ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⵉⴷⵔⵓ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵎⵖⵔⵉⴱⵉ ⴳ ⵜⵙⵓⵜⵍⵜ ⵜⵉⵙ 144 ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ
ⵉⴷⵔⵓ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵉⴳⵎⴰⵎⴰⵏ ⵏ ⵜⴰⵢⵢⴰⵡⵜ ⵜⴰⵎⵖⵔⵉⴱⵉⵜ, ⴳ ⵜⴼⵓⴳⵍⴰ ⵏ ⵓⵕⵥⵥⵓⵎ ⵏ ⵓⴳⵔⴰⵡ ⴰⵎⴰⵜⴰⵢ ⵡⵉⵙ 144 ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴰⵙⵙ ⵏ 20 ⵎⴰⵕⵚ 2022 ⴳ ⵉⵏⴷⵓⵏⵉⵙⵢⴰ ⴷⴷⵓ ⵜⵎⴰⵜⴰⵔⵜ: ⴰⵙⵎⵓⵙⵙⵓ ⵏ ⵉⴱⵕⵍⴰⵎⴰⵏⵏ ⵉ ⵓⵙⵡⵓⵔⵉ ⴼ ⵓⵙⵏⴼⵍ ⵏ ⵓⵏⵣⵡⵉ, ⵙ ⵜⵉⵍⵉⵜ ⵏ ⵓⵏⵙⵙⵉⵅⴼ ⵏ ⵉⵏⴷⵓⵏⵉⵙⵢⴰ ⵎⴰⵙⵙ ⵊⵓⴽⵓ ⵡⵉⴷⵓⴷⵓ.
ⵉⵏⵏⴰ ⵓⵏⵙⵙⵉⵅⴼ ⵏ ⵉⴷⵓⵏⵉⵙⵢⴰ ⴳ ⵜⴳⵓⵔⵉ ⵏⵏⵙ ⵎⴰⵙ ⴷ ⵉⵇⵇⴰⵏ ⵓⵙⵡⵓⵔⵉ ⴰⴱⵕⵍⴰⵎⴰⵏⵉ ⵉ ⵓⵙⴱⴷⴷⵉ ⵏ ⵓⵙⵏⴼⵍ ⵏ ⵓⵏⵣⵡⵉ ⴳ ⵓⵎⴰⴹⴰⵍ, ⴷ ⵓⵙⵔⵓⵙ ⵏ ⵜⵙⵔⵜⵉⵜ ⵜⴰⵙⵜⵔⴰⵜⵉⵊⵉⵜ ⵉⵙⵎⴷⵏ, ⴷ ⵓⵙⵡⵓⵔⵉ ⵙ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ, ⵉⵙⴷⴷⵉⴷ ⵎⴰⵙ ⵜⴻⵟⵟⴰⴼ ⵜⵎⴰⵣⵉⵔⵜ ⵏⵏⵙ ⵜⴰⵥⴹⴰⵕⵜ ⵏ ⵡⴰⵎⴰⵏ ⵏ ⵜⵉⵏ ⵜⴰⴼⵓⴽⵜ ⴷ ⵜⵉⵏ ⵡⴰⴹⵓ ⵜⵙⵖⴰⵡⵙⴰ ⵙ ⵉⵙⵙⴰⵔⵓⵜⵏ ⴳⴳⵓⵜⵏⵉⵏ ⴷ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ.
ⴳ ⵜⴳⵓⵔⵉ ⵏⵏⵙ, ⵉⵏⵏⴰ ⵎⴰⵙⵙ ⴷⵡⴰⵔⵜⵉ ⴱⴰⵜⵛⵉⴽⵓ ⴰⵏⵙⵙⵉⵅⴼ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵎⴰⵙ ⵜⴳⴰ ⵜⵎⵙⴰⵔⵜ ⵏ ⵓⵙⵏⴼⵍ ⵏ ⵓⵏⵣⵡⵉ ⵜⴰⵎⵣⵡⴰⵔⵓⵜ ⴷⴰⵔ ⵜⴰⵎⵓⵏⵜ ⴰⴷ ⵍⵍⵉ ⵉⵙⵔⵙ ⴳ ⵓⵖⴰⵡⴰⵙ ⵏⵏⵙ ⴰⵙⵜⵔⴰⵜⵉⵊⵉ, ⵜⴰⵙⵓⵜⵍⵜ ⴰⴷ ⵍⵍⵉ ⵔⴰⴷ ⵉⵎⴹⴰⴽⴰⵕ ⵓⵍⴰ ⴼ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⴷⴷⵉⴷ ⵎⴰⵙ ⵔⴰⴷ ⵜⵙⵡⵓⵔⵉ ⵜⴰⵎⵓⵏⵜ ⴼ ⵜⵏⴼⵔⵓⵜ ⵜⴰⴷⵓⵙⴰⵏⵜ ⵙ ⵜⵎⴰⴷⵔⴰⵡⵜ ⴰⴽⴷ ⵜⴰⵎⴷⴷⴰⵙⵜ ⵏ ⵜⴷⵓⵙⵉ ⵜⴰⴳⵔⴰⵖⵍⴰⵏⵜ, ⵉⵙⴷⴷⵉⴷ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⴼⵙⵙⴰⵢ ⵏ ⵜⴰⵙⵙⴰⵙⵜ ⵊⴰⵔ ⵔⵓⵙⵉⵢⴰ ⴷ ⵓⴽⵕⴰⵏⵢⴰ.
ⵜⵖⵔ ⵎⴰⵙⵙⴰ ⵎⴰⵀⴰⵔⴰⵏⵉ ⵏⴰⴽⵛⴰⵜⵔⴰ ⴳ ⵜⴳⵓⵔⵉ ⵏⵏⵙ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⵃⵎⴰ ⴰⴷ ⵜⵉⵍⵉ ⵜⵙⵔⵉⵜ ⴼ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵓⴼⵔⴰⴳ ⵏ ⵉⴷⵔⵉⵣⵏ ⵏⵏⵙ. ⵜⵉⵏⵉ ⵎⴰⵙ ⵔⴰⴷ ⵜⵎⴹⴰⴽⴰⵕ ⵜⵎⵙⵎⵓⵏⵜ ⵜⵉⵙ 144 ⵏ ⵜⴰⵎⵓⵏⵜ ⵓⵍⴰ ⴼ ⵓⵣⵔⴼ ⵏ ⵓⵎⴰⴷⴰⵏ ⵏ ⴼⴰⵍⵉⵚⵟⵉⵏ ⴷ ⵎⴰⵢⵏⵎⴰⵕ ⴷ ⵜⵏⴳⴰⴷⴷⴰⵢⵜ ⵊⴰⵔ ⵓⵡⵜⵎ ⴷ ⵜⴰⵡⵜⵎⵜ ⵉⵄⵔⵔⵉⵎⵏ ⴷ ⵜⵙⵔⵜⵉⵜ, ⵜⵙⴷⴷⵉⴷ ⴼ ⵜⵡⵉⵣⵉ ⵏ ⵉⴱⵕⵍⴰⵎⴰⵏⵉⵢⵉⵏ ⴳ ⵓⵙⴽⵔ ⵏ ⵓⴼⵔⴰ ⴷ ⵓⵙⴱⴷⴷⵉ ⵏ ⵉⵎⴰⵖⵏ. ⵖⵎⴽ ⵍⵍⵉ ⵜⵙⴷⴷⵉⴷ ⴼ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⴳ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⴽⵓµⵕⵓⵏⴰ ⵙ ⵓⵙⵔⵓⵙ ⵏ ⵜⵙⵔⵜⴰⵢ ⵜⵉⴷⵖⴰⵔⴰⵏⵉⵏ ⴼ ⵓⴳⵣⵣⴰⵢ ⵏ ⴽⵓⵕⵓⵏⴰ ⴷ ⵓⵎⵢⴰⵡⴰⵙ ⵉⵛⵛⴰⵔⵏ ⵊⴰⵔ ⵉⵡⴰⵏⴽⵏ .
ⵢⵓⵎⴰ ⵓⴽⴰⴱⴰⵕⴰ ⴰⵎⵖⵔⵉⴱⵉ:
- ⵎⴰⵙⵙ ⴰⵎⴰⵔⵉ ⴰⵃⵎⴰⴷ ⵜⵡⵉⵣⵉ, ⵜⴰⵔⴰⴱⴱⵓⵜ ⵏ ⵜⵥⵖⵔⵜ ⴷ ⵜⵎⴰⵜⵔⴰⵔⵜ.
- ⵎⴰⵙⵙⴰ ⵜⴰⵎⴰⵔⵉⵜ ⵅⴷⴷⵓⵊ ⵙⵙⵍⴰⵙⵉ, ⵜⴰⵔⴰⴱⴱⵓⵜ ⵜⴰⵙⵔⵎⵓⵏⵜ.
- ⵎⴰⵙⵙ ⴰⵎⵛⵛⵉⵡⵕ ⴽⴰⵎⴰⵍ ⴰⵢⵜ ⵎⵉⴽ, ⵜⴰⵔⴰⴱⴱⵓⵜ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ.
- ⵎⴰⵙⵙ ⴰⵎⵛⵛⵉⵡⵕ ⵃⴰⵙⴰⵏ ⵛⴰⵎⵉⵙ, ⵜⴰⵔⴰⴱⴱⵓⵜ ⵏ ⵜⵥⵖⵔⵜ ⴷ ⵜⵎⴰⵜⵔⴰⵔⵜ.