ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⴽⵕⴰⵙ 14 ⴽⵟⵓⴱⵕ 2020
ⵉⵙⵏⵎⴰⵍⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⵙ ⵜⵉⵍⵉⵜ ⵏ ⵉⵎⵙⵜⴳⴳⴰⵔⵏ ⵏ ⵓⴼⵏⵉⵇ ⵏ ⵓⵙⵔⵙ ⴷ ⵓⵙⵡⵓⴷⴷⵓ.
ⵖ ⵜⵣⵡⵉⵔⵉ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴼ ⵡⴰⵜⵉⴳ ⵏ ⵓⵏⵎⵓⵇⵇⴰⵔ ⴰⴷ ⵏ ⵓⵎⵙⴰⵡⴰⴹ ⴷ ⵉⴼⵔⴷⴰⵙ ⵏ ⵓⵙⵇⵇⵉⵎ, ⵃⵎⴰ ⴰⴷ ⵜⵜⵓⵙⵙⵉⵏⵏ ⵓⵎⵍⴰⵏ ⵣⴷⵉⵏⵉⵏ ⴷ ⵓⵙⵡⵓⴷⴷⵓ ⵏ ⵓⵙⴷⴰⵡ ⵏ ⵜⵏⵓⴼⴰ ⵖ ⵍⵍⴰⵏⵜ ⵜⵎⵓⴽⵔⵉⵙⵉⵏ ⵙⴳ 2017, ⴰⵢⵍⵍⵉⵖ ⵜⴱⴷⴷ ⵜⵉⴽⴽⵉ ⵏ ⵜⵏⵓⴼⴰ.
ⵉⵙⵙⴽⵜⵉ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴼⵔⴽⵉⵡⵉⵏ ⵖ ⵉⵣⵔⵉ ⵓⵎⴹⴰⴽⴰⵕ ⵏ ⵓⵙⴷⴰⵡ ⴰⴷ, ⵖ ⵜⴰⵢⵔⵉ ⵏ ⵜⵎⵓⵔⵜ ⴷ ⵉⵎⴰⵏ ⵏ ⵜⵎⵔⵉⵙⵜ ⵙ ⵓⵙⴽⵔ ⵏ ⵎⴰⴷ ⵜⵔⴰ ⵜⵎⵓⵔⵜ ⵙ ⴰⵢⵍⵍⵉ ⴷ ⵜⵉⵡⵉ ⵜⵎⴰⵙⴰⵢⵜ ⵏ ⵉⴱⵕⵍⴰⵎⴰⵏⵉⵢⵏ, ⵉⵏⵉⵏ ⵎⴰⵙ ⴷ ⵉⵇⵇⴰⵏ ⴰⴷ ⵜⵉⵍⵉ ⵜⵖⵜⴰⵙⵜ ⵉⴳⴳⵓⵔⴰⵏ ⵢⵉⵡⵉⵏ ⴰⵎⵛⴰⵛⴽⴰ ⵏ ⵉⴳⵏⵙⴰⵙⵏ ⵏ ⵜⵎⵜⵜⵉ.
ⵉⴳⴰ ⵓⵏⵎⵓⵇⵇⴰⵔ ⴰⴷ ⴰⵣⵎⵣⵣⵓ ⵏ ⵓⵙⵙⴽⵜⵉ ⵏ ⵜⵎⴽⵜⵉⵜ ⵜⴰⴱⵕⵍⴰⵎⴰⵏⵉⵜ, ⵖ ⵓⵙⵎⵏⵉⴷ ⵏ ⵓⵎⵣⵔⵓⵢ ⵖ ⵍⵍⴰⵏⵜ ⵜⵡⵓⵔⵉⵡⵉⵏ ⵏ ⵉⴳⵏⵙⴰⵙⵏ ⵏ ⵜⵎⵜⵜⵉ ⵙⴳ ⵎⴰⴷ ⵉⴳⴰⵏ ⴰⵣⴳⵏ ⵏ ⵜⴰⵙⵓⵜ, ⴰⵢⵍⵍⵉ ⵢⵉⵡⵙⵏ ⵉ ⵜⵎⴰⵣⵉⵔⵜ ⵏⵏⵖ ⴰⴷ ⴷⴰⵔⵙ ⵉⵍⵉⵏ ⵉⵙⴳⵓⴷⵉⵢⵏ ⴼⵓⵍⴽⵉⵏⵉⵏ, ⵢⵉⵍⵉ ⵓⵙⴷⵓⵙ ⵏ ⵜⵔⵙⴰⵍ ⵏ ⵜⴷⵉⵎⵓⵇⵔⴰⵟⵉⵜ ⵏ ⵜⴳⵏⵙⴰⵙⵜ ⴷ ⵓⵙⴷⵓⵙ ⵏ ⵜⵉⵍⵉⵜ ⵜⴰⵎⵢⴰⵏⴰⵡⵜ ⵉⵕⵡⴰⵏ. ⵖⵎⴽ ⵍⵍⵉ ⵉⴳⴰ ⵓⴱⵕⵍⴰⵎⴰⵏ ⵢⴰⵏ ⵓⵙⴰⵢⵔⴰⵔ ⵎⵇⵇⵓⵔⵏ ⵏ ⵓⵎⴹⴰⴽⴰⵕ ⵏ ⵜⵎⵙⴰⵔⵉⵏ ⵏ ⵜⵎⵜⵜⵉ ⴷ ⵓⵙⵎⵓⵜⴳ ⵏ ⵜⵓⴼⵔⵉⵏⵜ ⵜⴰⵙⵔⵜⴰⵏⵜ, ⴷ ⵓⵎⵙⴽⴰⵔ ⴰⵏⴰⵎⵎⴰⵙ ⵖ ⴽⵓ ⵉⴳⵔⴰⵏ ⵏ ⵓⵙⴽⴽⵉⵏ ⴰⵎⴰⵜⴰⵢ.
ⴷⴼⴼⵉⵔ, ⴼⴽⴰⵏ ⵉⵎⵙⵜⴳⴳⴰⵔⵏ ⵏ ⵓⵙⵡⵓⴷⴷⵓ ⵏ ⵓⵏⴳⵔⴰⵡ ⵢⴰⵏ ⵓⵙⵎⵏⵉⴷ ⵉⵣⵓⵣⵣⵔⵏ ⴼ ⵓⵏⴳⵔⴰⵡ ⵏ ⵜⵏⵓⴼⴰ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳⵉⵙ ⴰⵙⴰⵜⵉ ⴰⵣⵣⵔⴰⴼ ⴷ ⵜⵎⵢⴰⵇⵇⴰⵏⵜ ⵙ ⵉⴼⴽⴰ ⵓⵙⵇⵇⵉⵎ ⵜⴰⵡⵓⵔⵉ ⵏ ⵓⵙⵡⵓⴷⴷⵉ ⵉ ⵓⴼⵏⵉⵇ ⵏ ⵓⵙⵔⵙ ⴷ ⵓⵙⵡⵓⴷⴷⵓ.
ⴼⴽⴰⵏ ⵉⵎⵙⵜⴳⴳⴰⵔⵏ ⵓⵍⴰ ⵓⵎⵍⴰⵏ ⴼ ⵡⴰⵏⴰⵡ ⵏ ⵓⵏⴳⵔⴰⵡ ⴷ ⵉⵙⴳⵓⵎⵏ ⵏⵏⵙ ⴷ ⵜⵎⴽⵕⴰⴹ ⵏⵏⵙ ⴷ ⵓⵚⴽⵓ ⵏⵏⵙ ⴰⵜⵉⵇⵏⵉ, ⴷ ⵉⵏⵎⵎⴰⵍⵏ ⵏⵏⵙ ⵏ ⵓⵥⵕⴼ ⴷ ⵜⴷⵉⵎⵓⴳⵕⴰⴼⵉⵜ, ⵖⵎⴽ ⴰⵏⵏ ⴷ ⵜⵎⵓⴽⵔⵉⵙⵉⵏ ⵍⵍⵉ ⴳⵉⵙ ⵍⵍⴰⵏⵉⵏ ⵖⵉⵍⴰⴷ ⵍⵍⵉⵖ ⵓⵔ ⴳⴰⴷⴷⴰⵏ ⵉⴽⵛⵛⵓⵎⵏ ⴷ ⵜⵎⴽⵕⴰⴹ ⵏⵏⵙ.
ⵖ ⵜⵉⴼⴰⵡⵜ ⵏ ⵓⵎⵍⴰⵏ ⴰⴷ, ⵙ ⵉⵎⴰⵏ ⵏ ⵓⵎⴹⴰⴽⴰⵕ ⴰⵏⴰⵎⵓⵔ ⵉⵍⵍⴰⵏ ⵖ ⵜⵏⵓⴼⴰ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷⴰⵔ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ, ⴷ ⵓⴳⵏⵙ ⵏ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⵙ ⵜⵉⵍⴰⵡⵜ ⴷ ⵜⵉⵔⴰⵜ ⵉ ⵓⴼⵓⴽⴽⵓ ⵏ ⵓⵙⴷⴰⵡⵏ ⵏ ⵜⵏⵓⴼⴰ, ⵉⵎⵛⴰⵛⴽⴰ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵏⵙⵙⵉⵅⴼⵜ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵃⵎⴰ ⴰⴷ ⵉⵍⵉⵏⵜ ⵜⵎⵙⴽⴰⵔ ⵏ ⵓⴼⵓⴽⴽⵓ ⵉⵙⵎⴷⵏ ⵏ ⵓⵏⴳⵔⴰⵡ ⵏ ⵜⵏⵓⴼⴰ ⵙ ⵓⵎⵢⴰⵡⴰⵙ ⴷ ⵓⵣⴷⴷⵓⵢ ⴷ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⴷ ⵓⵙⵓⵊⴷ ⵏ ⵓⵙⴰⵜⵉ ⴰⵣⵣⵔⴰⴼ ⵉⵣⴷⵉⵏ ⴷ ⵡⴰⵡⵜⵜⴰⵙ ⴰⴷ.