ⴰⵙⵉⵔⴰ(2016-2021):
ⵉⵙⵎⵏⵉⴷ ⵎⴰⵙⵙ ⵎⵓⵃⴰⵎⵎⴰⴷ ⵜⵡⵉⵎⵉ ⴱⵏⵊⵍⵍⵓⵏ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⵉⵥⵉⵍⵏ ⴳ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⴽⵓⴼⵉⴷ 19
ⵉⴷⵔⵓ ⵎⴰⵙⵙ ⵎⵓⵃⴰⵎⵎⴰⴷ ⵜⵡⵉⵎⵉ ⴱⵏⵊⵍⵍⵓⵏ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵎⵡⴰⵙ 19 ⵎⴰⵕⵚ 2021, ⴳ ⵓⵎⵙⴰⵡⴰⵍ ⴰⴱⵕⵍⴰⵎⴰⵏⵉ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴼⵕⴰⵏⴽⵓⴼⵓⵏⵉⵜ ⵙ ⵜⴷⵔⴰⵡⵜ ⴷ ⵜⵎⴰⴷⴷⴰⵙⵜ ⵏ ⵓⵜⵜⵛⵓ ⴷ ⵜⴽⵔⵣⴰ ⵏ ⵜⵎⵜⵜⴰ ⵎⵓⵏⵏⵉⵏ ⴼ:”ⵜⴰⵏⴼⵔⵓⵜ ⵏ ⵓⵜⵜⵛⵓ ⴷ ⵓⵜⵜⵛⵓ ⴳ ⵓⴱⴰⵢⵢⵓⵕ ⴽⵓⴼⵉⴷ 19”, ⵙ ⵓⴼⵓⵣⵢⵓ ⴽⵓⵏⴼⵉⵕⵓⵏⵚ.
ⴳ ⵜⴳⵓⵔⵉ ⵏⵏⵙ ⵙ ⵜⵎⵍⴷⴰ ⴰⴷ, ⵉⵙⴷⴷⵉⴷ ⵎⴰⵙⵙ ⵎⵓⵃⴰⵎⵎⴰⴷ ⵜⵡⵉⵎⵉ ⴱⵏⵊⵍⵍⵓⵏ ⴼ ⵡⴰⵜⵉⴳ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴷ ⵓⵙⴱⴷⴷⵉ ⵏ ⴳⴰⵔ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⴽⵓⴼⵉⴷ 19, ⵍⵍⵉⴳ ⵜⵓⵔⵔⵉ ⵙ ⴽⵉⴳⴰⵏ ⵜⴷⵎⵙⴰ ⵏ ⵉⵡⴰⵏⴽⵏ ⴳ ⵓⵎⴰⴹⴰⵍ.
ⵢⵉⵏⵉ ⵎⴰⵙ ⵟⵟⴰⴼⵏ ⵉⴱⵕⵍⴰⵎⴰⵏⵏ, ⵙ ⵜⵎⵥⵍⴰⵢ ⵏⵏⵙⵏ ⴳ ⵓⵣⵣⵔⴰⴼ ⴷ ⵜⵉⴹⴰⴼ, ⵜⵉⵍⴰⵍⵜ ⵜⴰⴷⵙⵍⴰⵏⵜ ⴳ ⵓⵙⵓⵊⴷ ⵏ ⵜⵙⵔⵜⴰⵢ ⵕⵡⴰⵏⵉⵏ ⴳ ⵜⴳⵎⵉ ⵜⴰⵙⵓⵍⴰⵏⵜ ⴷ ⵓⵙⴱⴷⴷⵉ ⵏ ⵓⵥⵍⴰⴹ ⴷ ⴱⵓⵀⵢⵢⵓⴼ ⴷ ⴳⴰⵔ ⵓⵜⵜⵛⵓ, ⴷ ⵓⴹⵎⵏ ⵏ ⵜⵏⴼⵔⵓⵜ ⵏ ⵓⵜⵜⵛⵓ.
ⵢⵉⵏⵉ ⵎⴰⵙⵙ ⵎⵓⵃⴰⵎⵎⴰⴷ ⵜⵡⵉⵎⵉ ⴱⵏⵊⵍⵍⵓⵏ ⵎⴰⵙ ⵉⴳⴰ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵉⵎⵉⵙⵙ ⵏ ⵓⵣⴷⴷⵓⵢ ⵏ ⵜⵙⵏⵜⴰⵢⵉⵏ ⴷ ⵜⵓⴳⴳⴰⵙ ⵎⴳⴰⵍ ⵏ ⵓⴱⴰⵢⵢⵓⵕ, ⴷ ⵜⵡⵓⵔⵉ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵉ ⵓⵙⴷⵓⵙ ⵏ ⵜⵡⵓⵔⵉ ⵉⵛⵛⴰⵔⵏ ⴰⴽⴷ ⵉⴱⵕⵍⴰⵎⴰⵏⵏ ⵢⴰⴹⵏⵉⵏ, ⴳ ⵉⵙⵡⵉⵔⵏ ⴰⴼⵔⵉⵇⵉ ⴷ ⵓⴼⵕⵓⵏⴽⵓⴼⵓⵏⵉ.
ⵉⵙⵎⵏⵉⴷ ⵎⴰⵙⵙ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⵉⵥⵉⵍⵏ ⴳ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ, ⵢⵉⵏⵉ ⴰⵎⵓⵔⵙ ⵏ ⵍⵎⵖⵔⵉⴱ ⴳ ⵓⴹⵎⵏ ⵏ ⵜⵏⴼⵔⵓⵜ ⵏ ⵓⵜⵜⵛⵓ ⵉ ⴽⵓ ⵉⵏⵎⵓⵔⴰⵏ ⴳ ⵜⴼⵔⴽⴰ ⴰⴷ, ⴷ ⵓⵎⵙⴰⵙⴰ ⴷ ⵜⵣⵣⵉⴳⵣⵜ ⵏ ⵓⵙⵓⵔⵙ ⴰⴷⵓⵙⴰⵏ, ⴷ ⵓⵙⵡⵓⵔⵉ ⴷ ⵉⴷⵔⵉⵣⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵓⵥⵍⴰⵢ ⴰⴷⵓⵙⴰⵏ, “ⵣⵣⵉⴳⵣⵏⵜ ⵓⵍⴰ ⵜⵉⵍⴰⵍ ⵏ ⵓⵚⵉⴼⴹ ⴰⵏⴼⵍⴰⵃ ⵙⴽⵔⵏⵜ ⵜⴰⵢⴰⴼⵓⵜ ⵉⵕⵡⴰⵏ”.
ⵉⵙⴰⵡⵍ ⵎⴰⵙⵙ ⵜⵡⵉⵎⵉ ⴼ ⵉⵙⵡⵓⴷⴷⵓⵜⵏ ⴷ ⵜⵎⵙⴽⴰⵔ ⵜⵉⴷⵓⵙⴰⵏⵉⵏ ⴷ ⵜⵣⵔⴼⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⵏ ⵜⴳⵍⴷⵉⵜ ⵉ ⵓⵙⵏⴰⵍ ⵏ ⵜⴷⵎⵙⴰ ⵜⴰⵏⴰⵎⵓⵔⵜ ⴷ ⵓⵙⴱⴷⴷⵉ ⵏ ⵉⵎⵉⵣⵉⵢⵏ ⵏ ⵜⵏⴼⵔⵓⵜ ⵏ ⵓⵜⵜⵛⵓ.
ⵉⵙⵙⴽⵜⵉ ⴷ ⵜⴰⵙⵏⵜⴰⵢⵜ ⵏ ⵜⵡⵉⵣⵉ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵎⵏⵉⴷ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵜⴰⵢⵜⵎⴰⵜⵉⵏ ⵉ ⵓⴹⴼⵕ ⵏⵏⵙⵏⵜ ⴳ ⵜⵓⴳⴳⴰⵙ ⵏ ⵓⵙⴱⴷⴷⵉ ⵏ ⵓⴱⴰⵢⵢⵓⵔ ⵏ ⴽⵓⵕⵓⵏⴰ, ⵙ ⵜⵡⵉⵙⵉ ⵏ ⵜⵙⵏⵉⵊⵊⵉⵜ ⴷ ⵉⵙⴰⴼⴰⵔⵏ ⴷ ⵉⵎⴰⵡⴰⵜⵏ ⵏ ⵜⵙⵏⵉⵊⵊⵉⵜ, ⴷ ⵓⴷⵔⵓ ⵏ ⵜⵉⵔⵎⵉⵜⵉⵏ ⴷ ⵜⵎⵙⴽⴰⵔ ⵥⵉⵍⵏⵉⵏ ⴷ ⵓⴹⴼⵕ ⵏ ⵜⵎⵉⵣⴰⵔ ⴰⴷ ⴳ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵔ.