵙⴷⴷⴻⴷ ⵎⴰⵙ ⵉⵙⵙⵏⵜⵉ ⵍⵎⵖⵔⵉⴱ ⴳ ⵜⴳⵉⵔⴰ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ ⵢⴰⵜ ⵜⴼⵔⴽⴰ ⵜⴰⵎⴰⵢⵏⵓⵜ ⵏ ⵉⵎⵓⴽⵏⵏ ⵉⴷⵎⵙⴰⵏⵏ ⴷ ⵉⵎⵔⵙⵍⴰⵏⵏ ⴷ ⵉⵏⴰⵎⵓⵏⵏ. ⵍⵍⴰⵏ ⴰⴽⴽⵯ ⵉⵙⵏⴼⵍⵏ ⴼⴰⵡⵏⵉⵏ ⴳ ⴽⵓ ⵉⴳⵔⴰⵏ, ⵙ ⴽⵓ ⵜⵉⵏⴰⵥⴰⵕⵉⵏ  ⵏⵏⵙⵏ ⵍⵍⵉ ⵙⵖⴰⵡⵙⴰⵏⵉⵏ ⵙ ⵓⴼⵓⵍⵍⵙ ⵏⵏⵖ ⴰⵎⴳⵔⵓ ⴷ ⵓⵙⵎⵓⵙⵙⵓ ⵏⵏⵖ ⴰⵎⴳⵔⵓ ⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⵉⴳⴰ ⵍⵃⴰⵍ ⴽⵕⴰⴹ ⵉⵙⵎⵓⵜⵜⵓⵢⵏ ⵉⵅⴰⵜⴰⵔⵏ:

-          ⴰⵎⵣⵡⴰⵔⵓ, ⵎⴰⵙ ⵜⵍⵍⴰ ⵜⵎⴰⵣⵉⵔⵜ ⵏⵏⵖ ⴷ ⵓⵙⴰⴽⵓⴷ ⵏ ⵓⵙⵖⵣⵏ ⴷ ⵓⵙⴽⵔ ⵏ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ, ⵍⵍⵉ ⵔⴰⴷ ⵉⵙⵖⴰⵡⵙⴰ ⵓⵣⵣⴳⵉⵔ ⵏⵏⵙ ⵙ ⵉⵙⵖⴰⵡⵙⴰⵜⵏ ⴳ ⵓⵣⵣⵔⴰⴼ ⴷ ⵓⵙⴰⵜⵉ ⴰⵣⵔⴼⴰⵏ ⴷ ⵓⵎⵔⵙⵍⴰⵏ ⴷ ⵢⵉⴳⵔ ⵏ ⵜⵉⴹⴰⴼ ⴷ ⵓⵙⵓⵜⴳ.

-          ⵡⵉⵙ ⵙⵉⵏ, ⴳ ⵓⵎⵏⴰⴹ ⵏ ⵡⴰⵏⴰⵡ ⴰⵎⴰⵢⵏⵓ, ⴷ ⵓⵙⴽⵔ ⵏ ⵉⵎⵏⴰⴷⵏ ⵏⵏⵙ ⵉⵏⴰⵎⵓⵏⵏ, ⵉⴳⴰ ⵜ ⵎⴰⵙ ⵜⵙⵙⵏⵜⵉ ⵜⵎⴰⵣⵉⵔⵜ ⵏⵏⵖ ⵢⴰⵏ ⵓⵙⵎⴰⵜⵜⵉ ⵉⴼⴰⵡⵏ ⴳ ⵢⵉⴳⵔ ⵏ ⵓⴼⵔⴰⴳ ⴰⵏⴰⵎⵓⵏ. ⵓⵔ ⵉⴳⵉ ⵍⵃⴰⵍ ⵖⴰⵙ ⴰⴷ ⵉⵜⵜⵓⴼⴽⵉ ⵉ ⵜⵡⵉⵣⵉ ⴷ ⵓⵎⵢⴰⵡⴰⵙ ⵢⴰⵏ ⵓⵔⵎⵎⵓⵙ ⴰⵏⵎⵓⵔⵉ ⴰⵎⴰⵢⵏⵓ, ⴰⵣⵔⴼⴰⵏ ⴷ ⵓⵎⵔⵙⵍⴰ, ⵙ ⵜⵡⵉⵙⵉ ⵏ ⴽⵓ ⵉⵎⵙⵜⴳⴳⴰⵔⵏ, ⵎⴰⵛⵛ ⵉⴳⴰ ⴰⵙⵙⴰⵔⵓ ⴰⵙⵜⵔⴰⵜⵉⵊⵉ ⴳ ⵓⴼⴳⴰⵏ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏⵏⵙ ⴳ ⵜⵏⵓⴼⴰ ⵜⵉⴷⵓⵙⴰⵏⵉⵏ ⵕⵡⴰⵏⵉⵏ, ⴳ ⵓⵙⵙⵍⵎⴷ ⵉⵥⵉⵍⵏ ⵉⵙⴽⴰⵔⵏ ⴰⴼⴰⵔⵙ, ⵢⴰⴽⴽⴰⵏ ⴰⵏⵏⴰⵣⵏ ⵉⴳ ⵜⴰⵙⴰⵔⵓⵜ ⵏ ⵓⵙⵎⵖⵔ ⴰⵏⴰⵎⵓⵏ, ⴷ ⵓⴽⵛⵛⵓⵎ ⵏ ⵓⵙⴱⴷⴷⵉ ⵏ ⵓⵥⵍⴰⴹ ⴷ ⵉⵎⵣⴰⵔⴰⵢⵏ, ⴷ ⵜⵏⴰⴼⵜ ⵏ ⵓⵙⵓⵏⴼⵓ ⵢⴰⴽⴽⴰⵏ ⴰⴷⴷⵓⵔ.

-          ⴳ ⵓⵣⴷⴰⵢ ⴷ ⵉⵙⵎⵓⵜⵜⵓⵢⵏ ⴰⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵍⴰⵏⵉⵏ ⴰⵏⴰⵔⵓⵣ, ⵉ ⵓⵙⵓⵊⴷ ⵏ ⵉⵙⵖⴰⵡⵙⴰⵜⵏ ⵏⵏⵙ ⵉⵥⵕⴼⴰⵏⵏ, ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵉⵜⵜⵓⵙⴽⵔ “ⵓⴼⵏⵉⵇ ⵏ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵓⵙⵙⴰⵔⵓ”, ⵔⴰⴷ ⵉⴳ ⴰⴼⵏⵉⵇ ⵏ ⵓⵙⵙⴰⵔⵓ ⴰⵙⵜⵔⴰⵜⵉⵊⵉ ⵏ ⵓⵙⵥⵕⴼ ⵙ ⵎⴰⴷ ⵉⵙⵎⴷⵏ ⴷ ⵓⵎⵓⴽⵏ ⵏ ⵉⵔⴳⴰⵢⵏ, ⴷ ⵓⵖⵓⵍ ⵏ ⵓⵙⵏⴳⵉⴷⴷⵉ ⵏ ⵜⵎⵔⵙⴰⵍ ⴷ ⵜⵓⵚⴽⵉⵡⵉⵏ ⵜⵉⴳⴷⵓⴷⴰⵏⵉⵏ ⴷ ⵉⴽⵛⵛⵓⵎⵏ ⵏⵏⵙⵏⵜ ⴷ ⵜⵎⵥⵍⴰⵢ ⵏⵏⵙⵏⵜ.

ⵉⴳⴰ ⵖ ⵜⵙⵖⴰⵡⵙⴰⵏⵉⵜ, ⴷ ⵓⵙⵉⵙⵙⵏ ⴷ ⵓⵙⵓⵜⴳ ⴷ ⵓⵡⵇⵇⵔ ⵍⵍⵉ ⴷ ⵉⵇⵇⴰⵏ, ⴰⴷ ⴷⴰⵖ ⵏⵙⴷⴷⵉⴷ ⵎⴰⵙ ⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵙ ⵉⵙⴰⵡⵓⵔⵏ ⴰⴷ ⵉⵜⵜⵓⵙⵎⴰⵢⵏⵓⵏⵏ ⵉⵅⴰⵜⴰⵔⵏ ⴷ ⵉⵏⴰⵔⵓⵣⵏ, ⵉⵣⵣⵉⴳⵣ ⵙ ⵍⵎⵖⵔⵉⴱ ⴳ ⵜⵎⵙⵓⵜⵍⵉⵏ ⵜⵉⵏⴰⵎⵓⵔⵉⵏ ⴷ ⵜⵎⴰⴹⴰⵍⵉⵏ ⵛⴷⴷⴰⵏⵉⵏ, ⵙ ⵜⵓⵏⵥⵉⵥⵜ ⴷ ⵓⵙⵎⴰⵇⵍ ⴰⵎⵣⵡⴰⵔⵓ, ⵙ ⵡⴰⵏⴰⵡ ⵏ ⵓⵡⴰⵏⴽ ⵏ ⵓⴼⵔⴰⴳ ⴰⵏⴰⵎⵓⵏ ⵍⵍⵉ ⵉⵜⵜⵓⵙⵖⴰⵡⵙⴰⵏ ⴳ ⵓⵎⵏⴰⴹ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⴷ ⵡⴰⵏⴰⵡ ⴰⵏⴳⵎⵓ ⵉⵎⵙⴰⵙⴰⵏ ⴷ ⵓⵎⵏⴰⴹ ⵏⵏⵙ ⴷ ⵓⵎⵣⵔⵓⵢ ⵏⵏⵙ ⴷ ⵜⵎⵥⵍⴰⵢ ⵏⵏⵙ ⵍⵍⵉⵖ ⵉⴳⴰ ⴰⵡⴰⵏⴽ ⴰⵇⴱⵓⵔ ⵉⵟⵟⴰⴼⵏ ⵜⵉⵎⵢⵓⵔⵉⵏ ⵏ ⵓⵡⴰⵏⴽ ⵍⵍⵉⵖ ⵉⴳⴰ ⴰⵡⴰⵏⴽ ⵉⵍⵍⴰⵏ ⴳ ⵜⵉⴷⵜ ⴳ ⵓⵎⵣⵔⵓⵢ.

ⴰⵔ ⵙⵙⵔⵓⵙⵏ ⵉⵙⴰⵡⵓⵔⵏ ⴰⴷ ⵉⵅⴰⵜⴰⵔⵏ ⴷ ⵥⵍⵉⵏⵉⵏ ⴷ ⵉⵎⵓⴽⵏⵏ ⵉⵚⴽⵡⴰⵏⵏ, ⵜⵉⵎⵔⵙⵍⵜ ⵜⴰⵣⵣⵔⴰⴼⵜ  ⴷ ⵉⴼⵔⴷⴰⵙ ⵉⵙⵔⵜⴰⵏⵏ ⴷ ⵜⵓⴼⵔⵉⵏⵉⵏ ⴷⴰⵜ ⵏ ⵜⵎⴰⵙⴰⵢⵢⵉⵏ ⵜⵉⵎⵣⵔⴰⵢⵉⵏ. ⵙⵖⴰⵡⵙⴰⵏ ⵙ ⵓⵙⵎⵓⵙⵙⵓ ⵉⵥⵍⵉⵏ, ⴷ ⵓⵙⵓⵜⴳ ⵍⵍⵉ ⵔⴰⴷ ⵉⵙⴽⵔ ⴰⵙⴳⵓⴷⵉ. ⵉⴳ ⵡⴰⵡⵜⵜⴰⵙ ⴰⵙⴽⵔ ⵏ ⵜⵣⵣⵉⴳⵣⵜ ⵏ ⵍⵎⵖⵔⵉⴱ, ⴷ ⵓⴼⵔⴰⴳ ⵏ ⵍⵎⵖⵔⵉⴱ, ⴷ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ ⴷ ⵓⵙⵖⵓⴷⵓ ⵏ ⵜⵢⵢⴰⴼⵓⵜ ⵏ ⵜⵎⵔⵙⴰⵍ ⴳ ⵓⵙⴰⵜⵉ ⵏ ⵡⴰⵏⵡ ⵏⵏⵖ ⴰⴷⵉⵎⵓⵇⵔⴰⵟⵉ ⴰⵎⴰⵢⵏⵓ  ⵏ ⵜⵡⵉⵣⵉ ⵖ ⵉⵎⵓⵏ ⵓⵎⴰⴷⴰⵏ ⴰⵎⵖⵔⵉⴱⵉ ⴷ ⵜⴷⵓⵙⵉⵡⵉⵏ ⵏⵏⵙ ⵜⵓⴷⴷⵉⵔⵉⵏ ⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ ⵍⵍⵉ ⵉⴳⵓⴷⵏ ⵍⵎⵖⵔⵉⴱ ⴳ ⵓⵙⵎⵖⵔ ⵏⵏⵙ ⴷ ⵓⴼⵓⵖ ⵏⵏⵙ ⴷ ⵜⴷⵓⵙⵉ ⵜⴰⴷⵉⵎⵓⵇⵔⴰⵟⵉⵜ ⵜⴰⴷⵎⵙⴰⵏⵜ ⵉⵟⵟⴰⴼⵏ ⴰⴷⵖⴰⵔ ⴰⵎⵇⵔⴰⵏ ⴳ ⵓⵎⵏⵥⴰⵡ ⴷ ⵓⵎⴰⴹⴰⵍ.

ⵜⵉⵏⴳⴳⵯⴰⴷⵉⵏⴳⴳⵯⴰ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⴰⵢⵍⵍⵉ ⵉⵜⵜⵓⵙⴽⴰⵔⵏ ⵉⴳⴰ ⵜⴰⵢⵢⴰⴼⵓⵜ ⵏ ⵜⵡⵡⵓⵔⵉ ⵜⴰⵎⴳⵔⵓⵜ ⵏ ⴽⵓ ⵉⴼⵔⴷⴰⵙ ⴷ ⵉⵏⴳⵎⴰⵎⵏ ⵓⵙⵇⵇⵉⵎ, ⵜⵓⴳⵜ ⴷ ⵜⵓⵣⵍⵜ, ⵓⵔ ⵔⴰⴷ ⵉⵜⵜⵓⵙⴽⵉⵔ ⵜⴰⵔ ⴰⵍⵜⴰⵖ ⵏ ⴽⵓⵢⴰⵏ ⴷ ⵓⵙⵎⵓⵙⵙⵓ ⵏ ⴽⵓⵢⴰⵏ, ⴷ ⵓⵎⵢⴰⵡⴰⵙ ⵊⴰⵔ ⵜⵉⵏⴱⴰⴹⵉⵏ ⵜⴰⵣⵣⵔⴰⴼⵜ ⴷ ⵜⵎⵙⵙⵓⴳⵓⵔⵜ.

ⵜⴰⵏⵎⵎⵉⵔⵜ ⵉ ⴽⵓ ⵎⴰⴷ ⵢⵉⵡⵙⵏ ⴰⴷ ⵏⵍⴽⵎ ⴰⵢⵍⵍⵉ ⵉⵜⵜⵓⵙⴽⴰⵔⵏ, ⵜⴰⵏⵎⵎⵉⵔⵜ ⵉ ⵉⵏⴳⴳⵯⴰ ⴷ ⵜⵏⴳⴳⵯⴰ ⵍⵍⵉⵖ ⵓⴼⵉⵖ ⴰⵙⵏⴰⵍ ⵉⵕⵡⴰⵏ ⵉ ⵓⵙⴽⵔ ⵏ ⵜⵙⵎⵉⴳⵍⵜ ⵎⵓ ⵉⴳⴰ ⵢⵢⵉ ⴰⴷⴷⵓⵔ ⴰⵙ ⵜⵜ ⵙⴽⵔⵖ ⵙ ⵓⴱⵓⵔⵣ ⴳ ⵓⵙⵇⵇⵉⵎ ⵏ ⵉⵎⵓⵔⴰ.

ⵜⴰⵏⵎⵎⵉⵔⵜ ⵉⵎⵙⵜⴳⴳⴰⵔⵏ ⴷ ⵜⵎⵙⵡⵓⵔⵉⵢⵉⵏ ⴷ ⵉⵎⵙⵡⵓⵔⵉⵢⵏ ⵏ ⵓⵙⵇⵇⵉⵎ ⴼ ⵓⵙⵓⵊⴷ ⵏⵏⵙⵏ ⵉⵙⵓⵍⵏ ⵉ ⵓⵙⵏⴰⵍ ⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⴳ ⵓⵙⴽⵔ ⵏ ⵜⵙⵎⵉⴳⴰⵍ ⵏⵏⵙ.

ⵜⴰⵏⵎⵎⵉⵔⵜ ⵉ ⵜⴳⵔⴰⵡⵉⵏ ⵍⵍⵉ ⵙⵏⴰⵍⵏⵉⵏ ⴳ ⵢⵉⴹ ⵓⵍⴰ ⴰⵣⴰⵍ ⴳ ⵜⵎⵔⵙⵍⵜ ⴳ ⵓⵙⴽⵔ ⵏ ⵜⵙⵎⵉⴳⴰⵍ ⵏⵏⵙ, ⵜⵉⵎⵖⴰⵔⵉⵏ ⴷ ⵉⵔⴳⴰⵣⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵉ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴷ ⵉⵔⴳⴰⵣⵏ ⵏ ⵡⴰⵔⴰⵢ ⴰⵖⵔⵎⴰⵏ. ⴰⵙⵏⵉⵎⵎⵔ ⴷ ⵓⵙⵓⵜⴳ ⵉ ⵉⵎⵙⵡⵓⵔⵉⵢⵏ ⵏ ⵜⵖⵓⵙⵉ ⴷ ⵜⵡⵡⵓⵔⵉⵡⵉⵏ ⵥⵍⵉⵏⵉⵏ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵍⵍⵉ ⴰⵖ ⵙⴽⴰⵔⵏⵉⵏ  ⵜⵉⵎⵙⵓⵜⵍⵉⵏ ⵏ ⵜⵡⵡⵓⵔⵉ ⵖ ⵓⵙⵓⵏⴼⵓ.

ⴰⵙⵏⵉⵎⵎⵔ ⵉ ⵜⵎⵖⴰⵔⵉⵏ ⴷ ⵉⵔⴳⴰⵣⵏ ⵏ ⵜⵏⵖⵎⴰⵙⵜ ⵍⵍⵉ ⴹⴼⵕⵏⵉⵏ ⵜⵉⵡⵡⵓⵔⵉⵡⵉⵏ ⵏ ⵓⵙⵇⵇⵉⵎ ⵙ ⵓⵙⴼⵙⵉ ⴷ ⵓⵅⴼⴰⵡⴰⵍ ⴷ ⵓⴼⵔⴰⵏ

ⵜⴰⵏⵎⵎⵉⵔⵜ ⴼ ⵓⴷⴰⵡⴰⵍⵉⵥⵉⵍⵏ.