ⴰⵙⵉⵔⴰ(2016-2021):
ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ, ⴰⵙⵉⵏⴰⵙ 2 ⵢⵓⵏⵢⵓ 2020
ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⴰⵙⵙ ⵏ ⵓⵙⵉⵏⴰⵙ 2 ⵢⵓⵏⵢⵓ 2020, ⵙ ⵜⵏⵙⵙⵉⵅⴼⵜ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ. ⵍⵍⴰⵏ ⵖ ⵓⵖⴰⵡⴰⵙ ⵏ ⵜⵡⵓⵔⵉ ⵏⵏⵙ ⵉⵎⵔⵙⵉⵡⵏ ⵀⵎⵎⴰⵏⵉⵏ ⴰⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⴷ ⵜⵉⴹⴰⴼ ⴷ ⵜⵣⴷⴰⵢⵜ ⵏ ⵓⵙⵇⵇⵉⵎ ⴷ ⴽⵔⴰ ⵏ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ.
ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ ⴰⴷ, ⵙⵙⴽⵜⵉⵏ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⵜⴰⵎⵙⴰⵔⵜ ⵜⴰⵎⵇⵇⵔⴰⵏⵜ ⵍⵍⵉ ⵉⴷⴷⵔ ⵍⵎⵖⵔⵉⴱ ⵍⵍⵉⵖ ⵉⵎⵎⵓⵜ ⵢⴰⵏ ⵖ ⵉⵔⴳⴰⵣⵏ ⵉⵅⴰⵜⴰⵔⵏ ⵏ ⵓⵡⴰⵏⴽ, ⵉⴳⵍⵍⵉⵏ ⵏ ⵓⵙⴰⵍⵎⴰⴷ ⴰⵎⵖⵏⴰⵙ ⵎⴰⵙⵙ ⵄⴰⴱⴷ ⵕⵕⴰⵃⵎⴰⵏ ⵍⵢⵓⵙⴼⵉ ⵜⴰⵎⵍⵍⴰ ⵏ ⵕⴱⴱⵉ ⴼ ⵉⵎⴰⵏ ⵏⵏⵙ, ⵙⵙⴽⵜⵉⵏ ⴷ ⴰⵢⵍⵍⵉ ⵙ ⵉⵜⵜⵓⵙⵙⴰⵏ ⵓⵔⴳⴰⵣ ⴰⴷ ⴷ ⵡⴰⴷⴷⴰⴷⵏ ⵏⵏⵙ ⵉⵏⴰⵎⵓⵔⵏ ⴷ ⵉⵣⵔⴼⴰⵏⵏ ⴷ ⵜⵡⵉⵣⵉⵏ ⵏⵏⵙ ⵖ ⴽⵓ ⵉⴱⴰⵔⴰⵣⵏ ⵏ ⵜⵓⵚⴽⵓ ⵜⴰⵏⴰⵎⵓⵔⵜ, ⵉⵏⵉⵏ ⴰⵙⵓⵜⴳ ⵏⵏⵙⵏ ⵉ ⵎⴰ ⴷ ⵜⵓⵎⴰ ⵜⴱⵔⴰⵜ ⵏ ⵓⴼⵛⴰⴷ ⵍⵍⵉ ⵢⵓⵣⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⵉ ⵜⴰⵡⵊⴰ ⵏ ⵉⴳⵍⵍⵉⵏ ⵏ ⵍⵢⵓⵙⴼⵉ, ⴰⵢⵍⵍⵉ ⵉⵎⵎⴰⵍⵏ ⵍⵄⵏⴰⵢⵜ ⵜⴰⴳⵍⴷⴰⵏⵜ ⵉ ⵉⴳⵍⵍⵉⵏ ⴰⵅⴰⵜⴰⵔ ⵙ ⵓⴽⵜⴰⵢ ⵏ ⵉⴼⵔⵉⵙⵏ ⵏⵏⵙ ⵉⵏⴼⴳⴰⵏⵏ ⴷ ⵓⵙⵙⴰⵎ ⵏⵏⵙ ⴰⵏⴰⵎⵓⵔ ⵉⵖⵥⴰⵏⵏ ⵍⵍⵉ ⵙ ⵉⵙⴽⵔ ⵖ ⴽⵓ ⵉⵙⴳⴳⵯⴰⵙⵏ ⵏ ⵜⵖⵏⵙⴰ ⵏⵏⵙ ⵜⴰⵣⵔⴼⴰⵏⵜ ⴷ ⵜⵙⵔⵜⴰⵏⵜ ⵖ ⵍⵍⴰⵏ ⴽⵉⴳⴰⵏ ⵏ ⵉⵙⴼⴰⵙⴽⴰⵜⵏ ⵉⵅⴰⵜⴰⵔⵏ, ⵖⵎⴽ ⵍⵍⵉ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵃⴼⴹ ⵕⴱⴱⵉ.
ⴷⴼⴼⵉⵔ ⵏ ⵎⴰ ⴰⴷ, ⵖⵔⴰⵏ ⵉⴳⵎⴰⵎⵏ ⵏ ⵓⵙⵉⵔⴰ ⵍⴼⴰⵜⵉⵃⴰ ⴼ ⵉⵎⴰⵏ ⵏ ⵉⴳⵍⵍⵉⵏ ⴰⵅⴰⵜⴰⵔ.
ⵖ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ, ⵣⵎⵎⵉⵎⵏ ⵉⴳⵎⴰⵎⵏ ⵏ ⵓⵙⵉⵔⴰ ⴰⵜⵉⴳ ⵏ ⵜⵙⵎⵓⵏⴰⵢ ⵍⵍⵉ ⵙⵏⵎⴰⵍⴰⵏⵜ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵖ ⵉⵎⴰⵍⴰⵙⵙ ⵉⵣⵔⵉⵏ ⴷ ⵡⴰ ⴷ ⵉⵍⵍⴰⵏ, ⴳⵏⵜ ⴰⵣⵎⵣⵣⵓ ⵉ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ, ⴷ ⵜⵙⵇⵇⵉⵎⵜ ⵏ ⵜⵖⴰⵡⴰⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⴰⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ, ⴷ ⵜⵙⵇⵇⵉⵎⵜ ⵏ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ, ⴷ ⵜⵙⵇⵇⵉⵎⵜ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴷ ⵜⵥⴹⴰⵕⵜ ⴷ ⵉⵣⵓⵖⴰⵣ ⴷ ⵡⴰⵡⴰⵏⴰⴹ, ⴷ ⵜⵙⵇⵇⵉⵎⵜ ⵏ ⵜⵉⴹⴰⴼ ⵏ ⵜⴷⵔⵉⵎⵜ ⵜⴰⵎⴰⵜⴰⵢⵜ, ⴷ ⵜⵙⵇⵇⵉⵎⵜ ⵏ ⵜⵣⵔⴼⵜ ⴷ ⵓⵣⵣⵔⴰⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵉ ⵜⵉⴽⴽⵉ ⵏ ⵉⵙⵇⵙⵉⵜⵏ ⵉ ⵉⴳⵎⴰⵎⵏ ⵏ ⵜⵏⴱⴰⴹⵜ, ⴽⵓ ⵢⴰⵏ ⵖ ⵜⵎⵥⵍⴰⵢ ⵏⵏⵙ, ⴼ ⵓⵙⵡⵓⴷⴷⵓ ⵏ ⵉⴳⵔⴰⵏ ⵓⵏⴱⵉⴹⵏ ⵏ ⵓⵙⵓⵔⵙ ⵏ ⵓⵥⵍⴰⵢ ⴰⴷⵓⵙⴰⵏ ⵖ ⵜⵙⴳⵉⵡⵉⵏ ⵜⵉⵏⴰⵎⵓⵏⵉⵏ ⴷ ⵜⴷⵎⵙⴰⵏⵉⵏ, ⵖⵎⴽ ⵍⵍⵉ ⵜⵍⵍⴰ ⵜⵓⵙⵙⵏⴰ ⵏ ⵜⵣⵣⵉⴳⵣⵜ ⵏ ⵡⴰⴷⴷⴰⴷⵏ ⵉⴳⴷⵓⴷⴰⵏⵏ ⴷ ⵜⵎⵙⴽⴰⵔ ⵍⵍⴰⵏⵉⵏ.
ⵖ ⵓⵙⵎⵓⵜⵜⴳ ⵏ ⵜⵖⵔⵉ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⵓⵙⵏⴼⴰⵍⵏ, ⵉⵙⵎⵏⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵙⴰⵜⵉ ⴰⵣⵣⵔⴰⴼ ⵍⵍⵉ ⵜ ⵉⵙⵏⵎⴰⵍⴰⵏ ⵖ ⵓⴷⵓⵙⵜⵓⵔ ⴷ ⵓⵙⵍⴳⵏ ⴰⵎⴰⴷⴷⴰⵙ ⵏ ⵓⵥⵕⴼ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵙⵙⴽⵜⵉ ⴷ ⴰⵜⵉⴳ ⵉⵍⵍⴰⵏ ⴷⴰⵔ ⵜⵡⵓⵔⵉ ⴰⴷ ⵉⵣⴷⵉⵏ ⴷ ⵜⵎⵓⴽⵔⵉⵙⵉⵏ ⵏ ⵜⴼⵔⴽⴰ ⴷ ⵉⴷⵔⵉⵣⵏ ⵏⵏⵙ.
ⵖⵎⴽ ⵍⵍⵉ ⵎⴷⴰⵡⴰⵍⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴼ ⵜⵎⴰⵎⴽⵉⵏ ⵕⵡⴰⵏⵉⵏ ⵍⵍⵉ ⵔⴰⴷ ⵉⵙⴽⵔ ⵖ ⵜⴽⵜⵓⵜ ⴰⴷ ⵏ ⵓⵣⵣⵔⴰⴼ ⴷ ⵜⵉⴹⴰⴼ ⵢⴰⵏ ⵓⵣⵎⵣⵣⵓ ⵏ ⵓⵎⴹⴰⴽⴰⵕ ⴼ ⵉⵙⵜⴰⵢⵏ ⴷ ⵉⵙⵏⴼⴰⵔⵏ ⵍⵍⴰⵏⵉⵏ.
ⵉⵙⵙⴽⵜⵉ ⴷ ⵓⵍⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙ ⵉⴳⴰ ⵓⵙⵏⴼⴰⵔ ⴰⴷ ⴰⵎⵣⵡⴰⵔⵓ ⵖ ⵜⵉⴼⴰⵡⵜ ⵏ ⵓⴷⵓⵙⵜⵓⵔ ⴰⵎⴰⵢⵏⵓ ⵏ ⵜⴳⵍⴷⵉⵜ.
ⵖⵎⴽ ⵍⵍⵉ ⵉⴼⴼⵖ ⵓⵙⵉⵔⴰ ⵏ ⵓⵙⵇⵇⵉⵎ ⴰⴷ ⵣⵣⵉⴳⵣⵏ ⵉⵏⴳⵎⴰⵎⵏ ⵏ ⵓⵙⵇⵇⵉⵎ ⵖ ⵓⵎⵛⴰⵡⴰⵕ ⵅⴼ ⵓⵙⵏⵎⴰⵍⴰ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⵙ ⵓⵣⴷⴰⵢ ⴷ ⵜⵎⵓⴽⵔⵉⵙⵉⵏ ⵏ ⵡⴰⴽⵓⴷ ⵍⵍⵉ ⴷⵉⵙⵙ ⵣⴷⵉⵏⵉⵏ ⴷ ⵓⵙⵙⴰⵔⵓ ⵏⵏⵙⵏⵜ ⵙ ⵜⵉⵕⵡⵉ ⴷ ⵢⵓⵙⴰⵏ.
ⵖ ⵜⵡⵓⵔⵉ ⵏ ⵜⵉⴹⴰⴼ, ⵉⴼⴼⵖ ⵓⵙⵉⵔⴰ ⵏ ⵓⵙⵇⵇⵉⵎ ⴰⴷ ⵜⵉⵍⵉ ⵜⵖⵉⵎⵉⵜ ⵜⴰⵏⵎⵍⴰⵙⵙⵜ ⵏ ⵉⵙⵇⵙⵉⵜⵏ ⵉⵎⵉⵡⴰⵏⵏ ⴰⵙⵙ ⵏ ⵡⴰⵢⵏⴰⵙ 8 ⵢⵓⵏⵢⵓ 2020, ⵔⴰⴷ ⵉⵥⵍⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏⵏⵙ ⵉ ⵢⵉⴳⵔ ⵏ ⵜⵎⴰⵍⵍⴰⵢⵜ ⴷ ⵜⵏⵉⴷⵉ ⴷ ⵡⴰⵙⵙⴰⵢ ⵏ ⵉⴳⵏⵏⴰ ⴷ ⵜⴷⵎⵙⴰ ⵜⴰⵏⴰⵎⵓⵏⵜ ⵙ ⵉⵙⵇⵙⵉⵜⵏ ⵉⴹⴼⵕ ⵓⵎⴹⴰⴽⴰⵕ.
ⵙ ⵓⵎⵛⴰⵛⴽⴰ ⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵔⴰⴷ ⵜⵉⵍⵉ ⵜⵖⵉⵎⵉⵜ ⵜⴰⵢⵢⵓⵔⴰⵏⵜ ⴼ ⵜⵙⵔⵜⵉⵜ ⵜⴰⵎⴰⵜⴰⵢⵜ ⴰⵙⵙ ⵏ ⵓⴽⵡⴰⵙ 11 ⵢⵓⵏⵢⵓ 2020, ⵔⴰⴷ ⵉⵥⵍⵉ ⵓⵖⴰⵡⴰⵙ ⵏ ⵜⵡⵓⵔⵉ ⵏⵏⵙ ⵉ :"ⴰⵖⴰⵡⴰⵙ ⵏ ⵜⵏⴱⴰⴹⵜ ⵉ ⵓⵙⴰⵍⵉ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ".
ⵖ ⵓⵎⵏⵉⴷ ⴰⴷⵉⴱⵍⵓⵎⴰⵙⵉ ⴷ ⵜⵣⴷⴰⵢⵜ ⵏⵏⵙ ⵙ ⵓⵙⴼⵓⴳⵍⵓ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵉⴼⵔⵉⵇⵢⴰ, ⵉⵙⵙⴽⵜⵉ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⴳⴰⵔ ⵜⵉⵡⵓⵔⵉⵡⵉⵏ ⵍⵍⵉ ⵓⴽⴰⵏ ⵙⴽⴰⵔⵏⵜ ⴽⵔⴰ ⵏ ⵜⵙⴳⵉⵡⵉⵏ ⵜⴰⵄⴷⴰⵡⵉⵏ ⵏ ⵜⴰⵢⴰⵏⵜ ⵜⴰⵏⴰⴽⴰⵍⵜ ⵖ ⵓⴳⵯⵏⵙ ⵏ ⵓⴱⵕⵍⴰⵎⴰⵏ ⵏ ⴽⵓ ⵉⴼⵔⵉⵇⵢⴰ ⵍⵍⵉⵖ ⴱⴷⴷⵏⵜ ⴼ ⵓⵎⵍⴰⵏ ⵖ ⵉⵍⵍⴰ ⵓⵊⵍⵓ ⵏ ⵜⵉⴷⵜ, ⴰⵢⵍⵍⵉ ⵉⴳⴰⵏ ⵜⵉⵕⵥⵉ ⵉⴼⴰⵡⵏ ⵏ ⵜⵖⵜⴰⵙⵜ ⵏ ⵉⵎⴰⵡⵙⴰⵙⵏ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⵖ ⵉⵎⵔⵙⵉ ⴰⴷ.
ⵖⵎⴽ ⵍⵍⵉ ⴷ ⵉⵙⵙⴽⵜⵉ ⵓⵙⵉⵔⴰ ⵉⵥⵎⵓⵥⵥⴰⵍ ⵍⵍⵉ ⵉⵙⴽⴰⵔ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵉ ⵓⵙⴱⴷⴷⵉ ⵏ ⵜⴽⵔⴽⴰⵙ ⴷ ⴷⴷⴰⵄⵉⵢⴰⵜ, ⵉⵙⵙⴼⵓⵖ ⴷ ⵢⴰⵏ ⵓⵙⵉⵡⴹ ⴰⵎⵙⵙⴼⵔⵓ ⵙ ⵓⵣⵎⵣⵣⵓ ⴰⴷ, ⵉⵣⵓⵣⵣⵔ ⵜ ⴼ ⴽⵓ ⵉⴳⵎⴰⵎⵏ ⵏ ⵓⴱⵕⵍⴰⵎⴰⵏ ⵏ ⴽⵓ ⵉⴼⵔⵉⵇⵢⴰ.
ⵖ ⵜⵣⴷⴰⵢⵜ ⵏ ⵓⵙⵇⵇⵉⵎ ⴷ ⴽⵔⴰ ⵏ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ, ⵉⵥⵕⴰ ⵓⵙⵉⵔⴰ ⵜⴰⵏⵏⴰⵢⵜ ⵏ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ ⴼ "ⵉⵎⵔⵙⵉ ⵏ ⵜⵙⵔⵜⵉⵜ ⵜⴰⴳⴷⵓⴷⴰⵏⵜ ⵖ ⵢⵉⴳⵔ ⵏ ⵜⴼⴰⵜⵉⵜ ⵜⴰⵎⴰⴷⴷⵓⵔⵜ", ⵉⴼⴼⵖ ⴰⴷ ⵢⵉⵍⵉ ⵓⵣⵓⵣⵣⵔ ⵏⵏⵙ ⴼ ⴽⵓ ⵉⴳⵎⴰⵎⵏ ⵏ ⵓⵙⵇⵇⵓⵉⵎ.