ⵜⵉⵏⴰⵡⵜ ⴼ: “ⵜⴰⵎⵖⴰⵔⵜ ⵖ ⵜⵙⵔⵜⵉⵜ: ⴰⴱⵔⵉⴷ ⵖⵔ ⵢⵉⵙⴽⵉⵍ”, ⴰⵙⵉⵏⴰⵙ 13 ⵢⵓⵍⵢⵓⵣ 2021
ⴳ ⵓⵙⴰⵜⵉ ⵏ ⵓⵙⵏⴼⴰⵔ: “ⴰⵙⴷⵓⵙ ⵏ ⵜⵉⵍⴰⵍⵜ ⵏ ⵓⴱⵕⵍⴰⵎⴰⵏ ⴳ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ ⴳ ⵍⵎⵖⵔⵉⴱ”, ⵉ ⵜⵉⵣⵉ 2020-2023, ⴰⵔ ⵉⵙⵏⵎⴰⵍⴰ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵜⵉⵏⴰⵡⵜ ⴼ: “ⵜⴰⵎⵖⴰⵔⵜ ⵖ ⵜⵙⵔⵜⵉⵜ: ⴰⴱⵔⵉⴷ ⵖⵔ ⵢⵉⵙⴽⵉⵍ”, ⴰⵙⵉⵏⴰⵙ 13 ⵢⵓⵍⵢⵓⵣ 2021 ⴳ ⵓⵙⵖⵉⵎ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵕⵕⴱⴰⵟ.
ⵔⴰⴷ ⵉⵙⵙⵉⵅⴼ ⵜⵉⵏⴰⵡⵜ ⴰⴷ ⵎ.ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵡⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵎ.ⵄⴰⴱⴷ ⵍⵃⴰⴽⵉⵎ ⴱⵏ ⵛⵎⵎⴰⵙ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵎ.ⵔⵉⴽ ⴷⵉⵎⵙ, ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ, ⵎⴰ. ⵜⴰⵎⵙⵇⴰⴷⵜ ⴽⵍⵓⴷⵢⴰ ⴼⵉⴷⴰⵢ ⵜⴰⵏⵙⵙⵉⵅⴼⵜ ⵏ ⵓⴽⴰⴱⴰⵕ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⴳ ⵍⵎⵖⵔⵉⴱ.
ⵔⴰⴷ ⵉⴷⵔⵓ ⴳ ⵜⵉⵏⴰⵡⵜ ⴰⴷ ⵉⴱⵕⵍⴰⵎⴰⵏⵉⵢⵉⵏ ⵉⵎⵖⵔⵉⴱⵉⵢⵏ ⴷ ⵡⵉⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵙⵍⴰⵡⴰⵏ ⴰⴽⴽⵯ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵢⵉⵙⴽⵉⵍ ⴷ ⵜⵙⵇⵇⵉⵎⵜ ⵏ ⵓⵣⵡⴰⴳ ⴷ ⵉⵎⵣⵡⴰⴳⵏ ⴷ ⵉⵎⵊⵍⴰⵢ, ⵜⵉⵏⵙⵙⵉⵅⴼⵉⵏ ⵏ ⵜⵎⴰⴷⴷⴰⵙⵉⵏ ⵏ ⵜⵎⵖⴰⵔⵉⵏ ⴳ ⵉⴽⴰⴱⴰⵕⵏ ⵉⵙⵔⵜⴰⵏⵏ ⵍⵍⴰⵏⵉⵏ ⴳ ⵓⴱⵕⵍⴰⵎⴰⵏ, ⵉⵎⵓⵣⴰⵢⵏ ⵉⴳⵔⴰⵖⵍⴰⵏⵏ. ⵔⴰⴷ ⵙⴰⵡⵍⵏ ⴼ ⵓⵙⵎⵖⵔ ⵏ ⵜⵡⵉⵙⵉ ⵏ ⵜⵎⵖⴰⵔⵜ ⴳ ⵜⵓⴷⵔⵜ ⵜⴰⵙⵔⵜⴰⵏⵜ ⴷ ⵓⵙⴷⵓⵙ ⴷ ⵜⵉⵍⵉⵜ ⵏ ⵜⵎⵖⴰⵔⵉⵏ ⴳ ⵜⵎⵔⵙⴰⵍ ⵏ ⵜⴳⵏⵙⴰⵙⵜ ⴷ ⵉⵎⴰⵙⵙⵏ ⵏ ⵜⵖⵜⴰⵙⵜ.
ⵙⴳ 2002, ⵉⵙⴽⵔ ⵍⵎⵖⵔⵉⴱ ⵜⵉⵎⴰⵎⴽⵉⵏ ⵜⵉⵣⵣⵔⴰⴼⵉⵏ ⵏ ⵓⵙⵙⵔⵇⴱ ⵍⵍⵉ ⵉⵡⵙⵏⵉⵏ ⴳ ⵡⴰⵍⴰⵢ ⵉⵣⵣⵉⴳⵣⵏ ⵏ ⵓⵏⵛⴽ ⵏ ⵜⵎⵖⴰⵔⵉⵏ ⴳ ⵓⴱⵕⵍⴰⵎⴰⵏ ⴷ ⵜⴳⵔⴰⵡⵉⵏ ⵜⵜⴰⵡⵙⵜⴰⵢⵏⵉⵏ ⴳ ⵉⵙⵡⵉⵔⵏ ⵉⴷⵖⴰⵔⴰⵏⵏ ⴷ ⵉⵏⵎⵏⴰⴹⵏ, ⵎⴰⵛⵛ ⵎⴰⵢⴰ ⵏⵏ ⵓⵔⵜⴰ ⵉⵍⴽⵉⵎ ⴰⵙⴷⵓⵙ ⵏ ⵓⵎⵏⵣⴰⵢ ⵏ ⵢⵉⵙⴽⵉⵍ ⴳ ⵜⴳⵏⵙⴰⵙⵜ ⴳ ⵜⴳⵔⴰⵡⵉⵏ ⵜⵜⴰⵡⵙⵜⴰⵢⵏⵉⵏ, ⴷ ⵜⵉⵍⵉⵜ ⵏ ⵜⵎⵖⴰⵔⵉⵏ ⴳ ⵜⵣⵣⵓⵍⵉⵏ ⵏ ⵜⵖⵜⴰⵙⵉⵏ ⵎⴽ ⵉⵍⵍⴰⵏ ⴳ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵏ 2011.
ⵢⵉⵡⵉ ⵓⵙⵏⴼⴰⵔ ⵏ “ⵓⵙⴷⵓⵙ ⵏ ⵜⵉⵍⴰⵍⵜ ⵏ ⵓⴱⵕⵍⴰⵎⴰⵏ ⴳ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ ⴳ ⵍⵎⵖⵔⵉⴱ” ⴰⵙⵥⵕⴼ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⴷ ⵓⵣⵣⴳⵉⵔ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ, ⵉⵡⴰⵜⵜⵙ ⴰⵙⵏⴰⵍ ⵏ ⵜⵓⴳⴳⴰⵙ ⵏ ⵙⵉⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴳ ⵓⵙⴽⵔ ⵏ ⵜⵎⵥⵍⴰⵢⵉⵏ ⵏⵏⵙ ⴷ ⵓⵖⵓⴷⵓ ⵏ ⵜⵡⵡⵓⵔⵉ ⵏⵏⵙⵏ ⴷ ⵓⵕⵥⵥⵓⵎ ⴼ ⵉⵏⵎⵓⵔⴰⵏ. ⵉⴱⴷⴷ ⴼ ⴽⵕⴰⴹ ⵉⵙⴳⵓⵎⵏ: ⴰⵙⵏⴰⵍ ⵏ ⵜⵓⴳⴳⴰⵙ ⵏ ⵓⴱⵕⵍⴰⵎⴰⵏ ⴷ ⵉⵥⵕⵉ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⵎⴰⵜⴰⵢⵉⵏ ⵏ ⵜⵏⴱⴰⴹⵜ ⵙ ⵜⵖⴰⵔⴰⵙⵜ ⵉⵕⵡⴰⵏ, ⴰⵏⵏⵓⵕⵥⵎ ⴼ ⵉⵏⵎⵓⵔⴰⵏ ⴷ ⵡⴰⵎⵓⵏ ⴰⵖⵔⵎⴰⵏ ⴷ ⵉⵎⴷⵔⴰⵡⵏ ⵢⴰⴹⵏⵉⵏ ⴷ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ ⵜⴰⴱⵕⵍⴰⵎⴰⵏⵉⵜ, ⴰⵙⴷⵓⵙ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⴰⴱⵕⵍⴰⵎⴰⵏⵉ ⵊⴰⵔ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴷ ⵉⵏⴳⴳⵯⴰ ⵏⵏⵙ ⵙⴳ ⵉⵡⴰⵏⴽⵏ ⴰⴷⵊⴰⵕⵏ ⴷ ⵉⵡⴰⵏⴽⵏ ⵉⴳⵎⴰⵎⵏ ⴳ ⵓⵙⵇⵇⵉⵎ ⵏ ⵓⵕⵓⴱⴱⴰ.
ⴰⵔ ⵉⵜⵜⵓⵙⴽⵉⵔ ⵓⵙⵏⴼⴰⵔ ⵙ ⵜⵎⵣⵡⴰⵔ ⵏ ⵓⵎⵢⴰⵡⴰⵙ ⴷ ⵉⵙⵖⴰⵡⵙⴰⵜⵏ ⵥⵍⵉⵏⵉⵏ ⵙ ⵍⵎⵖⵔⵉⴱ, ⵍⵍⵉ ⵜⵜⵔⵓⵙⵏⵉⵏ ⵙ ⵜⵖⴰⵔⴰⵙⵜ ⵉⵛⵛⴰⵔⵏ ⵙⴳ ⵓⵙⵇⵇⵉⵎ ⵏ ⵓⵕⵓⴱⴱⴰ ⴷ ⵜⵏⴱⴰⴹⵉⵏ ⵜⵉⵎⵖⵔⵉⴱⵉⵢⵉⵏ ⴳ ⵓⵙⴰⵜⵉ ⵏ ⵜⵎⴷⵔⴰⵡⵜ ⵏ ⵜⵓⴷⵊⵓⵕⴰ ⴰⴽⴷ ⵍⵎⵖⵔⵉⴱ ⵖ 2018-2021
