ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴳ ⵓⴽⵓⵏⴳⵕⵉⵚ ⵏ ⵍⴱⵉⵔⵓ, ⵢⵉⵍⵉ ⵓⵙⴷⴷⵉⴷ ⴼ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵉⴳⴰⵏ ⴰⴼⵙⵙⴰⵢ ⵉ ⵜⵎⴰⵖⵜ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ
ⵉⵙⴷⴷⵉⴷ ⵎⴰⵙⵙ ⵉⵔⵏⵉⵙⵜⵓ ⴱⵓⵙⵜⴰⵎⴰⵏⵜ ⴷⵓⵏⴰⵢⵔ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵣⴷⴰⵢⵉⵏ ⵏ ⴱⵕⵕⴰ ⴳ ⵓⴽⵓⵏⴳⵕⵉⵚ ⵏ ⵍⴱⵉⵔⵓ, ⵎⴰⵙ ⴷ ⴰⴼⵙⵙⴰⵢ ⵉⴳⴰⵏ ⵢⴰⵏ ⵉ ⵜⵎⴰⵖⵜ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ ⵉⵍⵍⴰ ⵙ ⵜⵙⵓⵎⵔⵜ ⵓⵏⴱⴰⴹ ⴰⵏⵉⵎⴰⵏ ⵍⵍⵉ ⵜⴼⴽⴰ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵉ ⵓⴼⵙⵙⴰⵢ ⵉⵙⵎⴷⵏ ⵏ ⵓⵙⴷⴰⵡ ⴰⴷ, ⵢⵉⵏⵉ ⵎⴰⵙ ⵜⵍⵍⴰ ⵜⵅⵅⵓⵜⵔⴰ ⵏ ⵍⵎⵖⵔⵉⴱ ⴼ ⵡⴰⴽⴰⵍ ⵏⵏⵙ, ⴳ ⵓⵙⵏⵓⴱⴳ ⵏⵏⵙ ⵙⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⴰⵏⵙ 07 ⵎⴰⵕⵚ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ.
ⵉⵍⵍⴰ ⵎⴰⵙⵙ ⵉⵔⵏⵉⵙⵜⵓ ⴱⵓⵙⵜⴰⵎⴰⵏⵜ ⴷⵓⵏⴰⵢⵔ ⴳ ⵓⵔⵣⴰⴼ ⵏ ⵜⵡⵡⵓⵔⵉ ⵉ ⵜⵎⴰⵣⵉⵔⵜ ⵏⵏⵖ, ⵢⵉⵏⵉ ⵎⴰⵙ ⵉⵙⵏⴰⵍ ⵓⴱⵕⵍⴰⵎⴰⵏ ⵏ ⵍⴱⵉⵔⵓ ⵜⵉⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵍⵎⵖⵔⵉⴱ, ⵉⵙⵓⵜⴳ ⴰⵎⵓⵔⵙ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ19 ⴷ ⵜⵏⴽⵔⴰ ⵜⵓⵏⴳⵉⵎⵜ ⵏ ⵜⴳⵍⴷⵉⵜ ⴳ ⴽⵓ ⵉⴳⵔⴰⵏ ⴳ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴷ ⵜⵎⴳⵓⵔⵉ ⴷ ⵜⴼⵍⵍⴰⵃⵜ, ⵉⵙⴰⵡⵍ ⴼ ⵓⵙⵏⴼⵍ ⵏ ⵓⵙⵖⵏⵣⵉ ⴷ ⵜⴷⵎⵙⴰ ⵃⵎⴰ ⴰⴷ ⵜⵉⵍⵉ ⵜⵎⵢⴰⵇⵇⴰⵏⵜ ⵏ ⵓⵙⵏⴼⵍ ⵉⵍⴻⵍⵍⵉ ⵊⴰⵔ ⵙⵏⴰⵜ ⵜⵎⵉⵣⴰⵔ.
ⴳ ⵓⵎⵏⵉⴷ ⵏⵏⵙ, ⵉⵙⵓⵜⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵔⵣⴰⴼ ⴰⴷ ⵉⵎⵎⴰⵍⴰⵏ ⵜⴰⴷⵓⵙⵉ ⵏ ⵜⵣⴷⴰⵢⵉⵏ ⵊⴰⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ, ⵢⵉⵏⵉ ⵎⴰⵙ ⵜⴳⴰ ⵜⵎⵙⴰⵔⵜ ⵜⴰⵏⴰⵎⵓⵔⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵎⴰⴷⴰⵏ ⴰⵎⵖⵔⵉⴱⵉ, ⴷ ⵎⴰⵙ ⵉⴳⴰ ⵍⵎⵖⵔⵉⴱ ⴰⵛⴰⵎⵓⵛ ⵏ ⵓⴼⵔⴰ ⴷ ⵓⵔⴳⴳⵉⴳ.
ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵓⴷⵎⴰⵡⵏ ⵏ ⵜⴳⵎⵉ ⵜⴰⵎⴰⵜⴰⵢⵜ ⵍⵍⴰⵏⵉⵏ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ ⴷ ⵉⵙⵏⴼⴰⵔⵏ ⵜⵜⵓⵙⴽⴰⵔⵏⵉⵏ ⵙ ⵉⵙⵡⴰⵍⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴷ ⵎⴰⵙ ⵜⵍⵍⴰ ⵜⴷⵔⴰⵡⵜ ⵎⵇⵇⵓⵔⵏ ⴳ ⵉⵙⵜⴰⵢⵏ ⴳⴳⵓⵔⴰⵏⵉⵏ ⴳ ⵍⵎⵖⵔⵉⴱ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ.
ⵉⵙⵎⵏⵉⴷ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵉⵎⵓⴽⵏⵏ ⵉⵅⴰⵜⴰⵔⵏ ⵏ ⵜⴳⵍⴷⵉⵜ ⴳ ⵉⴳⵔⴰⵏ ⵏ ⵓⴷⵓⵙⵜⵓⵔ ⴷ ⵜⵎⵔⵙⴰⵍ ⴷ ⵜⴷⵎⵙⴰ ⴷ ⵜⴼⵍⵍⴰⵃⵜ ⴷ ⵜⵥⴹⴰⵕⵜ ⴷ ⵡⴰⵎⵓⵏ, ⵢⵉⵏⵉ ⵎⴰⵙ ⵜⵓⵊⴰⴷ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵉ ⵓⴷⵔⴰⵡ ⵏ ⵜⵉⵔⵎⵉⵜ ⵏⵏⵙ ⴰⴽⴷ ⵉⵡⴰⵏⴽⵏ ⵉⵎⴷⴷⵓⴽⴽⴰⵍ ⵜⴰⴳⵯⵎⴷ ⵓⵍⴰ ⵖ ⵜⵉⵔⵎⵉⵜⵉⵏ ⵏⵏⵏⵙⵏ ⵖ ⵉⵍⵍⴰ ⵓⵎⵓⵔⵙ.
ⵉⵃⴰⴹⵕ ⴳ ⵓⵏⵎⵓⵇⵇⴰⵔ ⴰⴷ ⵓⵎⵙⵇⵇⴰⴷ ⵏ ⵓⴳⵍⵍⵉⴷ ⴳ ⵍⴱⵉⵔⵓ ⴰⵎⵉⵏ ⵛⵛⵓⵔⴷⵉ ⴷ ⵎⴰⵙⵙ ⵅⵓⵚⵉ ⴻⵔⵏⵉⵙⵜⵓ ⴽⵡⵉⵜⵓ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵉⵙⵏⵖⵎⴰⵙⵏ ⴷ ⵎⴰⵙⵙⴰ ⴽⴰⵔⵎⵉⵏ ⴱⴰⵜⵔⵉⵙⵢⴰ ⵅⵡⴰⵔⵉⵣ ⴳⴰⵍⵉⴽⵓ ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⴷⵙⵜⴰⵔⵜ ⵏ ⵓⴽⵓⵏⴳⵕⵉⵚⵏ ⵍⴱⵉⵔⵓ.