ⵜⴰⵙⵎⵓⵏⵉ ⵏ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⴼ ⵓⵙⵏⴼⴰⵔ ⵏ ⵓⵎⵕⵚⵓⵎ ⵏ ⵓⵙⴽⴰⵔ ⵏ ⵓⵎⵉⴹⴰⵏ ⵉⵜⵜⵓⴼⴽⴰⵏ ⵉ ⵜⵖⴰⵡⵙⵉⵡⵉⵏ ⵥⵍⵉⵏⵉⵏ, ⵙ ⵉⵙⵎ ⵏ: “ⴰⴼⵏⵉⵇ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵜⵎⴰⴹⵓⵏⵜ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ ⴽⵓⴼⵉⴷ-19
ⵜⵙⴽⵔ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⵢⴰⵜ ⵜⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵎⴰⵙⵙ ⵄⴰⴱⴷⵓⵍⵍⴰⵀ ⴱⵓⵡⴰⵏⵓ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⵏⵛⴰⵄⴱⵓⵏ, ⴰⵎⴰⵡⵙⴰⵙ ⵏ ⵜⴷⴰⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ, ⵜⵥⵍⵉ ⵙ ⵜⵏⴽⴷⴰ ⵏ ⵓⵙⵏⴼⴰⵔ ⵏ ⵓⵎⵕⵚⵓⵎ ⵏ ⵓⵙⴽⴰⵔ ⵏ ⵓⵎⵉⴹⴰⵏ ⵉⵜⵜⵓⴼⴽⴰⵏ ⵉ ⵜⵖⴰⵡⵙⵉⵡⵉⵏ ⵥⵍⵉⵏⵉⵏ, ⵙ ⵉⵙⵎ ⵏ: ”ⴰⴼⵏⵉⵇ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵜⵎⴰⴹⵓⵏ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ ⴽⵓⴼⵉⴷ-19”.
ⵉⵙⴰⵡⵍ ⵎⴰⵙⵙ ⴰⵎⵡⴰⵙⴰⵙ ⴼ ⵜⵎⵓⵙⵜⴰⵍ ⵍⵍⵉ ⴷ ⵜⵉⵡⵉ ⵜⵎⴰⴹⵓⵏⵜ ⴰⴷ, ⴷ ⵜⵓⴳⴳⴰⵙ ⵜⵉⵅⴰⵜⴰⵔⵉⵏ ⵍⵍⵉ ⵏⵏ ⵜⴳⴳⴰ ⵜⵎⴰⵣⵉⵔⵜ ⵏⵏⵖ ⴰⴷ ⵜⵜ ⵜⵙⴱⴷⴷ ⵙ ⵜⵡⵓⵔⵉⵡⵉⵏ ⴷ ⵜⵎⵙⴽⴰⵔ ⵏ ⵡⴰⵔⴰⵢ ⵍⵍⵉ ⵜⵙⴽⵔ ⴷ ⵓⵍⴳⴳⵓⴷ, ⵍⵍⵉⵖ ⵔⴰⴷ ⴷ ⵜⴼⵍ ⵜⵎⴰⴹⵓⵏⵜ ⴰⴷ ⵉⴹⵉⵚⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴼ ⴽⵉⴳⴰⵏ ⵏ ⵉⴳⵔⴰⵏ ⵏ ⵜⴷⴰⵎⵙⴰ ⴰⵎ ⵜⴰⵎⴰⵍⵍⴰⵢⵜ ⴷ ⵍⵇⵀⴰⵡⵉ ⴷ ⵜⵙⵉⵔⴰⵎ ⴷ ⵡⵉⵢⵢⴰⴹ.
ⵖ ⵓⵎⵏⵉⴷ ⴰⴷ, ⵉⵙⵙⴽⵜⵉ ⴷ ⵎⴰⵙⵙ ⴰⵎⵡⴰⵙⴰⵙ ⵙ ⵜⵙⵏⵜⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⵃⵎⴰ ⴰⴷ ⵉⵜⵜⵓⵙⴽⵉⵔ ⵢⴰⵏ ⵓⴼⵏⵉⵇ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵜⵎⴰⴹⵓⵏⵜ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ, ⵍⵍⵉ ⵔⴰⴷ ⵉⵙⵙⵉⴱⵙⵉⵙ ⵖ ⵉⴹⵉⵚⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ, ⵖⵎⴽ ⴰⵏⵏ ⵓⵍⴰ ⴷ ⵓⵙⵖⵔⵜ ⵏ ⵓⵏⴳⵔⴰⵡ ⴰⴷⴰⵡⵙⴰⵏ ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵜⵣⵣⵉⴳⵣⵜ ⵏ ⵜⵎⴰⴹⵓⵏⵜ ⴰⴷ.
ⵢⵉⵏⵉ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⵙⵔⵙⵏⵜ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵎⴰⴷ ⵉⴳⴰⵏ 10 ⵏ ⵎⵍⵢⴰⵕ ⵏ ⴷⴷⵔⵀⵎ ⵙⴳ ⵜⵎⵙⴰⵙⵜⵍⵜ ⵏ ⵓⵡⴰⵏⴽ, ⵉⵙⵙⵓⵜⴳ ⵓⵍⴰ ⵉⵎⴰⵏ ⵏ ⵓⵎⵢⴰⵡⴰⵙ ⵍⵍⵉ ⴷ ⵉⵎⵍⴰ ⵉⴳⵔ ⵓⵙⵍⵉⴳ ⵍⵍⵉⵖ ⵔⴰⴷ ⵉⵍⵉⵏ ⵉⵙⵓⴳⴰⵎ ⵢⴰⴹⵏⵉⵏ ⵏ ⵓⴼⵏⵉⵇ.
ⵉⵙⵙⵉⵙⴼⵉⵡ ⵎⴰⵙⵙ ⴰⵎⴰⵡⵙⴰⵙ ⵖ ⵜⵏⴽⴷⴰ ⵏⵏⵙ ⵏ ⵓⵙⵏⴼⴰⵔ ⵏ ⵓⵎⵕⵚⵓⵎ ⵎⴰⵙ ⵉⵜⵜⵔⵙ ⵢⴰⵏ ⵡⴰⵜⵉⴳ ⵏ ⵉⴷⵔⵉⵎⵏ ⵉⵍⴽⵎⵏ ⵎⵍⵢⴰⵕ ⵏ ⴷⴷⵔⵀⵎ ⵉⵥⵍⵉⵏ ⵙ ⵓⵙⵖⵔⵜ ⵏ ⵓⵏⴳⵔⴰⵡ ⴰⴷⴰⵡⵙⴰⵏ, ⵖⵎⴽ ⵍⵍⵉ ⵉⵍⵍⴰ ⵓⵙⵀⵡⵏ ⵏ ⵜⴱⵔⵉⴷⵉⵏ ⵏ ⵜⵓⵜⵔⴰⵢⵉⵏ ⵉⵥⵍⵉⵏ ⵙ ⵜⵎⴰⵡⵙⴰⵙⵜ ⴰⴷ ⵍⵍⵉ ⵉⵍⵍⴰⵏ ⵖ ⵓⵙⵍⴳⵏ ⵏ ⵜⵏⵎⴰⵇⵇⴰⵙⵉⵏ ⵜⵉⴳⴷⵓⴷⴰⵏⵉⵏ.
ⴷⴼⴼⵉⵔ ⵎⴰⵢⴰ ⴷ, ⵙⴰⵡⵍⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⵏⴰⵎⵓⵔⵜ ⵉⵍⵍⴰⵏ ⵖ ⵓⴷⵖⴰⵔ ⵏ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙⵙⵓⵜⴳⵏ ⴰⵎⴽⵕⴰⴹ ⴰⵏⴰⵎⵓⵔ ⵉⵍⵍⴰⵏ ⴼ ⵓⵙⴱⴷⴷⵉ ⵏ ⵜⵎⴰⴹⵓⵏⵜ ⴰⴷ, ⵎⵍⵉⵏ ⴷ ⴰⴱⵓⵔⵣ ⵏⵏⵙⵏ ⵉⴳⴳⵓⵜⵏ ⵉ ⵜⴹⴼⵕⵉ ⴷ ⵜⵙⵏⵜⴰⵢⵉⵏ ⵉⵙⵓⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⵉⵜⵜⴰⵡⵉⵏ ⵙ ⵓⵃⵟⵟⵓ ⵏ ⵓⴷⵡⴰⵙ ⵏ ⵉⵏⵎⵓⵔⴰ ⴷ ⵓⴼⵙⵙⴰⵢ ⵏ ⵉⴹⵉⵚⵏ ⵏ ⵜⵎⴰⴹⵓⵏⵜ ⴰⴷ ⵖ ⵜⴷⴰⵎⵙⴰ ⴷ ⵡⴰⵎⵓⵏ ⴷ ⵜⵏⴼⵔⵓⵜ.
ⵙⵙⵓⵜⴳⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵓⵍⴰ ⵜⵓⴳⴳⴰⵙ ⵏ ⵜⵏⴱⴰⴹⵜ, ⵎⵎⵔⵏ ⵙ ⵜⵎⵙⴽⴰⵔ ⴷ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵍⵍⵉ ⵜⵙⴽⵔ ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵜⵎⴰⴹⵓⵏⵜ ⵏ “ⴽⵓⵕⵓⵏⴰ”, ⵓⵍⴰ ⵍⵍⵉⵖ ⵜⵙⵔⵙ ⵜⴰⵙⵇⵇⵉⵎⵜ ⵏ ⵜⵉⴹⴰⴼ ⵜⴰⴷⵎⵙⴰⵏⵜ ⵉ ⵓⴼⵙⵙⴰⵢ ⵏ ⵉⴹⵉⵚⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⵢⵉⵍⵉ ⵓⵙⴳⴼⴰⵔ ⵏ ⵉⴳⴰⴷⴰⵣⵏ ⴷ ⵓⵔⴳⴳⵉⴳ ⵏ ⵡⴰⵜⵉⴳⵏ.
ⵖⵎⴽ ⵍⵍⵉ ⵙⵙⵓⵜⴳⵏ ⵉⴷ ⵎⴰⵙⵙ ⴷ ⵉⴷ ⵎⴰⵙⵙⴰ ⵉⵎⵓⵔⴰ ⴰⵙⵎⵓⵙⵙⵓ ⴰⵎⴰⵜⴰⵢ ⴷ ⵜⵡⵓⵔⵉ ⵉⵙⵓⵍⵏ ⵏ ⴽⵓ ⵜⵉⵎⵔⵙⴰⵍ ⴷ ⵉⵎⵙⵜⴳⴳⴰⵔⵏ ⵉⵙⵔⴷⴰⵙⵏ ⴷ ⵓⵖⵔⵉⵎⵏ ⵏ ⵜⵎⴰⵣⵉⵔⵜ ⵏⵏⵖ.
ⵖⵎⴽ ⵍⵍⵉ ⵙⵙⵓⵜⴳⵏ ⵉⴷ ⵎⴰⵙⵙ ⴷ ⵉⴷ ⵎⴰⵙⵙⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵙ ⵓⵍⵜⴰⵖ ⵉⵥⵉⵍⵏ ⵏ ⵉⵏⵎⵓⵔⴰ ⴷ ⵜⵏⵎⵓⵔⴰ ⵙ ⵉⵎⴰⵏ ⵏ ⵜⵎⴰⵙⴰⵢⵜ ⴷ ⵓⵎⵢⴰⵡⴰⵙ ⵖ ⵓⵙⴱⴷⴷⵉ ⵏ ⵜⵎⴰⴹⵓⵏⵜ ⴰⴷ. ⵖⵔⵉⵏ ⵉ ⵉⵏⵎⵓⵔⴰ ⴷ ⵜⵏⵎⵓⵔⴰ ⴰⴷ ⵙⴽⴰⵔⵏ ⵙ ⵉⵙⵡⵓⴷⴷⵓⵜⵏ ⴷ ⵜⵎⵙⴽⴰⵔ ⵏ ⵡⴰⵔⴰⵢ ⵍⵍⵉ ⵜⵜⵉⵏⵉⵏⵜ ⵜⵏⴱⴰⴹⵉⵏ ⵉⵥⵍⵉⵏ ⵙ ⵎⴰⵢⴰ ⴷ, ⵙⵍⴰⵡⴰⵏ ⴰⴽⴽⵯ ⴰⴷ ⵖⴰⵎⴰⵏ ⵖ ⵜⴳⵯⵎⵎⴰ ⵏⵏⵙⵏ.
ⵃⵎⴰ ⴰⴷ ⵜⵉⵍⵉ ⵜⵡⵉⵙⵉ ⵖ ⵜⵓⴳⴳⴰⵙ ⴰⴷ ⵜⵉⵏⴰⵎⵓⵔⵉⵏ ⵜⵉⵎⴳⵔⴰ, ⵎⵛⴰⵛⴽⵏ ⴷ ⵉⴷ ⵎⴰⵙⵙ ⴷ ⵉⴷ ⵎⴰⵙⵙⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⴼ ⵓⵙⴽⴰⵔ ⵏ ⵏ ⵢⴰⵜ ⵜⵓⵙⵎⵉⵔⵜ ⵍⵍⵉ ⵖ ⵔⴰⴷ ⵉⵍⵉⵏⵜ ⵜⵓⴳⵜ ⵏ ⵜⵙⵓⵎⴰⵔ ⵉ ⵜⵙⵇⵇⵉⵎⵜ ⵏ ⵜⵉⴹⴰⴼ ⵜⴰⴷⵎⵙⴰⵏⵜ ⵍⵍⵉ ⵔⴰⴷ ⵉⵎⵓⵏ ⴰⵙⵙ ⵏ ⵓⴽⵡⴰⵙ 21 ⵎⴰⵕⵚ 2020 ⴰⴷ ⵜⴽⵛⵉⵎ ⵖ ⵓⵙⴰⵜⵉ ⵏ ⵓⴼⵏⵉⵇ ⴰⴷ, ⴰⴼⴰⴷ ⴰⴷ ⵢⵉⵍⵉ ⵓⵙⵖⵔⵜ ⵏ ⵓⵏⴳⵔⴰⵡ ⴰⴷⴰⵡⵙⴰⵏ ⴷ ⵓⵙⵏⴰⵍ ⵏ ⵉⵏⵎⵓⵔⴰ ⴷ ⵜⴰⵡⵊⵉⵡⵉⵏ ⴷ ⵉⴳⵔⴰⵏ ⵉⵜⵜⵓⴹⵕⵕⴰⵏ.